Read Hmong Njua Teg Num 13 Bible Online

Teg Num 13 - Hmong Njua bible

Teg Num 13

¹Pawg ntseeg kws nyob huv lub nroog Aati-aukias muaj qee leej yog cov cev Vaajtswv lug, qee leej yog xwbfwb: Cov ntawd ib tug yog Npananpas, ib tug yog Xime-oos (kws hu ua Dlub), ib tug yog Luki-us (kws yog tuabneeg Kulenes), ib tug yog Mana-ees (kws nrug tug tswv xeev Helauj luj hlub ua ke); hab ib tug yog Xaulus.

²Thaus puab taabtom ua kevcai yoo mov hab thov Vaajtswv, Vaaj Ntsujplig tug Dlawbhuv has rua puab has tas, “Mej ca le tsaa Npananpas hab Xaulus ua teg num kws kuv kuas obtug ua.”

³Thaus puab ua kevcai yoo mov hab thov Vaajtswv taag, puab tsaa teg rua obtug hab khaiv obtug moog ua num.

⁴Vaaj Ntsujplig tug Dlawbhuv khaiv Npananpas hab Xaulus obtug moog. Obtug moog rua tom lub nroog Xelukias, hab caij nkoj moog rua tim koog Povtxwv Xaipas.

⁵Thaus obtug moog txug huv lub nroog Xalamis, obtug txawm moog qha Vaajtswv txujlug rua huv cov Yudais tej tsev saablaaj. Obtug coj Yauhaas Malakaus moog paab obtug ua num.

⁶Thaus puab moog txug ntawm lub koog Povtxwv Pafaus, puab ntsib ib tug txivneej hu ua Npalas-Yexus, nwg yog ib tug tuabneeg Yudais, nwg txawj ua khawvkoob hab nwg has tas nwg yog ib tug cev Vaajtswv lug.

⁷Npalas-Yexus yog tug nom kws kaav lub koog Povtxwv Xaipas tug phoojywg. Tug nom ntawd ntse heev, nwg hu ua Xelanki-us Paulus. Nwg txhaj khaiv tuabneeg moog hu Npananpas hab Xaulus lug cuag nwg, rua qhov nwg xaav noog Vaajtswv txujlug.

⁸Tabsis tug kws txawj ua khawvkoob, (nwg lub npe Kilis hu ua Elimas), nwg tawmtsaam Npananpas hab Xaulus, hab tsi pub tug nom ntawd ntseeg Vaajtswv txujlug.

⁹Xaulus tug kws muaj dlua ib lub npe hu ua Paulus puv npo Vaaj Ntsujplig tug Dlawbhuv, nwg saib ntsoov Elimas,

¹⁰hab has tas, “Koj yog Dlaab Ntxwgnyoog tug tub! Koj tawmtsaam txhua yaam kws zoo, koj nyam dlaag ntxag hab ua phem xwb. Koj tseem yuav muab Vaajtswv txujlug kws yog qhov tseeb hloov ua lug dlaag hab los!

¹¹Nwgnuav tug Tswv yuav rau txim rua koj; koj yuav tsi pum kev ib ntus, txawm yog dluab tshaav ntuj los koj yeej yuav saib tsi pum.” Taamsim ntawd txawm muaj ib yaam zoo le fuab lug plooj nkaus Elimas ob lub qhovmuag, ces nwg txawm tsi pum kev lawm, nwg xuas moog rua nuav rua u nrhav tuabneeg tuav nwg teg coj nwg moog.

¹²Thaus tug nom pum le ntawd, nwg txawm ntseeg; nwg xaav tsi thoob rua Vaajtswv txujlug kws nwg nov ntawd.

¹³Paulus hab nwg ob tug phoojywg caij nkoj ntawm lub nroog Pafaus moog txug tim lub nroog Penkas huv tebchaws Paafilias, ces Yauhaas Malakaus txawm ncaim Paulus hab Npananpas obtug rov qaab moog rua nraag lub nroog Yeluxalees lawm.

¹⁴Paulus hab Npananpas sawv kev huv Penkas moog txug peg lub nroog Aati-aukias kws nyob huv tebchaws Pixidias. Nub Xanpataus obtug moog noog lug qhuab qha huv lub tsev saablaaj.

¹⁵Thaus muaj tuabneeg nyeem Mauxes txuj Kevcai hab tej lug kws cov cev Vaajtswv lug sau ca taag lawm, cov tuabneeg kws saib lub tsev saablaaj kuas ib tug moog has rua obtug has tas, “Ob tug kwvtij, yog meb muaj lug has txhawb suavdlawg zug, thov meb ca le has.”

¹⁶Paulus txawm sawv tseeg hab kuas suavdlawg nyob tuabywv, nwg pib qha has tas: “Cov kwvtij Yixalayees hab lwm Tsaav Tuabneeg kws fwm Vaajtswv, mej ca le noog kuv qha!

¹⁷Cov Yixalayees tug Vaajtswv xaiv peb cov yawmkoob lug ua nwg tsaav tuabneeg. Thaus puab tsiv moog nyob nraag tebchaws Iziv, Vaajtswv foom koob moov rua puab, puab fuamvaam coob heev. Vaajtswv tug kws muaj fwjchim luj kawg nkaus tau coj puab tsiv tawm nraag tebchaws Iziv lug.

¹⁸Vaajtswv ua sab ntev rua puab tau plaub caug xyoo tom taj suabpuam.

¹⁹Thaus puab lug txug huv tebchaws Kana-aas, Vaajtswv ua rua xyaa tsaav tuabneeg kws nyob huv lub tebchaws ntawd puamtsuaj taag huv tuabsi, hab Vaajtswv muab lub tebchaws ntawd rua cov Yixalayees nyob.

²⁰Puab nyob huv luv tebchaws ntawd tau kwvlaam le plaub puas tsib caug xyoo. “Tom qaab ntawd, Vaajtswv tsaa cov thawjtswj kaav cov Yixalayees lug txug thaus kws Xamuyees ua tug cev Vaajtswv lug.

²¹Thaus puab thov kuas Vaajtswv tsaa ib tug vaajntxwv kaav puab, Vaajtswv txawm tsaa Kises kws yog xeem Npeenyamees tug tub Xa-ules ua vaajntxwv kaav puab tau plaub caug xyoo.

²²Tom qaab ntawd Vaajtswv tsi pub Xa-ules ua vaajntxwv lawm, ces Vaajtswv txawm tsaa Daviv ua vaajntxwv kaav cov Yixalayees, rua qhov Vaajtswv has tas, ‘Kuv pum Yexais tug tub Daviv yog tug kws ua hum kuv sab, hab nwg yeej yuav ua lawv le txhua yaam kws kuv kuas nwg ua’.

²³Vaajtswv tau tsaa Daviv ib tug xeebntxwv lug ua cov Yixalayees tug Cawmseej lawv le Vaajtswv tau coglug tseg lawm. Tug Cawmseej ntawd yog Yexus ntaag.

²⁴Thaus Yexus tseem tsi tau ua nwg teg num, Yauhaas qha kuas cov Yixalayees tso puab tej kev txhum tseg hab ua kevcai raus dlej.

²⁵Thaus Yauhaas ua nwg teg num yuav tav, nwg has rua suavdlawg has tas, ‘Mej xaav has tas kuv yog leejtwg? Kuv tsi yog tug kws mej taabtom tog, tug kws yuav lawv kuv qaab lug, nwg muaj fwjchim luj dlua kuv, kuv tub tsi tsimnyog hle nwg txhais khau ntawm nwg kutaw.’

²⁶“Cov kwvtij kws yog Anplahaas cov xeebntxwv hab mej txhua tug kws yog lwm Tsaav Tuabneeg kws tuaj pehawm Vaajtswv ntawm nuav, txujlug kws yog txujkev cawm dlim tub lug txug peb lawm!

²⁷Cov tuabneeg kws nyob huv lub nroog Yeluxalees hab puab cov numtswv, puab tsi paub has tas, Yexus yog tug Cawmseej, hab puab tsi totaub tej lug kws cov cev Vaajtswv lug sau tseg kws muaj tuabneeg naj nub nyeem rua puab noog txhua nub Xanpataus. Tabsis qhov kws puab txav txim muab Yexus tua ntawd, tub yog muaj kuas tav lawv le tej lug kws cov cev Vaajtswv lug tau sau tseg lawm.

²⁸Txawm yog puab nrhav tsi tau txim rua Yexus los puab tseem kuas Philaj muab nwg tua povtseg.

²⁹Txhua yaam kev phem kws puab ua rua Yexus yog muaj lawv le Vaajtswv txujlug kws has txug nwg lawm, puab muab Yexus lub cev txu sau tug ntoo khaublig lug hab kwv moog log rua huv ib lub qhov ntxaa.

³⁰Tabsis Vaajtswv tub tsaa Yexus sawv huv qhov tuag rov qaab lug,

³¹hab Yexus lug tshwm rua cov tuabneeg kws nrug Yexus tuaj peg lub xeev Kalilais tuaj rua nraag lub nroog Yeluxalees pum ntau zag. Puab txhaj ua tau timkhawv rua cov Yixalayees has tas, puab tub pum Yexus lawm.

³²Qhov kws wb tuaj ntawm nuav, yog wb xaav kuas mej nov Txujmoo Zoo kws Vaajtswv tau coglug tseg rua peb cov yawmkoob lawm has tas,

³³nwg yuav paab peb cov kws yog puab cov xeebntxwv. Qhov kws Vaajtswv tsaa Yexus sawv huv qhov tuag rov qaab lug, yog Vaajtswv ua lawv le Vaajtswv tau coglug tseg rua huv phoo Ntawv Nkauj ntu ob has tas: ‘Koj yog kuv tug Tub; nub nua kuv yog koj Txiv lawm.’

³⁴Hab qhov nuav ntaag yog qhov kws Vaajtswv has txug qhov kws nwg yuav tsaa Yexus sawv huv qhov tuag rov qaab lug, Yexus lub cev yuav tsi lwj rua huv lub qhov ntxaa. Thaus Vaajtswv has txug zaaj nuav, Vaajtswv has tas, ‘Kuv yuav foom koob moov nplua mag rua mej lawv le kuv tub coglug tseg rua Daviv lawm;’

³⁵Hab nwg tseem has dlua lwm zaaj has tas, ‘Koj yuav tsi ca koj tug tubkhai kws muab sab npuab koj lub cev lwj rua huv lub qhov ntxaa.’

³⁶Thaus Daviv ua tej num kws Vaajtswv muab rua nwg ua tav lawm, tom qaab ntawd nwg txawm tuag. Puab coj nwg lub cev moog log nrug nwg cov yawmkoob, hab nwg lub cev lwj rua huv qhov ntxaa lawm.

³⁷Tabsis tug kws Vaajtswv tsaa sawv huv qhov tuag rov qaab lug, tug ntawd lub cev tsi lwj le.

³⁸Cov kwvtij, mej yuavtsum paub tseeb has tas qhov kws wb taabtom qha rua mej, yog wb qha has tas, Yexus yog tug kws zaam tau mej lub txim.

³⁹Hab mej yuavtsum paub has tas, txhua tug kws ntseeg Yexus, Yexus yuav dlaws tej kev txhum kws khi puab huv tuabsi moog. Tej kev txhum ntawd, Mauxes txuj kevcai yeej dlaws tsi tau.

⁴⁰Yog le ntawd, mej yuavtsum ceevfaaj nyob tsaam mej raug tej kws cov cev Vaajtswv lug sau tseg has tas,

⁴¹‘Mej saib, mej cov kws thuam Vaajtswv tej lug, mej yuav xaav tsi thoob hab mej yuav puamtsuaj moog, rua qhov lub sijhawm nuav, kuv taabtom ua kuv teg num. Txawm yog muaj tuabneeg qha teg num ntawd rua mej los mej yuav tsi ntseeg!’ ”

⁴²Thaus Paulus hab Npananpas taabtom tawm huv tsev saablaaj moog, suavdlawg txawm thov has tas, “Nub Xanpataus tom ntej nuav, thov meb rov tuaj qha peb dlua hab.”

⁴³Thaus suavdlawg rov moog tsev taag lawm, txawm muaj cov Yudais hab lwm Tsaav Tuabneeg kws coj cov Yudais txuj kevcai ntau leej nrug Paulus hab Npananpas obtug moog. Obtug nrug puab thaam hab txhawb puab zug kuas puab muab sab rau ntseeg hab ncu ntsoov Vaajtswv tshaav ntuj.

⁴⁴Thaus txug nub Xanpataus cov tuabneeg kws nyob huv lub nroog ntawd tuaj yuav laug taag tuaj noog Vaajtswv txujlug.

⁴⁵Thaus cov Yudais pum muaj tuabneeg coob coob tuaj noog obtug qha, puab khib, puab thuam tej lug kws Paulus qha hab tshev Paulus.

⁴⁶Tabsis Paulus hab Npananpas obtug yimfuab muaj sab tawv qha. Obtug has tas, “Wb yuavtsum xub qha Vaajtswv txujlug rua mej ua ntej, tabsis mej tsi txais yuav. Hab mej suav has tas, mej tsi tsimnyog tau txujsa ntev dlhawv moog ibtxhis. Yog le ntawd wb yuav tso mej tseg hab moog qha lwm Tsaav Tuabneeg.

⁴⁷Rua qhov Vaajtswv has rua wb has tas: ‘Kuv tsaa koj ua qhov kws pum kev ci rua lwm tsaav tuabneeg. Koj yuav qha txujkev cawm dlim moog thoob plawg huv qaab ntuj nuav.’ ”

⁴⁸Thaus lwm Tsaav Tuabneeg nov le ntawd, puab zoo sab hab qhuas tug Tswv txujlug heev; hab cov tuabneeg kws Vaajtswv xaiv lug yuav txujsa ntev dlhawv moog ibtxhis txawm lug ntseeg.

⁴⁹Tug Tswv txujlug txawm nrov nchaa moog thoob plawg cheebtsaam ntawd.

⁵⁰Tabsis cov Yudais ua rua cov txivneej kws yog cov thawjcoj huv lub nroog hab cov quaspuj kws yog lwm Tsaav Tuabneeg kws coj Vaajtswv txuj kevcai nruj tau kev ntxhuv sab. Cov Yudais ntawd tsimtxom Npananpas hab Paulus, hab ntab kuas obtug tawm huv cheebtsaam ntawd moog.

⁵¹Obtug txawm nchus tej moov aav kws lu obtug kutaw povtseg, kuas puab paub has tas, obtug tsi quavntsej puab, hab obtug txawm moog qha huv lub nroog Ikaune-us lawm.

⁵²Cov ntseeg huv lub nroog Aati-aukias zoo sab kawg le, hab puab puv npo Vaaj Ntsujplig tug Dlawbhuv.