Read Hmong Njua Loos 10 Bible Online

Loos 10 - Hmong Njua bible

Loos 10

¹Cov kwvtij, kuv lub sab xaav ntsoov txug kuv tsaav tuabneeg hab naj nub thov Vaajtswv paab kuas puab dlim.

²Kuv ua tau timkhawv has tas puab yeej muab sab npuab Vaajtswv, txawm yog puab muab sab npuab Vaajtswv le ntawd los puab tsi paub qhov tseeb.

³Puab tsi quavntsej txujkev ncaaj nceeg kws Vaajtswv qha rua puab, tabsis puab ua lawv le puab lub sab nyam xwb, puab txhaj tsi kaam ua lawv le Vaajtswv txujkev ncaaj nceeg.

⁴Rua qhov Yexus Khetos tub lug ua rua txuj kevcai ntawd tav lawm, Vaajtswv txhaj suav has tas txhua tug kws ntseeg yog tuabneeg ncaaj nceeg.

⁵Mauxes sau has tas, “Tug ncaaj nceeg yog tug kws coj lawv le Vaajtswv txuj kevcai, hab tug kws coj lawv le tej kevcai, tug ntawd tau txujsa.”

⁶Tabsis txujkev ncaaj nceeg kws lug ntawm txujkev ntseeg has tas, “Tsi xob xaav has tas, ‘Leejtwg txhaj yuav moog tau sau ntuj ceebtsheej?’ ” (Lu lug ntawd has tas, coj Yexus Khetos lug.)

⁷“Lossis has tas, ‘Leejtwg yuav moog huv tubtuag teb?’ ” (Lu lug ntawd has tas, coj Yexus Khetos huv qhov tuag rov qaab lug.)

⁸Txujkev ncaaj nceeg has le nuav: “Vaajtswv txujlug tub nyob ze mej lawm, nyob ntawm mej lub qhovncauj hab huv mej lub sab” (lu lug ntawd yog txujkev ntseeg kws peb qha);

⁹yog koj lub qhovncauj leeg has tas Yexus Khetos yog tug Tswv hab koj lub sab ntseeg has tas Vaajtswv tub tsaa Yexus Khetos sawv huv qhov tuag rov qaab lug lawm, koj yuav dlim.

¹⁰Rua qhov tug kws ntseeg huv nwg lub sab, Vaajtswv suav has tas nwg yog tug kws ncaaj nceeg, hab tug kws leeg ntawm nwg lub qhovncauj, Vaajtswv suav has tas nwg yog tug kws dlim txim.

¹¹Vaajtswv txujlug has tas, “Txhua tug kws ntseeg nwg yuav tsi poob ntsejmuag.”

¹²Zaaj nuav has rua cov Yudais hab lwm Tsaav Tuabneeg huv tuabsi; Vaajtswv kws yog suavdlawg tug Tswv, nwg foom koob moov nplua mag rua txhua tug kws thov nwg.

¹³Vaajtswv txujlug has tas, “Txhua tug kws thov tug Tswv paab yuav dlim.”

¹⁴Tabsis yog puab tsi tau ntseeg, puab yuav ua le caag thov nws? hab puab yuav ua le caag ntseeg tug kws puab tsi tau nov dlua? Yog tsi muaj tuabneeg moog qha Txujmoo Zoo rua puab, puab yuav ua le caag nov?

¹⁵Yog tsi muaj leejtwg khaiv puab moog, puab yuav ua le caag moog qha Txujmoo Zoo? Vaajtswv txujlug has tas, “Cov tuabneeg kws moog qha Txujmoo Zoo txhais kutaw zoo kawg le!”

¹⁶Tabsis tsi yog txhua tug yuav ntseeg Txujmoo Zoo ntawd; rua qhov Yaxayas has tas, “Tug Tswv, leejtwg txhaj yuav ntseeg tej kws peb qha?”

¹⁷Yog le ntawd, tub yog puab nov Txujmoo Zoo, puab txhaj ntseeg, hab Txujmoo Zoo kws puab nov ntawd yog Yexus Khetos tej lug.

¹⁸Tabsis kuv nug has tas, cov Yixalayees tsi tau nov Txujmoo Zoo los? Qhov tseeb tag, puab yeej nov lawm, rua qhov Vaajtswv txujlug has tas: “Puab moog qha Txujmoo Zoo thoob nplajteb, hab puab tej lug nrov nchaa moog txug qaab ntuj kawg lawm.”

¹⁹Kuv rov qaab nug dlua has tas, puas yog cov Yixalayees tsi totaub? Mauxes tub xub has lawm has tas: “Kuv yuav ua kuas mej khib rua cov tuabneeg kws tsi muaj tebchaws, hab kuv yuav ua kuas mej chim rua cov tsaav tuabneeg ruag.”

²⁰Hab Yaxayas muaj sab tawv qha has tas: “Cov tuabneeg kws tsi nrhav kuv, puab tub ntsib kuv lawm, cov tuabneeg kws tsi nug txug kuv, kuv tub lug tshwm rua puab pum lawm.”

²¹Tabsis Yaxayas has txug cov Yixalayees has tas, “Vaajtswv has tas, ‘Kuv tsaa kuv ob txhais teg taag nub tog cov tuabneeg kws tsi noog lug hab cov tuabneeg kws ntxeev saab.’ ”