Read Hmong Njua Teg Num 16 Bible Online

Teg Num 16 - Hmong Njua bible

Teg Num 16

¹Paulus moog txug peg lub nroog Denpis hab lub nroog Lixathas. Cov tuabneeg kws nyob huv lub nroog Lixathas muaj ib tug hu ua Timautes. Timautes nam yog ib tug tuabneeg Yudais kws ntseeg Vaajtswv, tabsis Timautes txiv yog tuabneeg Kilis.

²Cov ntseeg kws nyob huv lub nroog Lixathas hab huv lub nroog Ikaune-us suavdlawg puavleej fwm Timautes.

³Paulus xaav coj Timautes nrug nwg moog, Paulus txawm muab Timautes ua kevcai txav. Paulus ua le ntawd, rua qhov cov Yudais kws nyob huv lub tebchaws ntawd puavleej paub has tas, Timautes txiv yog tuabneeg Kilis.

⁴Paulus puab moog thoob plawg txhua lub nroog, puab qha tej kevcai kws cov timthawj hab cov txwjlaug nraag lub nroog Yeluxalees sau tuaj qha rua suavdlawg noog hab kuas suavdlawg ua lawv le tej kevcai ntawd.

⁵Yog le ntawd, cov ntseeg txhaj muaj zug heev hab naj nub muaj tuabneeg lug ntseeg coob quas zug ntxiv.

⁶Tom qaab ntawd Paulus puab moog thoob plawg huv cheebtsaam Felinkias hab cheebtsaam Kalatias, rua qhov Vaaj Ntsujplig tug Dlawbhuv tsi pub puab moog qha huv xeev Axias.

⁷Thaus puab moog txug peg Mixias nrimteb, puab yuav moog huv lub xeev Npithinias, tabsis Yexus tug Ntsujplig tsi pub puab moog.

⁸Puab txawm ca le hlaa dlhau plawg lub nroog Mixias moog rua nraag lub nroog Rhau-as.

⁹Mo ntawd Paulus txawm ua ywgtoog pum ib tug txivneej Makedaunias sawv ntsug thov Paulus has tas, “Thov koj hlaa tuaj paab peb cov kws nyob tim Makedaunias nuav.”

¹⁰Thaus Paulus ua ywgtoog ntawd, ces taamsim ntawd peb txawm sawbsim qhov txhua chaw yuav moog rua tim lub xeev Makedaunias, rua qhov peb paub tseeb has tas, Vaajtswv hu peb moog qha txujmoo zoo rua cov tuabneeg kws nyob tid.

¹¹Peb caij nkoj huv lub nroog Rhau-as ncaaj nraim moog rua peg koog Povtxwv Xamaulakes, hab nub tom qaab peb moog rua tim lub nroog Ne-apaulis.

¹²Peb taug kev tawm huv lub nroog Ne-apaulis moog rua peg lub nroog Filipis. Lub nroog Filipis yog lub tuamceeb nroog huv xeev Makedaunias kws yog cov tuabneeg Loos tswjfwm. Peb nyob ntawd tau ob peb nub.

¹³Thaus txug nub Xanpataus, peb txawm tawm huv lub nroog moog rua tom ntug dlej, peb xaav has tas nyaj yuav muaj ib qhov chaw kws cov Yudais moog thov Vaajtswv tod. Thaus peb moog txug, peb nyob quastsawg hab nrug cov quaspuj kws nyob tod thaam.

¹⁴Cov quaspuj ntawd muaj ib tug hu ua Lidias, nwg yog tuabneeg Thiyatilas, nwg tuaj ua luam muag ntaub yaajpwm. Nwg yog ib tug kws fwm Vaajtswv. Thaus nwg nov Paulus qha, tug Tswv qheb nwg lub sab, ua rua nwg totaub tej lug kws Paulus qha.

¹⁵Ces Lidias hab nwg tsev tuabneeg txawm ua kevcai raus dlej, Lidias has rua peb tas, “Yog mej pum has tas kuv ntseeg Vaajtswv tag, ces mej ca le nrug kuv moog su huv kuv tsev. Nwg coj peb heev, ces peb txawm nrug nwg moog rua tom nwg tsev.”

¹⁶Muaj ib nub thaus peb taabtom taug kev moog rua tom qhov chaw kws suavdlawg tuaj thov Vaajtswv, peb ntsib ib tug ntxhais qhev, nwg muaj dlaab hab paub txug yaav tom ntej. Qhov kws nwg txawj saib moov le ntawd, ua rua cov tuabneeg kws yuav nwg lug ua qhev tau nyaj ntau heev.

¹⁷Nwg pheej lawv Paulus peb qaab hab qw nrov nrov has tas, “Cov txivneej nuav yog Vaajtswv tug kws muaj Fwjchim Luj kawg nkaus cov tubkhai! Puab tuaj qha txujkev dlim txim rua mej.”

¹⁸Nwg pheej naj nub ua le ntawd, Paulus ntxhuv sab, ces Paulus txawm tig hlo moog has rua tug dlaab has tas, “Kuv tuav Yexus Khetos lub npe ntab koj, koj ca le tawm huv tug ntxhais nuav lub cev moog.” Taamsim ntawd dlaab txawm tawm plawg lawm.

¹⁹Thaus cov tuabneeg kws yuav tug ntxhais ntawd lug ua qhev pum has tas, puab yuav tsi tau nyaj lawm puab chim heev, puab txawm nteg kag Paulus hab Xilas obtug caab moog rua huv plawv nroog rua suavdlawg saib.

²⁰Puab coj Paulus obtug moog cuag cov numtswv Loos, hab qha rua cov numtswv has tas, “Ob tug txivneej nuav yog tuabneeg Yudais, obtug tuaj ua rua peb cov tuabneeg kws nyob huv lub nroog nuav ntxhuv.

²¹Obtug tuaj qha tej kevcai kws txawv peb txuj. Peb yog tuabneeg Loos, peb yeej tsi yuav tej kevcai ntawd hab peb coj tsi tau.”

²²Thaus puab has le ntawd taag, cov pejxeem txawm sau nthwv lug yuav ntaus Paulus hab Xilas obtug. Cov numtswv txawm muab obtug tej rig tsho dlua pis rhe povtseg hab kuas cov tubrog muab obtug nplawm.

²³Thaus cov tubrog muab obtug nplawm taag, puab txawm coj obtug moog kaw rua huv tsev lojcuj, puab kuas tug kws zuv lub tsev lojcuj zuv obtug zoo zoo.

²⁴Thaus puab has le ntawd taag, tug kws zuv lub tsev lojcuj txawm muab obtug kaw rua chaav huv plawv hab muab obtug xauv kutaw ruaj ruaj ca.

²⁵Thaus kwvlaam ib taag mo, Paulus hab Xilas taabtom thov Vaajtswv hab hu nkauj qhuas Vaajtswv. Cov tuabneeg kws nrug obtug nyob ua ke huv tsev lojcuj, puab suavdlawg noog obtug thov Vaajtswv hab hu nkauj.

²⁶Thaus obtug tseem hu nkauj, ua cav aav txawm tseeg quas nkawg ua rua lub tsev lojcuj ua zug koog. Ces taamsim ntawd lub tsev lojcuj tej qhovrooj txawm ca le qheb taagnrho hab tej saw hlau kws khi cov tuabneeg raug txim tej teg taw txawm nplaam taag huv tuabsi.

²⁷Tug kws zuv lub tsev lojcuj, nwg tsim dlheev nruab dlaab ndlub lug, ua cav tej qhovrooj tub qheb taag lawm. Thaus nwg pum le ntawd, nwg xaav has tas, ntshai cov tuabneeg raug txim tsiv taag lawm. Ces nwg txawm rhu hlo nwg raab ntaaj lug, yuav rov tua nwg.

²⁸Tabsis Paulus hu nrov nrov has tas, “Koj tsi xob ua le ko rua koj, peb txhua tug puavleej tseem nyob txhij ntawm nuav.”

²⁹Tug kws zuv lub tsev lojcuj kuas ib tug coj teeb moog rua nwg. Nwg txawm dlha ceev nrooj moog rua huv, nwg txhus caug ndlua ntawm Paulus hab Xilas kutaw. Nwg ntshai ua ib ce tshee quas nyo.

³⁰Nwg coj Paulus obtug tawm lug, nwg nug obtug has tas, “Ob tug tijlaug, kuv yuav ua le caag, kuv txhaj dlim kuv lub txim?”

³¹Paulus obtug teb has tas, “Koj hab koj tsev tuabneeg ca le ntseeg tug Tswv Yexus, mej txhaj yuav dlim lub txim.”

³²Obtug qha tug Tswv txujlug rua tug kws zuv lub tsev lojcuj hab cov tuabneeg kws nyob huv tsev noog.

³³Mo ntawd nwg coj obtug moog ntxuav obtug tej qhov txhaab kws luas nplawm to. Thaus ntxuav taag, nwg hab nwg tsev tuabneeg txawm ua kevcai raus dlej.

³⁴Thaus puab ua kevcai raus dlej taag, nwg coj Paulus hab Xilas rov moog peg nwg tsev hab ua mov rua obtug noj. Nwg hab nwg tsev tuabneeg zoo sab kawg le, rua qhov puab lug ntseeg Vaajtswv lawm.

³⁵Thaus kaaj ntug, cov numtswv Loos khaiv ib tug tub ceevxwm moog has rua tug kws zuv lub tsev lojcuj has tas, “Ca le tso obtug ntawm moog.”

³⁶Tug zuv lub tsev lojcuj txawm has rua Paulus has tas, “Cov numtswv tso tuabneeg tuaj has kuas kuv tso koj hab Xilas moog, yog le ntawd meb ca le moog kaaj sab lug.”

³⁷Tabsis Paulus has rua cov tub ceevxwm has tas, “Puab tsi tau taug wb zaaj saib wb puas tau ua txhum, puab ca le muab wb nplawm taabmeeg suavdlawg. Txawm yog wb tub yog tuabneeg Loos los puab tseem nplawm wb hab muab wb kaw rua huv tsev lojcuj nuav. Nwgnuav puab tsua yuav kuas wb ca le tawm tuabywv moog xwb yeej tsi tau le. Ca le kuas cov numtswv Loos tuaj tso wb.”

³⁸Cov tub ceevxwm rov moog qha tej nuav rua cov numtswv Loos noog. Thaus cov numtswv Loos nov has tas, Paulus hab Xilas yog tuabneeg Loos, puab ntshai kawg le.

³⁹Yog le ntawd, puab txawm tuaj thov Paulus hab Xilas obtug zaam txim rua puab. Thaus puab thov taag, puab coj obtug tawm huv tsev lojcuj, hab thov kuas obtug tawm huv lub nroog moog.

⁴⁰Thaus Paulus hab Xilas tawm huv tsev lojcuj moog, obtug moog rua tom Lidias tsev. Muaj cov kwvtij ntseeg tuaj nyob ua ke huv Lidias tsev, obtug txhawb kuas puab muab sab rau ntseeg, hab obtug moog rua lwm qhov lawm.