Read Hmong Njua Teg Num 1 Bible Online

Teg Num 1 - Hmong Njua bible

Teg Num 1

¹The-aufilaus, Phoo ntawv kws kuv xub sau, kuv sau has txug txhua yaam kws Yexus ua hab qha txij thaus kws nwg pib ua num

²moog txug nub kws Vaajtswv coj nwg moog sau ntuj. Thaus Yexus tsi tau moog sau ntuj, nwg kuas Vaaj Ntsujplig tug Dlawbhuv qha nwg cov timthawj kws nwg xaiv tseg lawm.

³Rua qhov plaub caug nub tom qaab kws nwg sawv huv qhov tuag rov qaab lug, nwg tau lug tshwm rua puab pum ntau zag, kuas puab paub has tas, nwg tseem muaj sa nyob. Puab tau pum nwg hab nwg qha puab txug Vaajtswv lub Tebchaws.

⁴Muaj ib zag thaus Yexus nrug nwg cov timthawj nyob ua ke, nwg saamfwm rua puab tas, “Mej tsi xob tawm huv lub nroog Yeluxalees moog qhov twg le, mej yuavtsum nyob tog txug nub kws mej tau lawv le kuv Txiv coglug has tas, nwg yuav pub rua mej. Qhov ntawd kuv tub qha rua mej lawm.

⁵Yauhaas muab tuabneeg ua kevcai raus rua huv dlej, tabsis tshuav ob peb nub xwb, yuav muab mej ua kevcai raus lug ntawm Vaaj Ntsujplig Tug Dlawbhuv.”

⁶Thaus cov timthawj nrug Yexus nyob ua ke, puab nug Yexus has tas, “Tug Tswv, lub sijhawm nuav, koj yuav muab lub Tebchaws rov rua cov Yixalayees los?”

⁷Yexus has rua puab tas, “Tsi taag mej yuav paub has tas, nub twg hab lub sijhawm twg yuav muaj le ntawd. Lub sijhawm ntawd, nyob ntawm leej Txiv teem ca.

⁸Tabsis thaus Vaaj Ntsujplig tug Dlawbhuv lug nrug mej nyob lawm, nwg yuav pub fwjchim rua mej hab mej yuav ua timkhawv qha kuv zaaj moog thoob plawg huv lub nroog Yeluxalees, huv lub xeev Yudas, huv lub xeev Xamalis, hab moog txug qaab ntuj kawg.”

⁹Thaus Yexus has le ntawd taag, thaus puab tseem saib quas ntsoov Yexus, ces Vaajtswv txawm coj Yexus moog sau ntuj lawm. Muaj ib tauv fuab lug roog nwg, ces puab tsi pum nwg lawm.

¹⁰Thaus puab tseem taabtom saib ntsoov Yexus moog sau ntuj, ua cav muaj ob tug txivneej naav rig tsho dlawb paug lug sawv ntawm puab.

¹¹Obtug has rua puab tas, “Cov tuabneeg Kalilais, mej sawv saib sau ntuj ua dlaabtsi? Yexus tug kws Vaajtswv nyavnyuas coj moog sau ntuj lawm, nwg yeej yuav rov qaab lug ib yaam nkaus le kws mej pum nwg moog ntaag.”

¹²Cov timthawj txawm rov qaab peg Roob Txiv Ntoo Roj lug txug rua huv lub nroog Yeluxalees. Lub roob ntawd nyob nrug dleb ntawm lub nroog kwvlaam le ib kilumev.

¹³Thaus puab lug txug huv lub nroog Yeluxalees, puab txawm moog rua huv ib lub tsev, hab nce moog rua ib chaav kws nyob txheej sau, chaav ntawd yog chaav kws puab tuaj su. Puab cov ntawd yog: Petus, Yauhaas, Yakaunpaus, Aadales, Filis, Thaumas, Npataulaumais, Mathais, Yakaunpaus kws yog Alafais tug tub, Ximoos tug kws xaav kuas nwg lub tebchaws muaj kev ywjpheej, hab Yudas kws yog Yakaunpaus tug tub.

¹⁴Puab cov nuav hab ib cov quaspuj hab Malis kws yog Yexus nam hab Yexus cov kwv pheej tuaj ua ke thov Vaajtswv huv chaav tsev ntawd.

¹⁵Ob peb nub tom qaab ntawd cov ntseeg tuaj saablaaj ua ke, puab muaj kwvlaam le ib puas neeg nkaum leej, ces Petus txawm sawv ntsug qha cov tuabneeg ntawd

¹⁶has tas, “Cov kwvtij, yeej yuav muaj lawv le Vaajtswv txujlug kws Vaaj Ntsujplig qha rua Vaajntxwv Daviv sau has txug Yudas tug kws coj tuabneeg kev moog nteg Yexus.

¹⁷Yudas yeej yog ib tug huv peb paab, Yexus tsaa nwg nrug peb ua ib teg num.”

¹⁸(Cov nyaj kws Yudas tau thaus Yudas ua phem, Yudas muab yuav ib thaaj aav. Qhov chaw kws Yudas lub cev poob, nwg plaab tawg hab nyuv tawm taag huv tuabsi, tub yog ntawm thaaj aav ntawd ntaag.

¹⁹Cov tuabneeg kws nyob huv lub nroog Yeluxalees nov zaaj nuav, puab txawm hu thaaj aav ntawd lawv le puab lug has tas, Akedamas kws txhais has tas, “Thaaj Aav Ntshaav.”)

²⁰“Tub muaj lug sau tseg rua huv phoo Ntawv Nkauj has tas, ‘Ca nwg lub tsev nyob khoob lug; tsi xob pub leejtwg moog nyob huv lub tsev ntawd.’ Hab muaj dlua ib nqai has tas, ‘Ca lwm tug lug hloov nwg chaw ua nwg teg num.’

²¹“Yog le ntawd, tug kws yuav lug nrug peb ua num, tug ntawd yuavtsum yog ib tug kws ibtxwm nrug peb ua ke hab nrug peb tug Tswv Yexus moog rua nuav rua u,

²²txij thaus Yauhaas qhuab qha hab muab tuabneeg ua kevcai raus dlej lug txug nub kws Vaajtswv coj Yexus moog sau ntuj, mas tug ntawd txhaj nrug peb ua tau timkhawv has tas, Yexus tub sawv huv qhov tuag rov qaab lug lawm tag.”

²³Ces puab pum zoo muab ob tug tuabneeg lug rua suavdlawg xaiv, ob tug ntawd ib tug yog Yauxej kws hu ua Npaxanpas (lossis hu ua Yuxatus), hab Mathias.

²⁴Puab txawm thov Vaajtswv has tas, “Tug Tswv, koj yog tug kws paub txhua tug lub sab huv tuabsi, yog le ntawd, thov koj qha rua peb saib ob tug nuav, koj xaiv tug twg

²⁵lug ua timthawj hloov Yudas chaw, ua teg num kws Yudas muab tso tseg hab moog rua huv qhov chaw kws yeej yog nwg lub lawm.”

²⁶Ces puab txawm rhu ntawv, saib ob tug ntawd tau tug twg. Puab rhu tau Mathias. Txij nub ntawd lug, Mathias txawm nrug kaum ib tug timthawj ntawd ua num.