Read Hmong Njua Yauhaas 5 Bible Online

Yauhaas 5 - Hmong Njua bible

Yauhaas 5

¹Tom qaab ntawd, thaus txug lub caij kws cov Yudais ua kevcai, Yexus txawm moog rua nraag lub nroog Yeluxalees.

²Nyob huv lub nroog Yeluxalees muaj ib lub paag dlej nyob ze ze ntawm lub Roojvaag Yaaj hab muaj tsib lub qaab khaav nyob ncig lub paag dlej; qhov chaw ntawd lug Henplais hu ua Npexathas.

³Muaj ib cov tuabneeg mob coob coob tuaj pw huv tej qaab khaav ntawd, cov tuabneeg dligmuag, cov tuabneeg cegtawv, hab cov tuabneeg tuag teg tuag taw. Puab tuaj nyob ntawd tog saib thaus twg lub paag dlej ndlaas.

⁴Rua qhov tug Tswv ib tug timtswv pheej lug dlu lub paag dlej ntawd. Thaus lub paag dlej ntawd ndlaas, yog tug tuabneeg mob twg xub nqeg moog rua huv lub paag dlej, ces tug ntawd tej mob zoo.

⁵Muaj ib tug txivneej mob tau peb caug yim xyoo lawm, nwg tuaj pw ntawm lub paag dlej ntawd.

⁶Yexus pum nwg pw ntawd, Yexus paub has tas nwg mob tau ntev lug lawm; yog le ntawd Yexus txhaj nug nwg has tas, “Koj puas xaav zoo?”

⁷Nwg teb Yexus has tas, “Tug Tswv, thaus dlej ndlaas tsi muaj leejtwg paab tuav kuv moog rua huv lub paag dlej; thaus kuv taabtom yuav nqeg moog rua huv, tub muaj lwm tug xub nqeg ua kuv ntej moog rua huv lawm.”

⁸Yexus has rua nwg tas, “Koj ca le sawv, yaws koj dlaim lev hab moog.”

⁹Taamsim ntawd, nwg tug mob txawm ca le zoo hlo; ces nwg txawm yaws hlo nwg dlaim lev hab moog lawm. Nub ntawd, yog nub Xanpataus,

¹⁰yog le ntawd, cov Yudais tej numtswv txhaj has rua tug txivneej kws zoo mob ntawd has tas, “Nub nua yog nub Xanpataus, koj nqaa koj dlaim lev taug kev mas txhum peb cov tuabneeg Yudais txuj Kevcai lawm.”

¹¹Nwg teb puab has tas, “Tug tuabneeg kws khu kuv zoo has rua kuv tas, ‘Ca le yaws koj dlaim lev hab moog.’ ”

¹²Puab nug nwg has tas, “Tug kws has kuas koj ua le nuav yog leejtwg?”

¹³Tabsis tug txivneej ntawd, tsi paub has tas Yexus yog leejtwg, rua qhov muaj tuabneeg coob coob nyob ntawd, hab Yexus tub moog rua lwm qhov lawm.

¹⁴Tom qaab ntawd, Yexus moog ntsib tug txivneej ntawd huv lub Tuamtsev hab has rua nwg tas, “Koj noog kuv has, nwgnuav koj tub zoo lawm; koj tseg tsi xob ua txhum lawm, nyob tsaam koj raug kev txomnyem heev dlua qub.”

¹⁵Ces tug txivneej ntawd txawm tawm moog qha rua cov Yudais tej numtswv has tas, tug kws khu nwg zoo mob ntawd yog Yexus.

¹⁶Yog le ntawd, puab txawm tuavhuv ua phem rua Yexus, rua qhov Yexus khu tug txivneej ntawd nub Xanpataus.

¹⁷Yexus teb puab has tas, “Kuv Txiv yeej ua num tsi su le, yog le ntawd, kuv yeej yuav ua num hab.”

¹⁸Qhov kws Yexus has nuav ua rua cov Yudais tej numtswv hajyam xaav muab Yexus tua povtseg; tsi yog qhov kws Yexus ua txhum txuj kevcai Nub Xanpataus xwb, tabsis Yexus tseem khaav has tas Vaajtswv yog nwg Txiv, hab Yexus has le kws nwg muaj fwjchim sis luag zog le Vaajtswv ntaag.

¹⁹Yexus teb puab has tas, “Kuv qha tseeb rua mej has tas: leej Tub yeej tsi ua ib yaam dlaabtsi lawv le nwg lub sab; nwg tsuas ua tej kws nwg pum nwg Txiv ua xwb. Tej kws leej Txiv ua, leej Tub txhaj ua.

²⁰Rua qhov leej Txiv hlub leej Tub hab qha ib puas tsaav yaam kws nwg ua rua leej Tub. Nwg yuav qha tej num kws tseemceeb dlua tej nuav rua leej Tub, hab tej ntawd yuav ua rua mej xaav tsi thoob.

²¹Leej Txiv tsaa cov tuabneeg kws tuag lawm sawv rov qaab lug le caag, leej Tub yuav pub txujsa rua cov tuabneeg kws nwg pum zoo pub rua ib yaam le ntawd.

²²Leej Txiv tsi txav txim rua leejtwg, tabsis nwg tsaa leej Tub ua tug txav txim,

²³kuas txhua tug fwm leej Tub ib yaam le fwm leej Txiv. Tug kws tsi fwm leej Tub, tug ntawd yeej tsi fwm leej Txiv tug kws khaiv leej Tub lug hab.

²⁴“Kuv qha tseeb rua mej has tas: tug kws noog kuv lug hab ntseeg tug kws khaiv kuv lug, tug ntawd txhaj tau txujsa ntev dlhawv moog ibtxhis. Nwg yuav tsi raug txav txim, rua qhov nwg tub tawm huv txujkev tuag lug tau txujsa lawm.

²⁵Kuv qha tseeb rua mej has tas, lub sijhawm taabtom lug hab tub lug yuav txug, taamsim nuav tub lug txug lawm, thaus ntawd yog thaus kws cov tuabneeg tuag lawm yuav nov Vaajtswv tug Tub lub suab hu, hab txhua tug kws nov yuav caj rov qaab lug.

²⁶Leej Txiv yog lub hauvpaug txujsa le caag, nwg tsaa leej Tub ua lub hauvpaug txujsa ib yaam le ntawd.

²⁷Hab leej Txiv tsaa leej Tub ua tug txav txim, rua qhov nwg yog Tuabneeg Leej Tub.

²⁸Mej tsi xob poob sab rua kuv tej lug nuav; rua qhov lub sijhawm taabtom lug, thaus ntawd cov tuabneeg kws tuag lawm yuav nov leej Tub lub suab hu,

²⁹hab puab yuav tawm huv puab tej qhov ntxaa lug: cov tuabneeg kws ua zoo yuav sawv lug tau txujsa, cov tuabneeg kws ua phem ua qas yuav sawv lug raug kev txav txim.

³⁰“Kuv tsi muaj cai ua ib yaam dlaabtsi lawv le kuv lub sab xaav; kuv tsuas txav txim lawv le Vaajtswv kuas kuv txav xwb, yog le ntawd, kuv yeej txav txim ncaaj nceeg, rua qhov kuv tsi ua lawv le kuv lub sab nyam, tabsis kuv tsuas ua lawv le tug kws khaiv kuv lug lub sab nyam xwb.

³¹“Yog kuv rov ua kuv tug timkhawv, ces yeej tsi muaj tuabneeg ntseeg tej kws kuv has.

³²Tabsis yeej muaj ib tug ua kuv tug timkhawv, hab kuv paub has tas tej kws nwg has txug kuv, nwg yeej has tseeb xwb.

³³Mej khaiv mej cov tuabneeg moog cuag Yauhaas, hab Yauhaas yeej ua timkhawv has tas tej lug kws kuv has puavleej tseeb.

³⁴Tsi yog kuv xaav kuas tuabneeg ua kuv tug timkhawv, tabsis kuv has le nuav kuas mej dlim mej lub txim.

³⁵Yauhaas zoo le lub teeb kws taws cig ntsaa ab, hab mej yuav zoo sab ib nyuas ntu thaus kws mej nyob huv qhov kaaj ntawd.

³⁶Tabsis kuv muaj ib qhov timkhawv kws tseemceeb dlua tej kws Yauhaas has: tej kws kuv ua, yog tej num kws leej Txiv muab rua kuv ua, tej num kws kuv ua, qha rua suavdlawg paub tseeb has tas, kuv yog tug kws leej Txiv khaiv lug.

³⁷Hab leej Txiv tug kws khaiv kuv lug, nwg yeej ua timkhawv has txug kuv zaaj ib yaam nkaus. Mej yeej ibtxwm tsi tau nov nwg lub suab lossis pum nwg lub ntsejmuag,

³⁸hab mej yeej tsi khaws nwg tej lug ca rua nruab sab, vim mej tsi ntseeg tug kws nwg khaiv lug.

³⁹Mej kawm Vaajtswv Txujlug, rua qhov mej xaav has tas txujlug ntawd yuav cawm tau mej txujsa moog ibtxhis; Vaajtswv Txujlug ntawd tub has txug kuv ntaag!

⁴⁰Tabsis mej tsi kaam lug cuag kuv kuas mej tau txujsa.

⁴¹“Kuv tsi xaav kuas tuabneeg qhuas kuv.

⁴²Tabsis kuv paub has tas, mej tsi muaj lub sab hlub Vaajtswv.

⁴³Kuv yog tug kws kuv Txiv khaiv lug, tabsis mej tsi leeg yuav kuv; tug kws tsi muaj leejtwg khaiv lug, nwg lug nwg xwb, mej tsua leeg yuav tug ntawd.

⁴⁴Mej ib leeg nyam ua rua ib leeg qhuas, tabsis mej tsi muaj ib tug nyam ua rua Vaajtswv qhuas; yog le ntawd, mej yuav ua le caag ntseeg kuv tej lug.

⁴⁵Mej tsi xob xaav has tas kuv yuav nkaug mej rua kuv txiv. Mauxes tug kws mej ca sab rua, nwg yog tug kws yuav nkaug mej rua kuv Txiv.

⁴⁶Yog mej ntseeg Mauxes tej lug, mej yeej yuav ntseeg kuv, rua qhov Mauxes yeej sau has txug kuv.

⁴⁷Yog mej tub tsi ntseeg tej lug kws Mauxes sau, mej yuav ua le caag ntseeg kuv tej lug?”