Read Hmong Njua Teg Num 17 Bible Online

Teg Num 17 - Hmong Njua bible

Teg Num 17

¹Thaus Paulus hab Xilas obtug hlaa dlhau lub nroog Aafipaulis hab lub nroog Apaulaunias lawm, obtug txawm moog txug nraag lub nroog Thexalaunikes. Cov Yudais muaj ib lub tsev saablaaj nyob huv lub nroog ntawd.

²Paulus txawm moog qha huv lub tsev saablaaj ntawd lawv le nwg txeev qha, nwg qha le ntawd peb zag rua peb nub Xanpataus. Nwg muab Vaajtswv txujlug qha hab teb tej lug kws puab nrug nwg sis caav.

³Nwg qha rua puab has tas, “Yeej yuav muaj tuabneeg muab tug Mexiyas tua, hab tom qaab ntawd, nwg yuav sawv huv qhov tuag rov qaab lug. Paulus has tas, tug Yexus kws kuv taabtom qha rua mej nuav, nwg yog tug Mexiyas ntaag.”

⁴Cov tuabneeg kws tuaj noog ntawd muaj qee leej ntseeg tej kws Paulus hab Xilas qha hab muaj cov tuabneeg Kilis kws fwm Vaajtswv hab cov quaspuj kws tseemceeb ntau leej ntseeg tej kws Paulus obtug qha.

⁵Tabsis cov Yudais ntxub obtug, puab txawm moog hu tej tuabneeg tsi tsimtxaj kws nyob tom tej kev tuaj nrug puab ua ib paab. Puab ua rua cov pejxeem kws nyob huv lub nroog ntawd ntxhuv, hab puab moog tsoo Yaxoos tsev nrhav Paulus hab Xilas obtug, puab yuav coj obtug tawm lug rua cov pejxeem txav txim.

⁶Tabsis puab nrhav tsi pum obtug, puab txawm nteg Yaxoos hab ob peb tug ntseeg caab moog cuag cov numtswv, puab qw nrov nrov has tas, “Cov tuabneeg nuav yog cov kws ua rua tej tuabneeg kws nyob txhua qhov ntxhuv. Nwgnuav puab tuaj txug huv peb lub nroog lawm.

⁷Tabsis Yaxoos tseem ca puab pw huv Yaxoos tsev hab. Tsi yog le ntawd xwb, puab tseem ua txhum vaajntxwv txuj kevcai, puab qha has tas, nwgnuav muaj dlua ib tug vaajntxwv hu ua Yexus lug kaav suavdlawg lawm.”

⁸Thaus cov pejxeem hab cov numtswv nov le ntawd, puab chim heev.

⁹Cov numtswv txawm muab Yaxoos puab nplua. Thaus puab them nyaj taag, cov numtswv txhaj tso puab moog.

¹⁰Thaus tsaus ntuj zuag cov ntseeg xaa Paulus hab Xilas obtug moog nraag lub nroog Npele-as. Thaus obtug moog txug nraag, obtug moog rua huv cov Yudais lub tsev saablaaj.

¹¹Paulus qha cov Yudais kws nyob huv lub nroog Npele-as yoojyim dlua le nwg qha cov kws nyob huv lub nroog Thexalaunikes. Cov tuabneeg Npele-as kub sab lug noog Vaajtswv txujlug hab puab naj nub kawm Vaajtswv txujlug, saib puas muaj tseeb lawv le Paulus qha.

¹²Cov tuabneeg ntawd muaj ntau leej lug ntseeg, muaj ntau leej quaspuj Kilis kws suavdlawg fwm hab ntau leej txivneej Kilis lug ntseeg hab.

¹³Thaus cov Yudais kws nyob huv lub nroog Thexalaunikes nov has tas, Paulus moog qha Vaajtswv txujlug nraag lub nroog Npele-as lawm, puab txawm tuaj ua rua cov pejxeem kws nyob huv lub nroog ntawd ntxhuv.

¹⁴Thaus cov ntseeg pum muaj le ntawd, puab txawm xaa Paulus moog rua nraag ntug havtxwv, tabsis Xilas hab Timautes tsi moog. Obtug ca le nyob huv lub nroog Npele-as.

¹⁵Puab xaa Paulus moog txug nraag lub nroog Athees. Thaus cov kws xaa Paulus yuav rov qaab lug rua peg lub nroog Npele-as, Paulus kuas puab moog has rua Xilas hab Timautes kuas tuaj cuag nwg sai sai.

¹⁶Thaus Paulus nyob huv lub nroog Athees tog Timautes hab Xilas obtug, nwg pum lub nroog ntawd muaj mlom ntau heev, nwg ntxhuv sab kawg le.

¹⁷Nwg moog huv lub tsev saablaaj, nwg naj nub nrug cov Yudais hab lwm Tsaav Tuabneeg kws fwm Vaajtswv hab cov tuabneeg kws tuaj rua ntawm tej kab sis caam.

¹⁸Thaus Paulus tseem nrug puab sis caam, ces cov xwbfwb kws yog cov Epikule-as paab hab cov Xatau-is paab qee leej tuaj nrug Paulus sis caam hab. Paulus qha has txug Yexus zaaj, hab qha txug qhov kws tuabneeg yuav sawv huv qhov tuag rov qaab lug. Puab cov ntawd qee leej thuam Paulus has tas, “Tug tuabneeg nuav nwg tub tsi txawj ntse, nwg qha ua dlaabtsi?” Qee leej has tas, “Saib mas zoo le yog nwg has txug lwm Tsaav Tuabneeg tej vaajtswv?”

¹⁹Yog le ntawd, puab txawm coj Paulus moog cuag cov numtswv ntawm Alepankus. Puab nug Paulus has tas, “Zaaj tshab kws koj qha ntawd yog le caag? Thov koj qha rua peb noog saib.

²⁰Peb nov koj qha tej zaaj txawv txawv kws peb tsi tau nov dlua. Peb xaav paub saib zaaj ntawd yog le caag tag.”

²¹(Puab has le ntawd, rua qhov cov tuabneeg Athees hab lwm Tsaav Tuabneeg kws nyob huv lub nroog ntawd, puab nyam noog hab nyam sis thaam txug tej zaaj txawv txawv kws puab tsi tau nov dlua.)

²²Ces Paulus txawm sawv ntsug taabmeeg cov numtswv hab qha puab has tas, “Cov tuabneeg Athees, kuv pum mej muab sab rau teev mej tej mlom heev.

²³Thaus kuv moog ncig saib mej lub nroog hab moog saib tej chaw kws mej pe mlom, kuv pum muaj lug sau rua ntawm ib lub thaaj has tas, ‘Muab rua tug Vaajtswv Kws Peb tsi Paub.’ Tug kws mej pehawm tabsis mej tsi paub ntawd tub yog tug kws nwgnuav kuv qha rua mej ntaag.

²⁴Tug Vaajtswv kws tsim lub nplajteb hab ib puas tsaav yaam kws nyob huv nplajteb nuav, tug ntawd yog tug Tswv kws kaav lub ntuj hab lub nplajteb, nwg yeej tsi nyob huv tej tsev kws tuabneeg ua.

²⁵Vaajtswv tsi pluag ib yaam dlaabtsi le, nwg yeej tsi kuas leejtwg ua ib yaam dlaabtsi rua nwg. Rua qhov Vaajtswv yog tug kws rau sav rau paa rua tuabneeg, hab pub ib puas tsaav yaam rua suavdlawg.

²⁶Vaajtswv tsim txhua tsaav tuabneeg tawm huv tuab tug tuabneeg le roj ntshaa lug xwb, hab kuas puab moog nyob thoob plawg huv lub nplajteb. Vaajtswv tu tebchaws rua puab hab teem sijhawm kuas puab nyob ntev le caag.

²⁷Vaajtswv ua le ntawd kuas puab txhaj le lug nrhav Vaajtswv. Yog puab kub sab lug xaav paub Vaajtswv, puab yeej yuav paub nwg, rua qhov Vaajtswv yeej nyob tsi dleb ntawm peb txhua tug.

²⁸lawv le qee leej has tseg has tas, ‘Muaj Vaajtswv, peb txhaj le caj sa moog moog lug lug hab muaj sa nyob.’ Mej cov kws txawj has lug txaj muaj qee leej has tas: ‘Peb puavleej yog Vaajtswv cov mivnyuas hab.’

²⁹Yog le ntawd, peb cov kws yog Vaajtswv cov mivnyuas lawm, peb tsi xob xaav has tas, Vaajtswv zoo ib yaam le tej mlom kws cov tuabneeg muaj tswvyim muab nyaj, muab kub nchuav hab muab pobzeb txaug ua.

³⁰Thaus tuabneeg tseem tsi tau paub Vaajtswv, Vaajtswv tsi suav tuabneeg lub txim. Tabsis nwgnuav Vaajtswv tub qha rua txhua tsaav tuabneeg kws nyob thoob plawg huv lub qaab ntuj nuav has tas, puab yuavtsum tso puab tej kev txhum tseg.

³¹Rua qhov Vaajtswv tub teem ib nub ca lawm, nub ntawd Vaajtswv yuav txav txim rua txhua tsaav tuabneeg huv qaab ntuj nuav. Tug kws Vaajtswv tsaa lug ua tug txav txim, nwg yuav txav txim ncaaj nceeg. Hab qhov kws Vaajtswv tsaa tug ntawd sawv huv qhov tuag rov qaab lug, qhov ntawd qha rua suavdlawg paub has tas, tug ntawd yog tug kws Vaajtswv tsaa tag.”

³²Thaus cov tuabneeg noog Paulus qha, puab nov Paulus has tas muaj ib tug kws tuag lawm sawv huv qhov tuag rov qaab lug, puab txawm thuam hab luag Paulus zum zawg. Tabsis muaj qee leej has tas, “Peb xaav rov noog koj qha zaaj nuav dlua hab.”

³³Tom qaab ntawd, Paulus txawm tawm huv qhov chaw kws suavdlawg tuaj saablaaj ntawd moog lawm.

³⁴Muaj qee leej lug ntseeg Yexus hab lug koom nrug Paulus. Cov tuabneeg kws lug ntseeg muaj ib tug nom hu ua Di-aunexi-us; muaj ib tug quaspuj hu ua Damalis, hab muaj dlua ob leeg lug ntseeg hab.