Read Hmong Njua Loos 14 Bible Online

Loos 14 - Hmong Njua bible

Loos 14

¹Mej yuavtsum txaus sab ca tug kws tsi ntseeg Vaajtswv pistsawg nrug mej nyob, mej tsi xob nrug nwg sis caav txug nwg txujkev ntseeg.

²Muaj qee leej ntseeg has tas noj tau txhua yaam huv tuabsi, tabsis tug kws tsi ntseeg Vaajtswv pistsawg, noj zaub xwb.

³Tug kws noj tau txhua yaam tsi xob saib tsi taug tug kws tsi noj, hab tug kws noj zaub xwb, tsi xob thuam tug kws noj tau txhua yaam; rua qhov Vaajtswv yeej leeg yuav tug ntawd hab.

⁴Koj yog leejtwg, koj txhaj thuam luas tug tubkhai? Tsuas yog tug tubkhai ntawd tug tswv, nwg txhaj has tau has tas, nwg tug tubkhai ua zoo lossis ua phem xwb, rua qhov tug Tswv paab tau kuas nwg ua zoo.

⁵Muaj qee leej xaav has tas qee nub tseemceeb, qee nub tsi tseemceeb, tabsis muaj qee leej xaav has tas txhua nub tseemceeb ib yaam nkaus. Yog le ntawd ca nyag ua lawv le nyag lub sab xaav xwb.

⁶Tug kws teem ib nub ua nub tseemceeb, yeej yog nwg fwm tug Tswv nwg txhaj ua le ntawd. Ib yaam nkaus le ntawd, tug kws noj tau txhua yaam yeej yog nwg fwm tug Tswv nwg txhaj noj, rua qhov nwg tub ua Vaajtswv tsaug lawm, nwg maam noj; tug kws caiv tsi noj yaam nuav yaam u los yeej yog nwg fwm tug Tswv nwg txhaj caiv, hab nwg yeej ua Vaajtswv tsaug ib yaam nkaus.

⁷Peb muaj sa nyob tsi yog peb muaj rua peb, hab peb tuag, tsi yog peb tuag rua peb xwb.

⁸Yog peb muaj sa nyob, peb muaj sa nyob rua tug Tswv, hab yog peb tuag, peb tuag rua ntawm tug Tswv; txawm yog peb muaj sa nyob lossis peb tuag, peb yeej yog tug Tswv tuabneeg.

⁹Rua qhov Yexus Khetos tuag hab sawv huv qhov tuag rov qaab lug lawm, nwg txhaj ua cov tuabneeg caj hab cov tuabneeg tuag tug Tswv.

¹⁰Ua le caag mej pheej thuam mej cov kwvtij, hab ua le caag mej pheej saib tsi taug mej cov kwvtij? Peb txhua tug yuav tau moog sawv taabmeeg Vaajtswv hab nwg yuav txav txim rua peb suavdlawg.

¹¹Rua qhov Vaajtswv txujlug has tas: “Tug Tswv has tas kuv yog Vaajtswv tug kws muaj sa nyob, txhua tug yuav txhus caug pe kuv, hab txhua tug lub qhovncauj yuav leeg has tas kuv yog Vaajtswv.”

¹²Peb txhua tug, nyag yuav tau qha nyag zaaj rua Vaajtswv.

¹³Peb tsi xob thuam lwm tug, tabsis mej ncu ntsoov tsi xob ua rua lwm tug yuam kev ua txhum.

¹⁴Kuv yog ib tug kws ntseeg tug Tswv Yexus Khetos, kuv paub has tas yeej tsi muaj ib yaam kws tsi huv le; tabsis tug kws ntseeg has tas yaam ntawd tsi huv, ces nwg tsi xob noj.

¹⁵Yog mej noj tej kws mej cov kwvtij caiv tsi noj, yeej yog mej tsi hlub puab. Mej tsi xob ca tej kws mej noj ua rua tug kws Yexus Khetos tub tuag txhwv lawm raug kev puamtsuaj.

¹⁶Mej tsi xob ca lwm tug thuam tej kws mej pum has tas zoo lawm has tas tsi zoo.

¹⁷Rua qhov Vaajtswv lub tebchaws tsi yog kev noj kev haus, tabsis yog kev ncaaj nceeg, kev thaajyeeb hab kev zoo sab kws Vaaj Ntsujplig tug Dlawbhuv pub rua peb.

¹⁸Tug kws ua Yexus Khetos teg num le nuav, nwg ua hum Vaajtswv sab hab ua hum tuabneeg sab.

¹⁹Yog le ntawd, peb yuavtsum muab sab rau ua tej kws yuav ua rua suavdlawg nyob sis humxeeb hab ua tej kws yuav txhawb tau lwm tug tug zug xwb.

²⁰Tsi xob muab tej zaub mov kws mej noj ua rua Vaajtswv teg num tsi muaj nqes. Txhua yaam zaub mov mej noj tau, tabsis tsi xob noj yaam kws ua rua lwm tug yuam kev ua txhum.

²¹Yog mej noj nqaj lossis haus cawv lossis ua ib yaam dlaabtsi yuav ua rua mej cov kwvtij yuam kev ua txhum, ces mej tsi noj lossis tsi xob ua yuav zoo dlua.

²²Tej kws mej ntseeg has tas noj tau, mej ca le noj, tsuas ca Vaajtswv hab mej paub xwb. Tug kws noj tej kws nwg lub sab qha has tas noj tsi txhum, tug ntawd yeej tsi nyuaj sab.

²³Tabsis tug kws nwg ua xyem xyaav rua tej kws nwg noj, thaus nwg noj Vaajtswv yuav rau txim rua nwg, rua qhov nwg tsi noj lawv le nwg lub sab qha rua nwg lawm; rua qhov txhua yaam kws peb tsi ua lug ntawm txujkev ntseeg, ces yog kev txhum.