Read Hmong Njua Teg Num 14 Bible Online

Teg Num 14 - Hmong Njua bible

Teg Num 14

¹Thaus Paulus hab Npananpas nyob huv lub nroog Ikaune-us, pheej muaj tuabneeg tsimtxom obtug hab. Obtug moog qha Vaajtswv txujlug huv cov Yudais tej tsev saablaaj, muaj cov Yudais hab lwm Tsaav Tuabneeg lug ntseeg coob heev.

²Tabsis cov Yudais kws tsi ntseeg ntxag kuas lwm Tsaav Tuabneeg nrug puab ntxub cov kws ntseeg Yexus.

³Yog le ntawd, ob tug timthawj txawm nyob huv lub nroog ntawd tau ntev loo. Obtug muaj sab tawv qha txug tug Tswv kws pub fwjchim rua obtug ua tej txujci tseemceeb, kuas suavdlawg paub has tas Vaajtswv txuj koob moov kws obtug qha yog txuj tseeb.

⁴Ces cov tuabneeg kws nyob huv lub nroog ntawd txawm tawg ua ob paab: ib paab tuaj cov Yudais tog, hab ib paab tuaj ob tug timthawj tog.

⁵Lwm Tsaav Tuabneeg hab cov Yudais qee leej nrug puab cov thawjcoj txawm tuavhuv ua phem hab yuav muab pobzeb ntaus ob tug timthawj.

⁶Thaus ob tug timthawj nov le ntawd, obtug txawm tsiv moog rua nraag lub nroog Lixathas hab lub nroog Denpis kws nyob huv tebchaws Likaunias hab huv tej cheebtsaam kws nyob ibncig ntawd.

⁷Hab obtug qha txujmoo zoo rua cov tuabneeg huv ob lub nroog ntawd.

⁸Nyob huv lub nroog Lixathas muaj ib tug txivneej tuag ceg thaus nruab thab lug, nwg moog tsi taug kev le.

⁹Tug txivneej ntawd ua tuab zoo noog tej lug kws Paulus qha. Paulus tsaa qhovmuag saib nwg, hab pum has tas nwg muaj kev ntseeg txaus paab nwg ob txhais ceg zoo.

¹⁰Ces Paulus txawm has nrov nrov rua nwg has tas, “Koj ca le sawv tseeg.” Tug ntawd txawm sawv tseeg ncig moog ncig lug.

¹¹Thaus suavdlawg pum tej kws Paulus ua ntawd, puab qw puab cov lug Likaunias nrov nrov has tas, “Tej vaajtswv txa ua tuabneeg lug cuag peb lawm.”

¹²Puab txawm muab Npananpas hu ua Xus, hab muab Paulus hu ua Helemes, rua qhov Paulus yog tug qha.

¹³Tug povthawj kws teev tug vaajtswv Xus, nwg lub tuamtsev nyob saab nrau ntug nroog, nwg txawm caab ib tug txiv nyuj hab nqaa paaj ntoos tuaj txug ntawm lub roojvaag kws yuav moog rua huv lub nroog. Tug povthawj ntawd hab cov pejxeem yuav coj tej ntawd tuaj fij rua ob tug timthawj.

¹⁴Thaus Npananpas hab Paulus nov has tas puab yuav ua le ntawd rua obtug, obtug txawm muab obtug ob lub tsho dlua hab dlha moog rua huv cov tuabneeg coob coob ntawd. Obtug has nrov nrov rua puab has tas,

¹⁵“Mej ua dlaabtsi le nuav? Wb yog tuabneeg ib yaam le mej hab xwb! Wb tuaj ntawm nuav, yog tuaj qha Txujmoo Zoo rua mej, kuas mej tso tej kws mej ua tsi muaj qaabhau tseg hab lug ntseeg tug Vaajtswv kws muaj sa nyob. Nwg yog tug kws tsim lub ntuj, hab lub nplajteb, dlej havtxwv hab ib puas tsaav yaam kws nyob sau nruab ntug hab huv havtxwv.

¹⁶Yaav taag lug, Vaajtswv ca txhua tsaav tuabneeg, nyag ua lawv le nyag lub sab nyam.

¹⁷Teg num zoo kws Vaajtswv ibtxwm ua, yog nwg pub muaj tshaav muaj naag, kuas tej qoobloo sav lawv caij lawv nyoog, hab pub zaub mov rua mej noj kuas mej tau nyob kaaj sab lug. Tej nuav qha rua suavdlawg paub tseeb has tas muaj Vaajtswv tag.”

¹⁸Txawm yog ob tug timthawj qha le ntawd rua puab los puab pheej yuav muab khoom fij rua obtug, obtug cheem yuav laug tsi yeej puab.

¹⁹Thaus cov Yudais kws nyob huv lub nroog Aati-aukias huv tebchaws Pixidias hab huv lub nroog Ikauni-us tuaj txug; puab txawm ntxag kuas suavdlawg tuaj puab tog. Puab muab pobzeb ntaus Paulus hab muab nwg hai tawm huv lub nroog moog, puab xaav has tas nwg tuag lawm.

²⁰Tabsis thaus cov ntseeg tuaj sawv vij Paulus, Paulus sawv hab rov moog rua huv lub nroog. Nub tom qaab Paulus hab Npananpas txawm moog rua nraag lub nroog Denpis lawm.

²¹Thaus Paulus hab Npananpas qha txujmoo zoo huv lub nroog Denpis, muaj ntau leej lug ntseeg. Tom qaab ntawd, obtug txawm rov moog rua peg lub nroog Lixathas, lub nroog Ikauni-us, hab lub nroog Aati-aukias huv cheebtsaam Pixidias.

²²Obtug nplig hab txhawb kuas cov ntseeg muab sab rau ntseeg tsi xob tso kev ntseeg tseg. Obtug qha puab has tas, “Peb cov ntseeg yeej yuav raug ntau yaam kev txomnyem, peb txhaj tau moog Vaajtswv lub Tebchaws.”

²³Paulus hab Npananpas tsaa muaj cov txwjlaug rua txhua pawg ntseeg, obtug ua kevcai yoo mov hab thov Vaajtswv muab obtug fij rua Vaajtswv tug kws puab ntseeg hab ca sab rua.

²⁴Tom qaab ntawd obtug txawm hlaa cheebtsaam Pixidias moog txug nraag tebchaws Paafilias.

²⁵Obtug qha Vaajtswv txujlug huv lub nroog Penkas taag, ces obtug txawm moog rua huv lub nroog Atalias,

²⁶hab obtug caij nkoj lug rua tim lub nroog Aati-aukias kws cov ntseeg tsaa obtug ua ob tug ua teg num qha txujmoo zoo kws nwgnuav obtug tub ua tav lawm.

²⁷Thaus obtug rov qaab lug txug huv lub nroog Aati-aukias, obtug hu cov ntseeg tuaj ua ke, obtug pav txhua yaam kws Vaajtswv tau paab obtug, hab qha qhov kws Vaajtswv qheb kev rua lwm Tsaav Tuabneeg lug ntseeg Vaajtswv lawm rua puab noog.

²⁸Obtug nrug cov ntseeg ntawd nyob tau ib ntus.