Read Hmong Njua Loos 12 Bible Online

Loos 12 - Hmong Njua bible

Loos 12

¹Cov kwvtij, Vaajtswv hlub peb kawg nkaus le, yog le ntawd kuv txhaj ntuag mej has tas thaus mej tseem ua neej nyob nuav, mej yuavtsum muab mej lub cev fij rua Vaajtswv kuas dlawbhuv hab hum Vaajtswv sab. Yog mej ua le ntawd, txhaj yog mej pehawm Vaajtswv lawv le Vaajtswv sab nyam.

²Mej tsi xob ua mej lub neej zoo le tej tuabneeg nplajteb ua, tabsis mej yuavtsum ca Vaajtswv hloov mej lub sab kuas mej muaj lub sab tshab. Mej txhaj yuav paub ua lawv Vaajtswv lub sab nyam. Yog mej ua le ntawd, mej txhaj paub ua qhov zoo, ua hum Vaajtswv sab hab paub ua zoo kawg nkaus.

³Vim Vaajtswv pub nwg txujkev hlub rua kuv, kuv txhaj ntuag mej txhua tug has tas, mej tsi xob xaav dlhau tej kws mej ua tsi tau. Tabsis mej yuavtsum muab mej txujkev ntseeg ntsuag saib, Vaajtswv pub mej muaj peevxwm npaum le caag.

⁴Rua qhov peb lub cev yeej muaj ntau yaam lug koom ua ke, hab txhua yaam ntawd nyag ua nyag num.

⁵Ib yaam nkaus le ntawd, txawm yog peb muaj coob leej los peb nrug Yexus Khetos koom ua ib lub cev, peb puavleej koom ib lub cev ib yaam le peb lub cev muaj ntau yaam sis koom.

⁶Vaajtswv pub peb txhua tug nyag muaj nyag koob moov lawv le Vaajtswv pum zoo pub rua peb lawm. Yog peb tau txuj koob moov kws qha Vaajtswv txujlug, peb yuavtsum qha lawv le peb txujkev ntseeg;

⁷yog peb tau txuj koob moov paab lwm tug, peb ca le paab; yog peb tau txuj koob moov qha, peb ca le qha;

⁸yog peb tau txuj koob moov txhawb lwm tug zug, peb ca le txhawb. Tug kws muaj qhov txhua chaw paab lwm tug, tug ntawd yuavtsum muab ntawm lub sab dlawb paug; tug kws ua thawjcoj, yuavtsum muab sab rau ua num; tug kws ua sab dlawb sab zoo rua lwm tug, tug ntawd yuavtsum ua ntsejmuag luas quas ntxhi.

⁹Yuavtsum muaj lub sab ncaaj nceeg hlub tag tag; ntxub txujkev ua phem ua qas, hab muab sab npuab qhov kws ua zoo;

¹⁰mej cov kws ntseeg Yexus Khetos, mej ib leeg yuavtsum hlub ib leeg, hab mej ib leeg fwm ib leeg.

¹¹Mej rau sab ntso ua num tsi xob tubnkeeg, hab yuavtsum muab sab rau ua teg num kws Vaajtswv kuas peb ua.

¹²Qhov kws mej ca sab rua Vaajtswv yuav ua rua mej zoo sab, hab thaus mej raug kev txomnyem mej yuavtsum ua sab ntev hab thov Vaajtswv tsi tseg tsi tu.

¹³Muab tej kws mej muaj paab cov ntseeg kws txomnyem; hab yog muaj qhua tuaj, mej yuavtsum hu puab lug su huv mej tej tsev.

¹⁴Mej yuavtsum thov Vaajtswv foom koob moov rua cov tuabneeg kws tsimtxom mej; thov Vaajtswv foom koob moov rua puab, tsi xob thov Vaajtswv foom tsi zoo rua puab.

¹⁵Thaus muaj tuabneeg zoo sab, mej ca le nrug puab zoo sab; thaus muaj tuabneeg quaj ntsuag, mej ca le nrug puab quaj ntsuag.

¹⁶Mej yuavtsum koom ua ib lub sab. Mej tsi xob khaavtheeb, yog luas kuas mej ua tej num kws tsi tseemceeb pistsawg los mej ca le ua. Tsi xob xaav has tas mej yog tuabneeg txawj ntse.

¹⁷Yog muaj leejtwg ua phem rua mej, mej tsi xob ua phem pauj, tabsis mej yuavtsum xyum ua qhov kws suavdlawg pum has tas yog tej kws zoo xwb.

¹⁸Mej yuavtsum ua txhua yaam zoo lawv le mej paub ua, mej txhaj yuav nrug suavdlawg nyob sis hum.

¹⁹Cov kwvtij, mej tsi xob ua pauj rua luas, tabsis ca Vaajtswv maam le ua pauj, rua qhov Vaajtswv txujlug has tas, “Kuv yog tug yuav ua pauj hab kuv yog tug yuav rau txim, tug Tswv has le ntawd.”

²⁰Vaajtswv txujlug has tas, “Yog mej cov yeebncuab tshaib plaab, mej ca le muab mov rua puab noj; yog puab nqhes dlej, mej ca le muab dlej rua puab haus; yog mej ua le nuav puab yuav txaajmuag.”

²¹Tsi xob ca txujkev phem kovyeej mej, tabsis mej yuavtsum ua zoo, mej txhaj kovyeej txujkev phem.