Read Hmong Njua Teg Num 26 Bible Online

Teg Num 26 - Hmong Njua bible

Teg Num 26

¹Vaajntxwv Akipas has rua Paulus has tas, “Kuv ca koj has dlaws koj zaaj.” Paulus xyaab hlo teg hab has dlaws nwg zaaj le nuav:

²“Vaajntxwv Akipas, kuv zoo sab kawg le, nub nua kuv tau lug sawv ntawm koj xubndlag has dlaws txhua zaaj kws cov Yudais nkaug kuv has tas kuv ua txhum rua koj noog,

³rua qhov koj yeej paub cov Yudais tej kevcai hab tej kws peb cov Yudais has tsi sis hum lawm. Yog le ntawd, thov koj ua sab ntev noog kuv has.

⁴“Txij thaus kuv yau lug txug naj nub nua, kuv lub neej zoo le caag los cov Yudais puavleej paub huv tuabsi. Kuv yeej nrug kuv tsaav tuabneeg nyob hlub huv kuv lub tebchaws hab huv lub nroog Yeluxalees.

⁵Puab yeej ibtxwm paub kuv thaus u lug lawm. Yog puab kaam ua timkhawv, puab yeej ua tau timkhawv has tas, kuv yog ib tug kws yog cov Falixais paab kws coj nruj.

⁶Nwgnuav kuv tuaj sawv ntawm nuav tub yog vim kuv ca sab rua tej kws Vaajtswv tau coglug tseg rua peb cov yawmkoob lawm.

⁷Peb cov Yudais kaum ob xeem puavleej muab sab rau naj nub naj mo ua lawv le Vaajtswv txuj Kevcai. Peb ca sab has tas, peb yuav tau lawv le tej lug kws Vaajtswv cog tseg ntawd. Vaajntxwv, tub yog vim kuv ca sab le nuav, cov Yudais txhaj has tas kuv ua txhum!

⁸Ua le caag mej cov kws yog tuabneeg Yudais ib yaam le kuv, mej pheej tsi ntseeg has tas, Vaajtswv tsaa tau cov tuabneeg kws tuag lawm sawv huv qhov tuag rov qaab lug?

⁹“Yaav taag lug lawm, kuv yeej xaav has tas, kuv yuav ua txhua yaam tawmtsaam Yexus tug kws yog tuabneeg Naxales.

¹⁰Kuv txhaj ua le ntawd nraag lub nroog Yeluxalees. Cov thawj ntawm cov povthawj tso cai rua kuv moog nteg cov ntseeg Vaajtswv coj lug kaw rua huv tsev lojcuj. Thaus cov thawj txav txim has tas yuav muab cov ntseeg ntawd coj moog tua povtseg, kuv pum zoo le ntawd hab.

¹¹Muaj ntau zag kuv moog nteg cov ntseeg huv tej tsev saablaaj lug rau txim hab yuam kuas puab tso puab tej kev ntseeg tseg. Kuv ntxub puab kawg le, kuv txhaj moog tsimtxom cov ntseeg kws nyob huv lwm Tsaav Tuabneeg tej tebchaws hab.

¹²“Yog le ntawd, kuv txhaj thov cov thawj ntawm cov povthawj ua ntawv tso cai rua kuv moog tsimtxom cov ntseeg peg lub nroog Damaxes.

¹³Vaajntxwv, thaus taav su kws kuv taug kev moog, kuv pum dluab ci nplaag sau ntuj tuaj, ci tshaaj lub nub tuaj rua kuv hab cov tuabneeg kws nrug kuv moog ntawd.

¹⁴Peb txawm qaug taag rua huv aav, kuv nov ib lub suab ua lug Henplais has rua kuv has tas, ‘Xaulus, Xaulus! Ua le caag koj tsimtxom kuv? Yog koj tawmtsaam kuv, yuav mob koj ib yaam le tug nyuj kws tuam nwg tug tswv tug paas, ces yeej yuav mob nyuj nqaj xwb.’

¹⁵Kuv nug has tas, ‘Tug Tswv, koj yog leejtwg?’ Tug Tswv teb has tas, ‘Kuv yog Yexus tug kws koj tsimtxom ntaag.

¹⁶Koj ca le sawv, qhov kws kuv lug tshwm rua koj pum nuav, yog kuv lug tsaa koj ua kuv tug tubkhai. Koj moog qha qhov kws nub nua koj pum kuv hab kuv yuav ua rua koj pum yaav tom ntej rua suavdlawg paub.

¹⁷Kuv yuav khaiv koj moog qha cov Yixalayees hab lwm Tsaav Tuabneeg, kuv yuav tsomkwm koj, tsi pub leejtwg ua phem rua koj.

¹⁸Kuv yuav khaiv koj moog qha cov tuabneeg kws nyob huv qhov tsaus ntuj kuas puab tawm lug nyob qhov pum kev, hab tawm huv dlaab Ntxwgnyoog txhais teg lug cuag Vaajtswv. Thaus puab lug ntseeg kuv lawd, Vaajtswv yuav zaam txim rua puab, puab txhaj tau lug nrug cov tuabneeg kws Vaajtswv xaiv ca ua Vaajtswv tsaav tuabneeg lawm nyob ua ke.’

¹⁹“Vaajntxwv Akipas, tub yog vim le ntawd, kuv txhaj ua lawv le tej kws kuv nov lub suab sau ntuj has kuas kuv ua.

²⁰Kuv xub qha cov tuabneeg kws nyob huv lub nroog Damaxes, kuv maam le moog qha nraag lub nroog Yeluxalees. Tom qaab ntawd kuv moog qha thoob plawg huv lub xeev Yudais hab qha lwm Tsaav Tuabneeg kuas suavdlawg nyag tso nyag tej kev txhum tseg, hab tig rov lug cuag Vaajtswv, hab nyag ua nyag lub neej kuas phim qhov kws nyag tub tso nyag tej kev txhum tseg lawm.

²¹Tub yog vim le ntawd, cov Yudais txhaj le tuaj nteg kuv huv lub Tuamtsev; thaus ntawd puab tub yuav muab kuv tua povtseg.

²²Tabsis Vaajtswv naj zag paab kuv lug txug naj nub nua, kuv txhaj le tau tuaj sawv ntawm nuav ua timkhawv qha tej kws kuv pum hab kuv paub lawm rua cov hlub cov yau suavdlawg noog. Tej kws kuv qha, kuv tsuas qha lawv le tej lug kws cov cev Vaajtswv lug hab Mauxes xub qha tseg lawm

²³has tas, tug Mexiyas yuav raug kev tsimtxom, hab nwg yuav yog thawj tug kws sawv huv qhov tuag rov qaab lug. Nwg yuav qha qhov kaaj kws yog txujkev cawm dlim rua cov Yudais hab lwm Tsaav tuabneeg.”

²⁴Thaus Paulus taabtom has dlaws Paulus zaaj tsi tau taag, Fexatus txawm has nrov nrov rua Paulus has tas, “Paulus, koj vwm lawm! Tej kev txawj ntse kws koj kawm ua rua koj vwm lawm.”

²⁵Paulus teb has tas, “Fexatus, kuv tsi vwm! Kuv yeej meejpem hab tej lug kws kuv has nuav yeej muaj tseeb tag.

²⁶Vaajntxwv Akipas, kuv muaj sab tawv qha tej nuav rua koj, rua qhov koj yeej paub tej nuav taag lawm, vim tej nuav muaj taabmeeg suavdlawg. Kuv ntseeg has tas koj yeej paub tej nuav huv tuabsi lawm.

²⁷Vaajntxwv Akipas, koj puas ntseeg tej lug kws cov cev Vaajtswv lug qha? Kuv paub has tas koj yeej ntseeg tej lug ntawd.”

²⁸Vaajntxwv Akipas has rua Paulus has tas, “koj nyavnyuas qha mivntsiv rua kuv xwb, koj txawm siv xaav has tas, koj yuav yum tau kuv lug ntseeg Yexus nua los?”

²⁹Paulus teb has tas, “Txawm yog kuv qha ntau qha tsawg los kuv thov Vaajtswv paab koj hab mej txhua tug kws taabtom noog kuv qha nuav kuas suavdlawg lug ua ib yaam le kuv ua, tsuas yog tsi xob raug luas muab saw hlau khi le kuv raug nuav xwb.”

³⁰Paulus has le ntawd taag, Vaajntxwv Akipas hab tug Tswv xeev Fexatus, Npelanikes hab cov tuabneeg kws nyob ntawd txawm sawv,

³¹hab thaus puab tawm moog rua nrau zoov lawm, puab sis thaam has tas, “Tug txivneej nuav tsi tau ua ib qhov txhum kws yuav txaus muab nwg tua povtseg lossis muab nwg kaw rua huv tsev lojcuj.”

³²Vaajntxwv Akipas has rua Fexatus has tas, “Yog tug txivneej nuav tsi xob thov moog has tim Fuabtais Xixas, ces peb ca le muab nwg tso moog los tau.”