Read Hmong Njua Teg Num 3 Bible Online

Teg Num 3 - Hmong Njua bible

Teg Num 3

¹Muaj ib nub thaus peb teev nub qaij, Petus hab Yauhaas moog rua huv lub Tuamtsev, thaus ntawd yog lub sijhawm kws suavdlawg tuaj thov Vaajtswv.

²Muaj ib tug txivneej tuag ceg thaus nruab thab lug nyob quastsawg ntawm lub roojvaag kws hu ua lub Roojvaag Zoo Nkauj. Naj nub muaj tuabneeg kwv nwg tuaj nyob rua ntawm lub roojvaag hab thov nyaj ntawm cov tuabneeg kws tuaj thov Vaajtswv huv lub Tuamtsev.

³Thaus nwg pum Petus hab Yauhaas taabtom yuav moog huv lub Tuamtsev, nwg txawm thov kuas obtug pub ib yaam dlaabtsi rua nwg.

⁴Obtug tsaa qhovmuag saib tug txivneej kws tuag ceg ntawd, ces Petus txawm has tas, “Koj ca le saib wb!”

⁵Tug txivneej ntawd xaav has tas, nyaj obtug yuav pub ib yaam dlaabtsi rua nwg ntaag.

⁶Tabsis Petus has rua nwg tas, “Kuv tsi muaj nyaj, tabsis kuv yuav muab yaam kws kuv muaj rua koj: Kuv tuav Yexus Khetos kws yog tuabneeg Naxales lub npe has rua koj tas, koj ca le sawv hab moog kev!”

⁷Petus tuav nkaus tug txivneej ntawd saab teg xis nqug nwg sawv. Taamsim ntawd nwg ob txhais ceg hab tej cos txhaa txawm muaj zug lawm;

⁸nwg sawv tseeg nrug Petus hab Yauhaas moog rua huv lub Tuamtsev hab nwg dlha paaj pawg ua Vaajtswv tsaug.

⁹Cov tuabneeg kws nyob ntawd pum nwg moog kev hab nov nwg ua Vaajtswv tsaug,

¹⁰hab thaus puab pum dlheev nwg, puab paub has tas, nwg yog tug kws naj nub tuaj nyob ntawm lub Roojvaag Zoo Nkauj thov nyaj, puab xaav tsi thoob le, sov yog ua le caag nwg moog taug kev lawm.

¹¹Thaus tug txivneej ntawd tseem tuav rawv Petus hab Yauhaas teg ntawm Xalumoos lub qaab khaav, cov tuabneeg kws pum le ntawd xaav tsi thoob le. Puab txawm dlha zum zawg lug rua ntawm Petus obtug.

¹²Thaus Petus pum cov tuabneeg dlha zum zawg lug, Petus has rua puab tas, “Cov kwvtij Yixalayees, ua le caag mej yuav xaav tsi thoob rua tej nuav hab ua le caag mej yuav saib quas ntsoov wb? Mej xaav has tas yog wb muaj fwjchim lossis yog wb ntseeg heev, wb txhaj ua rua tug txivneej nuav moog taug kev nua los?

¹³Tug Vaajtswv kws yog peb yawmkoob Anplahaas, Ixaj hab Yakhauj tug Vaajtswv ua rua nwg tug Tubkhai Yexus tau koob meej. Tabsis mej nteg nwg coj moog rua cov numtswv kws muaj fwjchim. Thaus Philaj taug nwg zaaj, txawm yog Philaj xaav muab nwg tso los mej tsi kaam.

¹⁴Nwg yog tug dlawbhuv hab ncaaj nceeg, tabsis mej tsi kaam Philaj tso nwg. Mej tsua thov kuas Philaj tso tug tuabneeg kws tua tuabneeg rua mej.

¹⁵Mej muab tug kws cawm tuabneeg txujsa tua povtseg, tabsis Vaajtswv tsaa nwg sawv huv qhov tuag rov qaab lug, peb txhaj ua timkhawv has tas nwg tub sawv huv qhov tuag rov qaab lug lawm tag.

¹⁶Tub yog Yexus lub npe kws muaj fwjchim khu tau tug txivneej tuag ceg kws mej pum ntawd muaj zug ntaag. Tub yog vim tug txivneej kws mej pum hab paub nuav ntseeg Yexus, nwg txhaj zoo. Mej pum has tas nwg zoo lawm vim nwg ntseeg Yexus.

¹⁷“Cov kwvtij, kuv paub has tas qhov kws mej hab mej cov thawjcoj ua le ntawd rua Yexus, vim mej tsi paub.

¹⁸Yaav thaus u Vaajtswv kuas cov cev Vaajtswv lug qha ua ntej has tas, tug Mexiyas yuav raug kev tsimtxom; nwgnuav tub muaj tav lawv le Vaajtswv tau has tseg lawm.

¹⁹Yog le ntawd, mej yuavtsum tso mej tej kev txhum tseg hab tig rov lug cuag Vaajtswv, Vaajtswv txhaj yuav zaam mej lub txim. Yog mej ua le ntawd,

²⁰tug Tswv yuav paab kuas mej tau zoo nyob kaaj sab lug. Vaajtswv yuav khaiv Yexus kws yog tug Mexiyas lug paab mej.

²¹Yexus yuav nyob sau ntuj ceebtsheej moog txug thaus kws ib puas tsaav yaam hloov dlua tshab taag huv tuabsi, tej nuav muaj lawv le cov cev Vaajtswv lug kws yog tuabneeg dlawbhuv thaus u tau qha tseg lawm.

²²Rua qhov Mauxes has tas, ‘Tug Tswv kws yog mej tug Vaajtswv yuav tsaa mej cov ib tug ua tug cev Vaajtswv lug ib yaam le nwg tau tsaa kuv, mej yuavtsum noog txhua yaam kws nwg qha rua mej.

²³Yog leejtwg tsi noog tej lug kws tug cev Vaajtswv lug ntawd qha, Vaajtswv yuav muab tug ntawd tshem tawm ntawm nwg tsaav tuabneeg moog hab tug ntawd yuav raug kev puamtsuaj.’

²⁴Cov cev Vaajtswv lug thaus u kws yog suav txij Xamuyees lug, puavleej has txug tej nuav ib yaam nkaus.

²⁵Thaus Vaajtswv kuas nwg cov cevlug qha nwg tej lug cog tseg rua mej, tub yog nwg xaav paab mej. Hab tej lug kws nwg cog tseg rua mej cov yawmkoob, tub yog nwg coglug rua mej hab. Vaajtswv coglug tseg rua Anplahaas has tas, ‘Kuv yuav foom koob moov ntawm koj tug xeebntxwv moog rua txhua tsaav tuabneeg huv qaab ntuj nuav.’

²⁶Yog le ntawd, Vaajtswv txhaj khaiv nwg tug Tubkhai kws nwg tub xaiv ca lawm lug cuag mej ua ntej, nwg foom koob moov rua mej, kuas mej txhaj tso mej tej kev txhum tseg.”