Read Hmong Njua Loos 5 Bible Online

Loos 5 - Hmong Njua bible

Loos 5

¹Yog le ntawd, vim peb ntseeg, Vaajtswv txhaj suav has tas peb yog tuabneeg ncaaj nceeg, peb tau nrug Vaajtswv sis raug zoo, rua qhov peb tug Tswv Yexus Khetos paab peb.

²Vim peb ntseeg Yexus Khetos, peb txhaj tau Vaajtswv txuj koob moov, hab muaj sa nyob. Peb ca le zoo sab hab ca sab has tas, peb yuav tau Vaajtswv tug tshwjchim kws ci ntsaa ab.

³Tsi yog le ntawd xwb, peb zoo sab qhov kws peb raug kev txomnyem, rua qhov peb paub has tas txujkev txomnyem ntawd ua rua peb ua taug sab ntev,

⁴qhov kws peb ua tau sab ntev hum Vaajtswv sab, hab qhov kws peb ua hum Vaajtswv sab, ua rua peb muaj kev ca sab.

⁵Txujkev ca sab nuav, tsi ua rua peb poob ntsejmuag, rua qhov Vaaj Ntsujplig tug dlawbhuv kws Vaajtswv tub pub rua peb lawm, qha rua peb has tas Vaajtswv hlub peb kawg le.

⁶Rua qhov peb paab tsi tau kuas peb dlim peb lub txim, Yexus Khetos txhaj lug tuag txhwv peb cov kws yog tuabneeg txhum lawv le lub sijhawm kws Vaajtswv teem tseg lawm.

⁷Qhov kws ib tug twg yuav tuag theej tug tuabneeg ncaaj nceeg, mas nyuaj kawg le. Tabsis tej zag yuav muaj qee leej txaus sab tuag theej tug tuabneeg zoo hab.

⁸Tabsis Vaajtswv qha rua peb has tas Vaajtswv hlub peb kawg le, rua qhov thaus peb tseem ua tuabneeg txhum Yexus Khetos tuag txhwv peb.

⁹Vim Yexus Khetos tuag theej peb lub txhoj, nwgnuav peb txhaj ua tau tuabneeg ncaaj nceeg, tsi yog le ntawd xwb, Vaajtswv yuav tsi txav txim rua peb, rua qhov Yexus Khetos cov ntshaav tub ntxuav peb tej kev txhum lawm.

¹⁰Thaus peb tseem yog Vaajtswv cov yeebncuab, Vaajtswv khaiv nwg tug Tub Yexus Khetos lug tuag theej peb lub txhoj hab coj peb lug nrug Vaajtswv sis raug zoo. Nwgnuav peb tub nrug Vaajtswv sis raug zoo lawm, tsi yog le ntawd xwb, peb tub dlim peb lub txim lawm, rua qhov Yexus Khetos tub sawv huv qhov tuag lug lawm.

¹¹Tsi yog le ntawd xwb; Vaajtswv ua rua peb zoo sab kawg le, rua qhov nwgnuav Yexus Khetos kws yog peb tug Tswv tub coj peb lug nrug Vaajtswv sis raug zoo lawm.

¹²Tub yog vim ib tug xub ua txhum, tuabneeg nplajteb txhua tug txhaj ua txhum. Vim tug ntawd ua txhum, tug ntawd txhaj tuag. Yog le ntawd, txhua tsaav tuabneeg kws nyob huv nplajteb nuav txhaj txawj tuag, rua qhov txhua tug puavleej tau ua txhum lawm.

¹³Thaus Vaajtswv tseem tsi tau qha Vaajtswv txuj Kevcai rua Mauxes, tuabneeg tub xub ua txhum lawm, tabsis Vaajtswv tsi suav tuabneeg lub txim, rua qhov thaus ntawd tseem tsi tau muaj txuj kevcai.

¹⁴Txij thaus Adaas tam lug txug Mauxes tam, tej tuabneeg puavleej muaj kev pluj kev tuag, txawm yog suavdlawg ua txhum tsi thooj le Adaas tug kws tsi noog Vaajtswv lug ua los suavdlawg puavleej tuag huv tuabsi. Adaas ua qauv txug tug kws yuav lug.

¹⁵Tabsis obtug zoo tsi sis thooj, rua qhov txuj koob moov kws Vaajtswv pub dlawb rua peb ntawd zoo tsi thooj le Adaas txujkev txhum. Vim Adaas ua txhum, suavdlawg txhaj tuag. Tabsis Vaajtswv hlub peb kawg le, Vaajtswv txhaj khaiv ib tug kws yog Yexus Khetos kws muaj lub sab hlub lug paab suavdlawg.

¹⁶Vaajtswv txuj koob moov hab Adaas txujkev txhum zoo tsi sis thooj. Thaus Adaas ua txhum lawm, txhaj muaj txujkev txav txim, tom qaab ntawd muaj ntau leej ua txhum, tabsis vim txuj koob moov kws Vaajtswv pub dlawb rua tuabneeg, Vaajtswv txhaj zaam txim rua suavdlawg.

¹⁷Vim ib tug ua txhum, suavdlawg txhaj tuag, tabsis teg num kws Yexus Khetos ua paab peb, tseemceeb dlua ndlais huv tuabsi. Txhua tug kws Vaajtswv suav has tas puab yog tuabneeg ncaaj nceeg, puab yuav tau txais Vaajtswv txuj koob moov nplua mag kws Vaajtswv pub dlawb hab puab yuav muaj txujsa nrug Yexus Khetos kaav moog ibtxhis.

¹⁸Tub yog vim ib tug ua txhum, Vaajtswv txhaj rau txim rua suavdlawg, tabsis vim teg num kws Yexus Khetos ua, paab tau tuabneeg dlim txim hab pub txujsa rua puab.

¹⁹Vim ib tug tsi noog Vaajtswv lug, suavdlawg txhaj ua txhum, tabsis vim Yexus Khetos noog Vaajtswv lug, suavdlawg txhaj ua tau tuabneeg ncaaj nceeg.

²⁰Thaus muaj txuj kevcai lawm, suavdlawg hajyam ua txhum txuj Kevcai; tabsis qhov twg muaj kev txhum, Vaajtswv txujkev hlub muaj nyob qhov ntawd.

²¹Yog le ntawd, txujkev txhum ua rua muaj kev pluj kev tuag le caag, Vaajtswv txujkev hlub ua rua muaj txujkev ncaaj nceeg, hab tau txujsa ntev dlhawv lug ntawm Yexus Khetos kws yog peb tug Tswv ib yaam le ntawd.