Read Hmong Njua Teg Num 12 Bible Online

Teg Num 12 - Hmong Njua bible

Teg Num 12

¹Lub sijhawm ntawd Vaajntxwv Helauj muab cov ntseeg Yexus qee leej coj moog tsimtxom.

²Helauj kuas luas muab ntaaj tua Yauhaas tug tijlaug Yakaunpaus povtseg.

³Thaus nwg pum has tas tej kws nwg ua ntawd hum cov Yudais sab, nwg txawm has kuas luas nteg Petus coj moog kaw rua huv tsev lojcuj. (Thaus ntawd suavdlawg taabtom ua Kevcai Noj Ncuav Tsi Xyaw Keeb.)

⁴Thaus puab nteg tau Petus lawm, puab coj Petus moog kaw rua huv tsev lojcuj hab kuas plaub paab tubrog zuv Petus, ib paab twg plaub leeg. Helauj xaav has tas, tom qaab kws ua Kevcai Hlaa Dlhau taag, nwg yuav coj Petus lug txav txim hab muab Petus tua taabmeeg cov pejxeem.

⁵Thaus Petus tseem raug kaw huv tsev lojcuj, cov ntseeg kub sab lug thov Vaajtswv paab Petus.

⁶Ua ntej nub kws Helauj coj Petus lug rua cov pejxeem, mo ntawd Petus pw tsaug zug huv ob tug tubrog kis nruab nraab. Luas muab ob txuj saw hlau khi Petus, hab muaj tubrog zuv lub tsev lojcuj huv tuabsi.

⁷Taamsim ntawd tug Tswv ib tug timtswv txawm lug sawv ntawm Petus ib saab, hab muaj dluab ci lug rua huv chaav tsev kws Petus pw. Tug timtswv ntawd tuav nkaus Petus xubpwg dlaj kuas Petus tsim hab has rua Petus has tas, “Koj ca le sawv!” Ces taamsim ntawd ob txuj saw hlau kws khi Petus ob txhais teg txawm nplaam plawg lawm.

⁸Tug timtswv has rua Petus has tas, “Koj ca le sa hlaab khov kho hab rau khau.” Petus txawm ua le ntawd. Tug timtswv rov has rua Petus has tas, “Koj ca le muab koj lub tsho ntev naav hab nrug kuv moog.”

⁹Petus txawm lawv tug timtswv qaab tawm moog rua saab nrau. Petus tsi paub sov yog nwg ua npau suav lossis yog tag; nwg xaav has tas ntshai yog nwg ua npau suav xwb.

¹⁰Tug timtswv hab Petus moog dlhau thawj paab tubrog hab moog dlhau paab ob, obtug maam le moog txug ntawm lub roojvaag hlau kws yuav moog rua huv lub nroog. Thaus obtug lug txug ntawm lub roojvaag hlau, lub roojvaag txawm qheb hlo rua obtug, obtug txawm tawm moog. Obtug taug kev moog mivntsiv, ces tug timtswv txawm ncaim Petus lawm.

¹¹Thaus ntawd Petus txhaj feeb meej hab nwg has tas, “Nwgnuav kuv paub tseeb has tas, Vaajtswv khaiv nwg ib tug timtswv sau ntuj lug paab kuv dlim ntawm Helauj txhais teg hab dlim ntawm tej kev phem kws cov Yudais yuav ua rua kuv lawm.”

¹²Thaus Petus paub has tas Petus dlim lawm, Petus txawm moog rua tom Malis kws yog Yauhaas Malakaus nam lub tsev. Muaj tuabneeg coob coob tuaj ua ke thov Vaajtswv huv.

¹³Petus moog khob qhovrooj hab hu, ces ib tug nkauj qhe hu ua Laudas txawm lug xauj saib yog leejtwg.

¹⁴Thaus nwg ncu tau has tas yog Petus lub suab, nwg zoo sab kawg le, nwg tsi ncu qheb qhovrooj, nwg txawm dlha ceev nrooj moog qha rua suavdlawg has tas, Petus sawv saab nrau qhovrooj.

¹⁵Puab has rua Laudas has tas, “Ntshai koj vwm lawm.” Tabsis Laudas has tas, “Yeej yog Petus tag tag le.” Puab txawm has tas, “Ntshai yog tug timtswv kws ibtxwm nrug Petus xwb.”

¹⁶Petus tseem nyob saab nrau khob khob qhovrooj. Thaus puab qheb hlo qhovrooj, puab pum dlheev Petus, puab xaav tsi thoob le.

¹⁷Petus kuas suavdlawg ua tuabywv, ces Petus txawm qha qhov kws tug Tswv coj nwg tawm huv tsev lojcuj lug rua puab noog. Hab nwg has rua puab has tas, “Mej ca le moog qha tej nuav rua Yakaunpaus hab cov ntseeg paub”. Thaus Petus has le ntawd taag ces nwg txawm moog rua lwm qhov lawm.

¹⁸Thaus kaaj ntug, cov tubrog kws zuv lub tsev lojcuj tsi pum Petus lawm, puab poob sab kawg le.

¹⁹Helauj khaiv tuabneeg moog nrhav Petus, tabsis puab nrhav tsi tau Petus. Helauj txawm hu cov tubrog kws zuv lub tsev lojcuj lug nug hab kuas luas muab cov tubrog kws zuv lub tsev lojcuj tua povtseg. Tom qaab ntawd Helauj tawm huv lub xeev Yudas moog nyob tau ib ntus peg lub nroog Xixaleyas.

²⁰Helauj chim rua cov tuabneeg kws nyob huv lub nroog Tiles hab Xidoos, cov tuabneeg ntawd ua ke tuaj cuag Helauj. Puab xub moog cuag tug nom kws hu ua Npalatus kws saib Helauj lub tsev kuas nwg paab, puab maam le moog cuag Helauj hab thov nrug nwg sis raug zoo. Puab ua le ntawd, rua qhov puab cov tuabneeg pheej moog yuav mov huv Helauj lub tebchaws lug noj.

²¹Thaus txug nub kws Helauj teem rua puab tuaj cuag nwg, Helauj naav nwg cev rig tsho vaajntxwv hab nyob sau nwg lub zwmtxwv has lug rua cov pejxeem.

²²Cov pejxeem has nrov nrov has tas, “Lub suab nuav yog vaajtswv lub suab tsi yog tuabneeg lub.”

²³Taamsim ntawd tug Tswv ib tug timtswv lug rau txim rua Helauj, rua qhov Helauj tsi fwm Vaajtswv. Txawm muaj kaas noj Helauj lub cev, Helauj txhaj tuag lawm.

²⁴Vaajtswv Txujlug txhaj luj hlub hab nthuav dlaav zuj zug moog rua txhua qhov.

²⁵Thaus Npananpas hab Xaulus ua num taag, obtug txawm rov huv lub nroog Yeluxalees moog, hab obtug coj Yauhaas Malakaus nrug obtug moog.