Read Hmong Njua Loos 8 Bible Online

Loos 8 - Hmong Njua bible

Loos 8

¹Nwgnuav tug kws nrug Yexus Khetos koom ib txujsa, tug ntawd yuav tsi raug txav txim.

²Rua qhov Vaaj Ntsujplig tug kws coj peb lug nrug Yexus Khetos koom ib txujsa, nwg tub tso peb dlim ntawm txujkev txhum hab txujkev tuag lawm.

³Vim tuabneeg ua tsi tau zoo, txuj kevcai txhaj paab tsi tau puab. Tabsis Vaajtswv paab tau, rua qhov nwg khaiv nwg tug Tub lug yug ua tuabneeg hab muaj roj ntshaa ib yaam le tej tuabneeg txhum, nwg txhaj dlaws tau tuabneeg lub txim.

⁴Vaajtswv ua le ntawd, kuas peb ua tau lawv le Vaajtswv txuj kevcai kws ncaaj nceeg, tsi yog peb ua lawv le peb lub sab qub qha, tabsis peb ua lawv le Vaaj Ntsujplig qha.

⁵Tug kws ua lub neej lawv le lub sab qub qha, tug ntawd yeej ua lawv le nwg lub sab qub nyam, tabsis tug kws ua nwg lub neej lawv le Vaaj Ntsujplig qha, tug ntawd yeej ua lawv le Vaaj Ntsujplig lub sab nyam.

⁶Tug kws ua lawv le nwg lub sab qub qha, tug ntawd yuav raug kev pluj kev tuag, tabsis tug kws ua lawv le Vaaj Ntsujplig qha, tug ntawd yuav tau txujsa hab kev kaaj sab.

⁷Tug kws ua lawv le nwg lub sab qub qha, tug ntawd ua yeebncuab rua Vaajtswv; rua qhov nwg tsi ua lawv le Vaajtswv txuj kevcai, hab qhov tseeb nwg yeej coj tsi tau lawv le txuj kevcai ntawd.

⁸Tug kws tseem ua lawv le nwg lub sab qub qha, tug ntawd ua tsi tau hum Vaajtswv sab.

⁹Yog Vaajtswv tug Ntsujplig nyob huv mej lub sab, mej yeej tsi ua lawv le mej lub sab qub qha mej, tabsis mej ua lawv le Vaaj Ntsujplig qha mej. Tug kws tsi muaj Yexus Khetos tug Ntsujplig, tug ntawd yeej tsi yog Yexus Khetos tug.

¹⁰Tabsis yog Yexus Khetos nyob huv mej lub sab, txawm yog mej lub cev tuag vim txujkev txhum los mej tug ntsujplig yuav tsi tuag, vim Vaajtswv suav has tas mej ncaaj nceeg.

¹¹Yog Vaajtswv tug Ntsujplig kws tsaa Yexus Khetos sawv huv qhov tuag rov qaab lug nyob huv mej lub sab lawm, ces tug kws tsaa Yexus Khetos sawv huv qhov tuag rov qaab lug, nwg yuav tsaa mej lub cev kws txawj tuag sawv rov qaab lug hab, rua qhov Vaaj Ntsujplig nyob huv mej.

¹²Yog le ntawd cov kwvtij, peb yuavtsum ua lawv le Vaajtswv tug Ntsujplig qha, tsi xob ua lawv le peb lub sab qub qha.

¹³Yog mej ua mej lub neej lawv le lub sab qub qha, mej yeej yuav tuag; tabsis yog mej ua mej lub neej lawv le Vaaj Ntsujplig qha, mej txhaj yuav tso tau mej tej kev txhum tseg hab mej yuav tau txujsa.

¹⁴Tug kws ca Vaajtswv tug Ntsujplig qha, tug ntawd txhaj yog Vaajtswv tug mivnyuas.

¹⁵Rua qhov mej tsi tau tug Ntsujplig kws coj mej moog ua qhev kuas mej txhawj mej ntshai, tabsis mej tau Vaaj Ntsujplig tug kws coj mej lug ua Vaajtswv cov mivnyuas, kuas mej muaj cuabkaav hu Vaajtswv has tas, “Anpas! Kuv Txiv!”

¹⁶Vaajtswv tug Ntsujplig qha rua peb lub sab has tas, peb yog Vaajtswv cov mivnyuas.

¹⁷Vim peb yog Vaajtswv cov mivnyuas lawm, peb yuav tau txais tej koob moov kws nwg npaaj tseg rua peb, hab peb yuav tau nrug Yexus Khetos txais tej kws Vaajtswv npaaj tseg rua Yexus Khetos lawm; peb cov kws raug kev txomnyem ib yaam le Yexus Khetos raug, peb yeej yuav tau Vaajtswv tug tshwjchim kws ci ntsaa ab ib yaam le Yexus Khetos tau hab.

¹⁸Kuv pum has tas txujkev txomnyem kws taamsim nuav peb raug yeej pev tsi tau tug tshwjchim ci ntsaa ab kws Vaajtswv yuav pub rua peb yaav tom ntej nuav.

¹⁹Ib puas tsaav yaam kws Vaajtswv tsim, tog ntsoov xaav pum nub kws Vaajtswv cov mivnyuas lug.

²⁰Txhua yaam kws Vaajtswv tsim, yeej tsi xaav raug kev puamtsuaj, tabsis Vaajtswv pum zoo ca tej ntawd raug kev puamtsuaj. Txawm le ntawd los tseem muaj kev ca sab

²¹has tas, muaj ib nub twg ib puas tsaav yaam kws Vaajtswv tsim, yuav dlim ntawm txujkev puamtsuaj, hab yuav nrug Vaajtswv cov mivnyuas tau tug tshwjchim kws ci ntsaa ab.

²²Rua qhov peb paub has tas txij thaus u lug txug naj nub nua, ib puas tsaav yaam kws Vaajtswv tsim ntsaaj ntsoog qeeg ib yaam le tug quaspuj kws mob plaab yuav yug mivnyuas;

²³tsi yog ib puas tsaav yaam kws Vaajtswv tsim txhaj ntsaaj ntsoog qeeg xwb, tabsis peb cov kws tau txais Vaaj Ntsujplig kws yog thawj txuj koob moov kws Vaajtswv pub rua peb lawm, peb los ntsaaj ntsoog qeeg tog ntsoov nub kws Vaajtswv hu peb has tas peb yog nwg cov mivnyuas, hab txhwv kuas peb dlim.

²⁴Tub yog vim peb ca sab le ntawd, peb txhaj dlim; tabsis yog peb qhovmuag tub pum yaam kws peb ca sab rua lawm, ces qhov ntawd yeej tsi yog txujkev ca sab. Leejtwg tseem yuav ca sab rua tej kws nwg qhovmuag tub pum lawm?

²⁵Tabsis yog peb ca sab rua tej kws peb qhovmuag tsi tau pum, peb yeej ua sab ntev tog tej ntawd.

²⁶Thaus peb tsaug muas Vaaj Ntsujplig paab peb; rua qhov peb tsi paub has tas, peb yuav thov yaam twg, tabsis Vaaj Ntsujplig thov Vaajtswv paab peb thaus peb tsi paub yuav has le caag.

²⁷Vaajtswv tug kws pum peb lub sab, yeej paub tej kws Vaaj Ntsujplig thov, rua qhov tej kws Vaaj Ntsujplig thov Vaajtswv paab peb, tej ntawd yeej lawv le Vaajtswv lub sab nyam.

²⁸Peb paub has tas, peb cov kws hlub Vaajtswv, txawm yog peb tau zoo hab txomnyem los Vaajtswv yuav ua kuas tej ntawd muaj nqes rua peb cov kws Vaajtswv pum zoo hu lug lawv le Vaajtswv npaaj tseg lawm.

²⁹Txhua tug kws Vaajtswv xaiv tau lawm, Vaajtswv muab tshwj rua ib caag kuas puab muaj yaam ntxwv zoo le nwg tug Tub, Vaajtswv ua le ntawd kuas Leej Tub tau ua tug tij ntawm cov ntseeg.

³⁰Hab cov kws Vaajtswv muab tshwj rua ib caag, yog cov kws Vaajtswv hu puab lawm; hab cov kws Vaajtswv hu, Vaajtswv suav has tas puab yog cov ncaaj nceeg, hab cov kws Vaajtswv suav has tas ncaaj nceeg, Vaajtswv pub tug tshwjchim kws ci ntsaa ab rua puab.

³¹Peb tseem yuav has le caag hab? Yog Vaajtswv tuaj peb tog lawm, leejtwg tseem yuav tawmtsaam tau peb?

³²Vaajtswv tsi khauvxwm nwg tug Tub, tabsis nwg muab nwg tug Tub lug theej peb suavdlawg lub txhoj, tsi yog nwg muab nwg tug Tub xwb, tabsis nwg tseem muab txhua yaam pub dlawb rua peb hab?

³³Leejtwg tseem yuav lam txim tau rua cov tuabneeg kws Vaajtswv xaiv lawm? Vaajtswv tub has tas puab tsi muaj txim lawm.

³⁴Leejtwg tseem yuav rau txim tau rua peb? Yexus Khetos tub tuag hab sawv huv qhov tuag rov qaab lug lawm, nwg nyob ntawm Vaajtswv saab xis, hab thov Vaajtswv paab peb.

³⁵Tsi muaj ib yaam dlaabtsi yuav cais tau peb tawm ntawm Yexus Khetos txujkev hlub, tsi has teebmeem, lossis kev nyuaj sab, lossis kev tsimtxom, lossis kev tshaib nqhes, lossis kev txomnyem, lossis kev txhawj ntshai, lossis kev pluj kev tuag.

³⁶Lawv le Vaajtswv txujlug has tas: “Vim peb ntseeg koj luas txhaj naj nub yuav muab peb tua; luas ua rua peb ib yaam le tug yaaj kws luas yuav caab moog tua.”

³⁷Txawm yog le ntawd los Yexus Khetos tug kws hlub peb, nwg tub paab peb kovyeej txhua yaam ntawd huv tuabsi lawm.

³⁸Rua qhov kuv paub tseeb has tas, tsi muaj ib yaam dlaabtsi yuav cais tau peb ntawm Vaajtswv txujkev hlub, tsi has kev tuag lossis kev ua neej nyob, cov timtswv lossis cov kws muaj fwjchim kaav sau nruab ntug, nwgnuav lossis yaav tom ntej,

³⁹sau nruab ntug lossis huv nruab tivtxwv, lossis ib puas tsaav yaam kws yog Vaajtswv tsim, yeej tsi muaj ib yaam dlaabtsi cais tau peb ntawm Vaajtswv txujkev hlub kws nwg pub Yexus Khetos kws yog peb tug Tswv lug tuag theej peb lub txhoj.