Read Hmong Njua Loos 7 Bible Online

Loos 7 - Hmong Njua bible

Loos 7

¹Cov kwvtij, mej yeej paub has tas, kuv has txug cov tuabneeg kws tub paub tej kevcai lawm; tej kevcai ntawd tsuas kaav tug tuabneeg kws tseem ua neej nyob xwb.

²Lawv le txuj kevcai, tug quaspuj kws yuav quasyawg lawm, nwg yuavtsum nrug nwg tug quasyawg nyob moog txug thaus nwg tug quasyawg tuag, tabsis yog tug quasyawg tuag lawm, tug quaspuj moog yuav lwm tug los yeej tsi txhum kevcai.

³Yog has tas nwg tug quasyawg tseem nyob, nwg ca le moog yuav dlua quasyawg lawm, suavdlawg yuav has tas nwg ntxag hluas nraug; tabsis yog nwg tug quasyawg tuag lawm, nwg moog yuav quasyawg tshab los yeej tsi txhum kevcai, hab tsi muaj leejtwg yuav has tas nwg ntxag hluas nraug.

⁴Cov kwvtij, ib yaam nkaus le ntawd, Mauxes Txuj Kevcai yeej tsi kaav mej cov kws nrug Yexus Khetos tuag ua ke lawm. Nwgnuav Yexus Khetos tug kws Vaajtswv tsaa sawv huv qhov tuag rov qaab lug, tub yuav mej lug ua nwg tug lawm, nwg ua le ntawd kuas mej ua mej lub neej rua Vaajtswv tau koob meej.

⁵Thaus kws peb tseem ua peb lub neej lawv le tuabneeg ibtxwm ua, vim txuj kevcai, txujkev txhum txhaj tshoov peb lub sab kuas peb nyam moog ua txhum hab raug kev pluj kev tuag.

⁶Tabsis nwgnuav peb tub dlim txuj kevcai kws khi peb, rua qhov peb zoo le cov tuabneeg kws tuag lawm. Naj nub nua peb txhaj tsi ua peb lub neej lawv le txuj qub kevcai kws sau tseg rua huv ntawv, tabsis peb ua peb lub neej lawv le txuj kevcai tshab kws Vaaj Ntsujplig qha.

⁷Peb yuav has le caag? Txuj kevcai yog kev txhum los? Yeej tsi yog le ntawd! Tabsis tub yog muaj txuj kevcai, kuv txhaj paub has tas kev txhum yog dlaabtsi. Yog txuj kevcai tsi has tas, “Tsi xob ntshaw luas tug,” ces kuv yeej tsi paub has tas qhov kws ntshaw luas tug nuav txhum.

⁸Tabsis txujkev txhum muab txuj kevcai ua hauv kev tshoov kuv sab kuas kuv ntshaw txhua yaam. Yog tsi muaj txuj kevcai, ces txujkev txhum yeej tuag lawm.

⁹Yaav taag lug kuv ua kuv lub neej tsi muaj txuj kevcai kaav kuv, tabsis thaus muaj txuj kevcai lawm, ua rua kev txhum tshwm tuaj,

¹⁰hab kuv txhaj tuag. Vaajtswv rhawv txuj kevcai yog ua kuas tuabneeg tau txujsa, tabsis kuv pum has tas txuj kevcai ua rua kuv raug kev pluj kev tuag.

¹¹Rua qhov txujkev txhum muab txuj kevcai ua hauv kev lug dlaag ntxag kuv hab tua kuv povtseg.

¹²Yog le ntawd, txuj kevcai yeej dlawbhuv, hab tej nqai kevcai los yeej dlawbhuv, ncaaj nceeg hab zoo kawg nkaus le.

¹³Puas yog Txuj Kevcai kws yog txuj zoo ua rua kuv raug kev pluj kev tuag? Yeej tsi yog le ntawd! Tub yog txujkev txhum muab txuj kevcai tua kuv, kuv txhaj raug kev pluj kev tuag. Yog le ntawd kuv txhaj paub has tas txujkev txhum zoo le caag, hab tej kevcai ntawd ua rua kuv pum has tas, txujkev txhumphem kawg nkaus le.

¹⁴Peb paub has tas Mauxes txuj Kevcai yog Vaajtswv txuj; tabsis kuv yog tuabneeg, txujkev txhum txhaj naj nub yuam kuv ua txhum.

¹⁵Kuv tsi totaub tej kws kuv ua; vim le caag kuv ua tej kws kuv tsi nyam ua, tabsis tej kws kuv nyam kuv tsua tsi ua.

¹⁶Thaus kuv ua tej kws kuv tsi nyam ua, kuv txhaj paub has tas txuj kevcai ntawd yeej zoo tag.

¹⁷Yog le ntawd, kuv tsi yog tug kws ua txhum; tabsis yog txujkev txhum kws nyob huv kuv lub sab ua xwb.

¹⁸Kuv paub has tas, kuv yog tuabneeg xwb, kuv txhaj ua tsi tau ib qho zoo le. Kuv xaav ua zoo, tabsis kuv ua tsi tau.

¹⁹Kuv xaav ua qhov zoo, tabsis kuv tsua tsi ua; kuv tsi xaav ua qhov phem, tabsis kuv tsua ua.

²⁰Yog kuv ua tej kws kuv tsi xaav ua, tej ntawd yeej tsi yog kuv ua, tabsis yog txujkev txhum kws nyob huv kuv lub sab ua.

²¹Yog le ntawd, kuv pum txuj kevcai zoo le nuav: thaus kuv xaav ua qhov zoo, kuv tsua xaiv ua qhov phem.

²²Kuv muaj ib lub sab xaav ua lawv le Vaajtswv txuj kevcai,

²³tabsis kuv pum has tas, kuv muaj dlua ib lub sab tawmtsaam txuj kevcai kws nyob huv kuv lub sab. Lub sab ntawd txhaj yuam kuv moog ua txujkev txhum qhev.

²⁴Ua caag kuv yuav nyuaj sab ua luaj le? Leejtwg txhaj yuav cawm tau kuv dlim ntawm lub sab kws coj kuv moog raug kev pluj kev tuag?

²⁵Kuv ua Vaajtswv tsaug kws peb tug Tswv Yexus Khetos tub paab kuv dlim lawm. Yog le ntawd, kuv lub sab ua lawv le Vaajtswv kuas kuv ua, tabsis kuv lub cev ua lawv le txujkev txhum kuas kuv ua.