Read Hmong Njua Teg Num 11 Bible Online

Teg Num 11 - Hmong Njua bible

Teg Num 11

¹Cov timthawj hab cov ntseeg kws nyob txhua qhov huv xeev Yudas nov has tas lwm Tsaav Tuabneeg lug ntseeg Vaajtswv txujlug lawm hab.

²Thaus Petus rov qaab moog txug nraag lub nroog Yeluxalees, cov Yudais kws has tas yuavtsum muab lwm Tsaav Tuabneeg xub ua kevcai txav tsaiv, maam le pub puab lug koom cov Yudais txawm thuam Petus has tas,

³“Ua le caag koj moog saib lwm Tsaav Tuabneeg kws tsi ua kevcai txav, hab tseem nrug puab noj mov ua ke hab?”

⁴Petus pib pav txhua yaam kws nwg pum thaus hauvpaug lug rua puab noog has tas,

⁵“Thaus kuv nyob huv lub nroog Yaupas, kuv taabtom thov Vaajtswv, ces kuv txawm ua ywgtoog pum ib yaam zoo le dlaim ntaub dlaav dlaav muaj hlua khi plaub ceg kaum tso dlauv sau ntuj lug rua ntawm kuv xubndlag.

⁶Kuv ua tuab zoo saib, kuv pum muaj txhua yaam tsaj, tsi has naab, naab qaa, qaav hab tej noog nyob huv dlaim ntaub ntawd.

⁷Ces kuv txawm nov ib lub suab has rua kuv has tas, ‘Petus, koj ca le sawv hab muab tua noj.’

⁸Tabsis kuv has tas, ‘Tsi tau, tug Tswv! Kuv yeej ibtxwm tsi noj tej kws kevcai txwv tsi pub noj lossis tej tsaj kws tsi huv.’

⁹Lub suab ntawd rov has rua kuv tas, ‘Tej kws Vaajtswv has tas huv lawm, koj tsi xob has tas tsi huv.’

¹⁰Muaj le ntawd txug peb zag, ces dlaim ntaub txawm rov rua sau ntuj lawm.

¹¹Taamsim ntawd peb tug txivneej kws tuaj peg lub nroog Xixaleyas tuaj, puab txawm tuaj txug huv lub tsev kws kuv su.

¹²Vaaj Ntsujplig has kuas kuv ca le nrug puab moog tsi xob xaav le caag. Ces rau leej kwvtij ntawm nuav kws yog cov ntseeg huv lub nroog Yaupas, puab nrug kuv moog peg lub nroog Xixaleyas hab, peb moog rua huv Kauneli-us tsev.

¹³Kaneli-us has rua peb has tas, nwg pum ib tug timtswv ceebtsheej lug huv nwg tsev hab has rua nwg tas, ‘Koj ca le khaiv tuabneeg moog nraag lub nroog Yaupas, moog hu ib tug txivneej hu ua Ximoos Petus tuaj.

¹⁴Nwg yuav qha tej lug kws cawm koj hab koj tsev tuabneeg kuas mej dlim mej lub txim.’

¹⁵Thaus kuv pib qha, Vaaj Ntsujplig tug Dlawbhuv txawm lug rua puab ib yaam le lug rua peb thaus chivthawj.

¹⁶Thaus ntawd kuv txawm ncu dlheev txug tej lug kws tug Tswv qha has tas, ‘Yauhaas muab mej ua kevcai raus rua huv dlej, tabsis mej yuav tau ua kevcai raus lug ntawm Vaaj Ntsujplig tug Dlawbhuv.’

¹⁷Vaajtswv tub pub Vaaj Ntsujplig tug Dlawbhuv rua lwm Tsaav Tuabneeg ib yaam le nwg pub rua peb cov kws ntseeg tug Tswv lawm hab. Vaajtswv tub pub rua puab lawm, kuv yuav txwv Vaajtswv los yeej tsi tau le.”

¹⁸Thaus puab nov le ntawd, puab tsi thuam Petus lawm, puab ua Vaajtswv tsaug has tas, “Nwgnuav Vaajtswv qheb kev rua lwm Taav Tuabneeg lug ntseeg, kuas puab txhaj tso puab tej kev txhum tseg hab tau txujsa.”

¹⁹Thaus luas muab Xatefanaus tua lawm, cov ntseeg raug kev tsimtxom heev, ces cov ntseeg ibtxha txawm tsiv moog nyob rua txhua qhov lawm, muaj ibtxha tsiv moog nyob rua peg xeev Faunikias, muaj ibtxha tsiv rua tim koog Povtxwv Xaipas hab lub nroog Aati-aukias, hab puab qha Txujmoo zoo rua cov Yudais nkaus xwb.

²⁰Tabsis cov ntseeg kws tsiv moog ntawd, muaj cov tuabneeg kws nyob huv koog Povtxwv Xaipas hab koog Povtxwv Kulenes, qee leej moog txug rua huv lub nroog Aati-aukias, ces puab qha txujmoo zoo kws has txug tug Tswv Yexus rua lwm Tsaav Tuabneeg hab.

²¹Tug Tswv lub fwjchim nrug puab, txhaj muaj tuabneeg coob coob ntseeg hab lug cuag tug Tswv.

²²Thaus cov ntseeg kws nyob nraag lub nroog Yeluxalees nov le nuav, puab txawm khaiv Npananpas moog rua peg Aati-aukias.

²³Thaus Npananpas moog txug peg, nwg pum has tas Vaajtswv tau foom koob moov rua puab, nwg zoo sab kawg le hab nwg txhawb puab tug zug, kuas puab muab sab npuab tug Tswv hab ntseeg tag tag.

²⁴Npananpas yog ib tug tuabneeg ncaaj nceeg, nwg puv npo Vaaj Ntsujplig tug Dlawbhuv, hab muab sab rau ntseeg. Nwg coj tau cov tuabneeg kws nyob huv lub nroog ntawd coob leej lug ntseeg tug Tswv.

²⁵Tom qaab ntawd Npananpas txawm moog nrhav Xaulus huv lub nroog Talaxus.

²⁶Thaus nwg nrhav tau Xaulus lawm, nwg coj Xaulus lug nrug nwg nyob huv lub nroog Aati-aukias. Obtug nrug cov ntseeg nyob tau ib xyoos, hab obtug naj nub qha cov ntseeg kws coob coob ntawd. Pawg ntseeg kws nyob huv lub nroog Aati-aukias yog thawj pawg kws tis lub npe hu ua Cov Ntseeg Yexus.

²⁷Lub sijhawm ntawd muaj ib cov cev Vaajtswv lug tuaj nraag lub nroog Yeluxalees tuaj txug peg lub nroog Aati-aukias.

²⁸Vaaj Ntsujplig kuas cov cev Vaajtswv lug ntawd tug kws hu ua Ankanpus sawv ntsug qha txug tej kws yuav tshwm lug yaav tom ntej. Nwg has tas yuav muaj kev tshaib kev nqhes thoob plawg lub nplajteb. (Ces lub sijhawm kws Kelaudi-us ua vaajntxwv txawm muaj kev tshaib plaab tag).

²⁹Cov ntseeg suavdlawg pum zoo kuas ib leeg muab mivntsiv nyaj lawv le puab muaj xaa moog rua cov kwvtij ntseeg Yexus kws nyob nraag lub xeev Yudas.

³⁰Puab txawm ua le ntawd, puab muab cov nyaj ntawd rua Xaulus hab Npananpas coj moog rua cov txwjlaug kws saib cov ntseeg nraag.