Read Hmong Njua Loos 1 Bible Online

Loos 1 - Hmong Njua bible

Loos 1

¹Kuv yog Paulus kws yog Yexus Khetos tug tubkhai, Vaajtswv xaiv kuv ua ib tug timthawj hab tsaa kuv ua tug qha nwg Txujmoo Zoo.

²Txujmoo Zoo ntawd Vaajtswv tub coglug rua nwg cov cevlug thaus u kuas muab sau tseg rua huv Vaajtswv txujlug kws tseemceeb lawm.

³Txujmoo Zoo ntawd has txug Vaajtswv tug Tub kws yog peb tug Tswv Yexus Khetos: nwg lug yug muaj roj ntshaa ib yaam le tuabneeg, nwg yog Daviv ib tug xeebntxwv;

⁴hab lawv le Vaaj Ntsujplig tug dlawbhuv qha has tas Yexus yog Vaajtswv tug Tub kws muaj fwjchim luj, rua qhov Vaajtswv tub tsaa nwg sawv huv qhov tuag rov qaab lug lawm.

⁵Vaajtswv kuas Yexus foom koob moov rua kuv hab tsaa kuv ua timthawj coj Txujmoo Zoo moog qha rua txhua tsaav tuabneeg kuas ntseeg Vaajtswv hab noog Vaajtswv lug.

⁶Vaajtswv tub hu mej cov kws nyob huv lub nroog Loos nuav lug ua Yexus tug lawm hab.

⁷Yog le ntawd kuv txhaj sau tsaab ntawv nuav tuaj rua mej txhua tug kws nyob huv lub nroog Loos nuav, mej yog cov kws Vaajtswv hlub hab Vaajtswv hu lug ua nwg tsaav tuabneeg lawm: Thov Vaajtswv kws yog peb Leej Txiv hab tug Tswv Yexus Khetos foom koob moov rua mej hab pub kuas mej tau nyob kaaj sab lug.

⁸Ua ntej nuav, kuv ua kuv tug Vaajtswv tsaug hab ua Yexus Khetos tug kws paab mej tsaug, rua qhov tej tuabneeg thoob qaab ntuj nov has tas mej yog cov kws muab sab rau ntseeg.

⁹Kuv naj nub muab sab rau qha Txujmoo Zoo kws has txug Vaajtswv tug Tub, hab Vaajtswv yeej paub has tas kuv ncu ntsoov mej hab thov Vaajtswv paab mej.

¹⁰Kuv thov Vaajtswv has tas yog Vaajtswv pum zoo, thov Vaajtswv qheb kev rua kuv tuaj saib mej.

¹¹Rua qhov kuv xaav pum mej hab coj Vaajtswv txujlug tuaj qha mej, txhawb kuas mej muab sab rau ntseeg ntxiv.

¹²Kuv has le nuav yog has tas kuas peb ib leeg paab ib leeg; kuv kev ntseeg yuav paab mej hab mej kev ntseeg yuav paab kuv.

¹³Cov kwvtij, mej yuavtsum ncu ntsoov has tas, kuv npaaj sab tuaj saib mej ntau zag, tabsis muaj tej yaam pheej taabkaum ua rua kuv tuaj tsi tau. Kuv xaav coj cov tuabneeg kws nrug mej nyob ua ke kuas puab lug ntseeg, ib yaam le kuv tub coj lwm Tsaav Tuabneeg lug ntseeg lawm.

¹⁴Rua qhov kuv tshuav cov tuabneeg Kilis hab cov tuabneeg kws nyob huv haav zoov, cov txawj ntse hab cov ruag nqe.

¹⁵Yog le ntawd, kuv txhaj kub sab lug xaav tuaj qha Txujmoo Zoo rua mej cov kws nyob huv lub nroog Loos ib yaam nkaus hab.

¹⁶Kuv yeej tsi txaajmuag qha Txujmoo Zoo le; rua qhov Txujmoo Zoo yog Vaajtswv lub fwjchim kws cawm tau txhua tug kws ntseeg dlim. Txujmoo Zoo ntawd, xub qha rua cov Yudais hab tom qaab ntawd maam le qha rua lwm Tsaav Tuabneeg.

¹⁷Txujmoo Zoo qha has tas tug kws ntseeg txhaj yog tug kws ncaaj nceeg taabmeeg Vaajtswv, txij thaus pib moog txug thaus xaus, lawv le Vaajtswv txujlug sau tseg lawm has tas, “Tug kws ua lub neej ncaaj nceeg yog tug kws yuav tau txujsa.”

¹⁸Vaajtswv tug kws nyob sau ntuj ceebtsheej chim rua tej kev txhum hab kev phem kws tuabneeg ua, rua qhov puab tej kev phem ntawd ua rua tuabneeg tsi paub qhov tseeb lawm.

¹⁹Vaajtswv rau txim rua puab, rua qhov Vaajtswv tub ua ib puas tsaav yaam kws qha kuas puab paub Vaajtswv, tabsis puab tseem tsi paub Vaajtswv hab.

²⁰Txij thaus Vaajtswv tsim lub nplajteb lug, txawm yog tuabneeg tsi pum Vaajtswv tug kws muaj fwjchim nyob moog ibtxhis hab qhov kws nwg yog Vaajtswv los yog puab saib ib puas tsaav yaam kws Vaajtswv tsim, puab yeej paub has tas muaj Vaajtswv tag. Yog le ntawd, puab yuav has tas puab tsi paub Vaajtswv yeej has tsi tau le.

²¹Txawm yog puab tub paub Vaajtswv lawm los puab tseem tsi fwm Vaajtswv lossis tsi ua nwg tsaug, puab xaav txug tej zaaj kws tsi muaj qaabhau, vim puab lub sab ruag hab tsaus ntuj nti.

²²Puab khaav has tas puab yog tuabneeg ntse, tabsis puab yog tuabneeg ruag kawg le;

²³tub tsimnyog puab pehawm Vaajtswv tug kws muaj sa nyob moog ibtxhis, tabsis puab tsua moog pe tej mlom kws zoo le tuabneeg, zoo le noog, zoo le tsaj lossis zoo le naab.

²⁴Tub yog vim le ntawd Vaajtswv txhaj ca tuabneeg moog ua phem ua qas lawv le puab lub sab nyam, puab ua kev nkauj kev nraug tsi paub txaajmuag le,

²⁵Rua qhov puab muab Vaajtswv txujlug tseeb hloov ua lug dlaag. Tub tsimnyog puab pehawm Vaajtswv tug kws tsim ib puas tsaav yaam, tabsis puab tsua moog pe hab teev tej kws Vaajtswv tsim xwb. Tsimnyog suavdlawg yuavtsum qhuas Vaajtswv moog ibtxhis le, Amees!

²⁶Tub yog vim tuabneeg ua phem le nuav, Vaajtswv txhaj ca puab moog ua kev nkauj kev nraug tsi paub txaajmuag le. Txawm yog tej quaspuj los ib leeg ntxag ib leeg,

²⁷hab tej txivneej los ua ib yaam nkaus le ntawd, lawv le ibtxwm quaspuj hab txivneej txhaj ua nam txiv xwb, tabsis tej txivneej puab tso qhov ntawd tseg, puab ib leeg ntxag ib leeg tsi paub txaajmuag le. Yog le ntawd, Vaajtswv txhaj rau txim rua puab.

²⁸Tub yog vim tuabneeg tsi kaam leeg has tas muaj Vaajtswv, Vaajtswv txhaj ca puab moog ua phem ua qas lawv le puab lub sab nyam, yog le ntawd, puab txhaj moog ua tej kws tsi tsimnyog ua.

²⁹Puab ua txhua yaam kev phem, puab ua limham, sab hlub, ua nruj ua tsiv, sis khib, tua tuabneeg, sis caav sis tshe, dlaag ntxag, hab xaav phem. Puab taug xaiv

³⁰hab ib leeg has lug phem rua ib leeg; puab saib tsi taug Vaajtswv, thuam lwm tug, khaavtheeb, muab hlub, puab naj nub tuav tswvyim ua phem hab puab tsi noog nam txiv lug;

³¹puab tsi paub qhov phem qhov zoo; puab tsi ua lawv le puab tau coglug tseg, puab ib leeg tsi hlub ib leeg hab puab ib leeg tsi ua zoo rua ib leeg.

³²Puab yeej paub Vaajtswv txuj kevcai kws has tas, cov tuabneeg kws ua phem le ntawd yeej tsimnyog raug kev tuag, tsi yog puab ua tej kev phem ntawd xwb, puab tseem pum zoo qhov kws lwm tug ua phem ntawd hab.