Read Hmong Njua Teg Num 6 Bible Online

Teg Num 6 - Hmong Njua bible

Teg Num 6

¹Tom qaab ntawd pheej muaj tuabneeg lug ua Yexus cov thwjtim coob zuj zug ntxiv. Ces cov Yudais kws has lug Kilis hab cov Yudais kws has lug Henplais tsi sis hum. Cov Yudais kws has lug Kilis ywg has tas, txhua nub kws faib zaub mov hab faib nyaj txag, puab tsi faib rua cov puj ntsuag kws yog tuabneeg Yudais kws has lug Kilis.

²Ces kaum ob tug timthawj txhaj hu cov ntseeg tuaj ua ke hab has rua puab tas, “Tsi tsimnyog peb cov kws yog timthawj tso qhov kws qha Vaajtswv txujlug tseg hab moog ua cov kws saib suavdlawg tej zaub mov.

³Yog le ntawd, cov kwvtij, mej ca le xaiv xyaa leej lug rua peb, puab yuavtsum yog cov kws suavdlawg fwm, puv npo Vaaj Ntsujplig tug Dlawbhuv hab muaj tswvyim, peb yuav tsaa puab ua teg num nuav.

⁴Peb txhaj muaj sijhawm thov Vaajtswv hab moog qha Vaajtswv txujlug.”

⁵Suavdlawg pum zoo ua lawv le cov timthawj has, ces puab txawm xaiv Xatefanaus tug kws muab sab rau ntseeg hab puv npo Vaaj Ntsujplig tug Dlawbhuv, hab puab xaiv Filis, Pakhaulus, Nikanaus, Timoos, Pamenas, hab Nikaulus kws nyob peg lub nroog Aati-aukias tuaj, nwg yog lwm Tsaav Tuabneeg kws coj cov Yudais txuj kevcai.

⁶Cov ntseeg txawm coj xyaa leej ntawd lug rua cov timthawj, cov timthawj tuav puab, thov Vaajtswv rua puab hab tsaa puab ua teg num ntawd.

⁷Vaajtswv txujlug txawm nrov nchaa moog thoob plawg txhua qhov chaw. Cov thwjtim kws nyob huv lub nroog Yeluxalees pheej muaj coob zuj zug ntxiv, hab muaj cov povthawj ntau leej lug ntseeg Yexus.

⁸Vaajtswv foom koob moov rua Xatefanaus hab pub fwjchim rua nwg ua tej txujci tseemceeb kws xaav tsi thoob rua suavdlawg pum.

⁹Tabsis muaj qee leej tswvcuab kws tuaj huv cov Tuabneeg Ywjpheej lub tsev saablaaj tuaj (luas ibtxwm hu le ntawd), muaj ibtxha yog cov Yudais kws nyob huv lub nroog Kilenes hab huv lub nroog Alexaadias tuaj, puab cov ntawd hab cov Yudais kws tuaj peg lub tebchaws Kilikias hab huv lub xeev Axias tuaj, txawm nrug Xatefanaus sis caav.

¹⁰Tabsis puab caav tsi yeej Xatefanaus, rua qhov Vaajtswv pub tswvyim rua Xatefanaus.

¹¹Puab txawm ndlav qee leej ua timkhawv dlaag has tas, “Peb nov tug txivneej nuav thuam Mauxes hab thuam Vaajtswv!”

¹²Puab txhobtxwm ua le ntawd kuas cov pejxeem, cov txwjlaug hab cov xwbfwb kws qha Vaajtswv txuj Kevcai suavdlawg ntxhuv. Puab txawm sau nthwv lug nteg Xatefanaus hab coj nwg moog cuag cov numtswv.

¹³Hab puab coj ob peb tug lug ua timkhawv dlaag has tas, “Tug txivneej nuav naj nub thuam peb lub Tuamtsev kws dlawbhuv hab thuam Mauxes txuj kevcai.

¹⁴Peb nov nwg has tas tug Yexus kws yog tuabneeg Naxales yuav muab lub Tuamtsev nuav rhuav, hab nwg yuav hloov Mauxes txuj kevcai kws Mauxes muab rua peb!”

¹⁵Taagnrho cov tuabneeg kws nyob huv lub tsev saablaaj ntawd saib quas ntsoov Xatefanaus, puab pum nwg lub ntsejmuag ci ib yaam le ib tug timtswv ceebtsheej lub.