Read Hmong Njua Teg Num 24 Bible Online

Teg Num 24 - Hmong Njua bible

Teg Num 24

¹Tau tsib nub tom qaab Ananias kws yog tug Povthawj Hlub, ob peb tug txwjlaug hab ib tug txivneej kws txawj txheem plaub hu ua Tetulus, puab moog rua peg lub nroog Xixaleyas. Thaus puab moog txug lawm, puab txawm nkaug Paulus rua Felis kws yog tug Tswv xeev.

²Thaus puab hu Paulus lug, Tetulus txawm nkaug Paulus rua Felis noog has tas, “Koj ua peb nam peb txiv! Naj nub nua peb muaj noj muaj haus, nyob kaaj sab lug hab peb lub tebchaws txhua qhov muaj kev vaammeej los tub yog vim muaj koj saib.

³Txhua yaam kws koj tau paab peb lawm, peb yeej ncu ntsoov koj txaj ntsig moog le.

⁴Ntshai yuav taabkaum koj, tabsis kuv thov koj ua sab ntev, peb muaj lu puav lug yuav has rua koj noog.

⁵Peb pum has tas, tug txivneej nuav pheej ua rua cov Yudais kws nyob thoob plawg qaab ntuj ntxhuv, hab nwg yog tug thawjcoj ntawm cov Naxalenes paab.

⁶Tsi yog le ntawd xwb, nwg tseem ua saib tsi taug lub Tuamtsev hab, peb txhaj nteg nwg. (Peb yeej yuav txav txim rua nwg lawv le peb txuj kevcai.

⁷Tabsis tug thawj tubrog pawg txheeb kws yog Lixias txawm tuaj txeeb Paulus ntawm peb teg moog lawm.

⁸Lixias has rua cov tuabneeg kws nkaug Paulus kuas tuaj has tim ntsej tim muag taabmeeg koj.) Yog koj ua tuab zoo taug tug txivneej nuav zaaj zoo zoo, koj yuav paub has tas, yeej yuav muaj lawv le tej lug kws peb has.”

⁹Cov Yudais kws nyob ntawd has zum zawg has tas, “Tej kws Tetulus has yeej muaj tseeb tag.”

¹⁰Thaus tug tswv xeev kuas Paulus has dlaws Paulus zaaj, Paulus has tas, “Kuv paub has tas koj yog tug txav txim rua cov tuabneeg kws nyob huv lub tebchaws nuav tau ntau xyoo lug lawm, kuv txhaj txaus sab has dlaws kuv zaaj rua koj noog.

¹¹Yog koj ua tuab zoo saib, koj yeej yuav paub has tas, txij nub kws kuv moog pehawm Vaajtswv nraag lub nroog Yeluxalees lug txug nub nua, tub tsi tau dlhau kaum ob nub.

¹²Cov Yudais yeej tsi tau pum kuv nrug leejtwg sis caav huv lub Tuamtsev le. Puab tub tsi pum kuv ua rua cov pejxeem ntxhuv huv puab tej tsev saablaaj lossis huv lub nroog qhov twg le.

¹³Tej lug kws puab nkaug kuv, puab nrhav tsi tau ib lus tseeb kws qha has tas kuv tau ua txhum.

¹⁴Txawm yog tsi muaj ib lus tseeb los kuv thov leeg ib qho rua koj has tas, kuv yeej coj lawv le txuj Kevcai Tshab kws puab has tas tsi tseemceeb. Tabsis txuj kevcai ntawd yeej yog Vaajtswv txuj kws peb cov yawmkoob yeej ibtxwm coj thaus u lug lawm. Kuv ntseeg txhua lu kws sau tseg rua huv Mauxes txuj Kevcai hab huv tej ntawv kws cov cev Vaajtswv lug tau sau tseg lawm huv tuabsi.

¹⁵Kuv hab puab puavleej ca sab ib yaam nkaus has tas, Vaajtswv yuav tsaa cov tuabneeg kws tuag lawm txhua tug sawv rov qaab lug, tsi has cov tuabneeg ua phem lossis cov tuabneeg ua zoo.

¹⁶Yog le ntawd, kuv txhaj muab sab rau ua kuas hum Vaajtswv sab hab hum tuabneeg sab.

¹⁷“Kuv tub tawm huv lub nroog Yeluxalees moog nyob lwm qhov tau ntau xyoo lawm, kuv txhaj rov qaab moog rua nraag lub nroog Yeluxalees, hab coj mivntsiv nyaj moog pub rua kuv tsaav tuabneeg hab muab tsaj tua hlawv fij rua Vaajtswv.

¹⁸Thaus kuv ua kevcai ntxuav taag, kuv taabtom muab tsaj tua hlawv fij rua Vaajtswv huv lub Tuamtsev, ces puab txawm tuaj pum kuv. Thaus ntawd tsi muaj tuabneeg coob nrug kuv nyob ua ke hab tsi muaj kev ntxhuv dlaabtsi le.

¹⁹Tabsis cov Yudais kws tuaj peg lub xeev Axias tuaj, muaj qee leej nyob ntawd hab. Yog puab pum has tas, thaus ntawd kuv ua txhum, tsimnyog puab tuaj nkaug kuv rua koj ntawm nuav,

²⁰lossis kuas cov tuabneeg kws nyob ntawm nuav has saib, thaus kuv qha kuv zaaj rua cov Yudais tej numtswv noog, cov kws nkaug kuv nuav, puab tsua pum kuv ua txhum dlaabtsi.

²¹Tsuas tshwj thaus kuv sawv taabmeeg puab, kuv has ib lus le nuav xwb: ‘Nub nua mej txav txim rua kuv tub yog vim kuv ntseeg has tas cov tuabneeg kws tuag lawm, yuav sawv huv qhov tuag rov qaab lug.’ ”

²²Felis yeej kawm paub txuj Kevcai Tshab lug lawm. Thaus nwg nov Paulus has le ntawd, nwg txawm kuas suavdlawg tso tseg. Nwg has rua suavdlawg has tas, “Tog Lixias kws yog tug thawj tubrog pawg txheeb tuaj txug tsaiv, kuv maam le rov has mej rooj plaub nuav dlua.”

²³Felis kuas tug thawj tubrog pawg pua zuv Paulus hab has tas, tsi xob muab Paulus khi, ca nwg cov phoojywg tuaj saib nwg hab tu nwg.

²⁴Tom qaab ntawd ob peb nub, Felis hab Deluxilas kws yog Felis tug quaspuj tuaj, Felis tug quaspuj yog tuabneeg Yudais, nwg kuas puab coj Paulus lug ntsib obtug, hab kuas Paulus qha txug kev ntseeg Yexus rua puab noog.

²⁵Tabsis thaus Paulus qha txujkev ncaaj nceeg, kev tswj yug lub sab hab txujkev txav txim kws yaav pegsuab rua obtug noog, Felis ntshai, nwg txawm has rua Paulus has tas, “Koj ca le rov moog, lwm nub kuv khoom tsaiv kuv maam le rov hu koj tuaj dlua.”

²⁶Tabsis Felis xaav has tas, Paulus yuav muab nyaj rua nwg, nwg txhaj pheej hu Paulus moog nrug nwg thaam ob peb zag.

²⁷Tom qaab ntawd ob xyoos, Pauleki-us Fexatus lug ua tug tswv xeev hloov Felis chaw. Felis xaav kuas cov Yudais nyam Felis, Felis txhaj ca Paulus nwg nyob nwg huv tsev lojcuj.