Read Hmong Njua Yauhaas 9 Bible Online

Yauhaas 9 - Hmong Njua bible

Yauhaas 9

¹Thaus Yexus taabtom taug kev moog, Yexus pum ib tug txivneej kws dligmuag thaus nruab thab lug lawm.

²Yexus cov thwjtim nug Yexus has tas, “Xwbfwb, leejtwg ua txhum txhaj ua rua tug txivneej nuav dligmuag thaus nruab thab lug lawm? Yog nwg ua txhum lossis nwg nam nwg txiv ua txhum?”

³Yexus teb has tas, “Qhov kws nwg dligmuag le nuav tsi yog vim nwg tej kev txhum lossis vim nwg nam nwg txiv tej kev txhum. Nwg dligmuag kuas suavdlawg pum Vaajtswv lub fwjchim xwb.

⁴Thaus kws tseem yog nruab nub, peb yuavtsum ua tug kws khaiv kuv lug tej num; thaus tsaus ntuj lawm yuav tsi muaj tuabneeg pum kev ua num.

⁵Thaus kuv tseem nyob huv nplajteb nuav, kuv yog qhov kaaj rua tuabneeg nplajteb pum kev.”

⁶Thaus Yexus has le nuav taag, Yexus txawm ntu quavncaug rua huv aav, nwg muab dlu xyaw moov aav; Yexus muab cov aav nkus ntawd pleev tug txivneej ntawd ob lub qhovmuag,

⁷hab Yexus has rua tug txivneej ntawd tas, “Koj ca le moog ntxuav muag ntawm lub paag dlej Xilau-aas.” (Lub npe nuav txhais has tas, “Khaiv moog.”) Tug txivneej dligmuag ntawd txhaj moog ntxuav muag hab rov qaab lug, ces nwg txawm pum kev lawm.

⁸Tej tuabneeg zej zog hab cov tuabneeg kws pheej pum tug txivneej ntawd thov khawv txawm sis nug has tas, “Tug txivneej nuav tsi yog tug kws naj nub nyob quastsawg thov khawv los?”

⁹Muaj qee leej has tas, “Nwg yog tug ntawd ntaag,” tabsis muaj qee leej has tas, “Nwg zoo le tug ntawd; tabsis nwg tsi yog tug ntawd.” Tug txivneej ntawd, has tas, “Kuv yog tug ntawd ntaag.”

¹⁰Puab nug nwg has tas, “Ua le caag koj tsua pum kev lawm?”

¹¹Nwg teb has tas, “Tug txivneej kws npe hu ua Yexus ua ib co aav nkus lug pleev kuv ob lub qhovmuag, hab has kuas kuv moog ntxuav muag ntawm lub paag dlej Xilau-aas. Yog le ntawd kuv txhaj moog, hab thaus kuv ntxuav muag taag, ces kuv qhovmuag txawm pum kev lawm.”

¹²Puab nug has tas, “Nwg nyob qhov twg?” Tug txivneej ntawd teb has tas, “Kuv tsi paub.”

¹³Puab coj tug txivneej dligmuag kws tub pum kev lawm moog cuag cov Falixais.

¹⁴Nub kws Yexus ua aav nkus pleev tug dligmuag ntawd ob lub qhovmuag yog nub Xanpataus.

¹⁵Cov Falixais rov nug tug txivneej ntawd has tas, “Ua le caag koj pum kev lawm?” Nwg qha rua puab has tas, “Tug ntawd muab mivntsiv aav nkus pleev kuv ob lub qhovmuag, kuv moog ntxuav muag taag, ces kuv txawm pum kev lawm.”

¹⁶Cov Falixais muaj qee leej has tas, “Tug txivneej kws ua le nuav yeej tsi yog tug kws Vaajtswv khaiv lug, rua qhov nwg tsi fwm nub Xanpataus.” Tabsis muaj qee leej has tas, “Tug tuabneeg txhum yuav ua le caag ua tau tej txujci tseemceeb nuav? Ces puab txawm tsi sis hum lawm.”

¹⁷Yog le ntawd, cov Falixais rov nug tug txivneej ntawd dlua has tas, “Koj has tas yog tug ntawd khu koj ob lub qhovmuag pum kev, koj sim pav saib nwg yog leejtwg?” Tug txivneej ntawd teb has tas, “Nwg yog ib tug cev Vaajtswv lug.”

¹⁸Cov Yudais tej numtswv tsi ntseeg has tas tug txivneej ntawd yog tug dligmuag kws tub pum kev lawm moog txug thaus kws puab moog hu nwg nam nwg txiv tuaj,

¹⁹hab puab nug obtug has tas, “Tug nuav puas yog meb tug tub kws meb has tas nwg ibtxwm dligmuag thaus nruab thab lug? Ua le caag nwgnuav nwg tsua pum kev lawm?”

²⁰Nwg nam nwg txiv teb has tas, “Wb paub has tas nwg yog wb tug tub hab paub has tas, nwg ibtxwm dligmuag thaus nruab thab lug tag.

²¹Tabsis wb tsi paub sov ua le caag nwgnuav nwg tsua pum kev lawm, hab wb tsi paub has tas sov leejtwg khu nwg ob lub qhovmuag. Nwg tub tav hluas lawm, mej ca le nug nwg xwb; nwg maam le qha rua mej.”

²²Nwg nam nwg txiv has le nuav vim obtug ntshai cov Yudais tej numtswv, rua qhov cov Yudais tej numtswv tau saablaaj has tas, yog leejtwg leeg has tas Yexus yog tug Mexiyas, puab yuav muab tug ntawd ntab tawm huv lub tsev saablaaj moog.

²³Tub yog vim le nuav nwg nam nwg txiv txhaj has tas, “Nwg tub tav hluas lawm; mej ca le nug nwg xwb!”

²⁴Puab txawm rov hu tug txivneej kws ibtxwm dligmuag thaus nruab thab ntawd lug cuag puab dlua zag ob, puab has rua nwg tas, “Koj ca le coglug taabmeeg Vaajtswv has tas koj yuav qha qhov tseeb rua peb. Peb paub has tas tug txivneej ntawd yog ib tug tuabneeg txhum.”

²⁵Tug txivneej ntawd teb has tas, “Kuv tsi paub has tas tug ntawd yog ib tug tuabneeg txhum lossis tsi yog. Kuv tsuas paub has tas, kuv ibtxwm dligmuag, tabsis nwgnuav kuv pum kev lawm xwb.”

²⁶Puab nug has tas, “Nwg ua le caag rua koj? Nwg khu koj ob lub qhovmuag le caag, koj txhaj pum kev?”

²⁷Tug txivneej ntawd teb has tas, “Kuv tub qha taag rua mej lawm, tabsis mej tsi noog kuv tej lug le. Ua le caag mej tseem xaav rov qaab nov dlua hab? Puas yog mej xaav ua nwg thwjtim hab?”

²⁸Puab txawm tshev nwg has tas, “Koj txhaj yog tug ntawd tug thwjtim; tabsis peb yog Mauxes cov thwjtim.

²⁹Peb paub has tas Vaajtswv nrug Mauxes thaam xwb; tug tuabneeg ntawd sov nwg tuaj qhov twg tuaj peb tsi paub.”

³⁰Tug txivneej ntawd teb puab has tas, “Kuv xaav tsi thoob le! Sov ua le caag mej tsi paub has tas nwg tuaj qhov twg tuaj, tabsis nwg tsua khu tau kuv ob lub qhovmuag pum kev lawm!

³¹Peb paub has tas Vaajtswv yeej tsi noog cov tuabneeg txhum tej lug; nwg tsuas noog cov tuabneeg kws fwm nwg hab ua lawv le nwg tej lug xwb.

³²Txij thaus chivkeeb kws muaj lub nplajteb nuav lug, tsi tau muaj leejtwg nov has tas muaj ib tug tuabneeg twg khu tau tug tuabneeg kws dligmuag thaus nruab thab lug kuas pum kev le.

³³Yog tug ntawd tsi yog tug kws Vaajtswv khaiv lug, nwg yeej ua tsi tau le nuav le.”

³⁴Puab teb has tas, “Koj yog tuabneeg txhum thaus nruab thab lug lawm, koj tseem yuav ntuag peb hab los?” Ces puab txawm muab nwg ntab tawm huv tsev saablaaj moog lawm.

³⁵Thaus Yexus nov has tas puab muab tug txivneej ntawd ntab tawm huv tsev saablaaj moog lawm, Yexus txawm moog nug nwg has tas, “Koj puas ntseeg Tuabneeg Leej Tub?”

³⁶Tug txivneej ntawd teb has tas, “Xwbfwb, thov koj qha kuv saib Tuabneeg Leej Tub yog leejtwg? Kuv txhaj paub ntseeg nwg.”

³⁷Yexus has rua nwg tas, “Koj tub pum Tuabneeg Leej Tub lawm, nwg yog tug kws taabtom nrug koj thaam nuav ntaag.”

³⁸Tug txivneej ntawd has tas, “Tug Tswv, kuv ntseeg lawm!” Hab nwg txawm txhus caug ndlua pehawm Yexus.

³⁹Yexus has tas, “Kuv lug huv lub nplajteb nuav yog lug txav txim, kuas tug dligmuag pum kev, hab kuas cov tuabneeg kws pum kev dligmuag.”

⁴⁰Cov Falixais kws nyob ntawd, muaj qee leej nov Yexus has le ntawd, puab txawm nug Yexus has tas, “Tsi yog koj has tas peb puavleej dligmuag huv tuabsi nua los?”

⁴¹Yexus teb has tas, “Yog mej dligmuag, ces mej tsi yog tuabneeg txhum le; tabsis mej khaav has tas mej pum kev, yog le ntawd, mej tseem yog tuabneeg txhum.”