Read Hmong Njua Loos 16 Bible Online

Loos 16 - Hmong Njua bible

Loos 16

¹Kuv qha rua mej paub has tas peb tug muam Fenpes, yog ib tug kws ua num paab pawg ntseeg huv lub nroog Keekhale-as.

²Kuv thov mej tog txais nwg ntawm tug Tswv lub npe, kuas tsimnyog qhov kws peb yog Vaajtswv tsaav tuabneeg, hab tej kws nwg xaav tau, mej ca le paab nwg; rua qhov nwg tau paab suavdlawg hab paab kuv lawm.

³Thov mej has noj qaab nyob zoo rua Paxilas hab Akilas obtug, obtug yog ob tug kws paab kuv ua Yexus Khetos teg num;

⁴hab obtug tau paab kuv, obtug tsi khauvxwm obtug txujsa le, tsi yog kuv tuab leeg ncu obtug tshaav ntuj xwb, tabsis txhua pawg ntseeg kws yog lwm Tsaav Tuabneeg puavleej ncu obtug tshaav ntuj hab.

⁵Thov mej has noj qaab nyob zoo rua cov ntseeg kws tuaj saablaaj huv obtug tsev. Thov mej has noj qaab nyob zoo rua kuv tug phoojywg Epanetus, nwg yog thawj tug kws lug ntseeg Yexus Khetos huv lub xeev Axias.

⁶Thov mej has noj qaab nyob zoo rua Malis tug kws muab sab rau ua num paab mej.

⁷Thov mej has noj qaab nyob zoo rua Adelaunikus hab Yuniyas kws yog kuv ob tug kwvtij Yudais kws raug kaw nrug kuv ua ke huv tsev lojcuj; obtug yog ob tug kws cov thwjtim paub zoo, hab obtug xub lug ntseeg Yexus Khetos ua ntej kuv.

⁸Thov mej has noj qaab nyob zoo rua Apiyatus kws yog kuv tug phoojywg zoo ntawm tug Tswv lub npe.

⁹Thov mej has noj qaab nyob zoo rua Ulanpanus kws yog ib tug phoojywg nrug peb ua Yexus Khetos teg num ua ke, hab has rua kuv tug phoojywg Xitakhis.

¹⁰Thov mej has noj qaab nyob zoo rua Apeles tug kws muab sab npuab Yexus Khetos, hab has noj qaab nyob zoo rua Aletaunpulus tsev tuabneeg.

¹¹Thov mej has noj qaab nyob zoo rua kuv tug kwvtij Helaudi-oos hab has noj qaab nyob zoo rua Nalekixus kws yog tsev tuabneeg ntseeg Yexus.

¹²Has kuv tej lug noj qaab nyob zoo rua Tifanas hab Tifauxas kws ua tug Tswv teg num, hab has rua Palexis kws yog kuv tug phoojywg zoo, nwg ua tug Tswv num khwv kawg le.

¹³Kuv xaa lug noj qaab nyob zoo rua Lufus, nwg yog tug kws nquag ua tug Tswv teg num kawg le; hab has noj qaab nyob zoo rua nwg nam tug kws ib yaam le yog kuv nam hab.

¹⁴Has kuv tej lug noj qaab nyob zoo rua Axikitus, Filenkoos, Helemes, Palaunpas, Helemas, hab cov kwvtij hab cov muam kws ntseeg Yexus kws nrug puab nyob ntawd huv tuabsi.

¹⁵Thov mej has noj qaab nyob zoo rua Filaunkus, Yulias, Nele-us, hab nwg tug muam, hab Aulepas hab taagnrho cov ntseeg kws nrug puab nyob ua ke ntawd huv tuabsi.

¹⁶Mej ib leeg has noj qaab nyob zoo rua ib leeg ntawm txujkev sis hlub. Cov ntseeg Yexus Khetos puavleej xaa lug noj qaab nyob zoo tuaj rua mej.

¹⁷Cov kwvtij, kuv xaav kuas mej ceevfaaj cov tuabneeg kws ntxag kuas suavdlawg tawg paab tawg pawg hab kuas mej tso tej lug qha kws mej tub nov lawm tseg. Mej tsi xob quavntsej cov tuabneeg ntawd tej lug qha!

¹⁸Rua qhov cov tuabneeg kws ua le ntawd puab tsi yog cov kws ua peb tug Tswv Yexus Khetos teg num, tabsis puab tsuas tuaj nrhav noj nrhav haus nkaus xwb. Hab puab has tej lug mog lug muas dlaag ntxag cov tuabneeg kws tsi paub qaabhau kuas yuam kev.

¹⁹Txhua tug puavleej nov has tas mej noog lug heev, yog le ntawd kuv zoo sab kawg le. Kuv xaav kuas mej ua tuabneeg txawj ntse rua yaam kws zoo; kuv xaav kuas mej ua le tug tuabneeg ruag rua yaam kws phem.

²⁰Tshuav tsi ntev Vaajtswv tug kws ua rua peb tau nyob kaaj sab lug yuav muab dlaab Ntxwgnyoog nas nthi rua mej tsuj. Thov kuas peb tug Tswv Yexus Khetos txuj koob moov nrug nraim mej suavdlawg.

²¹Timautes tug kws nrug kuv ua num ua ke, nwg has noj qaab nyob zoo rua mej; hab Luki-sus, Yaxoos, hab Xauxipates kws yog kuv cov kwvtij Yudais, puab has noj qaab nyob zoo rua mej hab.

²²Kuv yog Teti-us tug kws sau Paulus tsaab ntawv nuav, kuv has noj qaab nyob zoo rua mej cov kws ntseeg Yexus hab.

²³Nkayus tug kws kuv nrug nyob hab muab nwg lub tsev rua cov ntseeg ua chaw saablaaj, nwg has noj qaab nyob zoo rua mej suavdlawg. Elaxetus kws yog tug tuav cov numtswv huv lub nroog tej nyaj, hab peb tug kwvtij Khualetus, has noj qaab nyob zoo rua mej suavdlawg hab.

²⁴Thov kuas peb tug Tswv Yexus Khetos txujkev hlub nrug nraim mej txhua tug. Amees.

²⁵Peb ca le ua rua Vaajtswv tau koob meej! Vaajtswv yog tug kws paab tau kuas mej muab sab rau ntseeg, txhua zag kws kuv qha Txujmoo Zoo kuv yeej qha has tas, Vaajtswv paab tau mej. Txujmoo Zoo ntawd has txug Yexus Khetos zaaj kws ntau tam yaav taag lug tsi muaj tuabneeg paub.

²⁶Tabsis, nwgnuav tub muaj tuabneeg muab qha rua suavdlawg paub lawv le Vaajtswv tug kws muaj sa nyob moog ibtxhis tau qha rua cov cev Vaajtswv lug muab sau tseg rua huv ntawv lawm, kuas txhua tsaav tuabneeg ntseeg hab noog Vaajtswv lug;

²⁷Thov kuas Vaajtswv tug kws muaj kev txawj ntse tuab leeg tau koob meej lug ntawm Yexus Khetos moog ibtxhis le. Amees.