Read Hmong Njua Teg Num 25 Bible Online

Teg Num 25 - Hmong Njua bible

Teg Num 25

¹Thaus Fexatus lug ua tswv xeev tau peb nub lawm, nwg tawm huv lub nroog Xixaleyas moog rua nraag lub nroog Yeluxalees,

²thaus nwg moog txug nraag, cov thawj ntawm cov povthawj hab cov Yudais tej thawjcoj txawm tuaj nkaug Paulus rua Fexatus.

³Puab thov Fexatus hu kuas Paulus tuaj rua huv lub nroog Yeluxalees. Puab thov le ntawd, rua qhov puab tub tuavhuv tseg lawm has tas, puab yuav tog kev muab Paulus tua povtseg.

⁴Fexatus teb has tas, Paulus tseem raug kaw peg lub nroog Xixaleyas. Tsi ntev nuav kuv yuav rov qaab moog peg,

⁵yog mej pum Paulus ua txhum dlaabtsi, mej cov kws ua thawj ca le nrug kuv moog rua peg lub nroog Xixaleyas, mej maam le sis has peg.

⁶Fexatus tseem nrug puab nyob huv lub nroog Yeluxalees kwvlaam le kaum nub, nwg maam le rov qaab moog rua peg lub nroog Xixaleyas. Thaus nwg moog txug peg lawm, nub tom qaab nwg moog rua huv lub tsev has plaub, ces nwg txawm khaiv tuabneeg moog coj Paulus lug cuag nwg.

⁷Thaus Paulus lug txug, cov Yudais kws tuaj nraag lub nroog Yeluxalees tuaj, txawm lug sawv vij Paulus hab nkaug Paulus ntau yaam rua Fexatus, tabsis puab tsi muaj timkhawv le.

⁸Ces Paulus txawm has dlaws Paulus zaaj has tas, “Kuv yeej tsi tau ua txhum cov Yudais txuj kevcai hab tsi tau ua saib tsi taug lub Tuamtsev lossis ua txhum Fuabtais Xixas le.”

⁹Tabsis Fexatus xaav kuas cov Yudais nyam Fexatus, ces nwg txawm nug Paulus has tas, “Koj puas xaav moog rua nraag lub nroog Yeluxalees, ca kuv maam le moog has mej rooj plaub nraag?”

¹⁰Paulus teb has tas, “Kuv tub nyob huv Fuabtais Xixas lub tsev has plaub nuav lawm, yog le ntawd tub tsimnyog koj txav txim rua kuv ntawm nuav. Koj yeej paub has tas, kuv tsi tau ua txhum rua cov Yudais.

¹¹Yog kuv tau ua txhum kevcai lossis ua ib yaam dlaabtsi kws tsimnyog muab kuv tua povtseg, kuv yeej tsi tawv tsi nyom le. Tabsis yog tej lug kws puab nkaug kuv ntawd tsi muaj tseeb, leejtwg tseem yuav muaj cuabkaav muab kuv rua puab? Kuv thov moog has tim Fuabtais Xixas.”

¹²Thaus Fexatus nov Paulus has le ntawd, nwg txawm nrug nwg cov tuavxaam saablaaj. Thaus puab saablaaj taag, nwg has rua Paulus has tas, “Koj tub thov moog has tim Fuabtais Xixas lawm, yog le ntawd koj yuav tau moog cuag Xixas xwb.”

¹³Tom qaab ntawd tsi ntev Vaajntxwv Akipas hab Vaajntxwv tug muam kws hu ua Npelanikes tuaj saib Fexatus huv lub nroog Xixaleyas.

¹⁴Obtug tuaj nyob tau ntau nub, Fexatus txawm pav Paulus rooj plaub rua Vaajntxwv Akipas noog has tas, “Lub sijhawm kws Felis ua tug tswv xeev kaav lub xeev nuav, nwg tau muab ib tug txivneej kaw rua huv tsev lojcuj, nwgnuav tug txivneej ntawd tseem nyob huv tsev lojcuj;

¹⁵hab thaus kuv moog rua nraag lub nroog Yeluxalees, cov thawj ntawm cov povthawj hab cov txwjlaug txawm tuaj nkaug tug txivneej ntawd rua kuv hab thov kuas kuv txav txim rua nwg.

¹⁶Tabsis kuv has rua puab has tas, lawv le cov Loos txuj kevcai, ob tog yuavtsum tuaj sis has tim ncauj tim lug hab ca tug pemkom has dlaws nwg zaaj taag tsaiv, maam le txav txim rua tug kws ua txhum.

¹⁷Thaus puab tuaj txhij lawm, nub tom qaab kuv moog nyob huv lub tsev has plaub, hab hu tug txivneej ntawd lug cuag kuv.

¹⁸Thaus cov yeejkom sawv lug has, puab tsi nkaug tej kws nwg ua txhum lawv le kuv xaav.

¹⁹Puab tsuas sis caav has txug puab tej kevcai xwb, hab puab has txug ib tug txivneej kws hu ua Yexus, nwg tub tuag lawm, tabsis Paulus has tas tug txiv neeg ntawd tseem muaj sa nyob.

²⁰Thaus ntawd kuv tsi paub yuav taug le caag txhaj paub zaaj nuav tseeb, kuv txhaj nug Paulus saib, nwg puas kaam moog nraag lub nroog Yeluxalees, kuv maam le has nwg rooj plaub nraag.

²¹Tabsis Paulus thov kuas kuv ca nwg nyob nwg huv lub tsev lojcuj, hab ca Fuabtais Xixas maam le txav txim rua nwg. Kuv txhaj ca nwg nyob nwg huv tsev lojcuj moog txug nub kws kuv xaa nwg moog cuag Fuabtais Xixas.”

²²Vaajntxwv Akipas has rua Fexatus has tas, “Kuv xaav noog tug txivneej ntawd has.” Ces Fexatus txawm teb has tas, “Pigkig, kuv yuav kuas tug txivneej ntawd lug has rua koj noog.”

²³Nub tom qaab cov thawj tubrog hab cov numtswv huv lub nroog nrug vaajntxwv hab Npelanikes moog rua huv chaav tsev has plaub. Thaus Vaajntxwv Akipas moog txug huv chaav tsev has plaub lawm, Fexatus khaiv tuabneeg moog hu Paulus lug cuag vaajntxwv.

²⁴Thaus Paulus lug txug, Fexatus has rua vaajntxwv has tas, “Vaajntxwv Akipas hab mej txhua tug kws nyob ntawm nuav: mej suavdlawg puavleej pum tug txivneej nuav, nwg yog tug kws cov Yudais kws nyob huv lub nroog nuav hab cov kws nyob nraag lub nroog Yeluxalees, pheej tuaj kuas kuv muab nwg tua povtseg.

²⁵Tabsis kuv tub nug nwg taag lawm, kuv tsi pum nwg ua ib qhov txhum kws yuav txaus muab nwg tua povtseg. Yog le ntawd thaus nwg thov moog has tim Fuabtais Xixas, kuv txhaj has rua nwg has tas, kuv yuav xaa nwg moog.

²⁶Vaajntxwv Akipas, kuv has rua koj has tas, yeej tsi muaj ib qhov tseemceeb kws yuav zoo sau tug txivneej nuav zaaj moog qha rua Fuabtais Xixas paub. Yog le ntawd, kuv txhaj coj nwg tuaj cuag suavdlawg, tabsis qhov tseeb yeej yog kuv coj nwg tuaj cuag koj kuas koj taug nwg zaaj, kuv txhaj muaj lug sau xaa moog rua Fuabtais Xixas.

²⁷Kuv xaav has tas, yog tsi muaj ib qhov tseemceeb kws zoo sau qha has tas tug kws raug txim ua txhum dlaabtsi, yeej tsi zoo xaa tug ntawd moog cuag Fuabtais Xixas.”