Read Hmong Njua Teg Num 4 Bible Online

Teg Num 4 - Hmong Njua bible

Teg Num 4

¹Thaus Petus hab Yauhaas tseem taabtom qha cov tuabneeg ntawd, cov povthawj qee leej, cov tubrog kws saib lub Tuamtsev tug thawj hab ib cov Xadukais txawm tuaj nrhav obtug.

²Puab chim rua Petus hab Yauhaas heev, rua qhov obtug qha rua suavdlawg has tas, Yexus tub sawv huv qhov tuag rov qaab lug lawm. Obtug qha le ntawd, suavdlawg txhaj paub has tas, tuabneeg sawv tau huv qhov tuag rov qaab lug.

³Puab txawm nteg Petus hab Yauhaas coj moog kaw ib mos, rua qhov thaus ntawd tub tsaus ntuj lawm.

⁴Tabsis cov tuabneeg kws tau nov obtug qha zaaj ntawd, muaj ntau leej ntseeg Yexus; suav cov txivneej kws lug ntseeg muaj kwvlaam le tsib txheeb leej.

⁵Thaus kaaj ntug lawm, cov Yudais tej thawjcoj, cov txwjlaug hab cov xwbfwb kws qha Vaajtswv txuj Kevcai tuaj ua ke saablaaj huv lub nroog Yeluxalees.

⁶Anas kws yog tug Povthawj Hlub, Kaiyafas, Yauhaas, Alexaades hab lwm tug kws yog tug Povthawj Hlub tsev tuabneeg tuaj nrug puab saablaaj hab.

⁷Puab coj Petus hab Yauhaas lug sawv taabmeeg puab hab puab nug obtug has tas, “Leejtwg pub fwjchim rua meb? Hab meb tuav leejtwg lub npe ua tej nuav?”

⁸Taamsim ntawd, Vaaj Ntsujplig tug Dlawbhuv txawm lug kaav Petus lub sab, Petus teb puab has tas, “Cov numtswv kws kaav pejxeem hab cov txwjlaug,

⁹nub nua mej nug wb le nuav, yog mej nug txug qhov kws wb khu tug txivneej tuag ceg nuav lossis nug txug qhov kws nwg ob txhais ceg zoo.

¹⁰Yog mej nug le ntawd, kuv teb rua mej hab cov Yixalayees suavdlawg has tas, tub yog Yexus tug kws yog tuabneeg Naxales ua rua tug txivneej kws sawv taabmeeg mej nuav zoo ntaag. Yexus yog tug kws mej muab ntsa rua sau tug ntoo khaublig, tabsis Vaajtswv tub tsaa nwg sawv huv qhov tuag rov qaab lug lawm.

¹¹Yexus yog tug kws Vaajtswv txujlug qha tseg has tas: ‘Lub Pobzeb kws cov kws ua tsev muab povtseg, nwgnuav tub muab lub ntawd lug ua lub thawj lawm.’

¹²Tsi muaj leejtwg cawm tau peb dlim peb lub txim, tsuas yog Yexus tuab leeg xwb txhaj cawm tau, tsi muaj dlua lwm tug kws Vaajtswv tso lug cawm peb tuabneeg nplajteb kuas peb dlim peb lub txim le.”

¹³Thaus puab pum has tas Petus hab Yauhaas muaj sab tawv teb le ntawd, puab xaav tsi thoob le, rua qhov puab paub has tas obtug yeej tsi tau kawm ntawv. Ces puab ncu dlheev txug has tas, obtug yeej nrug Yexus nyob ua ke.

¹⁴Tabsis puab tsi muaj lug teb, rua qhov puab pum tug txivneej tuag ceg kws zoo lawm nrug obtug sawv ua ke ntawd.

¹⁵Puab txawm kuas Petus hab Yauhaas obtug tawm moog rua nrau zoov, puab saablaaj has tas,

¹⁶“Peb yuav ua le caag rua obtug? Cov tuabneeg kws nyob huv lub nroog Yeluxalees nuav puavleej paub has tas, zaaj txujci tseemceeb nuav tub yog obtug ua, yog peb yuav has tas tsi yog obtug ua los yeej has tsi tau.

¹⁷Peb yuavtsum txwv tsi pub obtug has Yexus lub npe rua leejtwg le, zaaj nuav txhaj yuav tsi nrov nchaa moog rua suavdlawg nov.”

¹⁸Puab txawm hu obtug rov qaab lug, hab puab has rua obtug kuas obtug tsi xob has lossis qha Yexus zaaj ib zag le lawm.

¹⁹Tabsis Petus hab Yauhaas teb puab has tas, “Wb noog mej lug zoo dlua le wb noog Vaajtswv lug los? Mej sim xaav saib, ob qho nuav qhov twg yuav hum Vaajtswv sab dlua?

²⁰Tej kws wb nov hab wb pum lawm, wb yeej yuav qha, wb npog tsi tau le.”

²¹Cov numtswv hajyam txwv obtug tawv dlua thawj zag, ces puab maam le tso obtug moog. Puab tsi paub yuav rau txim le caag rua obtug, rua qhov tej tuabneeg kws pum zaaj txujci tseemceeb ntawd suavdlawg puavleej qhuas Vaajtswv.

²²Tug txivneej kws Vaajtswv khu zoo ntawd noobnyoog muaj plaub caug tawm xyoo lawm.

²³Thaus cov numtswv tso Petus hab Yauhaas lawm, obtug rov moog rua ntawm cov ntseeg hab qha tej kws cov thawj ntawm cov povthawj hab cov txwjlaug txwv obtug rua puab noog.

²⁴Thaus cov ntseeg nov le ntawd, puab koom ua ib lub sab thov Vaajtswv has tas: “Vaajtswv, koj yog tug kws tsim lub ntuj hab lub nplajteb, tsim dlej havtxwv hab tsim ib puas tsaav yaam kws nyob sau nruab ntug, nyob huv nplajteb hab huv havtxwv,

²⁵koj kuas Vaaj Ntsujplig tug Dlawbhuv qha rua peb yawmkoob Daviv kws yog koj tug tubkhai has tas: ‘Vim le caag lwm Tsaav Tuabneeg chim heev; hab tej tuabneeg tuavhuv ua phem, tabsis ua tsi tau?

²⁶Cov vaajntxwv kws kaav lub nplajteb nuav sawv nreg nroog tog hab cov numtswv tuaj ua ke tawmtsaam tug Tswv hab tug Mexiyas.’

²⁷Yeej muaj le ntawd tag, rua qhov Helauj hab Pauti-us Philaj obtug nrug lwm Tsaav Tuabneeg hab cov Yixalayees tuaj ua ke rua huv lub nroog nuav tawmtsaam Yexus kws yog koj tug Tubkhai dlawbhuv kws koj tsaa ua tug Mexiyas lawm.

²⁸Tej kws puab ua nuav tub yog muaj lawv le koj lub fwjchim hab koj tau npaaj sab tseg lawm.

²⁹Tug Tswv, nwgnuav thov koj tsaa qhovmuag saib tej kws puab ua nruj ua tsiv rua peb. Hab thov koj paab peb cov kws yog koj cov tubkhai kuas muaj lub sab tawv qha koj txujlug.

³⁰Thov koj cev teg khu tej tuabneeg kws muaj mob, hab thaus peb tuav Yexus kws yog koj tug Tubkhai dlawbhuv lub npe, thov koj ua tej txujci tseemceeb rua suavdlawg pum.”

³¹Thaus puab thov taag, qhov chaw kws puab nyob ntawd txawm ua zug koog, Vaaj Ntsujplig tug Dlawbhuv txawm lug kaav puab txhua tug lub sab, puab txhaj muaj lub sab tawv qha Vaajtswv txujlug.

³²Cov ntseeg txhua tug puavleej koom ua ib lub sab. Puab nqaa puab tej qhov txhua chaw tuaj tso ua ke ua suavdlawg tug. Tsi muaj ib tug yuav has tas, tej kws nwg muaj yog nwg le.

³³Vaajtswv pub fwjchim rua cov timthawj, puab txhaj muaj lub sab tawv ua timkhawv has txug zaaj kws Tswv Yexus sawv huv qhov tuag rov qaab lug, hab Vaajtswv foom koob moov rua puab txhua tug.

³⁴Puab cov ntawd tsi muaj ib tug txomnyem le. Cov kws muaj aav ntau lossis muaj teb, muaj vaaj muaj tsev los nwg muab muag, hab coj cov nyaj kws nwg muag tau tuaj

³⁵rua cov timthawj; hab cov timthawj muab cov nyaj ntawd faib rua suavdlawg lawv le tug kws muaj chaw siv.

³⁶Yauxej kuj ua le ntawd hab; Yauxej yog xeem Levis, nwg yug tim lub koog Povtxwv Xaipas. Cov timthawj tis dlua ib lub npe rua Yauxej hu ua Npananpas, (lub npe ntawd txhais has tas “Tug kws Txhawb Zug.”)

³⁷Nwg muab nwg dlaim teb muag, hab coj cov nyaj tuaj rua cov timthawj.