Read Hmong Njua Teg Num 23 Bible Online

Teg Num 23 - Hmong Njua bible

Teg Num 23

¹Paulus tsaa qhovmuag saib cov Yudais tej numtswv hab has rua puab has tas, “Cov kwvtij, kuv lub sab yeej paub has tas, kuv ua kuv lub neej zoo taabmeeg Vaajtswv lug txug naj nub nua.”

²Thaus tug Povthawj Hlub Ananias nov Paulus has le ntawd, nwg kuas cov tuabneeg kws sawv ze ntawm Paulus, ntaus Paulus qhovncauj.

³Paulus has rua Ananias has tas, “Tug nam tuabneeg ntsejmuag ncaaj sab nkhaus, Vaajtswv yuav ntaus koj. Ua le caag koj tseem yuav muaj plhus tuaj nyob ntawm ko txav txim rua kuv lawv le Mauxes txuj Kevcai? Qhov kws koj kuas puab ntaus kuv, koj tub ua txhum Mauxes txuj Kevcai lawm los sav!”

⁴Cov tuabneeg kws sawv ze Paulus has rua Paulus has tas, “Koj tseem yuav saib tsi taug tug Povthawj Hlub kws ua Vaajtswv teg num hab los?”

⁵Paulus teb puab has tas, “Cov kwvtij, kuv tsi paub has tas nwg yog tug Povthawj Hlub, yog kuv paub ces kuv yuav tsi has le ntawd, rua qhov Vaajtswv txujlug sau tseg has tas, ‘Mej tsi xob thuam tug kws saib mej.’ ”

⁶Thaus Paulus pum has tas, cov tuabneeg kws tuaj saablaaj ntawd muaj ibtxha yog cov Xadukais hab ibtxha yog cov Falixais, ces Paulus txawm has nrov nrov rua suavdlawg has tas, “Cov kwvtij, kuv yog ib tug Falixais, kuv txiv yog ib tug Falixais hab. Qhov kws puab coj kuv tuaj rua mej taug kuv zaaj, tub yog vim kuv ca sab has tas, cov tuabneeg kws tuag lawm yuav muaj sa sawv huv qhov tuag rov qaab lug.”

⁷Thaus Paulus has le ntawd taag, cov Falixais hab cov Xadukais txawm sis caav heev hab puab tsi sis hum lawm.

⁸(Rua qhov cov Xadukais tsi ntseeg has tas, tuabneeg yuav sawv tau huv qhov tuag rov qaab lug, hab tsi ntseeg has tas muaj cov timtswv ceebtsheej lossis muaj ntsujplig; tabsis cov Falixais ntseeg has tas muaj peb yaam ntawd huv tuabsi.)

⁹Suavdlawg yimfuab sis caav heev dlua, cov xwbfwb kws qha Vaajtswv txuj Kevcai kws yog cov Falixais paab muaj qee leej txawm sawv tseeg hab tshev has tas, “Peb tsi pum tug txivneej nuav ua ib qhov txhum le! Tej zag yog ntsujplig lossis timtswv ceebtsheej lug has rua nwg tag!”

¹⁰Thaus tug thawj tubrog pawg txheeb pum suavdlawg sis caav heev, nwg ntshai nyob tsaam puab muab Paulus chua ndluag ua ob peb ceg, nwg txhaj kuas nwg cov tubrog coj Paulus tawm huv cov tuabneeg ntawd moog rua huv lub yeej.

¹¹Mo ntawd tug Tswv lug sawv ntawm Paulus ib saab hab has rua Paulus has tas, “Koj tsi xob ntshai! Koj tub ua timkhawv qha kuv zaaj huv lub nroog Yeluxalees lawm, koj yuavtsum ua ib yaam le ntawd tim lub nroog Loos hab.”

¹²Thaus kaaj ntug cov Yudais txawm tuaj ua ke saablaaj. Puab coglug has tas, puab yuav tsi noj tsi haus ib yaam dlaabtsi moog txug thaus puab tua tau Paulus tsaiv.

¹³Cov tuabneeg kws tuavhuv ntawd muaj plaub caug tawm leej.

¹⁴Ces puab txawm moog cuag cov thawj ntawm cov povthawj hab cov txwjlaug, puab has tas, “Peb tub coglug lawm has tas peb yuav tsi noj tsi haus ib yaam dlaabtsi moog txug thaus peb tua tau Paulus tsaiv.

¹⁵Yog le ntawd, mej hab cov Yudais tej numtswv ca le khaiv tuabneeg moog has rua cov tuabneeg Loos tug thawj tubrog pawg txheeb kuas coj Paulus tuaj cuag peb. Mej ua txuj has rua nwg has tas, mej xaav taug Paulus zaaj kuas paub tseeb dlua thawj zag. Yog mej ua le ntawd peb yuav moog tog kev tua Paulus povtseg thaus nwg tseem tuaj tsi tau txug ntawm nuav.”

¹⁶Tabsis Paulus tug muam tug tub nov puab tuavhuv yuav muab Paulus tua povtseg, nwg txawm moog rua huv cov tubrog lub yeej hab qha qhov kws nwg nov ntawd rua Paulus paub.

¹⁷Paulus txawm hu ib tug thawj tubrog pawg pua lug cuag nwg hab has tas, “Thov koj coj tug tub hluas nuav moog cuag tug thawj tubrog pawg txheeb, nwg muaj lug yuav has rua tug thawj tubrog ntawd noog.”

¹⁸Tug thawj tubrog pawg pua txawm coj tug tub hluas ntawd moog cuag tug thawj tubrog pawg txheeb hab has tas, “Tug Paulus kws raug txim ntawd thov kuv coj tug tub hluas nuav tuaj cuag koj, tug tub hluas nuav muaj lug yuav has rua koj noog.”

¹⁹Tug thawj tubrog pawg txheeb tuav tug tub hluas ntawd teg coj moog rua ib caag hab nug has tas, “Koj muaj lug dlaabtsi yuav has rua kuv?”

²⁰Tug tub hluas ntawd teb has tas, “Cov Yudais tej numtswv tub saablaaj hum lawm has tas, pigkig puab yuav tuaj thov koj coj Paulus moog cuag cov Yudais tej numtswv, puab yuav ua txuj has tas, ‘Cov Yudais tej numtswv xaav taug Paulus zaaj kuas paub tseeb dlua thawj zag.’

²¹Tabsis koj tsi xob noog puab has, rua qhov tub muaj plaub caug tawm leej taabtom tog kev yuav tua Paulus. Cov tuabneeg ntawd tub coglug tseg lawm has tas, puab yuav tsi noj tsi haus ib yaam dlaabtsi moog txug thaus puab tua tau Paulus tsaiv. Puab tub npaaj txhij lawm, tabsis puab tseem tog saib koj yuav has le caag xwb.”

²²Tug thawj tubrog pawg txheeb txawm has rua tug tub hluas ntawd has tas, “Koj ca le rov qaab moog tsev, hab koj tsi xob qha qhov kws koj tuaj has rua kuv nuav rua leejtwg le.”

²³Tug thawj tubrog pawg txheeb hu nwg ob tug thawj tubrog pawg pua lug cuag nwg hab has tas, “Meb ca le moog txhij ob puas leej tubrog, txhij cov tubrog caij neeg xyaa caum leej, hab cov tubrog nkaug muv ob puas leej, thaus cuaj teev tsaus ntuj, mej moog rua peg lub nroog Xixaleyas.

²⁴Mej nrhav neeg rua Paulus caij, mej yuavtsum saib nwg zoo zoo, hab xaa nwg moog kuas txug Felis kws yog tug tswv xeev.”

²⁵Tug thawj tubrog pawg txheeb sau ib tsaab ntawv xaa moog rua Felis. Tsaab ntawv ntawd nwg sau has le nuav:

²⁶“Hawm txug tug Tswv xeev Felis, kuv yog Kelaudi-us Lixias. Kuv sau tsaab ntawv nuav tuaj qha rua koj paub has tas,

²⁷cov Yudais tau nteg tug txivneej nuav, puab tub yuav muab nwg tua povtseg. Kuv nov has tas, nwg yog tuabneeg Loos, kuv txhaj coj kuv cov tubrog moog paab nwg.

²⁸Kuv xaav paub tseeb has tas tej lug kws cov Yudais nkaug nwg yog le caag tag, kuv txhaj coj nwg moog cuag cov Yudais tej numtswv.

²⁹Thaus peb taug nwg zaaj, kuv pum has tas tej lug kws puab nkaug nwg, puab has txug qhov kws nwg ua txhum cov Yudais txuj kevcai xwb. Kuv tsi pum nwg ua ib qhov txhum kws yuav tsimnyog muab nwg tua povtseg lossis muab nwg kaw rua huv tsev lojcuj.

³⁰Thaus kuv nov has tas cov Yudais tuavhuv yuav tog kev muab nwg tua povtseg, kuv txhaj xaa nwg tuaj cuag koj. Kuv has rua cov tuabneeg kws nkaug nwg has tas, kuas puab ca le tuaj has tim ntsej tim muag ntawm koj.”

³¹Cov tubrog ntawd moog ua lawv le tug thawj tubrog pawg txheeb has. Mo ntawd puab coj Paulus moog txug peg lub nroog Aatipatis.

³²Nub tom qaab cov tubrog kws moog kutaw, puab txawm rov qaab moog rua nraag puab lub yeej lawm, tsuas tseg cov tubrog kws caij neeg xaa Paulus moog rua peg lub nroog Xixaleyas xwb.

³³Thaus puab moog txug huv lub nroog Xixaleyas lawm, puab muab tsaab ntawv kws Kelaudi-us Lixias sau rua tug Tswv xeev hab muab Paulus cob rua nwg.

³⁴Thaus tug Tswv xeev nyeem tsaab ntawv ntawd taag, nwg nug Paulus has tas, “Koj nyob lub tebchaws twg tuaj?” Thaus tug Tswv xeev paub has tas, Paulus tuaj peg tebchaws Kilikias tuaj,

³⁵tug Tswv xeev has rua Paulus has tas, “Tog cov tuabneeg kws nkaug koj tuaj txug tsaiv, kuv maam le noog koj has.” Tug tswv xeev kuas cov tubrog zuv Paulus zoo zoo huv Vaajntxwv Helauj lub loog.