Read Hmong Njua Loos 9 Bible Online

Loos 9 - Hmong Njua bible

Loos 9

¹Kuv yog tug kws ntseeg Yexus Khetos, tej lug kws kuv has, kuv has tseeb xwb kuv tsi dlaag; Vaaj Ntsujplig tug Dlawbhuv kaav kuv lub sab ua rua kuv paub has tej lug kws kuv has, kuv yeej tsi dlaag.

²Kuv nyuaj sab kawg le, rua qhov kuv txhawj kuv tsaav tuabneeg heev.

³Txawm yog Vaajtswv foom tsi zoo rua kuv hab muab kuv cais tawm ntawm Yexus Khetos moog los kuv yeej txaus saab, tsuav yog kuv tsaav tuabneeg tau lug nrug Vaajtswv sis raug zoo xwb.

⁴Puab yog cov Yixalayees kws Vaajtswv xaiv lug ua Vaajtswv cov mivnyuas, Vaajtswv qha nwg tug tshwjchim kws ci ntsaa ab rua puab, Vaajtswv coglug rua puab hab qha Vaajtswv txuj kevcai rua puab, Vaajtswv qha kuas puab paub pehawm Vaajtswv, hab qha has tas puab yuav tau txais tej kws Vaajtswv coglug tseg;

⁵puab yog cov Henplais tej yawmkoob kws nto moo lug tej xeebntxwv; hab Yexus Khetos tug kws lug yug ua tuabneeg, nwg yog puab tsaav tuabneeg. Suavdlawg ca le qhuas Vaajtswv tug kws kaav ib puas tsaav yaam moog ibtxhis! Amees.

⁶Kuv tsi tau has tas Vaajtswv tsi ua lawv le Vaajtswv tej lug cog tseg; rua qhov Vaajtswv tsi xaiv cov Yixalayees txhua tug lug ua Vaajtswv tsaav tuabneeg,

⁷hab tsi yog Anplahaas cov xeebntxwv puavleej yog Vaajtswv cov mivnyuas. Vaajtswv has rua Anplahaas has tas, “Ixaj cov mivnyuas txhaj yog koj cov xeebntxwv kws kuv coglug rua koj xwb.”

⁸Vaajtswv has le ntawd, tub yog Vaajtswv has tas, Anplahaas cov tubki muaj ibtxha txhaj le yog Vaajtswv cov mivnyuas, ibtxha tsi yog. Cov kws yog Vaajtswv mivnyuas tag, tsuas yog cov kws Vaajtswv xub has tseg lawm has tas Anplahaas yuav muaj xwb.

⁹Rua qhov Vaajtswv cov lug cog tseg has le nuav: “Lwm xyoo txug lub caij nuav, kuv yuav rov lug hab Xalas yuav yug tau ib tug tub.”

¹⁰Tsi yog le ntawd xwb. Lenpekas muaj ob tug tub kws yog tuab leeg txiv, obtug txiv yog peb yawmkoob Ixaj.

¹¹Vaajtswv has rua Lenpekas has tas, “Koj ob tug tub, tug hlub yuav ua tug yau qhev.” Vaajtswv has le ntawd thaus Lenpekas tseem tsi tau yug obtug, hab obtug tseem tsi tau paub qhov phem qhov zoo. Vaajtswv xaiv ib tug tseg ib tug lawv le Vaajtswv tub xaav tseg lawm. Vaajtswv tsi xaiv lawv le obtug teg num.

¹³Lawv le Vaajtswv txujlug has tas, “Kuv hlub Yakhauj, tabsis kuv ntxub Exaus.”

¹⁴Peb yuav has le caag? Peb yuav has tas Vaajtswv ua tsi ncaaj nua los? Tsi yog le ntawd!

¹⁵Rua qhov Vaajtswv has rua Mauxes has tas, “Kuv pum zoo taabncuab tug twg, kuv yuav taabncuab tug ntawd, hab kuv pum zoo hlub tug twg, kuv yuav hlub tug ntawd.”

¹⁶Qhov kws Vaajtswv ua le ntawd, tsi yog lawv le tuabneeg xaav yuav lossis vim qhov kws tuabneeg ua zoo, tabsis yog Vaajtswv hlub xwb.

¹⁷Rua qhov Vaajtswv txujlug has rua Falaus has tas, “Kuv tsaa koj ua vaajntxwv, kuas suavdlawg pum kuv lub fwjchim, hab kuas kuv lub npe nrov nchaa moo lug moog thoob qaab ntuj.”

¹⁸Yog le ntawd, Vaajtswv pum zoo hlub tug twg, Vaajtswv yeej hlub tug ntawd, hab Vaajtswv pum zoo kuas tug twg tawv ncauj tug ntawd yeej tawv ncauj.

¹⁹Mej cov muaj qee leej yuav has rua kuv tas, “Yog le ntawd, ua caag Vaajtswv tseem has tas muaj tug ua txhum hab? Leejtwg tseem yuav tawv dlhau Vaajtswv hab?”

²⁰Phoojywg, koj yog leejtwg, ua le caag koj tseem nrug Vaajtswv sis caav hab? Lub laujkaub aav yeej tsi has rua tug kws puab laujkaub has tas, “Ua caag koj puab kuv zoo le nuav?”

²¹Tug kws puab laujkaub nwg yeej muaj cai muab aav lug puab laujkaub lawv le nwg lub sab nyam. Nwg muab tuab thooj aav lug puab ib lub zoo ib lub phem los nyob ntawm nwg pum zoo.

²²Ib yaam nkaus le ntawd, Vaajtswv xaav qha nwg txujkev chim rua suavdlawg pum nwg lub fwjchim. Tabsis nwg ua sab ntev rua cov tuabneeg kws nwg chim rua, cov tuabneeg ntawd yog cov kws raug txujkev puamtsuaj,

²³hab Vaajtswv xaav kuas peb pum Vaajtswv tug tshwjchim ci ntsaa ab kws Vaajtswv muab pub rua peb cov kws Vaajtswv hlub, peb yog cov kws Vaajtswv xaiv tseg ca txais nwg tug tshwjchim.

²⁴Cov kws Vaajtswv hu, tsi yog hu cov Yudais xwb, tabsis hu lwm Tsaav Tuabneeg hab.

²⁵Vaajtswv has rua Hauxeyas sau tseg has tas: “Cov tuabneeg kws tsi yog kuv cov, kuv yuav hu ua ‘Kuv cov,’ hab tsaav tuabneeg kws kuv tsi hlub, kuv yuav hu ua ‘Tsaav tuabneeg kws kuv hlub.’

²⁶Hab nyob txhua qhov chaw kws kuv tsi hu puab has tas, ‘Mej yog kuv tsaav tuabneeg,’ nyob qhov chaw ntawd kuv yuav hu puab ua Vaajtswv tug kws muaj sa nyob cov mivnyuas.”

²⁷Hab Yaxayas has txug cov Yixalayees has tas, “Txawm yog cov Yixalayees coob heev ib yaam le tej xuabzeb ntawm ntug havtxwv los tsuas muaj qee leej txhaj yuav dlim xwb;

²⁸Rua qhov tug Tswv tub yuav txav txim rua lub nplajteb nuav sai sai.”

²⁹Hab Yaxayas qha has tas, “Yog tug Tswv kws muaj fwjchim luj kawg nkaus tsi tseg peb kuas muaj xeebntxwv, ces peb yeej yuav puamtsuaj taag ib yaam le lub nroog Xaudoos hab lub nroog Kaumaulas.”

³⁰Peb yuav has le caag? Lwm Tsaav Tuabneeg yeej tsi xyum coj lawv le txujkev ncaaj nceeg, tabsis vim puab ntseeg, puab txhaj ua tau tuabneeg ncaaj nceeg;

³¹tabsis cov Yixalayees xyum coj lawv le txuj kevcai qha kuas puab ua tau tuabneeg ncaaj nceeg, tabsis puab ua tsi tau lawv le txuj kevcai qha.

³²Vim le caag puab ua tsi tau? rua qhov puab tsi vaamkhom txujkev ntseeg, tabsis puab ca sab rua teg num kws puab ua xwb. Yog le ntawd puab txhaj dlawm lub pobzeb

³³kws Vaajtswv txujlug has tas: “Kuv yuav muab ib lub pobzeb tso rua huv lub nroog Xi-oos, txhua tug tuabneeg yuav dlawm lub pobzeb ntawd, lub pobzeb ntawd yuav ua rua tuabneeg qaug, tabsis yog leejtwg ntseeg nwg, tug ntawd yuav tsi poob ntsejmuag.”