Read Hmong Njua Loos 13 Bible Online

Loos 13 - Hmong Njua bible

Loos 13

¹Suavdlawg yuavtsum noog numtswv lug, rua qhov tej numtswv ntawd yog Vaajtswv pum zoo txhaj muaj, hab tej numtswv ntawd puavleej yog Vaajtswv tsaa.

²Yog leejtwg tawmtsaam numtswv, ces yog nwg tawmtsaam Vaajtswv tug kws tsaa tej numtswv ntaag, hab Vaajtswv yuav rau txim rua tug kws tawmtsaam numtswv ntawd.

³Tug tuabneeg kws ua zoo yeej tsi ntshai numtswv, tabsis tug kws ua txhum txhaj ntshai numtswv. Mej yuavtsum ua zoo mej txhaj tsi ntshai numtswv, numtswv txhaj yuav qhuas mej;

⁴Rua qhov numtswv yog Vaajtswv tug tubkhai kws ua num paab mej. Tabsis yog mej ua txhum, mej yeej yuav ntshai nwg, rua qhov nwg muaj fwjchim rau txim rua mej! Nwg yog Vaajtswv tug tubkhai kws rau txim rua cov tuabneeg ua txhum.

⁵Yog le ntawd, mej yuavtsum noog numtswv lug, tsi yog vim mej ntshai nyob tsaam mej raug txim xwb, tabsis vim mej lub sab yeej paub has tas yuavtsum noog numtswv lug.

⁶Ib yaam nkaus le ntawd, mej yuavtsum them se rua numtswv, rua qhov yog Vaajtswv kuas tej numtswv ua teg num nuav ntaag.

⁷Yog le ntawd mej yuavtsum them txhua yaam se: se laj se teb, se vaaj se tsev, se nyaj txag kws mej khwv tau lug, mej yuavtsum fwm hab saib taug txhua tug numtswv huv tuabsi.

⁸Mej tsi xob tshuav leejtwg nqe, tuab qho nuj nqes kws mej tshuav ces yog ib leeg hlub ib leeg; tug kws hlub lwm tug txhaj yog nwg ua lawv le txuj kevcai qha.

⁹Txuj kevcai qha has tas, “Mej tsi xob ntxag luas quaspuj luas quasyawg; mej tsi xob tua tuabneeg; mej tsi xob ua tubsaab; mej tsi xob ntshaw luas tug”; hab muaj dlua lwm nqai kevcai kws muab sau zog ua ib nqai has le nuav tas, “Hlub mej tej kwvtij zej zog ib yaam le mej hlub mej lub cev.”

¹⁰Yog mej hlub kwvtij zej zog, mej yeej tsi ua phem rua leejtwg; yog mej hlub puab txhaj yog mej ua lawv le txuj kevcai qha.

¹¹Mej yuavtsum ua le nuav, rua qhov mej tub paub lawm has tas lub sijhawm nuav yog caij sawv tsi yog caij pw, rua qhov nwgnuav txujkev cawm dlim lug ze peb dlua thaus kws peb nyavnyuas lug ntseeg;

¹²nwgnuav yog ib taag mo dlua lawm, tub yuav kaaj ntug. Peb yuavtsum tsi xob ua le cov tuabneeg kws nyob qhov tsaus ntuj ua, hab peb yuavtsum muab tej cuabyeej kws Vaajtswv muab rua peb lug tuav;

¹³peb yuavtsum ua peb lub neej kuas tsimnyog qhov kws peb yog tuabneeg nruab nub, tsi xob qw ua nqaaj ua nqug hab haus cawv qaug, tsi xob ua nkauj ua nraug hab ua tuabneeg tsi paub cai, tsi xob sis caav sis tshe hab sis khib.

¹⁴Tabsis peb yuavtsum muab tug Tswv Yexus Khetos tej cuabyeej lug tuav; hab tsi xob quavntsej tej kev phem kev qas kws mej lub sab nyam ua.