Read Hmong Njua Teg Num 18 Bible Online

Teg Num 18 - Hmong Njua bible

Teg Num 18

¹Tom qaab ntawd Paulus txawm tawm huv lub nroog Athees moog rua tim lub nroog Kauleethaus.

²Thaus nwg nyob huv lub nroog ntawd, nwg ntsib ib tug tuabneeg Yudais hu ua Akilas kws yug huv tebchaws Pootus. Akilas tug quaspuj hu ua Paxilas. Obtug nyavnyuas tuaj tim tebchaws Italis tuaj, rua qhov Vaajntxwv Kelaudi-us ntab cov Yudais txhua tug kuas tsiv tawm huv lub nroog Loos moog. Paulus txawm moog saib Akilas obtug,

³Paulus nrug obtug nyob hab nrug obtug ua num ua ke. Paulus xaws tsevntaub ib yaam le Akilas obtug.

⁴Txhua nub Xanpataus Paulus moog rua huv tsev saablaaj, nwg yum cov Yudais hab cov tuabneeg Kilis kuas lug ntseeg Yexus Khetos.

⁵Thaus Xilas hab Timautes obtug tuaj peg lub xeev Makedaunias tuaj txug huv lub nroog Kauleethaus, Paulus txawm qha Vaajtswv txujlug lawm xwb, nwg tsi ua lwm yaam num le. Nwg ua timkhawv rua cov Yudais has tas, Yexus yog tug Mexiyas.

⁶Thaus puab tawmtsaam hab thuam Paulus, Paulus txawm muab Paulus lub tsho nchus, hab has rua puab has tas, “Yog mej lub txim poob lug raug mej, mej tsi xob lam has tas kuv tsi qha mej. Txij nuav moog kuv yuav moog qha lwm Tsaav Tuabneeg.”

⁷Paulus txawm ncaim puab moog, nwg moog nrug ib tug txivneej kws yog lwm Tsaav Tuabneeg kws hu ua Titi-us Yuxatus nyob. Nwg yog ib tug kws fwm Vaajtswv, nwg lub tsev nyob ze lub tsev saablaaj.

⁸Kixapus kws yog tug thawj saib lub tsev saablaaj, hab nwg tsev tuabneeg txawm lug ntseeg Yexus Khetos hab muaj ntau leej kws nyob huv lub nroog Kauleethaus tau nov Paulus qha, puab txawm lug ntseeg hab ua kevcai raus dlej.

⁹Muaj ib mos Paulus ua ywgtoog pum tug Tswv lug has rua Paulus has tas, “Koj tsi xob ntshai, koj ca le qha moog tsi xob tso tseg,

¹⁰rua qhov kuv nrug koj nyob. Tsi muaj leejtwg yuav ua tau phem rua koj, rua qhov kuv cov thwjtim muaj ntau leej nyob huv lub nroog nuav.”

¹¹Yog le ntawd, Paulus txhaj nyob huv lub nroog Kauleethaus qha Vaajtswv txujlug rua suavdlawg tau ib xyoos hab rau hli.

¹²Lub sijhawm kws Nkali-aus ua nom kaav lub xeev Akhayas, cov Yudais tuavhuv ua ib lub sab nteg Paulus coj moog rua tom tsev has plaub.

¹³Puab has tas, “Tug txivneej nuav yum suavdlawg kuas pehawm Vaajtswv tsi lawv le peb txuj kevcai.”

¹⁴Thaus Paulus taabtom yuav teb puab, Nkali-aus has rua cov Yudais has tas, “Yog nwg tau ua txhum qhov twg lossis tau ua phem le caag rua mej cov Yudais, ces kuv yeej yuav ua sab ntev noog mej tej lug.

¹⁵Tabsis mej tsuas sis caav txug tej nyuas lug, tej nyuas npe hab mej tej kevcai kws mej has tsi sis hum xwb, ca mej sis has mej, tej kws mej has nuav kuv tsi kaam txav txim.”

¹⁶Nkali-aus txawm ntab puab tawm huv lub tsev has plaub moog.

¹⁷Ces puab cov ntawd txawm moog nteg Xauthenes kws yog tug thawj saib lub tsev saablaaj coj moog nplawm ntawm lub tsev has plaub saab nrau qaab tsistaug. Tabsis Nkali-aus tsi quavntsej le.

¹⁸Paulus nrug cov ntseeg nyob huv lub nroog Kauleethaus tau ob peb nub ntxiv, nwg maam le nrug Paxilas hab Akilas caij nkoj moog rua tim tebchaws Xilias. Thaus puab moog txug huv lub nroog Keekhale-as, ces Paulus txawm muab nwg cov plaubhau chais, rua qhov nwg tub coglug has tas, nwg yuav chais nwg cov plaubhau.

¹⁹Thaus Paulus moog txug tim lub nroog Efexus, Paulus txawm ncaim Paxilas hab Akilas obtug. Thaus puab sis ncaim lawm, Paulus moog rua huv tsev saablaaj hab nrug cov Yudais sis caam.

²⁰Puab cov ntawd thov kuas Paulus nrug puab nyob ib ntus, tabsis Paulus tsi kaam nyob.

²¹Thaus nwg yuav ncaim puab moog, nwg has rua puab has tas, “Yog Vaajtswv pum zoo kuv tuaj, kuv maam le rov qaab tuaj qha mej dlua.” Ces Paulus txawm caij nkoj tawm huv lub nroog Efexus moog lawm.

²²Thaus Paulus moog txug nraag lub nroog Xixaleyas, Paulus moog nraag lub nroog Yeluxalees hab moog saib cov ntseeg kws nyob nraag. Tom qaab ntawd nwg rov lug rua peg lub nroog Aati-aukias.

²³Nwg nyob huv lub nroog Aati-aukias ib ntus, nwg maam le moog txhua nrho qhov txhua chaw huv cheebtsaam Kalatias hab Felinkias, nwg moog qha cov ntseeg kuas muab sab rau ntseeg.

²⁴Thaus ntawd muaj ib tug txivneej Yudais hu ua Apaulaus kws nyob huv lub nroog Alexaadias, nwg tuaj txug huv lub nroog Efexus. Nwg yog ib tug kws txawj qha hab paub Vaajtswv txujlug.

²⁵Nwg kawm tug Tswv txuj Kevcai. Nwg kub sab lug qha txug Yexus zaaj, tej kws nwg qha ntawd puavleej muaj tseeb. Tabsis nwg tsuas paub txuj kevcai raus dlej kws Yauhaas qha xwb.

²⁶Apaulaus moog qha huv lub tsev saablaaj tsi ntshai leejtwg le. Thaus Paxilas hab Akilas nov nwg qha, obtug txawm coj nwg moog rua tom obtug tsev, hab obtug qha Vaajtswv zaaj rua Apaulaus paub tseeb dlua yaav taag lug lawm.

²⁷Thaus cov ntseeg kws nyob huv lub nroog Efexus paub has tas, Apaulaus yuav hlaa moog rua tim tebchaws Kilis, puab sau ib tsaab ntawv xaa moog rua cov ntseeg kws nyob tid kuas puab hlub Apaulaus. Thaus Apaulaus moog txug tid, nwg paab puab kawg le, puab lug ntseeg rua qhov Vaajtswv foom koob moov rua puab.

²⁸Nwg caav yeej cov Yudais taabmeeg suavdlawg, rua qhov nwg tej lug tseemceeb, hab nwg muab Vaajtswv txujlug qha rua puab paub has tas, Yexus yog tug Mexiyas.