Read Hmong Njua Teg Num 19 Bible Online

Teg Num 19 - Hmong Njua bible

Teg Num 19

¹Thaus Apaulaus nyob huv lub nroog Kauleethaus, thaus ntawd Paulus moog txhua nrho cheebtsaam Kalatias, nwg maam le moog txug huv lub nroog Efexus. Thaus nwg tuaj txug lawm, nwg ntsib cov ntseeg ob peb leeg,

²nwg nug puab has tas, “Thaus mej lug ntseeg, mej puas tau Vaaj Ntsujplig tug Dlawbhuv?” Puab teb has tas, “Peb tsi tau nov dlua has tas muaj Vaaj Ntsujplig tug Dlawbhuv le.”

³Paulus nug puab has tas, “Yog le ntawd, mej ua kevcai raus dlej le caag?” Puab teb has tas, “Peb ua lawv le Yauhaas txuj kevcai raus dlej.”

⁴Paulus qha rua puab has tas, “Yauhaas txuj kevcai raus dlej tsuas qha has tas, cov kws ua kevcai raus dlej ntawd yog cov kws tub tso kev txhum tseg lawm, txawm yog le ntawd los Yauhaas qha has tas, suavdlawg yuavtsum ntseeg tug kws yuav lawv Yauhaas qaab lug, tug ntawd yog Yexus.”

⁵Thaus puab nov Paulus has le ntawd, puab txawm tuav tug Tswv Yexus lub npe ua kevcai raus dlej.

⁶Thaus Paulus tsaa teg hab thov Vaajtswv rua puab, Vaaj Ntsujplig tug Dlawbhuv lug rua puab txhua tug. Puab txawm has tau lug txawv txawv hab puab qha Vaajtswv txujlug.

⁷Cov txivneej ntawd muaj kwvlaam le kaum ob leeg.

⁸Paulus muaj sab tawv qha huv lub tsev saablaaj has txug Vaajtswv lub Tebchaws tau peb lub hlis. Nwg nrug cov tuabneeg kws tuaj noog nwg qha sis caam hab yum kuas puab lug ntseeg Yexus.

⁹Tabsis cov tuabneeg ntawd qee leej muaj sab tawv tsi kaam ntseeg Yexus. Puab taabmeeg thuam Tswv Yexus zaaj rua suavdlawg noog. Ces Paulus txawm tso puab tseg, coj nwg cov thwjtim nrug nwg moog, hab nwg naj nub moog qha huv Tilanus chaav tsev saablaaj.

¹⁰Nwg pheej qha le ntawd tau ob xyoos, cov Yudais hab lwm Tsaav Tuabneeg kws nyob huv lub xeev Axias txhaj tau nov Vaajtswv txujlug.

¹¹Vaajtswv pub fwjchim rua Paulus ua tau tej txujci tseemceeb rua suavdlawg pum,

¹²hab puab muab Paulus txuj phuam so fws hab Paulus dlaim ntaub npua ua num coj moog tso rua sau cov tuabneeg kws muaj mob lub cev, ces cov tuabneeg ntawd tej mob txawm zoo lawm, hab cov tuabneeg kws raug dlaab los dlaab ca le tawm lawm.

¹³Cov Yudais kws txawj ntab dlaab muaj qee leej moog ntab dlaab rua qhov nuav qhov u. Puab tuav Yexus lub npe ntab dlaab saib dlaab puas tawm. Puab has rua dlaab has tas, “Peb tuav Yexus tug muaj fwjchim kws Paulus qha ntab mej tawm.”

¹⁴Cov kws ua le ntawd tub yog cov Yudais tug Povthawj Hlub kws hu ua Xakevas xyaa leej tub ntaag.

¹⁵Dlaab teb puab has tas, “Kuv yeej paub Yexus hab paub Paulus, tabsis mej tsua yog leejtwg?”

¹⁶Tug txivneej kws raug dlaab ntawd txawm muab puab ntaus, nwg ntaus yeej puab, puab txawm tsiv tawm huv nwg lub tsev moog. Puab tej rig tsho ndluag hab ib ce to taag huv tuabsi.

¹⁷Cov Yudais hab lwm Tsaav Tuabneeg kws nyob huv lub nroog Efexus puavleej nov zaaj nuav, puab ntshai kawg le. Ces Tswv Yexus lub npe txawm nrov nchaa moo lug moog thoob plawg txhua qhov.

¹⁸Cov kws tub xub lug ntseeg lawm, muaj ntau leej tuaj leeg puab tej kev txhum taabmeeg suavdlawg.

¹⁹Cov tuabneeg kws txawj ua khawvkoob ntau leej muab puab tej ntawv khawvkoob coj tuaj hlawv taabmeeg suavdlawg. Puab tej ntawv ntawd raug nqe tsib caug txheeb lub nyaj.

²⁰Yog le ntawd, tug Tswv txujlug kws muaj fwjchim txhaj nrov nchaa moog thoob plawg txhua qhov hab muaj tuabneeg lug ntseeg coob zuj zug.

²¹Thaus dlhau tej xwm ntawd lawm Paulus npaaj sab has tas nwg yuav moog rua tim Makedaunias hab Akhayas, nwg maam le moog rua nraag lub nroog Yeluxalees. Paulus has tas, “Tom qaab ntawd kuv yuavtsum moog rua tim lub nroog Loos.”

²²Paulus khaiv Timautes hab Elatus kws nrug nwg ua num ua nwg ntej moog rua tim lub xeev Makedaunias. Thaus obtug moog lawm, Paulus tseem nyob huv xeev Axias tau ib ntus hab.

²³Thaus ntawd nyob huv lub nroog Efexus muaj kev kub ntxhuv, rua qhov muaj tuabneeg lug ntseeg Yexus coob zuj zug,

²⁴nyob huv lub nroog ntawd muaj ib tug txivneej hu ua Demeti-us, nwg yog ib tug kws ntaus nyaj muag, nwg muab nyaj nchuav ua tej lub nyuas tsev miv miv zoo le lub tsev teev tug mlom quaspuj Alatemis, ua rua cov tuabneeg kws ntaus nyaj tau nyaj ntau heev.

²⁵Demeti-us txawm moog hu cov kws ntaus nyaj ntawd hab lwm cov kws txawj ntaus nyaj ib yaam le puab cov tuaj saablaaj. Nwg has rua puab has tas, “Mej suavdlawg yeej paub has tas, tub yog vim peb ua teg num nuav peb txhaj tau noj tau haus.

²⁶Mej tub pum hab nov tej kws tug Paulus ntawd qha lawm. Nwg qha has tas, tej mlom kws peb nchuav nuav tsi tseemceeb dlaabtsi le. Nwg has le ntawd ua rua cov tuabneeg kws nyob huv lub nroog Efexus nuav hab cov kws nyob thoob plawg lub xeev Axias tso txuj qub kevcai tseg yuav taag.

²⁷Yog peb tsi ceevfaaj, nyob tsaam tej kws peb ua yuav poob nqe hab ntshai suavdlawg yuav saib tsi taug lub tsev kws peb pe tug mlom quaspuj Alatemis kws muaj fwjchim luj, ces tug mlom quaspuj Alatemis kws cov tuabneeg Axias huv lub xeev Axias hab tej tuabneeg kws nyob thoob plawg huv qaab ntuj nuav pe yuav tsi muaj fwjchim lawm.”

²⁸Thaus Demeti-us has le ntawd taag, suavdlawg chim heev, puab txawm qw nrov nrov has tas, “Cov tuabneeg Efexus, tug mlom quaspuj Alatemis muaj fwjchim luj kawg nkaus.”

²⁹Ces txawm muaj kev ntxhuv thoob plawg huv lub nroog Efexus. Suavdlawg txawm tuaj nteg kag Nkayus hab Alitakhus kws yog tuabneeg Makedaunias caab moog rua tom lub tshaav puam, rua qhov obtug nrug Paulus tuaj.

³⁰Paulus xaav moog cheem cov tuabneeg ntawd, tabsis cov ntseeg tsi kheev Paulus moog.

³¹Cov numtswv kws nrug Paulus sis raug zoo khaiv tuabneeg moog cheem kuas Paulus tsi xob moog huv cov tuabneeg coob coob kws nyob tom tshaav puam.

³²Thaus ntawd cov tuabneeg coob coob kws nyob tod taabtom ntxhuv heev, nyag taug nyag qw le nuav le u, rua qhov muaj ibtxha tsi paub has tas, sov puab tuaj saablaaj zaaj dlaabtsi tag!

³³Cov Yudais txawm muab Alexaades thawb moog rua tom suavdlawg hauv ntej, ces muaj qee leej xaav has tas, tug kws ua txhum ntshai yog Alexaades. Alexaades txawm cu teg kuas suavdlawg nyob tuabywv, nwg yuav qha zaaj ntawd rua suavdlawg saib yog le caag.

³⁴Tabsis thaus puab pum has tas, Alexaades yog tuabneeg Yudais hab, puab qw tau ob txoog teev has tas, “Cov tuabneeg Efexus tug mlom Alatemis muaj fwjchim luj kawg nkaus.”

³⁵Thaus kawg tug teev ntawv huv lub nroog has kuas suavdlawg nyob tuabywv. Nwg has tas, “Cov tuabneeg Efexus, suavdlawg puavleej paub has tas, cov tuabneeg kws nyob huv lub nroog Efexus nuav yog cov kws tu lub tsev teev tug mlom Alatemis kws muaj fwjchim luj kawg nkaus, hab tu lub pobzeb tseemceeb kws poob sau ntuj lug.

³⁶Suavdlawg puavleej paub has tas, muaj le ntawd tag. Yog le ntawd, mej ca le nyob tuabywv tsi xob laam tau laam ua rua suavdlawg ntxhuv.

³⁷Mej nteg obtug lug ua dlaabtsi? Obtug tub tsi tau moog nyag ib yaam dlaabtsi huv lub tsev teev mlom lossis thuam peb tug mlom los sav.

³⁸Yog Demeti-us hab nwg cov tuabneeg ntaus nyaj ntawd xaav kom leejtwg rua numtswv, peb yeej muaj tsev has plaub hab muaj tug txav txim huv tuabsi, kuas puab moog sis has lawm tom.

³⁹Tabsis yog mej tsua muaj dlua lwm zaaj, mej yuavtsum hu suavdlawg tuaj ua ke saablaaj tsaiv, maam le txav txim.

⁴⁰Yog peb tsi ua le nuav, nyob tsaam numtswv yuav has tas, tej kev kws ntxhuv nub nua yog peb ua, ces peb yuav tsi muaj lug teb puab, rua qhov tej kev ntxhuv nuav tsi muaj hauvpaug hauvntsis dlaabtsi.”

⁴¹Thaus nwg has le ntawd taag, ces nwg txawm kuas suavdlawg moog tsev.