Read Hmong Njua Teg Num 10 Bible Online

Teg Num 10 - Hmong Njua bible

Teg Num 10

¹Muaj ib tug txivneej kws yog tuabneeg Loos nyob huv lub nroog Xixaleyas hu ua Kauneli-us, nwg yog ib tug thawj tubrog kws saib paab tubrog hu ua “Italis Paab.”

²Nwg yog ib tug kws coj Vaajtswv txuj kevcai nruj hab nwg tsev tuabneeg puavleej fwm Vaajtswv. Nwg pheej paab cov tuabneeg Yudais kws txomnyem, hab nwg naj nub thov Vaajtswv.

³Muaj ib nub thaus nub qaij nwg ua ywgtoog pum Vaajtswv ib tug timtswv lug huv nwg chaav tsev hab hu nwg has tas, “Kauneli-us.”

⁴Kauneli-us saib dlheev tug timtswv ntawd, nwg ntshai kawg le, nwg txawm nug tug timtswv has tas, “Koj xaav yuav dlaabtsi?” Tug timtswv teb has tas, “Vaajtswv tub nov koj tej lug thov hab pum tej kws koj pub rua cov tuabneeg txomnyem lawm.

⁵Koj ca le khaiv tuabneeg moog nraag lub nroog Yaupas, moog hu Ximoos kws muaj dlua ib lub npe hu ua Petus kuas tuaj ntawm nuav.

⁶Petus nyob huv Ximoos tug kws luam tawv tsaj lub tsev, lub tsev ntawd nyob ntawm ntug havtxwv.”

⁷Thaus Vaajtswv tug timtswv moog lawm, Kauneli-us txawm hu ob tug tubkhai hab ib tug tubrog lug cuag nwg. Tug tubrog ntawd yog ib tug kws coj Vaajtswv txuj kevcai nruj heev hab yog ib tug kws naj nub ua num rua Kauneli-us.

⁸Kauneli-us pav tej kws nwg pum huv tuabsi rua puab peb tug ntawd noog, hab nwg khaiv puab moog rua nraag lub nroog Yaupas.

⁹Nub tom qaab thaus peb tug ntawd taabtom moog yuav txug lub nroog Yaupas. Thaus yuav taav su, Petus nce moog thov Vaajtswv sau qaum tsev.

¹⁰Petus tshaib plaab, nwg xaav noj mov; thaus luas tseem taabtom ua su noj, Petus txawm ua ywgtoog.

¹¹Petus pum rooj ntug qheb hab muaj ib yaam zoo le dlaim ntaub dlaav dlaav muaj hlua khi plaub ceg kaum tso dlauv sau ntuj lug rua huv nplajteb.

¹²Petus pum txhua yaam tsaj, tsi has naab, naab qaa, qaav hab tej noog puavleej nyob huv dlaim ntaub ntawd.

¹³Ces txawm muaj ib lub suab has rua Petus has tas, “Petus, koj ca le sawv hab muab tua noj!”

¹⁴Tabsis Petus has tas, “Tsi tau, tug Tswv! Kuv yeej ibtxwm tsi noj tej kws kevcai txwv tsi pub noj.”

¹⁵Lub suab ntawd txawm rov has dlua rua Petus has tas, “Tej kws Vaajtswv has tas huv lawm, koj tsi xob has tas tsi huv.”

¹⁶Muaj le ntawd txug peb zag, ces dlaim ntaub ntawd txawm rov rua sau ntuj lawm.

¹⁷Thaus Petus taabtom xaav tsi thoob rua tej kws nwg ua ywgtoog pum ntawd, peb tug txivneej kws Kauneli-us khaiv tuaj, puab tuaj nrhav tau Ximoos lub tsev, hab puab sawv saab nrau qhovrooj.

¹⁸Puab hu has tas, “Ximoos Petus puas nyob huv mej tsev?”

¹⁹Thaus Petus tseem xaav txug zaaj ywgtoog kws nwg pum ntawd, Vaaj Ntsujplig txawm has rua Petus has tas, “Koj saib, muaj peb tug txivneej tuaj nrhav koj.

²⁰Koj ca le nqeg moog rua txheej huv hab nrug puab moog, tsi xob xaav le caag, rua qhov tub yog kuv khaiv puab tuaj.”

²¹Petus nqeg rua txheej huv, hab nwg has rua peb tug txivneej ntawd has tas, “Tug kws mej tuaj nrhav yog kuv ntaag, mej tuaj nrhav kuv ua dlaabtsi?”

²²Puab teb has tas, “Tug thawj tubrog Kauneli-us khaiv peb tuaj. Nwg yog ib tug tuabneeg ncaaj nceeg hab coj Vaajtswv txuj kevcai nruj, cov Yudais suavdlawg puavleej fwm nwg. Vaajtswv ib tug timtswv lug has rua nwg has tas, kuas nwg hu koj moog saib nwg, nwg txhaj yuav tau nov tej kws koj qha.”

²³Ces Petus txawm coj cov txivneej ntawd lug huv tsev hab puab pw ib mos ntawd. Nub tom qaab Petus txawm nrug puab moog; cov ntseeg kws nyob huv lub nroog Yaupas muaj qee leej nrug Petus moog hab.

²⁴Nub tom qaab Petus maam le moog txug huv lub nroog Xixaleyas. Kauneli-us tub hu tej kwvtij neejtsaa hab tej phoojywg tuaj nyob huv nwg tsev tog Petus lawm.

²⁵Thaus Petus moog yuav txug ntawm Kauneli-us tsev, Kauneli-us txawm tawm tuaj tog Petus, hab txhus caug ndlua ntawm Petus kutaw hawm Petus.

²⁶Tabsis Petus tuav nkaus Kauneli-us tsaa nwg sawv hab has tas, “Koj ca le sawv! Kuv yog tuabneeg ib yaam le koj hab xwb.”

²⁷Petus hab Kauneli-us sis thaam sis thaam moog rua huv tsev, Petus pum muaj tuabneeg coob coob tuaj nyob tog nwg lawm.

²⁸Petus has rua cov tuabneeg ntawd has tas, “Mej tub paub lawm has tas cov Yudais txuj kevcai yeej ibtxwm tsi pub cov Yudais moog saib lossis nrug lwm Tsaav Tuabneeg, tabsis Vaajtswv qha rua kuv has tas, kuv tsi xob hu leejtwg has tas yog tuabneeg tsi huv.

²⁹Yog le ntawd, thaus koj khaiv tuabneeg tuaj hu kuv, kuv tsi yig le, kuv txhaj ca le tuaj. Kuv xaav paub saib koj hu kuv tuaj ua dlaabtsi?”

³⁰Kauneli-us teb has tas, “Tau plaub nub dlhau lug kws yog tuab lub sijhawm thaus peb teev nub qaij nuav, kuv taabtom thov Vaajtswv huv kuv tsev. Taamsim ntawd, kuv txawm pum ib tug txivneej naav rig tsho ci ntsaa ab lug sawv ntawm kuv hauv ntej.

³¹Nwg has rua kuv tas, ‘Kauneli-us, Vaajtswv tub nov koj tej lug thov hab pum tej kws koj muab pub rua cov tuabneeg txomnyem lawm.

³²Koj ca le khaiv tuabneeg moog hu Ximoos Petus nraag lub nroog Yaupas tuaj. Nwg su huv Ximoos tug kws luam tawv tsaj lub tsev; lub tsev ntawd nyob ntawm ntug havtxwv.’

³³Ces taamsim ntawd kuv txawm khaiv tuabneeg tuaj hu koj, hab koj txaus sab hlo tuaj. Nwgnuav Vaajtswv nrug peb nyob ntawm nuav, peb taabtom tog noog tej kws tug Tswv tau qha kuas koj has rua peb noog.”

³⁴Petus pib qha rua puab has tas, “Nwgnuav kuv paub tseeb has tas, Vaajtswv tsi xaiv leejtwg ntsejmuag.

³⁵Txawm yog tsaav tuabneeg twg los xij, Vaajtswv leeg yuav txhua tug kws fwm Vaajtswv hab ua hum Vaajtswv sab.

³⁶Mej tub paub txujlug kws Vaajtswv qha rua cov tuabneeg Yixalayees lawm. Txujlug ntawd yog Txujmoo Zoo kws has tas, tug kws ntseeg Yexus Khetos kws yog suavdlawg tug Tswv, tug ntawd yuav tau nyob kaaj sab lug.

³⁷Mej tub paub zaaj kws pib muaj huv xeev Kalilais, hab nrov nchaa moog thoob plawg tebchaws Yixalayees, tom qaab kws Yauhaas qha has tas tuabneeg yuavtsum ua kevcai raus dlej.

³⁸Hab mej paub txug zaaj kws Vaajtswv tub pub Vaaj Ntsujplig tug Dlawbhuv hab fwjchim rua Yexus tug kws yog tuabneeg Naxales lawm. Yexus moog thoob plawg txhua qhov chaw, nwg ua num zoo, hab cov tuabneeg kws raug dlaab, nwg ntab dlaab tawm huv tuabsi. Yexus ua tau le ntawd, rua qhov Vaajtswv nrug nwg.

³⁹Peb tub pum txhua yaam kws Yexus ua huv cov Yixalayees tej zog, hab huv lub nroog Yeluxalees, peb ua tau timkhawv has tas, yeej muaj tseeb tag. Txawm yog nwg ua le ntawd los luas tseem muab nwg coj moog ntsa rua sau ntoo khaublig hab muab nwg tua povtseg.

⁴⁰Tabsis peb nub tom qaab, Vaajtswv tsaa nwg sawv huv qhov tuag rov qaab lug hab nwg tau lug tshwm rua ib cov tuabneeg pum.

⁴¹Tsi yog suavdlawg pum, tabsis tsuas yog peb cov kws Vaajtswv tub xub xaiv ca ua timkhawv pum xwb. Thaus Vaajtswv tsaa nwg sawv huv qhov tuag rov qaab lug, peb cov kws ua timkhawv, peb tau nrug nwg noj nwg haus ua ke.

⁴²Hab nwg kuas peb moog qha Txujmoo Zoo rua suavdlawg, hab ua timkhawv qha has tas, nwg yog tug kws Vaajtswv tsaa ua tug txav txim rua cov tuabneeg caj hab cov tuabneeg tuag.

⁴³Cov kws cev Vaajtswv lug puavleej has tas, Vaajtswv yuav zaam txim rua txhua tug kws ntseeg Yexus tug kws muaj fwjchim.”

⁴⁴Thaus Petus tseem taabtom qha, Vaaj Ntsujplig tug Dlawbhuv txawm lug rua txhua tug kws noog tej lug kws Petus qha.

⁴⁵Thaus cov Yudas kws ntseeg Yexus kws nrug Petus tuaj nraag lub nroog Yaupas tuaj pum has tas, Vaajtswv pub Vaaj Ntsujplig tug Dlawbhuv rua lwm Tsaav Tuabneeg lawm hab, puab xaav tsi thoob le,

⁴⁶rua qhov puab nov cov tuabneeg ntawd has tau lug txawv txawv, hab qhuas Vaajtswv tug kws muaj fwjchim luj. Petus has tas,

⁴⁷“Cov tuabneeg nuav tub tau txais Vaaj Ntsujplig tug Dlawbhuv ib yaam le peb tau txais lawm. Leejtwg tseem yuav txwv tsi pub muab cov tuabneeg nuav ua kevcai raus dlej hab?”

⁴⁸Yog le ntawd, Petus txhaj kuas puab tuav Yexus Khetos lub npe ua kevcai raus dlej. Ces puab thov kuas Petus nrug puab nyob ob peb nub.