Read Hmong Njua Yauhaas 6 Bible Online

Yauhaas 6 - Hmong Njua bible

Yauhaas 6

¹Tom qaab ntawd, Yexus caij nkoj hlaa Havtxwv Kalilais moog rua saab tim u (lub havtxwv ntawd muaj dlua ib lub npe hu ua Tinpelias).

²Muaj ib cov tuabneeg coob coob lawv Yexus qaab moog, rua qhov puab pum tej txujci kws nwg khu tau tej tuabneeg muaj mob zoo.

³Yexus moog rua sau roob hab nrug nwg cov thwjtim nyob ua ke.

⁴Thaus ntawd, tub yuav txug lub caij kws cov Yudais ua Kevcai Hlaa Dlhau.

⁵Yexus tsaa qhovmuag saib, nwg pum tuabneeg coob coob taabtom tuaj cuag nwg, yog le ntawd, nwg txawm has rua Filis has tas, “Peb yuav moog yuav mov qhov twg txhaj le txaus suavdlawg noj?”

⁶(Yexus has le nuav, yog nwg sim Filis sab; qhov tseeb, Yexus tub paub lawm has tas, Yexus yuav ua le caag.)

⁷Filis teb has tas, “Txawm yog muab ob puas tawm lub nyaj moog yuav mov los ntshai ib leeg tsuas tau ib nyuas qhov miv miv xwb.”

⁸Yexus cov thwjtim muaj ib tug hu ua Aadales, nwg yog Ximoos Petus tug kwv, nwg has tas,

⁹“Muaj ib tug mivnyuas tub nyob ntawm nuav, nwg muaj tsib lub ncuav hab ob tug ntseg. Tabsis yuav tsi txaus cov tuabneeg nuav noj.”

¹⁰Yexus has tas, “Mej ca le has kuas suavdlawg nyob quastsawg.” (Thaaj chaw ntawd muaj muaj nyom.) Yog le ntawd, suavdlawg txawm nyob quastsawg; cov txivneej kws nyob ntawd yuav laug muaj tsib txheeb leej.

¹¹Yexus muab tsib lub ncuav ntawd lug ua Vaajtswv tsaug, hab nwg muab faib rua suavdlawg noj. Nwg muab ob tug ntseg lug ua ib yaam nkaus le ntawd hab, tug kws yuav noj ntau npaum le caag los tau.

¹²Thaus suavdlawg noj tsau lawm, Yexus has rua nwg cov thwjtim has tas, “Mej ca le moog sau tej kws suavdlawg noj tsi taag, tsi pub ib qho xuam le.”

¹³Yog le ntawd, cov thwjtim txhaj moog sau tej ncuav seem kws suavdlawg noj tsi taag tau kaum ob tawb puv nkaus.

¹⁴Thaus cov tuabneeg suavdlawg pum Yexus ua zaaj txujci tseemceeb nuav, puab has tas, “Tug nuav yog tug cev Vaajtswv lug kws nqeg lug rua huv nplajteb nuav tag!”

¹⁵Yexus paub has tas puab yuav tuaj muab nwg yuam tsaa ua vaajntxwv; yog le ntawd, nwg tuab leeg txhaj moog rua sau roob lawm.

¹⁶Thaus yuav tsaus ntuj, Yexus cov thwjtim moog rua nraag ntug havtxwv,

¹⁷puab nce rua huv lub nkoj, hab caij nkoj hlaa havtxwv rov qaab moog rua tim lub nroog Kapena-us. Thaus ntawd tub tsaus ntuj zuag lawm, Yexus tseem tsi tau lug rua ntawm puab.

¹⁸Ces txawm muaj cua dlaaj cua dlub ntsawj dlej ndlaas cuag dlaabtsi.

¹⁹Cov thwjtim tub nkuam lub nkoj moog dleb kwvlaam le tsib rau kilumev lawm, thaus puab pum Yexus lug kutaw sau nplaim dlej lug ze zuj zug rua ntawm puab lub nkoj, puab ntshai kawg le.

²⁰Yexus has rua puab tas, “Mej tsi xob ntshai, tub yog kuv ntaag!”

²¹Puab txhaj zoo sab ca Yexus lug rua huv puab lub nkoj, taamsim ntawd lub nkoj tub moog txug ndlua ntawm ntug qhov chaw kws puab yuav moog.

²²Nub tom qaab cov tuabneeg coob coob kws nyob saab ntug havtxwv tim u pum tuab lub nkoj nyob ntawd xwb. Puab paub has tas Yexus yeej tsi tau nrug nwg cov thwjtim caij lub nkoj ntawm moog, puab tsuas pum cov thwjtim caij moog xwb.

²³Muaj dlua ib co nkoj tuaj tim lub nroog Tinpelias tuaj nreg ze rua ntawm qhov chaw kws Yexus muab ncuav lug ua Vaajtswv tsaug hab muab ndlais faib rua suavdlawg noj.

²⁴Thaus cov tuabneeg coob coob ntawd paub has tas Yexus hab nwg cov thwjtim tsi nyob qhov ntawd lawm, puab txawm nce rua huv cov nkoj ntawd hab caij moog nrhav Yexus rua tim lub nroog Kapena-us.

²⁵Thaus cov tuabneeg ntawd moog nrhav tau Yexus saab havtxwv tim u lawm, puab has rua Yexus has tas, “Xwbfwb, thaus twg koj tub tuaj rua ntawm nuav lawm?”

²⁶Yexus teb has tas, “Kuv qha tseeb rua mej has tas, tub yog vim kuv muab mov rua mej noj tsau, mej txhaj tuaj nrhav kuv, tsi yog vim mej pum tej txujci tseemceeb kws kuv ua.

²⁷Mej tsi xob nrhav tej mov kws txawj lwj; tabsis mej yuavtsum nrhav tej mov kws tsi txawj lwj. Tuabneeg Leej Tub yuav muab cov mov kws cawm tau txujsa ntev dlhawv moog ibtxhis rua mej, rua qhov Vaajtswv tug kws yog leej Txiv tub nas homthawj rua nwg lawm.”

²⁸Puab nug Yexus has tas, “Peb yuav ua le caag, peb txhaj ua tau lawv le Vaajtswv xaav kuas peb ua?”

²⁹Yexus teb has tas, “Qhov kws Vaajtswv xaav kuas mej ua, yog nwg xaav kuas mej ntseeg tug kws nwg khaiv lug.”

³⁰Puab teb has tas, “Koj yuav ua yaam txujci tseemceeb dlaabtsi rua peb saib kuas peb ntseeg koj? Koj yuav ua dlaabtsi?

³¹Thaus u peb cov yawmkoob noj manas tom taj suabpuam lawv le Vaajtswv Txujlug has tas, ‘Nwg muab mov sau ntuj lug rua puab noj.’ ”

³²Yexus has tas, “Kuv qha tseeb rua mej has tas, tej mov kws Mauxes muab rua mej noj, tsi yog tej kws lug sau ntuj lug; tej mov kws kuv Txiv muab rua mej noj txhaj yog tej tseem mov kws lug sau ntuj lug.

³³Rua qhov tug kws lug sau ntuj lug, nwg yog cov mov kws Vaajtswv muab lug cawm tuabneeg nplajteb txujsa.”

³⁴Puab thov Yexus has tas, “Tug Tswv, thov koj muab cov mov ntawd rua peb noj moog le.”

³⁵Yexus qha puab has tas, “Kuv yog cov mov kws cawm tuabneeg txujsa. Tug kws lug cuag kuv, tug ntawd yuav tsi tshaib ib zag le; tug kws ntseeg kuv, tug ntawd yuav tsi nqhes ib zag le lawm.

³⁶Kuv has rua mej has tas, nwgnuav mej tub pum kuv lawm, tabsis mej tsi ntseeg kuv.

³⁷Txhua tug kws kuv Txiv pub rua kuv, puab yeej yuav lug cuag kuv. Txhua tug kws lug cuag kuv, kuv leeg yuav huv tuabsi,

³⁸rua qhov kuv lug sau ntuj lug tsi yog lug ua lawv le kuv lub sab, tabsis kuv lug ua lawv le tug kws khaiv kuv lug lub sab nyam.

³⁹Tug kws khaiv kuv lug kuas kuv saib cov tuabneeg kws nwg pub rua kuv lawm, tsi xob ca ib tug twg pluj le, hab thaus txug nub kawg kuv yuav tsaa puab txhua tug sawv huv qhov tuag rov qaab lug.

⁴⁰Rua qhov kuv Txiv xaav kuas txhua tug kws pum leej Tub hab ntseeg nwg muaj txujsa ntev dlhawv moog ibtxhis. Hab thaus txug nub kawg kuv yuav tsaa puab sawv huv qhov tuag rov qaab lug.”

⁴¹Ces cov Yudais txawm ywg Yexus, rua qhov Yexus has tas, “Kuv yog cov mov kws lug sau ntuj lug.”

⁴²Yog le ntawd, puab txhaj has tas, “Tug txivneej nuav yog Yauxej tug tub Yexus los tsi yog? Peb yeej paub nwg nam nwg txiv huv tuabsi. Ua le caag nwg yuav has tas nwg lug sau ntuj lug?”

⁴³Yexus has rua puab tas, “Mej ca le tseg tsi xob ywg le ntawd lawm.

⁴⁴Yeej tsi muaj leejtwg lug cuag tau kuv, tsuas yog leej Txiv tug kws khaiv kuv lug, nwg coj leejtwg lug, tug ntawd txhaj tau lug cuag kuv xwb; hab thaus txug nub kawg kuv yuav tsaa tug ntawd sawv huv qhov tuag rov qaab lug.

⁴⁵Cov cev Vaajtswv lug sau tseg has tas, ‘Vaajtswv yuav qha txhua tug huv tuabsi.’ Txhua tug kws nov leej Txiv tej lug hab ua lawv le nwg qha yeej lug cuag kuv.

⁴⁶Kuv has le nuav tsi yog has tas txhua tug puavleej pum leej Txiv; tsuas yog tug kws Vaajtswv khaiv lug, nwg tuab leeg xwb txhaj pum leej Txiv.

⁴⁷Kuv qha tseeb rua mej has tas tug kws ntseeg kuv, tug ntawd tub tau txujsa ntev dlhawv moog ibtxhis lawm.

⁴⁸Kuv yog cov mov kws cawm tuabneeg txujsa.

⁴⁹Txawm yog mej cov yawmkoob tau noj manas tom taj suabpuam los puab tub tuag taag lawm.

⁵⁰Tabsis yog leejtwg noj cov mov kws lug sau ntuj lug, tug ntawd yuav tsi tuag.

⁵¹Kuv yog cov mov kws lug sau ntuj lug cawm tuabneeg txujsa. Tug kws noj cov mov nuav yuav tau txujsa ntev dlhawv moog ibtxhis; hab cov mov kws kuv yuav muab cawm tuabneeg nplajteb txujsa ntawd tub yog kuv cev nqaj ntaag.”

⁵²Ces cov Yudais txawm sis caav npautawg vog has tas, “Tug txivneej nuav yuav ua le caag muab tau nwg cev nqaj rua peb noj?”

⁵³Yexus has rua puab tas, “Kuv qha tseeb rua mej has tas, yog mej tsi noj Tuabneeg Leej Tub cev nqaj hab tsi haus nwg cov ntshaav, ces mej yuav tsi tau txujsa.

⁵⁴Tug kws noj kuv cev nqaj hab haus kuv cov ntshaav, tug ntawd tau txujsa ntev dlhawv moog ibtxhis, hab thaus txug nub kawg kuv yuav tsaa nwg sawv huv qhov tuag rov qaab lug.

⁵⁵Rua qhov kuv cev nqaj yog cov tseem mov; hab kuv cov ntshaav yog cov tseem dlej.

⁵⁶Tug kws noj kuv cev nqaj hab haus kuv cov ntshaav, tug ntawd nrug kuv koom ib txujsa, hab kuv nrug tug ntawd koom ib txujsa.

⁵⁷Leej Txiv tug kws khaiv kuv lug, nwg yog tug kws muaj txujsa, vim kuv nrug nwg koom ib txujsa, kuv txhaj le tau txujsa. Ib yaam nkaus le ntawd, tug kws noj kuv cev nqaj tug ntawd muaj txujsa, rua qhov kuv yog tug kws muaj txujsa.

⁵⁸Cov mov nuav yog cov mov kws lug sau ntuj lug; cov mov nuav tsi zoo le cov mov kws mej cov yawmkoob noj, hab puab tuag taag lawm. Tug kws noj cov mov nuav yuav tau txujsa ntev dlhawv moog ibtxhis.”

⁵⁹Yexus has cov lug nuav thaus nwg qha huv lub tsev saablaaj kws nyob huv lub nroog Kapena-us.

⁶⁰Cov tuabneeg kws lawv Yexus qaab nov tej lug kws nwg qha ntawd, muaj ntau leej has tas, “Cov lug nuav nyuaj kawg le. Leejtwg txhaj yuav totaub?”

⁶¹Tabsis Yexus paub has tas puab ywg txug tej lug kws Yexus has, Yexus txhaj has rua puab tas, “Tej lug kws kuv has ntawd ua rua mej nyuaj sab los?

⁶²Yog has tas mej pum Tuabneeg Leej Tub rov qaab moog nyob sau qhov chaw kws nwg ibtxwm nyob lug lawm, mej tsua yuav xaav le caag?

⁶³Vaajtswv tug Ntsujplig ua tau rua tuabneeg muaj sa; tabsis tuabneeg nqaj tawv ua tsi tau le ntawd. Tej lug kws kuv qha rua mej ntawd, yog ntsujplig hab yog txujsa.

⁶⁴Tabsis mej cov muaj qee leej tsi ntseeg kuv tej lug.” (Yexus has le ntawd, rua qhov thaus chivthawj nwg tub xub paub lawm has tas, nwg cov thwjtim tug twg yog tug tsi ntseeg hab tug twg yog tug kws yuav ntxeev saab rua nwg.)

⁶⁵Hab Yexus has ntxiv tas “Tub yog vim le nuav kuv txhaj has rua mej has tas, yeej tsi muaj ib tug lug cuag kuv, tsuas yog tug kws leej Txiv tshoov nwg lub sab txhaj lug cuag kuv xwb.”

⁶⁶Vim le ntawd, cov tuabneeg kws caum Yexus qaab muaj coob leej txhaj tso Yexus tseg, hab tsi nrug nwg moog lawm.

⁶⁷Yog le ntawd, Yexus txhaj nug nwg kaum ob tug thwjtim has tas, “Mej ne, mej yuav tso kuv tseg hab los?”

⁶⁸Ximoos Petus teb Yexus has tas, “Tug tswv, yog peb tso koj tseg, peb yuav moog cuag leejtwg? Tsuas yog koj tuab leeg tej lug xwb, txhaj pub tau txujsa ibtxhis rua tuabneeg.

⁶⁹Nwgnuav peb ntseeg hab paub tseeb has tas koj yog tug dlawbhuv kws Vaajtswv khaiv lug.”

⁷⁰Yexus teb puab has tas, “Puas yog kuv xaiv mej kaum ob leeg nuav? Tabsis mej cov ko muaj ib tug yog dlaab ntxwgnyoog.”

⁷¹Yexus has le ntawd, yog has txug Ximoos Ixakali-us tug tub Yudas. Txawm yog Yudas yog ib tug ntawm Yexus kaum ob tug thwjtim los nwg tseem ntxeev sab rua Yexus.