Read Hmong Njua Loos 6 Bible Online

Loos 6 - Hmong Njua bible

Loos 6

¹Peb yuav has le caag? Puas tsimnyog peb pheej ua txhum kuas Vaajtswv hajyam hlub peb ntxiv?

²Peb tsi xob ua le ntawd! Peb tub tuag rua txujkev txhum lawm, peb tseem yuav ua kev txhum ntxiv dlua hab los?

³Mej tub paub lawm has tas peb txhua tug kws ua kevcai raus dlej, peb tub nrug Yexus Khetos koom ib txujsa lawm. Qhov kws ua kevcai raus rua huv dlej, yog peb tuag ib yaam le Yexus tuag.

⁴Qhov kws luas muab peb raus rua huv dlej, yog luas muab peb log nrug Yexus hab peb koom nwg txujkev tuag, yog le ntawd Leej Txiv tug kws muaj fwjchim tsaa Yexus sawv huv qhov tuag rov qaab lug, nwg yuav pub lub neej tshab rua peb.

⁵Peb nrug Yexus koom nwg txujkev tuag le caag, peb yuav tau nrug nwg sawv huv qhov tuag rov qaab lug ib yaam le ntawd hab.

⁶Peb paub has tas, peb lub neej qub tub raug muab ntsa tuag nrug Yexus Khetos rua sau nwg tug ntoo khaublig lawm, ua le ntawd kuas txujkev txhum lub fwjchim puamtsuaj moog, peb txhaj tsi tau ua txujkev txhum qhev ntxiv lawm.

⁷Rua qhov tug tuabneeg tuag, nwg tub dlim txujkev txhum lub fwjchim lawm.

⁸Tabsis yog peb tuag nrug Yexus Khetos, peb ntseeg has tas peb yuav muaj txujsa nrug nwg nyob ua ke hab.

⁹Peb paub has tas Vaajtswv tub tsaa Yexus Khetos sawv huv qhov tuag rov qaab lug hab nwg yuav tsi tuag le lawm, rua qhov txujkev tuag yuam tsi tau nwg.

¹⁰Qhov kws Yexus tuag, nwg tsuas tuag ib zag theej suavdlawg lub txhoj xwb; nwgnuav nwg muaj sa nyob, hab nwg nrug Vaajtswv sis raug zoo.

¹¹Ib yaam le ntawd, mej yuavtsum ncu ntsoov has tas mej tub tuag rua txujkev txhum hab nrug Yexus Khetos koom ib txujsa nyob rua ntawm Vaajtswv lawm.

¹²Yog le ntawd, mej tsi xob ca txujkev txhum kaav mej lub cev kws txawj tuag, rua qhov txujkev txhum ua rua mej ua lawv le mej lub sab nyam.

¹³Mej tsi xob ca txujkev txhum siv mej lub cev ib qho moog ua phem ua qas. Tabsis muab mej lub cev pub rua Vaajtswv ib yaam le cov tuabneeg kws Vaajtswv tub tsaa sawv huv qhov tuag rov qaab lug lawm, hab muab mej lub cev pub rua Vaajtswv siv ua qhov ncaaj nceeg.

¹⁴Tsi xob ca txujkev txhum kaav mej; rua qhov Mauxes Txuj Kevcai tsi kaav mej lawm, tabsis Vaajtswv txujkev hlub kaav mej.

¹⁵Peb yuav ua le caag? Peb yuav ca le ua txhum, vim Mauxes txuj Kevcai tsi kaav peb lawm, tabsis Vaajtswv txujkev hlub kaav peb los? Tsi xob ua le ntawd!

¹⁶Mej yeej paub lawm has tas, yog mej zoo sab ua luas qhev hab ntseeg luas lug, luas yeej yuav ua mej tug tswv. Yog mej ca txujkev txhum ua mej tug tswv, thaus kawg mej yuav raug kev pluj kev tuag. Yog mej noog Vaajtswv lug, mej txhaj yog tuabneeg ncaaj nceeg.

¹⁷Yaav taag lug mej ua txujkev txhum qhev, tabsis nwgnuav kuv ua Vaajtswv tsaug, rua qhov mej muab sab rau ua lawv le tej lug kws luas qha rua mej lawm.

¹⁸Vaajtswv tub tso mej dlim ntawm txujkev txhum hab mej tub ca txujkev ncaaj nceeg kaav mej lawm.

¹⁹(Kuv has le tuabneeg has, rua qhov mej tsi totaub.) Mej ibtxwm muab mej lub cev moog ua txujkev txhum hab kev phem kev qas qhev le caag lawm. Nwgnuav mej yuavtsum muab mej lub cev moog ua qhov zoo hab ua kev ncaaj nceeg qhev ib yaam le ntawd.

²⁰Thaus mej tseem ua txujkev txhum qhev, txujkev ncaaj nceeg yeej tsi kaav mej le.

²¹Tej kws mej ua taag lug lawm, mej tau dlaabtsi? Tej ntawd ua rua mej txaajmuag kawg le los sav! Tej kws mej ua ntawd, thaus kawg yog kev pluj kev tuag xwb!

²²Tabsis nwgnuav Vaajtswv tub tso mej dlim ntawm txujkev txhum lug ua Vaajtswv cov tubqhe lawm. Qhov kws mej tau yog Vaajtswv ntxuav kuas mej muaj lub sab dlawbhuv, thaus kawg mej txhaj tau txujsa ntev dlhawv moog ibtxhis.

²³Rua qhov nqe zug ntawm txujkev txhum yog kev tuag, tabsis txuj koob moov kws Vaajtswv pub dlawb yog txujsa ntev dlhawv moog ibtxhis kws lug ntawm Yexus Khetos kws yog peb tug Tswv lug.