Read Hmong Njua Loos 15 Bible Online

Loos 15 - Hmong Njua bible

Loos 15

¹Peb cov kws muaj kev ntseeg ruaj lawm, tsimnyog peb paab cov kws muaj kev ntseeg tsawg, hab peb tsi xob ua kuas hum peb sab xwb.

²Peb txhua tug yuavtsum ua kuas hum peb cov kwvtij kws ntseeg sab, txhaj yuav paab tau puab, kuas puab muaj kev ntseeg ruaj.

³Rua qhov Yexus Khetos tsi tau ua kuas hum nwg sab xwb; tabsis Vaajtswv txujlug has tas, “Tej lug kws luas thuam mej, tub yog luas thuam kuv ntaag.”

⁴Rua qhov Vaajtswv txujlug kws thaus u luas muab sau tseg rua huv ntawv, tub yog sau qha rua peb. Vaajtswv txujlug ua rua peb muaj kev ca sab, ua sab ntev hab muab sab rau ntseeg ntxiv.

⁵Thov Vaajtswv tug kws ua rua mej muaj lub sab ntev hab muab sab rau ntseeg ntxiv, paab kuas mej nyob sis humxeeb, mej txhaj yuav muaj tug yaam ntxwv ib yaam le Yexus Khetos.

⁶Yog mej ua le ntawd, mej txhaj yuav koom tau ua ib lub sab qhuas Vaajtswv tug kws yog peb tug Tswv Yexus Khetos Leej Txiv.

⁷Mej ib leeg yuavtsum zoo sab hlo txais tog ib leeg, ib yaam le Yexus Khetos tau txais yuav mej. Yog mej ua le ntawd, Vaajtswv yuav tau koob meej.

⁸Kuv qha rua mej has tas qhov kws Yexus Khetos lug paab cov tuabneeg Yudais, yog ua rua suavdlawg paub has tas Vaajtswv yog tug ncaaj nceeg, Vaajtswv yeej yuav ua kuas tav lawv le tej lug kws Vaajtswv tau cog tseg rua puab cov yawmkoob,

⁹hab nwg paab kuas lwm tsaav tuabneeg paub ua Vaajtswv tsaug, rua qhov Vaajtswv hlub puab. Lawv le Vaajtswv txujlug has tas: “Yog le ntawd thaus kuv nrug lwm Tsaav Tuabneeg nyob kuv yuav ua koj tsaug; hab kuv yuav hu nkauj qhuas koj lub npe.”

¹⁰Hab has ntxiv has tas, “Lwm tsaav tuabneeg, mej ca le nrug Vaajtswv tsaav tuabneeg zoo sab!”

¹¹Hab tseem has ntxiv has tas, “Mej cov kws yog lwm Tsaav Tuabneeg, mej ca le qhuas tug Tswv hab txhua tsaav tuabneeg ca le qhuas nwg!”

¹²Hab Yaxayas has ntxiv has tas, “Yexais ib tug xeebntxwv yuav lug, nwg yuav kaav lwm tsaav tuabneeg hab puab yuav tso sab plhuav rua nwg.”

¹³Thov Vaajtswv tug kws mej ca sab rua, pub mej muaj kev zoo sab hab nyob kaaj sab lug, Vaaj Ntsujplig tug Dlawbhuv lub fwjchim yuav paab kuas mej muaj kev ca sab rua Vaajtswv heev zuj zug.

¹⁴Cov kwvtij, kuv paub has tas mej yog cov kws muaj lub sab zoo, muaj kev txawj ntse, hab ib leeg txawj qha ib leeg.

¹⁵Qhov kws kuv muaj cuabkaav sau tsaab ntawv nuav tuaj rua mej, yog kuv xaav ntuag kuas mej ncu tej yaam tseemceeb kws yog Vaajtswv txujkev hlub kws Vaajtswv pub rua kuv,

¹⁶kuv txhaj tau ua Yexus Khetos ib tug tubkhai kws qha Vaajtswv Txujmoo Zoo rua lwm Tsaav Tuabneeg, ib yaam le tug povthawj, kuas lwm Tsaav tuabneeg zoo le tej khoom fij kws hum Vaajtswv sab, hab Vaaj Ntsujplig tug Dlawbhuv ntxuav kuas puab huv.

¹⁷Kuv koom nrug Yexus Khetos, kuv txhaj muaj cuabkaav khaav tej num kws kuv ua rua Vaajtswv.

¹⁸Kuv yeej tsi muaj cuabkaav khaav ib yaam dlaabtsi le, tsuas yog tej kws Yexus Khetos kuas kuv coj lwm Tsaav Tuabneeg lug ntseeg Vaajtswv, vim tej lug kws kuv qha hab tej num kws kuv ua,

¹⁹hab Vaaj Ntsujplig pub fwjchim rua kuv ua tej txujci tseemceeb. Yog le ntawd, kuv txhaj qha Yexus Khetos Txujmoo Zoo huv lub nroog Yeluxalees moog txug rua peg lub nroog Ilelikus.

²⁰Teg num kws kuv nyam ua tshaaj, yog moog qha Txujmoo Zoo rua txhua qhov kws tsi tau muaj tuabneeg moog qha Yexus Khetos zaaj dlua le, txhaj tsi muaj tuabneeg has tas, kuv moog tsaa tsev rua ntawm lub qua tsev kws luas tub ncaws tau ca lawm.

²¹Lawv le Vaajtswv txujlug has tas: “Cov tuabneeg kws tsi tau muaj tuabneeg qha Yexus zaaj rua puab, puab yuav pum; hab cov tuabneeg kws tsi tau nov dlua Yexus zaaj, puab yuav totaub.”

²²Muaj ntau yaam pheej taabkaum kuv, kuv txhaj tsi tau tuaj saib mej.

²³Tabsis nwgnuav tim tej cheebtsaam kws kuv nyob nuav, kuv tub ua num tav lawm, kuv npaaj sab lug tau ob peb xyoos has tas kuv yuav tau tuaj pum mej,

²⁴thaus kuv moog tim tebchaws Xapees. Kuv ca sab has tas thaus kuv tuaj ntawd, kuv yuav pum mej hab tau nrug mej nyob ib ntus, ces mej yuav paab xaa kuv moog rua tim tebchaws Xapees.

²⁵Taamsim nuav kuv taabtom rov moog paab cov ntseeg kws nyob nraag lub nroog Yeluxalees;

²⁶Rua qhov cov ntseeg kws nyob huv Makedaunias hab Akhayas, puab txaus sab muab mivntsiv nyaj xaa moog paab cov ntseeg txomnyem kws nyob nraag lub nroog Yeluxalees.

²⁷Puab yeej txaus sab hlo ua le ntawd. Puab paub has tas yeej tsimnyog puab pauj cov tuabneeg kws nyob nraag lub nroog Yeluxalees txaj ntsig. rua qhov cov Yudais ca lwm tsaav tuabneeg tau lug nrug cov Yudais koom Vaajtswv txuj koob moov.

²⁸Thaus kuv nqaa cov nyaj ntawd moog cob rua puab lawm, kuv yuav moog rua tim tebchaws Xapees, tabsis kuv yuav xub tuaj saib mej tsaiv;

²⁹kuv paub has tas thaus kuv tuaj txug tim mej, Yexus Khetos yuav foom koob moov ntau kawg rua mej.

³⁰Cov kwvtij, vim peb cov kws ntseeg peb tug Tswv Yexus Khetos hab vim Vaaj Ntsujplig tub ua rua peb txawj sis hlub lawm, yog le ntawd kuv thov mej kub sab lug thov Vaajtswv paab kuv,

³¹kuas cov tuabneeg tsi ntseeg kws nyob huv lub xeev Yudas tsi xob ua phem rua kuv, hab thov Vaajtswv paab kuv, kuas teg num kws kuv moog ua paab cov ntseeg kws nyob huv lub nroog Yeluxalees hum suavdlawg sab.

³²Yog Vaajtswv pum zoo, kuv yuav zoo sab hlo tuaj saib mej, hab thaus kuv tuaj pum mej lawm, kuv yuav zoo sab heev.

³³Kuv thov Vaajtswv tug kws ua rua peb tau nyob kaaj sab lug nrug nraim mej txhua tug. Amees.