Read Hmong Njua Teg Num 20 Bible Online

Teg Num 20 - Hmong Njua bible

Teg Num 20

¹Thaus tsi muaj kev ntxhuv lawm, Paulus hu cov ntseeg tuaj ua ke. Nwg has lug txhawb puab zug taag, nwg txawm ncaim puab moog rua peg lub xeev Makedaunias lawm.

²Thaus nwg taug kev moog, nwg qha ntau zaaj txhawb cov ntseeg kws nyob huv tej zej zog huv lub xeev ntawd tug zug, nwg maam le moog txug nraag lub xeev Akhayas.

³Nwg nyob huv lub xeev Akhayas tau peb hlis. Thaus nwg taabtom yuav caij nkoj moog rua tim tebchaws Xilias, nwg nov has tas cov Yudais tuavhuv yuav ua phem rua nwg. Ces nwg txawm xaav has tas, nwg yuav rov qaab moog rua peg lub xeev Makedaunias.

⁴Cov tuabneeg kws nrug Paulus moog yog Pilehus tug tub Xaupates, Alitakhus hab Xekudus kws nyob huv lub nroog Thexalaunikes; Nkayus kws nyob huv Denpis; Tikhikus hab Taufimus kws nyob huv xeev Axias; hab Timautes.

⁵Puab cov ntawd xub ua ntej moog nyob nraag lub nroog Rhau-as tog peb.

⁶Thaus peb ua Kevcai Noj Ncuav Tsi Xyaw Keeb taag, peb txawm caij nkoj tawm huv lub nroog Filipis moog rua nraag lub nroog Rhau-as. Peb moog tau tsib nub maam le moog txug nraag, hab peb nyob nraag tau rau xyaa nub.

⁷Nub xyaa thaus tsaus ntuj peb tuaj noj mov ua ke hab ua kevcai noj tug Tswv Rooj Mov. Paulus qha puab txug ib taag mo, rua qhov thaus kaaj ntug nwg yuav ncaim puab moog.

⁸Chaav tsev txheej sau kws peb saablaaj ntawd, puab taws ntau lub teeb.

⁹Mo ntawd muaj ib tug hluas hu ua Etikhus, nwg nyob ntawm lub qhovrais noog Paulus qha. Thaus Paulus tseem taabtom qha, Etikhus tsaug zug heev, nwg txawm looj hlas lawm hab nwg ca le poob ntawm lub qhovrais kws yog txheej tsev peb rua huv aav. Thaus puab nqeg moog muab nwg tsaa hlo, nwg tub tuag lawm,

¹⁰tabsis thaus Paulus nqeg lug txug, Paulus txawm moog puag nkaus tug hluas ntawd, Paulus has rua suavdlawg has tas, “Mej tsi xob txhawj, nwg tub muaj sa lawm.”

¹¹Ces Paulus nce rov moog rua sau tsev hab muab ncuav lug faib rua suavdlawg noj lawv le kevcai noj tug Tswv Rooj Mov. Paulus nrug suavdlawg thaam moog txug kaaj ntug, nwg maam le ncaim puab moog lawm.

¹²Suavdlawg pum tug hluas ntawd tseem muaj sa, puab zoo sab kawg le, puab txawm coj nwg moog tsev.

¹³Peb caij nkoj ua ntej moog nyob nraag lub nroog Axaus tog Paulus. Nwg tub xub has kuas peb moog nyob nraag tog nwg, rua qhov nwg yuav moog kutaw moog rua nraag, nwg maam le nrug peb caij nkoj moog.

¹⁴Thaus Paulus tuaj txug nraag lub nroog Axaus, peb txhaj coj nwg nrug peb caij nkoj moog rua nraag lub nroog Mitilenes.

¹⁵Peb caij nkoj tawm huv lub nroog Mitilenes moog ib nub txug ntawm lub koog Povtxwv Khi-aus. Nub tom qaab peb caij nkoj tawm ntawm Khi-aus moog ib nub txug lub koog Povtxwv Xamaus, hab nub tom qaab peb moog txug nraag lub nroog Miletus.

¹⁶Paulus tub xaav tseg has tas, nwg yuav tsi moog su huv lub nroog Efexus, rua qhov nwg tsi muaj sijhawm su huv xeev Axias, nwg yuav maaj moog nraag lub nroog Yeluxalees, saib moog puas ncaav nub kws suavdlawg ua kevcai Peetekos. Yog le ntawd, peb txhaj caij nkoj dlhau plawg moog tsi su huv lub nroog Efexus.

¹⁷Thaus Paulus tseem nyob huv lub nroog Miletus, nwg khaiv tuabneeg moog hu cov txwjlaug kws saib cov ntseeg peg lub nroog Efexus kuas tuaj cuag nwg.

¹⁸Thaus cov txwjlaug tuaj txug lawm, Paulus has rua puab has tas, “Txij thaus kuv tuaj txug huv lub xeev Axias lug txug nub nua, kuv ua kuv lub neej zoo le caag los mej puavleej pum.

¹⁹Txawm yog cov Yudais pheej tuavhuv ua phem rua kuv kuas kuv raug kev txomnyem los kuv tseem ua sab ntev ua Vaajtswv teg num. Thaus kuv ua teg num ntawd, muaj qee zag lug kuv kua muag kawg le.

²⁰Hab mej tub paub has tas, thaus kuv qha mej huv mej tej tsev hab huv tej tsev saablaaj, kuv yeej qha tej zaaj kws yuav paab tau mej xwb, kuv tsi zais ib lus le.

²¹kuv pheej ntuag cov Yudais hab lwm Tsaav Tuabneeg kuas suavdlawg nyag tso nyag tej kev txhum tseg, tig rov lug cuag Vaajtswv hab ntseeg peb tug Tswv Yexus.

²²Nwgnuav Vaaj Ntsujplig tug dlawbhuv yuav kuas kuv moog nraag lub nroog Yeluxalees. Thaus kuv moog txug nraag, kuv yuav raug kev txomnyem le caag los kuv tsi paub.

²³Kuv tsuas paub lawv le Vaaj Ntsujplig qha rua kuv lawm xwb. Nwg qha kuv has tas, kuv yuav raug kaw huv tsev lojcuj hab yuav raug kev txomnyem huv tej nroog kws kuv yuav moog ntawd.

²⁴Tabsis kuv yeej tsi suav has tas kuv lub neej tseemceeb dlaabtsi, rua qhov kuv xaav ua teg num kws tug Tswv Yexus muab rua kuv ua kuas tav. Teg num ntawd yog moog qha Txujmoo Zoo rua suavdlawg kuas puab paub has tas, Vaajtswv hlub puab.

²⁵“Kuv tub moog txhua qhov qha rua suavdlawg has txug Vaajtswv lub Tebchaws. Nwgnuav kuv paub has tas, mej txhua tug kws nyob ntawm nuav yuav tsi muaj ib tug rov pum kuv le lawm,

²⁶Yog le ntawd, nub nua kuv qha rua mej has tas, yog mej cov leejtwg raug kev puamtsuaj, mej tsi xob lam has tas, kuv tsi qha mej.

²⁷Rua qhov kuv tub qha tej kws Vaajtswv xaav kuas mej paub rua mej lawm, kuv tsi tau zais ib qho le.

²⁸Mej yuavtsum ceevfaaj nyob tsaam mej yuam kev hab mej yuavtsum ua tuab zoo saib paab yaaj kws Vaaj Ntsujplig tug Dlawbhuv muab tso rua mej ua tug saib. Mej yuavtsum saib cov ntseeg ntawd ib yaam le tug tswv yaaj saib nwg paab yaaj. Cov ntseeg ntawd yog cov kws Vaajtswv tug Tub tuag txhwv lug ua nwg cov lawm.

²⁹Kuv paub has tas thaus kuv moog lawm, maa yeej yuav lug rua huv mej cov. Thaus maa lug maa yuav tum txhua tug yaaj huv tuabsi.

³⁰Txawm yog huv mej cov los yeej yuav muaj qee leej qha tsi tseeb ntxag cov ntseeg kuas moog ua puab thwjtim.

³¹Mej yuavtsum ceevfaaj hab ncu ntsoov has tas, kuv tub naj nub naj mo qha mej tau peb xyoos lug lawm. Thaus kuv qha mej ntawd muaj qee zag lug kuv kua muag kawg le.

³²“Nwgnuav kuv yuav ncaim mej moog, kuv thov Vaajtswv tsomkwm mej, mej yuavtsum khaws Vaajtswv tej lug kws has tas. Vaajtswv hlub mej rua huv mej lub sab. Vaajtswv txujlug ntawd txhaj paab tau kuas mej muab sab rau ntseeg hab yuav pub tej koob moov kws Vaajtswv tub npaaj tseg ca rua cov kws ntseeg nwg lawm rua mej.

³³Kuv yeej tsi ntshaw leejtwg tej nyaj tej kub lossis tej rig tsho naav lug ua kuv tug.

³⁴Mej suavdlawg puavleej paub has tas, kuv hab cov phoojywg kws nrug kuv ua num tau noj tau naav tub yog vim kuv ob txhais teg khwv yug suavdlawg xwb, kuv yeej tsi tau thov leejtwg le.

³⁵Txhua yaam num kws kuv ua rua mej pum tub yog kuv ua qha rua mej paub has tas, peb yuavtsum ua num nyaav le ntawd txhaj paab tau cov tuabneeg kws tsi muaj zug. Hab peb yuavtsum ncu ntsoov tej lug kws tug Tswv Yexus qha has tas, ‘Thaus yug pub rua luas, yug zoo sab heev dlua thaus yug tau luas le.’ ”

³⁶Thaus Paulus qha puab taag, Paulus hab cov tuabneeg kws noog nwg qha suavdlawg txhus caug thov Vaajtswv.

³⁷Thaus Paulus yuav ncaim puab moog, suavdlawg quaj quaj, hab puab lug puag Paulus xubpwg nwj Paulus.

³⁸Puab nyuaj sab kawg le, rua qhov nwg has tas, puab yuav tsi pum nwg lawm, ces puab txawm xaa nwg moog rua nraag lub nkoj.