Read Hmong Njua Loos 2 Bible Online

Loos 2 - Hmong Njua bible

Loos 2

¹Mej xaav has tas, mej muaj cuabkaav txav txim rua lwm tug nua los? Yog mej txav txim rua lwm tug, mej yuav tsi muaj lug has dlaws mej zaaj. Thaus mej txav txim rua lwm tug, yog mej txav txim rua mej ntaag, rua qhov mej tub ua txhum ib yaam le lwm tug hab.

²Peb paub has tas qhov kws Vaajtswv txav txim rua cov tuabneeg kws ua tej kev phem nuav nwg yeej ua yog lawm.

³Mej txav txim rua lwm tug, tabsis mej tseem ua txhum ib yaam le puab hab, mej xaav has tas mej yuav tsiv dlim Vaajtswv txujkev txav txim nua los?

⁴Lossis yog mej tuam mom Vaajtswv txaj ntsig qhov kws Vaajtswv ua sab dlawb sab zoo hab ua sab ntev rua mej. Mej yeej paub has tas, qhov kws Vaajtswv ua sab dlawb sab zoo rua mej, yog nwg xaav kuas mej tso mej tej kev txhum tseg.

⁵Tabsis qhov kws mej tawv ncauj hab tsi kaam tso mej tej kev txhum tseg, yog ua kuas Vaajtswv chim hab txav txim rua mej. Nub kws Vaajtswv txav txim ncaaj nceeg, nwg yuav txav txim nyaav rua mej.

⁶Rua qhov Vaajtswv yuav muab nqe zug rua txhua tug lawv le teg num kws nwg tau ua lug lawm.

⁷Vaajtswv yuav muab txujsa ntev dlhawv moog ibtxhis rua cov tuabneeg kws muaj lub sab ntev hab naj nub ua zoo; hab xaav kuas Vaajtswv pub koob moov rua puab, qhuas puab hab pub txujsa kws tsi txawj tuag rua puab.

⁸Vaajtswv yuav chim hab npautawg rua cov tuabneeg kws ua lawv le puab lub sab nyam, puab tsi nyam qhov tseeb, tabsis puab nyam kev phem kev qas xwb.

⁹Txhua tug tuabneeg kws ua phem ua qas yuav raug kev txomnyem hab nyuaj sab, cov Yudais yuav xub raug ua ntej, tom qaab ntawd yog lwm Tsaav Tuabneeg.

¹⁰Tabsis Vaajtswv yuav foom koob moov, pub tshwjchim hab kev kaaj sab lug rua txhua tug kws ua zoo, yuav xub pub rua cov Yudais, tom qaab ntawd yog pub rua lwm Tsaav Tuabneeg.

¹¹Rua qhov Vaajtswv yeej txav txim rua txhua tug ib yaam nkaus.

¹²Lwm Tsaav Tuabneeg yeej tsi muaj Mauxes txuj Kevcai, tabsis puab yuav raug puamtsuaj, vim puab ua txhum. Cov Yudais muaj Mauxes txuj kevcai los puab yuav raug txav txim, vim puab ua txhum txuj kevcai ntawd.

¹³Rua qhov Vaajtswv tsi suav has tas, cov tuabneeg kws nov Vaajtswv txuj Kevcai yog cov kws ncaaj nceeg, tabsis cov tuabneeg kws ua lawv le Vaajtswv txuj Kevcai txhaj yog cov tuabneeg ncaaj nceeg.

¹⁴Lwm Tsaav Tuabneeg yeej tsi muaj Vaajtswv txuj Kevcai, tabsis tej kws puab ua, puab ua lawv le txuj Kevcai ntawd qha, txawm yog puab tsi muaj Vaajtswv txuj Kevcai los puab yeej muaj ib txuj kevcai nyob huv puab lub sab.

¹⁵Qhov kws puab paub ua zoo ntawd qha has tas, puab yeej muaj Vaajtswv txuj Kevcai nyob huv puab lub sab. Puab lub sab kws paub qhov phem qhov zoo yuav qha qhov tseeb rua puab; qee zag puab lub sab qha has tas puab ua txhum, hab qee zag puab lub sab qha has tas puab ua zoo lawm.

¹⁶Thaus txug nub kws Vaajtswv txav txim, Vaajtswv yuav kuas Yexus Khetos muab tej kws tuabneeg lub sab xaav nraim nkoog nthuav tawm lug lawv le Txujmoo Zoo kws kuv tub qha lawm.

¹⁷Mej has tas, mej yog tuabneeg Yudais; mej ca sab rua Vaajtswv txuj Kevcai hab mej khaav has tas mej nrug Vaajtswv sis raug zoo;

¹⁸mej yeej paub tej kws Vaajtswv xaav kuas mej ua, hab mej paub qhov phem qhov zoo, rua qhov Vaajtswv txuj Kevcai tub qha rua mej lawm;

¹⁹yog mej paub has tas mej yog cov kws coj cov tuabneeg dligmuag kev, hab yog lub teeb kws ci pum kev rua cov tuabneeg kws nyob huv qhov tsaus ntuj,

²⁰hab mej yog cov kws qha cov ruag, mej yog cov xwbfwb kws qha cov mivnyuas yau, mej muaj kev txawj ntse hab paub Vaajtswv txuj Kevcai kws yog qhov tseeb,

²¹mej cov kws qha lwm tug, ua le caag mej tsi qha mej? Mej qha has tas, “Tsi xob ua tubsaab,” tabsis puas yog mej tub ua tubsaab?

²²Mej has tas, “Tsi xob ntxag luas quaspuj lossis luas quasyawg,” tabsis puas yog mej tub ntxag lawm? Mej tsi nyam pe mlom, tabsis puas yog mej nyag tej nyaj tej kub huv tej tsev teev mlom?

²³Mej khaav has tas mej muaj Vaajtswv txuj Kevcai, tabsis puas yog mej tsi coj lawv le txuj Kevcai ntawd ua rua Vaajtswv poob ntsejmuag?

²⁴Vaajtswv txujlug has tas, “Tub yog vim mej cov tuabneeg Yudais, lwm Tsaav Tuabneeg txhaj thuam Vaajtswv lub npe.”

²⁵Yog mej ua lawv le Vaajtswv txuj Kevcai, qhov kws mej ua kevcai txav txhaj tseemceeb; tabsis yog mej tsi ua lawv le Vaajtswv txuj Kevcai qha, mej zoo ib yaam le tug kws tsi tau ua kevcai txav.

²⁶Yog lwm Tsaav Tuabneeg kws tsi tau ua kevcai txav muaj ib tug coj lawv le Vaajtswv txuj Kevcai qha, qhov kws nwg tsi tau ua kevcai txav ntawd, Vaajtswv puas suav has tas nwg tsi ua kevcai txav?

²⁷Lwm Tsaav Tuabneeg kws tsi ua kevcai txav ntawm nqaj tawv, tabsis yog puab ua lawv le Vaajtswv txuj kevcai qha, puab yuav txav txim rua mej cov kws ua kevcai txav lawv le tub muaj lug sau tseg lawm, rua qhov mej tsi ua lawv le Vaajtswv txuj Kevcai.

²⁸Rua qhov tug kws yog tuabneeg Yudais tag, yog tug kws muaj lub sab tshab, hab tug kws ua kevcai txav tag, tsi yog tug kws ua kevcai txav ntawm nqaj tawv xwb.

²⁹Tug kws yog tuabneeg Yudais tag, yog tug kws muaj lub sab tshab, hab tug kws ua kevcai txav tag, yog tug kws ua lawv le Vaajtswv tug Ntsujplig qha. Txawm yog tuabneeg tsi qhuas tug kws muaj lub sab tshab los Vaajtswv qhuas tug ntawd.