Read Hmong Njua Teg Num 21 Bible Online

Teg Num 21 - Hmong Njua bible

Teg Num 21

¹Thaus peb ncaim puab moog lawm, peb txawm caij nkoj ncaaj nraim moog rua nraag koog Povtxwv Kaus; nub tom qaab peb moog txug nraag koog Povtxwv Laudes, hab tom qaab ntawm peb maam le moog txug lub nroog Patalas.

²Peb pum ib lub nkoj yuav moog rua tim lub xeev Faunikias, peb txhaj caij lub nkoj ntawd moog.

³Thaus peb moog pum lub koog Povtxwv Xaipas lawm, peb txawm moog saab qaabteb rua tim tebchaws Xilias. Puab yuav thau tej qhov txhua chaw huv lub nkoj rua ntawm lub nroog Tiles, peb txhaj nreg nkoj ntawm lub nroog ntawd.

⁴Thaus peb nrhav tau cov ntseeg kws nyob huv lub nroog Tiles lawm, peb nrug puab nyob tau xyaa nub. Vaaj Ntsujplig qha rua puab kuas puab tsi xob pub Paulus moog nraag lub nroog Yeluxalees.

⁵Tabsis thaus dlhau xyaa nub lawm, peb ncaim puab moog. Puab txhua tug hab puab tej quaspuj mivnyuas suavdlawg puavleej xaa peb moog txug nraag ntug havtxwv, peb suavdlawg txhus caug ntawm ntug havtxwv thov Vaajtswv.

⁶Ces peb txawm sis ncaim, thaus peb nce rua huv nkoj, puab txawm rov qaab moog tsev lawm.

⁷Peb caij nkoj tawm huv lub nroog Tiles moog kawg kev nkoj rua nraag lub nroog Pataulemais, peb moog saib cov ntseeg huv lub nroog hab nrug puab nyob tau ib nub.

⁸Nub tom qaab peb moog rua nraag lub nroog Xixaleyas. Peb moog su huv Filis kws yog ib tug qha txujmoo zoo lub tsev. Filis yog ib tug ntawm xyaa leej kws cov ntseeg nraag lub nroog Yeluxalees tau xaiv lug ua num.

⁹Filis muaj plaub tug ntxhais tsi tau yuav quasyawg. Puab plaub leeg ntawd puavleej qha Vaajtswv txujlug.

¹⁰Peb nyob huv Filis tsev tau ob peb nub, muaj ib tug cev Vaajtswv lug hu ua Ankanpus tuaj nraag xeev Yudas tuaj.

¹¹Nwg tuaj saib peb, nwg muab Paulus txuj hlaab sa lug khi nwg teg nwg taw, hab nwg has tas, Vaaj Ntsujplig has tas: “Cov Yudais kws nyob nraag lub nroog Yeluxalees yuav muab tug kws sa txuj hlaab nuav khi ib yaam le nuav, hab yuav muab nwg rua lwm tsaav Tuabneeg coj moog tsimtxom.”

¹²Thaus peb nov le ntawd, peb hab cov ntseeg kws nyob ntawd cheem tsi kheev Paulus moog rua nraag lub nroog Yeluxalees.

¹³Tabsis Paulus has rua puab has tas, “Mej quaj ua dlaabtsi, mej yuav ua kuas kuv nyuaj sab los? Kuv yeej npaaj txhij lawm, tsi yog cov tuabneeg huv lub nroog Yeluxalees yuav muab kuv khi xwb, txawm yog puab yuav muab kuv tua povtseg, vim kuv ua tug Tswv Yexus teg num los kuv yeej yuav moog nraag.”

¹⁴Peb cheem tsi tau nwg, yog le ntawd peb txawm ca nwg moog, nyob tsaam yog tug Tswv pum zoo.

¹⁵Thaus ntawd peb txawm sawbsim qhov txhua chaw hab moog nraag lub nroog Yeluxalees.

¹⁶Cov ntseeg kws nyob huv lub nroog Xixaleyas muaj qee leej nrug peb moog hab, thaus peb moog txug, puab coj peb moog su huv Manaxoos tsev, yaav taag lug Manaxoos nyob peg koog Povtxwv Xaipas hab nwg tub ntseeg Vaajtswv ntev lug lawm.

¹⁷Thaus peb moog txug huv lub nroog Yeluxalees, cov ntseeg zoo sab kawg le.

¹⁸Nub tom qaab Paulus nrug peb moog saib Yakaunpaus. Cov txwjlaug kws saib cov ntseeg tub tuaj nyob ntawd tog peb lawm.

¹⁹Thaus Paulus nrug puab thaam, Paulus pav txhua yaam kws Vaajtswv ua, txij thaus Paulus moog qha lwm Tsaav Tuabneeg rua puab noog.

²⁰Thaus puab nov Paulus has le ntawd, puab ua Vaajtswv tsaug. Puab has rua Paulus has tas, “Tijlaug, koj tub paub has tas, cov Yudais muaj ntau txheeb leej lug ntseeg Yexus lawm, puab yog cov kws coj Mauxes txuj kevcai nruj.

²¹Puab nov has tas, koj pheej moog qha cov Yudais kws nyob huv lwm Tsaav Tuabneeg tej tebchaws kuas puab tso Mauxes txuj Kevcai tseg, tsi xob muab tej mivnyuas ua kevcai txav, puab tsi xob ua lawv le cov Yudais txuj kevcai kws suavdlawg ibtxwm coj lug lawm.

²²Puab suavdlawg yeej yuav nov has tas, koj tuaj txug ntawm nuav lawm. Yog le ntawd, koj yuav ua le caag?

²³Peb xaav kuas koj ua le nuav. Muaj plaub tug txivneej nyob ntawm nuav, puab tau coglug tseg has tas,

²⁴puab yuav ua kevcai ntxuav, koj ca le nrug puab moog hab muab nyaj paab them puab tej nqe, puab txhaj tau chais puab tej plaubhau. Yog koj ua le ntawd, suavdlawg txhaj paub has tas, koj coj lawv le Mauxes txuj Kevcai, koj tsi tau ua tej kws puab nov ntawd.

²⁵Peb tub sau ib tsaab ntawv rua lwm Tsaav Tuabneeg kws ntseeg Vaajtswv lawm has tas, peb suavdlawg pum zoo kuas puab tsi xob noj tej qhov txhua chaw kws muab fij rua dlaab, tsi xob noj ntshaav, tsi xob noj tej nqaj tsaj kws hlua zawm cejdlaab tuag, hab tsi xob ntxag luas quaspuj luas quasyawg.”

²⁶Yog le ntawd, Paulus coj plaub tug txivneej ntawd moog, hab nub tom qaab nwg nrug puab ua kevcai ntxuav. Paulus moog qha rua tug povthawj kws saib lub Tuamtsev paub has tas, thaus twg puab maam le ua kevcai ntxuav tav. Nub kws puab ua kevcai ntxuav tav yog nub kws puab nqaa khoom tuaj fij rua Vaajtswv lawv le puab tub coglug tseg lawm has tas, puab yuav ua le ntawd.

²⁷Thaus yuav dlhau xyaa nub kws puab ua kevcai ntxuav ntawd, cov Yudais kws tuaj peg lub xeev Axias tuaj, muaj qee leej pum Paulus nyob huv lub Tuamtsev. Ces puab txawm ntxag kuas cov pejxeem ntxhuv hab puab txawm nteg Paulus.

²⁸Puab qw nrov nrov has tas, “Cov Yixalayees! Mej ca le lug paab peb! Tug nuav yog tug kws pheej moog qha txhua qhov kuas suavdlawg ntxub cov Yixalayees, saib tsi taug Mauxes txuj Kevcai hab lub Tuamtsev nuav. Tsi yog le ntawd xwb, nwg tseem coj lwm Tsaav Tuabneeg tuaj rua huv lub Tuamtsev hab ua rua lub Tuamtsev tsi huv lawm.”

²⁹(Puab has le ntawd, rua qhov puab pum Taufimus kws tuaj peg lub nroog Efexus tuaj, nrug Paulus nyob ua ke huv lub nroog, puab txhaj xaav has tas, Paulus yeej coj Taufimus moog rua huv lub Tuamtsev lawm.)

³⁰Tej lug kws puab has ntawd ua rua cov pejxeem kws nyob huv lub nroog ntxhuv. Ces puab txawm dlha zum zawg tuaj nteg Paulus hab muab nwg caab tawm huv lub Tuamtsev moog. Taamsim ntawd txawm muaj ib tug lug muab lub Tuamtsev tej qhovrooj kaw kag lawm.

³¹Thaus cov tuabneeg coob coob ntawd taabtom yuav muab Paulus tua povtseg, txawm muaj ib tug moog qha rua tug thawj tubrog pawg txheeb kws saib cov tubrog Loos has tas, cov pejxeem kws nyob huv lub nroog Yeluxalees nuav suavdlawg ntxhuv heev lawm.

³²Thaus tug thawj tubrog pawg txheeb nov le ntawd, nwg txawm coj cov thawj tubrog pawg pua hab ib paab tubrog nrug nwg moog saib yog ua caag cov pejxeem txhaj ntxhuv le ntawd. Thaus cov pejxeem pum tug thawj tubrog pawg txheeb coj tubrog dlha tuaj, ces puab txawm tsi ntaus Paulus lawm.

³³Tug thawj tubrog pawg txheeb tuaj txug ndlua ntawm Paulus, nwg tuav nkaus Paulus hab has kuas cov tubrog muab ob txuj saw hlau lug khi Paulus. Tug thawj tubrog txawm nug has tas, “Tug nuav yog leejtwg, hab nwg ua txhum dlaabtsi?”

³⁴Cov tuabneeg ntawd puab nyag has nyag lawm ib yaam tsi sis thooj. Ces tug thawj tubrog pawg txheeb paub tsi tseeb has tas yog vim le caag, nwg txhaj kuas cov tubrog coj Paulus moog rua huv cov tubrog lub yeej.

³⁵Thaus puab moog txug ntawm tug ntaiv, cov tubrog txawm muab Paulus nqaa, rua qhov cov pejxeem ua nruj ua tsiv heev rua Paulus.

³⁶Cov pejxeem lawv Paulus qaab hab qw ntsoog qeeg has tas, “Ca le coj nwg moog tua povtseg.”

³⁷Thaus cov tubrog taabtom coj Paulus moog rua huv lub tsev, Paulus txawm has rua tug thawj tubrog pawg txheeb has tas, “Thov ca kuv has ib lus rua koj puas tau?” Tug thawj tubrog pawg txheeb teb has tas, “Koj paub lug Kilis hab los?

³⁸Koj tsi yog tug tuabneeg Iziv kws yaav taag lug tawmtsaam numtswv hab coj plaub txheeb leej kws tua tuabneeg nrug nwg moog rua tom roob mojsaab qhua los?”

³⁹Paulus teb has tas, “Kuv yog tuabneeg Yudais, kuv yug huv lub nroog Talaxus kws nyob peg tebchaws Kilikias. Kuv yog cov tuabneeg kws nyob huv lub nroog Talaxus ntaag. Lub nroog ntawd yog ib lub nroog tseemceeb. Thov koj ca kuv has rua cov pejxeem ntawd mivntsiv.”

⁴⁰Tug thawj tubrog pawg txheeb txhaj ca Paulus has. Paulus txawm sawv ntsug ntawm tug ntaiv cu teg rua suavdlawg kuas nyob tuabywv. Thaus suavdlawg nyob tuabywv lawm, Paulus txawm ua lug Henplais qha rua puab has tas,