Read Hmong Njua Teg Num 27 Bible Online

Teg Num 27 - Hmong Njua bible

Teg Num 27

¹Thaus cov numtswv saablaaj pum zoo has tas, puab yuav xaa peb moog tim tebchaws Italis, puab muab Paulus hab ob peb tug tuabneeg raug txim rua Yuli-us kws yog cov Loos tug thawj tubrog pawg pua kws saib paab tubrog kws hu ua “Fuabtais Paab.”

²Ces peb nce moog rua huv lub nkoj kws tuaj peg lub nroog Alimetis tuaj. Lub nkoj ntawd taabtom yuav moog rua tim tej nroog kws muaj chaw nreg nkoj huv xeev Axias, peb txawm caij moog. Muaj ib tug txivneej hu ua Alitakhus nrug peb moog. Aletakhus yog tuabneeg Makedaunias kws tuaj tim lub nroog Thexalaunikes tuaj.

³Nub tom qaab peb moog txug huv lub nroog Xidoos. Yuli-us hlub Paulus, Yuli-us ca Paulus moog saib Paulus cov phoojywg, cov phoojywg ntawd txhaj muab tej qhov txhua chaw pub rua Paulus.

⁴Thaus peb caij nkoj tawm huv lub nroog Xidoos moog, peb moog saab peg qaum koog Povtxwv Xaipas moog, rua qhov saab nraag cua ntsawj hlub heev.

⁵Thaus peb caij nkoj moog, peb moog ze lub xeev Kilikias hab xeev Paafilias, peb maam le moog txug lub nroog Milas kws nyob huv tebchaws Likias.

⁶Thaus peb tseem nyob huv lub nroog Milas muaj ib lub nkoj tuaj nraag lub nroog Alexaadias tuaj, lub nkoj ntawd yuav moog rua tim tebchaws Italis. Tug thawj tubrog pawg pua txawm kuas peb caij lub nkoj ntawm moog.

⁷Peb caij nkoj moog qeeb heev, rua qhov muaj cua ntsawj hlub heev tom hauv ntej tuaj, peb txhaj moog tsi tau ceev. Peb moog tau ntau nub, peb maam le moog txug huv lub nroog Kanidus. Pheej muaj cua ntsawj hlub heev, peb moog tsi tau ncaaj nraim, peb txhaj lem nkoj moog rua nraag lub koog povtxwv Keletes, hab peb moog ze Keletes ceg kaum kws hu ua Xalemaunes moog.

⁸Peb caij nkoj lawv ntug koog povtxwv moog nyuaj kawg le, peb maam le moog txug ib qho chaw kws suavdlawg hu ua Qhov Chaw Zoo Nreg Nkoj kws nyob ze lub nroog Laxe-as.

⁹Peb nyob ntawm qhov chaw nreg nkoj ntawd tau ntev loo, tsi zoo caij nkoj moog lawm, rua qhov tub dlhau Nub ua Kevcai Theej Txhoj lawm. Yog le ntawd Paulus txhaj has rua suavdlawg has tas,

¹⁰“Cov kwvtij, yog peb caij nkoj moog ntxiv, ntshai peb yuav muaj kev txhawj kev ntshai heev, lub nkoj hab tej qhov txhua chaw kws peb thauj moog yuav puamtsuaj taag huv tuabsi, tsi yog le ntawd xwb, tseem yuav muaj tuabneeg tuag hab.”

¹¹Txawm yog Paulus has le ntawd los tug thawj tsi noog Paulus lug, nwg tsuas noog tug tsaav nkoj hab tug tswv nkoj lug xwb.

¹²Lub caij ntuj no tsi zoo nreg nkoj ntev ntawm qhov chaw ntawd, feem coob txhaj pum zoo caij nkoj tawm qhov chaw ntawd moog su tom lub nroog Faunis kws muaj chaw nreg nkoj. Lub nroog Faunis yog qhov chaw nreg nkoj ntawm lub koog Povtxwv Keletes kws tig rua saab qaabteb nubpoob hab saab qaumteb nubpoob. Puab moog su qhov ntawd kuas dlhau lub caij ntuj no.

¹³Thaus muaj cua tuaj quas ntxag saab qaabteb tuaj, puab xaav has tas, zoo moog rua tim lub nroog Faunis. Puab txawm nqug lub thauj lug rua sau lub nkoj, hab puab caij nkoj lawv ntug koog Povtxwv Keletes moog.

¹⁴Tabsis thaus puab caij nkoj moog mivntsiv, txawm muaj ib nthwv cua ntsawj sau koog Povtxwv Kaletes tuaj. Nthwv cua ntawd suavdlawg hu ua “Cov Cua Saab Nubtuaj Qaumteb.”

¹⁵Cov cua ntawd ntsawj lub nkoj kws peb caij, lub nkoj txawm moog tsi tau lawv ntug koog Povtxwv Kaletes moog.

¹⁶Peb lem lub nkoj moog txug nraag ib lub koog Povtxwv miv miv kws hu ua Kaudas. Thaus peb moog txug nraag cua ntsawj tsi heev, rua qhov muaj lub koog povtxwv ntawd thaiv lawm, peb txhaj nqug lub nkoj miv lug khi rua ntawm lub nkoj luj, tabsis peb nqug nyuaj kawg le.

¹⁷Thaus puab nqug tau lub nkoj lawm, puab muab hlua khi lub nkoj ruaj ruaj, rua qhov puab ntshai nyob tsaam lub nkoj moog tsoo cov xuabzeb ntawm ntug havtxwv Linpias, puab txhaj muab dlaim ntaub cug cua txu, ca lub nkoj moog lawv le cua ntsawj.

¹⁸Cua dlaaj cua dlub pheej tsi txawj tu le, thaus kaaj ntug lawm, puab muab tej qhov txhua chaw kws puab thauj moog, thau povtseg rua huv havtxwv.

¹⁹Nub tom qaab puab txawm muab tej qhov txhua chaw kws puab siv huv lub nkoj thau povtseg huv tuabsi hab.

²⁰Peb tsi pum lub nub hab lub hli tau ntau nub los cua dlaaj cua dlub tseem ntsawj le qub. Thaus ntawd peb txhaj xaav has tas, ntshai peb yuav tsi dlim le lawm.

²¹Tau ntau nub cov tuabneeg kws nyob huv lub nkoj tsi muaj leejtwg noj mov le, Paulus txawm sawv ntsug has tas, “Cov kwvtij, yog mej ntxuv noog kuv lug, peb nyob tuabywv tom lub koog Povtxwv Keletes tsi xob tuaj, ces peb tub tsi raug kev txomnyem hab peb tej qhov txhua chaw yuav tsi poob taag.

²²Tabsis kuv has rua mej has tas, mej tsi xob txhawj! Peb cov kws nyob ntawm nuav yuav tsi muaj ib tug tuag le, tsuas yog lub nkoj yuav puag taag xwb.

²³Kuv paub le nuav, rua qhov naag mo tug Vaajtswv kws kuv naj nub pehawm khaiv nwg ib tug timtswv lug has rua kuv has tas,

²⁴‘Paulus, koj tsi xob ntshai! Koj yeej yuav tau moog sawv taabmeeg Fuabtais Xixas xwb. Vaajtswv hlub koj heev, Vaajtswv yuav tsi pub cov tuabneeg kws nyob huv lub nkoj nuav ib tug tuag le.’

²⁵Yog le ntawd cov kwvtij, mej tsi xob txhawj! Rua qhov kuv ntseeg has tas, Vaajtswv yeej yuav ua lawv le nwg tau qha rua kuv lawm.

²⁶Txawm yog le caag los peb lub nkoj yeej yuav moog khuab rua ib lub koog povtxwv xwb.”

²⁷Cua dlaaj cua dlub ntsawj peb lub nkoj moog moog lug lug huv Havtxwv Meditelanees tau kaum plaub mos, mo ntawd kwvlaam ib taag mo, cov tuabneeg kws ua num huv lub nkoj xaav has tas lub nkoj tub moog yuav txug tim ntug,

²⁸puab txawm muab ib txuj hlua khi lub thauj tso rua huv havtxwv ntsuag saib tub le caag. Thaus puab ntsuag taag, puab pum has tas tub neeg nkaum dlaaj, lub nkoj moog mivntsiv puab rov ntsuag dlua, puab pum has tas tub kaum tsib dlaag.

²⁹Puab ntshai nyob tsaam lub nkoj moog tsoo pobzeb, puab txhaj muab plaub lub thauj tom tw nkoj tso rua huv havtxwv kuas lub nkoj nreg. Mo ntawd peb laaj tog txug kaaj ntug kawg le.

³⁰Cov tuabneeg kws ua num huv lub nkoj xaav tsiv, puab txawm muab lub nkoj miv tso rua huv havtxwv, puab ua txuj ua yaam le puab yuav muab cov thauj hlau kws nyob tom taubhau nkoj tso rua huv dlej.

³¹Tabsis Paulus has rua tug thawj tubrog pawg pua hab cov tubrog has tas, “Yog puab cov ntawd tsiv lawm, ces mej cov nyob ntawm nuav yuav tsi muaj ib tug dlim le.”

³²Cov tubrog nov Paulus has le ntawd, cov tubrog txawm muab txuj hlua kws khi lub nkoj miv txav tso lub nkoj miv rua dlej ntsawj moog.

³³Thaus yuav kaaj ntug, Paulus kuas suavdlawg noj mov. Paulus has tas, “Mej tub tog saib cua dlaaj cua dlub puas tu lug tau kaum plaub nub nuav lawm, mej tsi tau noj ib yaam dlaabtsi le.

³⁴Yog le ntawd, thov mej ca le noj mov, mej txhaj le yuav tsi tuag. Txawm yog mej tej plaubhau los yuav tsi muaj ib txuj poob le.”

³⁵Thaus Paulus has le ntawd taag, Paulus txawm muab ib lub ncuav lug ua Vaajtswv tsaug taabmeeg suavdlawg, nwg maam le muab ndlais noj.

³⁶Thaus puab nov Paulus has le ntawd, puab zoo sab mivntsiv, puab txhua tug txhaj noj mov hab.

³⁷Taagnrho peb cov kws nyob huv lub nkoj muaj ob puas xyaa caum rau leej.

³⁸Thaus puab noj mov taag lawm, puab muab cov nplej kws puab thauj moog, thau povtseg rua huv havtxwv kuas lub nkoj sib mivntsiv.

³⁹Thaus kaaj ntug lawm, cov tuabneeg kws ua num huv lub nkoj pum ib lub koog povtxwv, tabsis puab tsi paub has tas yog lub twg. Puab pum ib ceg havtxwv kws muaj xuabzeb, puab xaav has tas tso lub nkoj ncaaj nraim moog rua ntawd nyaj yuav moog txug tim ntug.

⁴⁰Puab txawm muab tej hlua kws khi cov thauj txav tso cov thauj rua huv havtxwv, hab dlaws txuj hlua kws khi ob tug dluav kws tswj lub nkoj povtseg, hab puab nthuav dlaim ntaub cug cua nyob tom taubhau rua cua ntsawj lub nkoj kuas ncaaj nraim moog rua tim ntug.

⁴¹Tabsis thaus puab caij lub nkoj moog tsi tau txug tim ntug, tog taubhau nkoj txawm moog dlaig nkaus ruaj ruaj rua ntawm cov xuabzeb lawm, dlej ndlaas tuaj ntsawj yaav tw nkoj tawg yuav laug taag.

⁴²Cov tubrog ntshai nyob tsaam cov tuabneeg raug txim ua luam dlej tsiv, puab txawm sis thaam has tas, yuavtsum muab cov tuabneeg raug txim tua povtseg huv tuabsi.

⁴³Tabsis tug thawj tubrog pawg pua xaav paab Paulus, nwg txhaj txwv tsi pub kuas puab muab cov tuabneeg raug txim tua povtseg, tug thawj tubrog has kuas cov kws txawj ua luam dlej, dlha rua huv dlej ua luam dlej moog rua tim ntug,

⁴⁴cov kws tsi txawj ua luam dlej ca le muab tej dlaim txag hab tej yaav ntoo kws luv ntawm lub nkoj lug tag hauvsab ua luam dlej moog rua tim ntug. Puab ua le ntawd, suavdlawg txhaj moog txug tim ntug huv tuabsi tsi muaj ib tug tuag le.