Read Hmong Njua Teg Num 28 Bible Online

Teg Num 28 - Hmong Njua bible

Teg Num 28

¹Thaus peb txhua tug dlim hab tawm tau rua tim ntug lawm, peb txhaj paub has tas, lub koog povtxwv ntawd hu ua Malatas.

²Cov tuabneeg kws nyob huv lub koog povtxwv ntawd hlub peb kawg le. Puab rauv tawg rua peb nte, rua qhov thaus ntawd taabtom lug naag hab no heev.

³Paulus moog khaws tau ib tsuag tawg lug, nwg taabtom yuav muab tso rua huv qhovcub, thaus paa tawg txhawb, muaj ib tug naab tawm huv tsuag tawg lug tum Paulus txhais teg.

⁴Thaus cov tuabneeg Malatas pum tug naab tum dlai vag ntawm Paulus txhais teg, puab sis thaam has tas, “Tug txivneej nuav, ntshai nwg yog ib tug tuabneeg tua tuabneeg, txawm yog nwg dlim kev tuag huv havtxwv lug lawm los Ntuj tseem tsi tseg nwg nyob hab.”

⁵Tabsis Paulus nchus tug naab poob rua huv qhovcub, Paulus tsi mob le caag le.

⁶Cov tuabneeg ntawd pum naab tum Paulus txhais teg, puab xaav has tas, ntshai Paulus txhais teg yuav o lossis Paulus yuav ca le qaug ntawg hab tuag kag taamsim ntawd, puab tog tog, tabsis tsi pum muaj le caag, ces puab tsua has tas, “Nwg yog vaajtswv.”

⁷Tug nom kws kaav lub koog povtxwv Malatas hu ua Puli-us, nwg lub tsev nyob tsi dleb ntawm qhov chaw kws cov tuabneeg Malatas rauv tawg rua peb nte, peb moog su huv Puli-us tsev tau peb nub, hab Puli-us nrhav zaub nrhav mov zoo kawg rua peb noj.

⁸Thaus ntawd Puli-us txiv taabtom ua npaws hab thoj plaab. Paulus moog saib Puli-us txiv huv txaaj hab thov Vaajtswv paab khu nwg. Thaus Paulus thov Vaajtswv, Paulus cev teg tuav nwg, ces nwg tej mob txawm zoo lawm.

⁹Thaus Paulus khu Puli-us txiv zoo lawm, cov tuabneeg muaj mob kws nyob huv lub koog povtxwv ntawd txawm tuaj cuag Paulus, hab puab txhua tug tej mob zoo huv tuabsi.

¹⁰Cov tuabneeg ntawd nqaa ntau yaam tuaj pub rua peb hab ua peb tsaug. Hab thaus peb yuav caij nkoj moog, puab nqaa qhov txhua chaw tuaj tso rua huv lub nkoj rua peb siv.

¹¹Peb nyob huv koog povtxwv Malatas tau peb lub hlis, tom qaab ntawd, peb nce moog rua huv lub nkoj kws hu ua “Vaajtswv Ntxaib,” lub nkoj ntawd tuaj nraag lub nroog Alexaadias tuaj su huv lub koog Povtxwv ntawd kuas dlhau lub caij ntuj no.

¹²Thaus peb moog txug peg lub nroog Xilakuxes, peb nyob ntawd tau peb nub.

¹³tom qaab ntawd peb caij nkoj moog rua peg lub nroog Lenki-oos. Nub tom qaab muaj cua ntsawj saab qaabteb tuaj, peb caij nkoj moog ob nub txhaj moog txug peg lub nroog Pute-aulis.

¹⁴Thaus peb moog txug huv lub nroog ntawd lawm, peb moog saib cov ntseeg. Puab thov kuas peb nrug puab nyob xyaa nub. Tom qaab ntawd peb maam le moog txug peg lub nroog Loos.

¹⁵Thaus cov kwvtij ntseeg kws nyob huv lub nroog Loos nov has tas peb moog, puab txawm tuaj tog peb. Muaj ibtxha tuaj tog peb nraag lub Kab Api-us, muaj ibtxha tuaj tog peb nraag lub zog kws hu ua Peb Lub Tsev Su. Thaus Paulus pum cov ntseeg tuaj tog peb, nwg ua Vaajtswv tsaug hab nwg kaaj sab mivntsiv.

¹⁶Thaus peb moog txug huv lub nroog Loos lawm, cov numtswv ca Paulus nwg nyob nwg, tsuas yog puab tso ib tug tubrog zuv Paulus xwb.

¹⁷Tau peb nub tom qaab Paulus txawm hu cov Yudais tej thawjcoj kws nyob huv lub nroog ntawd tuaj saablaaj. Thaus suavdlawg tuaj txhij lawm, Paulus has rua puab has tas, “Cov kwvtij, txawm yog kuv tsi tau ua txhum peb tsaav tuabneeg lossis tsi tau ua txhum peb cov yawmkoob tej kevcai los cov Yudais ca le nteg kuv tim lub nroog Yeluxalees hab muab rua cov numtswv Loos txav txim.

¹⁸Thaus cov numtswv Loos taug kuv zaaj taag, puab xaav tso kuv, rua qhov puab tsi pum kuv ua ib qho txhum kws yuav txaus muab kuv tua povtseg,

¹⁹tabsis cov Yudais txwv tsi pub puab tso kuv, kuv txhaj thov tuaj cuag Fuabtais Xixas. Kuv ua le nuav, tsi yog kuv yuav tuaj nkaug kuv tsaav tuabneeg rua Fuabtais Xixas.

²⁰Qhov kws kuv hu mej tuaj ntawm nuav yog kuv xaav pum mej hab qha rua mej paub has tas, vim le caag luas txhaj muab saw hlau khi kuv. Kuv raug khi le nuav tub yog kuv ntseeg tug kws cov Yixalayees ca sab rua.”

²¹Puab has rua Paulus has tas, “Cov tuabneeg kws nyob tim lub xeev Yudas tsi muaj ib tug sau koj zaaj tuaj rua peb paub le. Hab peb cov kwvtij kws nyob tid tuaj saib peb, tabsis peb tsi nov puab has ib yaam dlaabtsi txug koj le.

²²Peb cov kws tuaj ntawm nuav, peb xaav paub has tas zaaj kws koj ntseeg yog le caag, rua qhov peb pheej nov has tas, tej tuabneeg kws nyob txhua qhov chaw, suavdlawg ntxub cov tuabneeg kws ntseeg le koj ntseeg. Zaaj nuav peb paub tsi tseeb, thov koj qha rua peb.”

²³Puab txawm teem ib lub sijhawm yuav nrug Paulus thaam. Thaus txug lub sijhawm ntawd, muaj tuabneeg coob coob tuaj cuag Paulus huv lub tsev kws Paulus nyob. Paulus qha cov tuabneeg kws tuaj ntawd ib nub tsaus ntuj. Nwg qha txug Vaajtswv lub Tebchaws. Nwg muab tej lug kws Mauxes hab cov cev Vaajtswv lug sau tseg lawm qha rua puab kuas puab lug ntseeg Yexus.

²⁴Thaus Paulus qha taag, muaj ibtxha ntseeg tej kws Paulus qha, tabsis muaj ibtxha tsi ntseeg,

²⁵cov tuabneeg ntawd tsi sis hum, nyag txawm tawm nyag lawm. Thaus puab yuav moog Paulus has ib lus rua puab has tas, “Vaaj Ntsujplig tug Dlawbhuv kuas Yaxayas kws yog tug cev Vaajtswv lug has tseeb rua mej cov yawmkoob:

²⁶Nwg has tas, ‘Ca le moog has rua cov tuabneeg nuav has tas, mej yuav noog taag noog thab, tabsis mej yuav tsi totaub, mej yuav saib taag saib thab, tabsis mej yuav tsi pum,

²⁷cov tuabneeg nuav lub sab ruag, puab tsi xaav noog, puab txhaj ntsaws qhovntsej, puab tsi xaav pum, puab txhaj qe qhovmuag. Yog puab tsi ua le ntawd nyob tsaam puab qhovmuag yuav pum, puab qhovntsej yuav nov hab puab yuav totaub, ces puab yuav tig rov lug cuag kuv, hab kuv yuav khu puab tej mob.’ ”

²⁸Paulus xaus lug has tas, “Kuv qha rua mej has tas, tub muaj tuabneeg moog qha Vaajtswv txujlug kws yog txujkev cawm dlim rua lwm Tsaav Tuabneeg lawm. Puab yeej yuav noog!”

²⁹Thaus Paulus has le ntawd taag, cov Yudais sis caav heev, ces puab nyag txawm tawm nyag moog lawm.

³⁰Paulus nyob huv lub tsev kws nwg ndlav tau ob xyoos txwm nkaus, nwg tog txais txhua tug kws tuaj saib nwg.

³¹Nwg qha txug Vaajtswv lub Tebchaws hab qha Tswv Yexus Khetos zaaj rua txhua tug noog, nwg tsi ntshai leejtwg le hab tsi muaj leejtwg txwv nwg.