Read Hmong Njua Yauhaas 4 Bible Online

Yauhaas 4 - Hmong Njua bible

Yauhaas 4

¹Cov Falixais nov has tas Yexus muaj thwjtim hab muab tuabneeg ua kevcai raus dlej coob dlua Yauhaas.

²(Qhov tseeb, Yexus yeej tsi muab tuabneeg ua kevcai raus dlej, tsuas yog Yexus cov thwjtim muab xwb.)

³Thaus Yexus nov le ntawd, nwg txawm tawm huv xeev Yudas rov qaab moog rua peg xeev Kalilais;

⁴nwg yuavtsum taug txujkev kws moog hlaa lub xeev Xamalis moog.

⁵Yexus moog txug ntawm lub nroog Xikhas kws nyob huv xeev Xamalis, lub nroog ntawd nyob tsi dleb ntawm thaaj teb kws Yakhauj muab rua nwg tug tub Yauxej.

⁶Thaus u Yakhauj khawb tau ib lub qhov tshij rua ntawd, thaus Yexus taug kev lug txug ntawm lub qhov tshij ntawd, Yexus lim heev, nwg txhaj nyob quastsawg ntawm lub qhov tshij ntawd. Lub sijhawm ntawd yog thaus taav su.

⁷Muaj ib tug quaspuj Xamalis tuaj nqaa dlej, Yexus has rua tug quaspuj ntawd has tas, “Thov koj muab mivntsiv dlej rua kuv haus.”

⁸(Yexus cov thwjtim moog yuav zaub mov rua tom nroog lawm.)

⁹Tug quaspuj ntawd teb Yexus has tas, “Koj yog tuabneeg Yudais, hab kuv yog tuabneeg Xamalis, ua le caag koj laam thov dlej ntawm kuv haus?” (Cov Yudais yeej ibtxwm tsi koom siv cov Xamalis tej khob hab tej taig le.)

¹⁰Yexus teb nwg has tas, “Yog koj paub yaam kws Vaajtswv yuav pub rua koj, hab paub tug kws thov dlej ntawm koj haus yog leejtwg, ces koj yeej yuav thov nwg, hab nwg yuav muab cov dlej kws cawm txujsa rua koj haus.”

¹¹Tug quaspuj ntawd has tas, “Tug tswv, koj tub tsi muaj dlaabtsi ntaus dlej, hab lub qhov tshij nuav tub heev. Koj yuav muab cov dlej kws cawm txujsa qhov twg lug?

¹²Peb yawmkoob Yakhauj muab lub qhov tshij nuav rua peb; nwg hab nwg cov tub hab nwg tej tsaj puavleej haus dlej huv lub qhov tshij nuav. Koj tseem muaj fwjchim luj dlua peb yawmkoob Yakhauj hab los?”

¹³Yexus teb has tas, “Txhua tug kws haus cov dlej huv lub qhov tshij nuav tseem yuav rov nqhes dlua,

¹⁴tabsis txhua tug kws haus cov dlej kws kuv muab rua nwg, nwg yuav tsi nqhes dlua ib zag le lawm. Cov dlej kws kuv muab rua nwg yuav txhawv huv nwg lub sab hab cawm nwg txujsa moog ibtxhis.”

¹⁵Tug quaspuj ntawd has rua Yexus has tas, “Tug tswv, thov koj muab cov dlej kws koj has ko rua kuv haus! Kuv txhaj yuav tsi nqhes dlua hab tsi tau tuaj nqaa dlej huv lub qhov tshij nuav lawm.”

¹⁶Yexus has rua tug quaspuj ntawd tas, “Koj ca le moog hu koj tug quasyawg tuaj ntawm nuav.”

¹⁷Tug quaspuj ntawd teb has tas, “Kuv tsi muaj quasyawg.” Yexus teb has tas, “Koj has tas koj tsi muaj quasyawg, koj has yog lawm.

¹⁸Koj tub yuav tsib tug quasyawg lawm, hab tug quasyawg kws nwgnuav koj nrug nyob ntawd los yeej tsi yog koj tug quasyawg. Tej kws koj qha rua kuv ntawd, koj has tseeb lawm.”

¹⁹Tug quaspuj ntawd has rua Yexus has tas, “Tug tswv, kuv paub has tas koj yog ib tug cev Vaajtswv lug.

²⁰Peb cov kws yog tuabneeg Xamalis cov yawmkoob ibtxwm pehawm Vaajtswv sau lub roob nuav, tabsis mej cov kws yog tuabneeg Yudais, mej has tas suavdlawg yuavtsum moog pehawm Vaajtswv nraag lub nroog Yeluxalees txhaj yog.”

²¹Yexus has rua tug quaspuj ntawd tas, “Koj ca le ntseeg kuv tej lug, tub yuav txug lub sijhawm kws tuabneeg yuav tsi pehawm leej Txiv sau lub roob nuav lossis nraag lub nroog Yeluxalees lawm.

²²Mej cov kws yog tuabneeg Xamalis, mej tsi paub tug kws mej pehawm yog leejtwg; tabsis peb cov kws yog tuabneeg Yudais, peb paub tug kws peb pehawm, rua qhov tug Cawmseej lug yug rua huv cov tuabneeg Yudais.

²³Lub sijhawm ntawd taabtom lug, hab tub lug txug ntawm nuav lawm, cov tuabneeg kws pehawm leej Txiv yuav pehawm ntawm saab ntsujplig hab qhov tseeb, rua qhov leej Txiv xaav kuas suavdlawg muaj nplooj sab dlawb paug pehawm nwg tag.

²⁴Vaajtswv yog Ntsujplig, cov kws pehawm Vaajtswv yuavtsum pehawm ntawm saab ntsujplig hab qhov tseeb.”

²⁵Tug quaspuj ntawd has rua Yexus has tas, “Kuv paub has tas tug Mexiyas yuav lug, hab thaus nwg lug lawm, nwg yuav qha txhua yaam rua peb.”

²⁶Yexus teb has tas, “Kuv yog nwg, kuv taabtom nrug koj thaam nuav ntaag.”

²⁷Taamsim ntawd Yexus cov thwjtim txawm lug txug, puab pum Yexus nrug tug quaspuj ntawd thaam, puab xaav tsi thoob le. Tabsis tsi muaj ib tug nug tug quaspuj ntawd has tas, “Koj xaav yuav dlaabtsi?” Lossis nug Yexus has tas, “Vim le caag koj nrug tug quaspuj ntawd thaam?”

²⁸Ces tug quaspuj ntawd txawm muab nwg lub hub dlej tso plhuav tseg, nwg rov qaab moog rua tom nroog, hab nwg has rua cov tuabneeg huv nroog tas,

²⁹“Mej ca le moog saib tug txivneej kws nyob tod saib, nwg qha txhua yaam kws kuv tau ua taag lug lawm huv tuabsi rua kuv noog! Nwg puas yog tug Mexiyas?”

³⁰Yog le ntawd, suavdlawg txawm tawm zum zawg huv nroog tuaj saib Yexus.

³¹Thaus ntawd cov thwjtim has rua Yexus has tas, “Xwbfwb, ca le lug noj mov tsaiv!”

³²Tabsis Yexus teb has tas, “Kuv tub muaj mov noj lawm, tej ntawd mej tsi paub.”

³³Yog le ntawd, cov thwjtim txhaj sis nug has tas, “Leejtwg tub nqaa mov tuaj rua nwg noj lawm?”

³⁴Yexus has rua cov thwjtim has tas, “Kuv tej mov yog ua lawv le tug kws khaiv kuv lug lub sab nyam, hab ua teg num kws nwg tso rua kuv ua lawm kuas tav.

³⁵Muaj ib lu lug kws mej has tas, ‘Tshuav plaub hlis, maam le txug caij hlais nplej.’ Tabsis kuv qha rua mej has tas, mej ca le tsaa qhovmuag saib tej teb; nplej tub sav heev zoo hlais lawm!

³⁶Tug tuabneeg kws hlais nplej tub tau nqe zug lawm, hab tej kws nwg sau lug ca tub tau txujsa ntev dlhawv moog ibtxhis lawm; yog le ntawd, tug kws cog hab tug kws hlais yuav zoo sab kawg le.

³⁷Vim le ntawd lu lug kws has tas, ‘Muaj ib tug cog, hab muaj dlua ib tug hlais,’ lu lug ntawd yeej muaj tseeb tag!

³⁸Kuv khaiv mej moog hlais cov nplej huv dlaim teb kws tsi yog mej tug zug ua; dlaim teb ntawd yog lwm tug tug zug ua, tabsis mej tau sau tej kws yog lwm tug tug zug ua.”

³⁹Cov tuabneeg Xamalis kws nyob huv lub nroog ntawd, muaj ntau leej ntseeg Yexus, rua qhov tug quaspuj ntawd has rua puab tas, “Nwg qha txhua yaam kws kuv tau ua taag lug lawm huv tuabsi rua kuv noog.”

⁴⁰Yog le ntawd, thaus cov tuabneeg Xamalis tuaj cuag Yexus, puab cheem kuas Yexus nrug puab nyob, ces Yexus txawm moog nyob huv lub nroog ntawd tau ob nub.

⁴¹Muaj ntau leej lug ntseeg Yexus ntxiv, rua qhov puab nov Yexus tej lug qha,

⁴²hab puab has rua tug quaspuj ntawd tas, “Nwgnuav peb ntseeg, tsi yog vim tej lug kws koj has, tabsis peb ntseeg vim peb tau nov nwg tej lug, hab peb paub has tas nwg yog tuabneeg nplajteb tug Cawmseej tag.”

⁴³Tom qaab kws Yexus nyob huv lub nroog ntawd tau ob nub, nwg txawm moog rua peg lub xeev Kalilais lawm.

⁴⁴Rua qhov Yexus has tas, “Cov tuabneeg kws nyob huv lub tebchaws kws tug cev Vaajtswv lug nyob, cov tuabneeg ntawd yeej tsi fwm nwg.”

⁴⁵Thaus Yexus moog txug peg xeev Kalilais, suavdlawg tuaj tog txais nwg, rua qhov puab tau moog ua Kevcai Hlaa Dlhau nraag lub nroog Yeluxalees, hab tau pum txhua yaam kws Yexus ua thaus ua kevcai Hlaa Dlhau ntawd.

⁴⁶Ces Yexus txawm rov qaab moog rua huv lub zog Kanas kws nyob huv xeev Kalilais kws thaus Yexus muab dlej txa ua cawv txiv maab. Muaj ib tug nom nyob huv lub nroog Kapena-us, nwg tug tub mob heev.

⁴⁷Thaus nwg nov has tas Yexus rov qaab nraag xeev Yudas lug txug rua huv xeev Kalilais lawm, nwg txhaj moog cuag Yexus hab thov kuas Yexus moog khu nwg tug tub kws mob heev yuav tuag huv lub nroog Kapena-us.

⁴⁸Yexus has rua tug nom ntawd tas “Yog mej tsi pum tej txujci tseemceeb, mej yeej tsi ntseeg kuv tej lug le.”

⁴⁹Tug nom ntawd has rua Yexus has tas, “Tug tswv, tsheem kuv tug tub tseem tsi tau tuag, thov koj moog paab khu!”

⁵⁰Yexus has rua tug nom ntawd tas, “Koj ca le rov qaab moog tsev, koj tug tub yeej yuav tsi tuag!” Tug nom ntawd ntseeg Yexus tej lug, nwg txawm rov qaab moog tsev lawm.

⁵¹Thaus nwg taabtom taug kev moog tsev, nwg cov tubkhai tuaj caum nwg hab qha rua nwg has tas, “Koj tug tub zoo lawm.”

⁵²Nwg nug puab has tas, thaus twg nwg tug tub zoo lawm? hab puab teb has tas, “Naag mo thaus ib teev, ces nwg tug npaws txawm tu lawm.”

⁵³Ces leej txiv ncu dlheev txug has tas, thaus ntawd yog lub sijhawm kws Yexus has rua nwg tas, “Koj tug tub yuav tsi tuag.” Yog le ntawd, nwg hab nwg tsev tuabneeg txhaj ntseeg Yexus.

⁵⁴Txij thaus Yexus rov nraag xeev Yudas lug txug rua huv xeev Kalilais, nwg ua txujci tseemceeb ob zag rua zag nuav.