Read Hmong Njua 1 Kauleethaus 1 Bible Online

1 Kauleethaus 1 - Hmong Njua bible

1 Kauleethaus 1

¹Kuv yog Paulus tug kws Vaajtswv hu lug ua Yexus Khetos tug timthawj lawv le Vaajtswv lub sab nyam, hab peb tug kwvtij Xauthenes sau tsaab ntawv nuav

²xaa tuaj rua cov ntseeg Vaajtswv kws nyob huv lub nroog Kauleethaus txhua tug kws Vaajtswv hu lug ua Vaajtswv tsaav tuabneeg hab tej tuabneeg kws nyob txhua qhov chaw kws pehawm peb tug Tswv Yexus Khetos kws yog puab hab peb tug Tswv, kuas tau nrug Yexus Khetos koom ib txujsa.

³Thov Vaajtswv kws yog peb Leej Txiv hab Yexus Khetos tug kws yog peb tug Tswv foom koob moov rua mej kuas mej tau zoo nyob kaaj sab lug.

⁴Kuv naj nub ua kuv tug Vaajtswv tsaug, rua qhov Vaajtswv pub Vaajtswv txuj koob moov rua mej cov kws ntseeg Yexus Khetos lawm.

⁵Yexus Khetos ua rua mej muaj txhua yaam, tsi has tej lug kws mej has hab tej kev txawj ntse kws mej muaj.

⁶Qhov ntawd, yog qhov kws ua rua mej ua timkhawv qha txug Yexus Khetos zaaj.

⁷Yog le ntawd, thaus kws mej taabtom tog peb tug Tswv Yexus Khetos rov qaab lug mej txhaj tau koob moov, tsi muaj ib yaam kws mej yuav tsi tau le.

⁸Vaajtswv yuav paab kuas mej muab sab rau ntseeg moog txug nub kawg, yog le ntawd nub kws peb tug Tswv Yexus rov qaab lug, mej txhaj tsi muaj ib qho txhum le.

⁹Vaajtswv yog tug ncaaj nceeg; Vaajtswv txhaj hu mej lug nrug nwg tug Tub Yexus Khetos kws yog peb tug Tswv sis raug zoo.

¹⁰Cov kwvtij kuv tuav peb tug Tswv Yexus Khetos lub npe ntuag mej suavdlawg, kuas mej has tej lug kws ua rua suavdlawg nyob sis hum txhaj tsi ua rua mej tawg ua paab ua pawg. Mej yuavtsum koom ua ib lub sab, xaav ib yaam hab muaj ib lub homphaj xwb.

¹¹Cov kwvtij, Khalau-es tsev tuabneeg qee leej tuaj qha rua kuv has tas, mej pheej sis caav sis tshe.

¹²Kuv nov mej ib leeg has lawm ib yaam. Ib tug has tas, “Kuv yog Paulaus paab”; muaj dlua lwm tug has tas, “Kuv yog Apaulus paab”; muaj dlua lwm tug has tas, “Kuv yog Petus paab”; hab muaj dlua lwm tug has tas, “Kuv yog Yexus Khetos paab.”

¹³Mej muab Yexus Khetos faib ua ob peb tug los? Paulus yog tug kws tuag sau ntoo khaublig theej mej lub txhoj los? Lossis mej tuav Paulus lub npe muab tuabneeg ua kevcai raus dlej los?

¹⁴Kuv ua Vaajtswv tsaug kws kuv tsi tau muab mej leejtwg ua kevcai raus dlej, kuv tsuas yog muab Kixapus hab Nkayus ua kevcai raus dlej xwb.

¹⁵Yog le ntawd, yeej tsi muaj leejtwg tuav kuv lub npe muab mej ua kevcai raus dlej.

¹⁶(Kuv tub muab Xatefanas tsev tuabneeg ua kevcai raus dlej lawm hab; dlua le ntawd, kuv tsi ncu has tas sov kuv puas tau muab lwm tug ua kevcai raus dlej hab.)

¹⁷Rua qhov Yexus Khetos tsi tau khaiv kuv moog muab tuabneeg ua kevcai raus dlej, tabsis nwg khaiv kuv moog qha Txujmoo Zoo. Thaus kuv qha Txujmoo Zoo, kuv tsi tau qha lawv le tuabneeg lub tswvyim, nyob tsaam ua rua qhov kws Yexus Khetos tuag sau tug ntoo khaublig tsi muaj nqes lawm.

¹⁸Cov tuabneeg kws yuav raug kev puamtsuaj xaav has tas, qhov kws Yexus Khetos tuag sau tug ntoo khaublig tsi tseemceeb dlaabtsi rua puab le; tabsis peb cov kws tub tau txais txujkev cawm dlim lawm, peb paub has tas qhov ntawd yog Vaajtswv lub fwjchim ntaag.

¹⁹Vaajtswv txujlug has tas: “Kuv yuav rhuav cov tuabneeg ntse lub tswvyim, hab kuv yuav tsi quavntsej cov tub txawg tub ntse tej kev txawj ntse.”

²⁰Cov tuabneeg ntse nyob qhov twg? Cov tub txawg tub ntse nyob qhov twg? Cov tuabneeg kws txawj sis caav txug kev txawj ntse tam nuav nyob qhov twg? Vaajtswv tub ua rua tuabneeg nplajteb lub tswvyim ruag lawm.

²¹Rua qhov Vaajtswv yog tug muaj tswvyim, Vaajtswv pum has tas tuabneeg lub tswvyim paab tsi tau kuas tuabneeg paub Vaajtswv le, Vaajtswv pum zoo cawm cov tuabneeg kws ntseeg Vaajtswv txujlug kws peb qha kws tuabneeg suav has tas tsi tseemceeb dlaabtsi.

²²Cov tuabneeg Yudais xaav pum tej txujci tseemceeb puab txhaj ntseeg, hab cov tuabneeg Kilis tsuas ca sab rua tej kev txhawj ntse xwb.

²³Tabsis peb qha zaaj kws Yexus Khetos raug ntsa rua sau tug ntoo khaublig, zaaj ntawd ua rua cov Yudais chim hab ua rua lwm Tsaav Tuabneeg thuam has tas tsi tseemceeb;

²⁴tabsis cov tuabneeg kws Vaajtswv hu, tsi has cov Yudais lossis lwm Tsaav Tuabneeg puavleej paub has tas, Yexus Khetos yog Vaajtswv lub fwjchim hab yog Vaajtswv lub tswvyim.

²⁵Rua qhov Vaajtswv lub fwjchim kws tuabneeg xaav has tas ruag, tseem ntse dlua tuabneeg lub tswvyim, hab Vaajtswv tug zug kws tuabneeg xaav has tas tsi muaj zug, tseem muaj zug dlua tuabneeg tug zug.

²⁶Cov kwvtij, mej ua tuab zoo xaav thaus Vaajtswv hu mej lug ntseeg, mej yog tuabneeg zoo le caag: lawv le tuabneeg xaav, mej cov tsi muaj pistsawg leej txawj ntse, tsi muaj pistsawg leej muaj fwjchim, hab tsi muaj pistsawg leej ua num ua tswv.

²⁷Tabsis Vaajtswv xaiv yaam kws tuabneeg xaav has tas ruag kawg nkaus huv lub nplajteb nuav kuas cov tuabneeg txawj ntse txaajmuag; hab Vaajtswv xaiv yaam kws tuabneeg suav has tas tsi muaj zug huv lub nplajteb nuav kuas cov tuabneeg muaj zug poob ntsejmuag.

²⁸Vaajtswv xaiv tej kws tuabneeg thuam, saib tsi taug hab xaav has tas tsi tseemceeb, kuas tej kws tuabneeg xaav has tas tseemceeb puamtsuaj moog,

²⁹Vaajtswv ua le nuav kuas tsi muaj leejtwg yuav muaj cuabkaav khaav tau le.

³⁰Tabsis Vaajtswv coj mej lug nrug Yexus Khetos koom ib txujsa, Yexus Khetos yog lub tswvyim hab txujkev ncaaj nceeg kws Vaajtswv pub rua peb, peb txhaj tau lug ua Vaajtswv tsaav tuabneeg kws dlawbhuv kuas peb dlim peb lub txim,

³¹lawv le Vaajtswv txujlug has tas, “Tug kws yuav khaavtheeb, nwg tsuas khaav tau tej kws tug Tswv ua lawn xwb.”