Read Hmong Njua Teg Num 8 Bible Online

Teg Num 8 - Hmong Njua bible

Teg Num 8

¹Xaulus pum zoo puab tua Xatefanaus hab. Txij nub ntawd lug cov ntseeg kws nyob huv lub nroog Yeluxalees raug tsimtxom heev. Taagnrho cov ntseeg suavdlawg tsiv moog nyob txhua lub zog huv xeev Yudas hab xeev Xamalis, tsuas tshuav cov timthawj txhaj tsi tsiv xwb.

²Cov txivneej kws fwm Vaajtswv muaj qee leej tuaj muab Xatefanaus lub cev kwv moog log, puab quaj hab hlub Xatefanaus kawg le.

³Xaulus tsimtxom cov ntseeg heev; nwg moog huv cov ntseeg tej tsev ib lub rua ib lub, nwg nteg cov ntseeg, tsi has quaspuj lossis txivneej huv tuabsi coj moog kaw rua huv tsev lojcuj.

⁴Cov ntseeg kws tsiv moog nyob rua txhua qhov chaw, puab kuj moog qha Txujmoo Zoo rua qhov ntawd.

⁵Filis moog rua huv ib lub nroog kws nyob rua huv xeev Xamalis, nwg qha has txug tug Mexiyas rua cov tuabneeg ntawd noog.

⁶Thaus suavdlawg nov Filis qha hab pum tej txujci tseemceeb kws Filis ua, puab ua tuab zoo noog nwg qha.

⁷Cov tuabneeg raug dlaab ntau leej tuaj cuag Filis kuas Filis ntab dlaab tawm, thaus dlaab yuav tawm, dlaab qw nrov nrov hab tawm moog lawm. Filis khu tej tuabneeg tuag teg tuag taw hab tej tuabneeg cegtawv txhua tug zoo huv tuabsi.

⁸Cov tuabneeg kws nyob huv lub nroog ntawd, suavdlawg zoo sab kawg le.

⁹Muaj ib tug txivneej hu ua Ximoos, nwg nyob huv lub nroog ntawd tau ntev lug lawm. Nwg yog ib tug kws txawj ua khawvkoob, nwg pheej ua rua cov tuabneeg Xamalis xaav tsi thoob le. Nwg khaav has tas, nwg yog ib tug tuabneeg tseemceeb,

¹⁰taagnrho cov tuabneeg kws nyob huv lub nroog ntawd, tsi has tug hlub tug yau puavleej fwm nwg. Puab has tas, “Tug txivneej nuav muaj Vaajtswv lub fwjchim kws hu ua ‘Lub Fwjchim Luj Kawg Nkaus.’ ”

¹¹Puab noog nwg lug, rua qhov nwg tub ua khawvkoob rua puab kuas puab muab sab npuab nwg ntev lug lawm.

¹²Tabsis thaus suavdlawg nov Txujmoo Zoo kws Filis qha txug Vaajtswv Lub Tebchaws hab has txug Yexus Khetos, puab suavdlawg tsi has quaspuj lossis txivneej txawm lug ntseeg Yexus hab ua kevcai raus dlej huv tuabsi.

¹³Ximoos txawm lug ntseeg Yexus hab. Thaus nwg ua kevcai raus dlej taag lawm, nwg pheej nrug Filis ua ke. Thaus nwg pum tej txujci tseemceeb kws Filis ua, nwg xaav tsi thoob le.

¹⁴Thaus cov timthawj kws nyob nraag lub nroog Yeluxalees nov has tas, cov tuabneeg Xamalis txais yuav Vaajtswv txujlug lawm, cov timthawj txawm khaiv Petus hab Yauhaas moog saib puab.

¹⁵Thaus obtug moog txug, obtug thov Vaajtswv pub Vaaj Ntsujplig tug Dlawbhuv rua cov ntseeg ntawd.

¹⁶Rua qhov Vaaj Ntsujplig tug Dlawbhuv tseem tsi tau lug nrug cov ntseeg ntawd nyob, tsuas yog Filis tuav Yexus lub npe muab puab ua kevcai raus dlej lawm xwb.

¹⁷Petus hab Yauhaas obtug tsaa teg rua puab, ces puab txhua tug txawm tau txais Vaaj Ntsujplig tug Dlawbhuv.

¹⁸Thaus ob tug timthawj tsaa teg rua cov ntseeg ntawd, Ximoos pum has tas puab txhua tug puavleej tau Vaaj Ntsujplig tug Dlawbhuv, ces Ximoos txawm muab nyaj rua Petus hab Yauhaas obtug.

¹⁹Ximoos has rua obtug has tas, “Thov meb faib lub fwjchim nuav rua kuv hab, thaus kuv tsaa teg rua leejtwg, tug ntawd txhaj yuav tau Vaaj Ntsujplig tug Dlawbhuv.”

²⁰Tabsis Petus teb Ximoos has tas, “Koj hab koj cov nyaj yuav tuab txhij poob moog rua huv ntuj tawg, rua qhov koj xaav has tas koj muab nyaj yuav tau lub fwjchim kws Vaajtswv pub!

²¹Koj yuav tsi muaj feem lug nrug peb koom ua teg num nuav, rua qhov Vaajtswv paub has tas koj lub sab tsi ncaaj.

²²Koj ca le tso plhuav tej kev phem kws koj xaav ko tseg, hab thov Vaajtswv zaam tej kev txhum kws koj lub sab xaav phem ntawd huv tuabsi moog.

²³Rua qhov kuv paub has tas koj yog ib tug tuabneeg kws sab hlub, hab koj tej kev phem tub khi koj lawm, koj yuav nti tsi dlim le.”

²⁴Ximoos txawm has rua Petus hab Yauhaas has tas, “Thov meb thov Vaajtswv paab kuv, kuas kuv tsi xob raug tej kws meb has ntawd ib qho le.”

²⁵Thaus Petus hab Yauhaas obtug qha tej kws obtug pum hab paub, hab qha tug Tswv Txujmoo Zoo rua suavdlawg noog taag lawm, obtug txawm rov qaab moog rua nraag lub nroog Yeluxalees. Thaus obtug taug kev rov qaab moog, obtug qha Txujmoo Zoo rua ntau lub zog kws nyob huv xeev Xamalis.

²⁶Tug Tswv ib tug timtswv lug has rua Filis has tas, “Koj ca le sawv kev moog rua saab qaabteb, koj taug txujkev kws tuaj tom lub nroog Yeluxalees tuaj moog rua nraag lub nroog Nkaxas.” (Nwgnuav txujkev ntawd tsi muaj tuabneeg moog lawm.)

²⁷Yog le ntawd Filis txawm sawv kev moog; thaus Filis taabtom taug kev moog, nwg ntsib ib tug nraug saam kws yog tuabneeg Eti-upias, hab yog ib tug numtswv kws saib nam Vaajntxwv Kaadakes kws kaav tebchaws Eti-upias lub txhaab nyaj. Tug nom ntawd moog pehawm Vaajtswv huv lub nroog Yeluxalees hab caij tsheb neeg rov lug tsev.

²⁸Thaus nwg caij tsheb neeg rov lug tsev, nwg nyeem phoo ntawv kws Yaxayas kws yog tug cev Vaajtswv lug sau tseg.

²⁹Vaaj Ntsujplig tug Dlawbhuv txawm has rua Filis has tas, “Koj ca le caum kuas cuag lub tsheb neeg ntawd.”

³⁰Filis dlha ceev nrooj moog, nwg nov tug nom ntawd taabtom nyeem Yaxayas kws yog tug cev Vaajtswv lug phoo ntawv. Filis nug has tas, “Zaaj kws koj nyeem ko, koj puas totaub?”

³¹Tug nom ntawd teb has tas, “Tub tsi muaj leejtwg qha lub ntsab rua kuv, kuv yuav ua le caag totaub?” Tug nom ntawd txawm kuas Filis nce moog nrug nwg caij tsheb neeg.

³²Vaajtswv txujlug kws tug nom ntawd nyeem has le nuav: “Puab caab nwg moog ib yaam le caab tug yaaj moog tua, nwg zoo ib yaam le tug yaaj kws nyob tuabywv rua luas txav plaub. Nwg tsi has ib lus le.

³³Puab ua saib tsi taug nwg hab txav txim tsi ncaaj rua nwg. Tsi muaj leejtwg yuav paub txug nwg cov xeebntxwv, rua qhov nwg tub tsi muaj sa nyob huv nplajteb nuav lawm.”

³⁴Tug nom ntawd has rua Filis has tas, “Thov koj qha zaaj nuav rua kuv saib. Tug kws cev Vaajtswv lug has le nuav, yog nwg has txug leejtwg? Nwg has txug nwg lossis nwg has txug lwm tug?”

³⁵Filis txawm qha Txujmoo Zoo kws has txug Yexus zaaj rua tug nom noog. Nwg qha zaaj kws tug nom ntawd taabtom nyeem ntaag.

³⁶Thaus obtug taabtom caij tsheb neeg taug kev moog, obtug moog txug ntawm ib qhov chaw kws muaj dlej. Tug nom ntawd has rua Filis has tas, “Tub muaj dlej nyob ntawm nuav, koj muab kuv ua kevcai raus dlej puas tau?” [

³⁷Filis has rua tug nom ntawd has tas, “Yog koj ntseeg tag tag, kuv muab koj ua kevcai raus dlej ntawm nuav los tau.” Tug nom ntawd teb has tas, “Kuv ntseeg has tas, Yexus Khetos yog Vaajtswv tug Tub.”]

³⁸Tug nom ntawd txawm kuas nreg tsheb neeg, ces obtug txawm nqeg moog rua huv dlej, hab Filis muab tug nom ntawd ua kevcai raus dlej.

³⁹Thaus obtug tawm huv dlej lug, tug Tswv tug Ntsujplig txawm coj Filis moog rua lwm qhov, tug nom ntawd tsi pum Filis lawm, ces tug nom ntawd txawm caij tsheb neeg moog tsev, nwg zoo sab kawg le.

⁴⁰Muaj tuabneeg pum Filis nyob peg lub nroog Axautais; Filis moog qha Txujmoo Zoo thoob plawg tej nroog kws nyob cheebtsaam ntawd moog txug rua peg lub nroog Xixaleyas.