Read Hmong Njua 1 Kauleethaus 11 Bible Online

1 Kauleethaus 11 - Hmong Njua bible

1 Kauleethaus 11

¹Mej xyum ua lawv le kuv tug yaam ntxwv, ib yaam le kuv xyum ua lawv le Yexus Khetos tug yaam ntxwv.

²Kuv qhuas mej, rua qhov mej ncu ntsoov kuv hab ua lawv le tej lug kws kuv tau qha mej lawm.

³Tabsis kuv xaav kuas mej totaub has tas Yexus Khetos yog txhua tug txivneej lub taubhau, tug quasyawg yog tug quaspuj lub taubhau, hab Vaajtswv yog Yexus Khetos lub taubhau.

⁴Tug txivneej kws ntoo phuam thov Vaajtswv lossis qha Vaajtswv txujlug, tug ntawd saib tsi taug Yexus Khetos.

⁵Tug quaspuj kws tsi ntoo phuam thov Vaajtswv lossis qha Vaajtswv txujlug, tug ntawd saib tsi taug nwg tug quasyawg. Nwg zoo ib yaam le tug quaspuj kws muab plaubhau chais taag lawm.

⁶Tug quaspuj kws tsi ntoo phuam, zoo dlua le muab nwg cov plaubhau txav. Tug quaspuj kws chais plaubhau lossis txav plaubhau nwg yuav poob ntsejmuag, yog le ntawd nwg yuavtsum ntoo phuam.

⁷Tsi taag txivneej yuav ntoo phuam, rua qhov txivneej yog Vaajtswv tug yaam ntxwv hab lub fwvxyeej. Tabsis quaspuj yog txivneej lub fwvxyeej;

⁸rua qhov Vaajtswv tsi tau tsim txivneej lug ntawm quaspuj, tabsis tsim quaspuj lug ntawm txivneej.

⁹Hab tsi tau tsim txivneej rua quaspuj, tabsis tsim quaspuj rua txivneej.

¹⁰Vim cov timtswv ceebtsheej naj nub saib suavdlawg, yog le ntawd tsimnyog tug quaspuj yuavtsum ntoo phuam, suavdlawg txhaj paub has tas nwg fwm nwg tug quasyawg.

¹¹Txawm le ntawd los peb cov kws ntseeg tug Tswv, tsi has txivneej lossis quaspuj, ib leeg yeej vaam ib leeg.

¹²Rua qhov Vaajtswv tsim quaspuj lug ntawm txivneej, txawm le ntawd los txhua tug txivneej yog quaspuj yug; hab ib puas tsaav yaam puavleej yog Vaajtswv tsim huv tuabsi.

¹³Mej sim ua tuab zoo xaav saib, thaus suavdlawg tuaj pehawm Vaajtswv, puas tsimnyog tug quaspuj kws tsi ntoo phuam thov Vaajtswv?

¹⁴Lawv le ibtxwm, mej yeej paub has tas, tug txivneej kws tseg plaubhau ntev, nwg yeej yuav poob ntsejmuag,

¹⁵tabsis tug quaspuj kws tseg plaubhau ntev nwg yuav tau ntsejmuag, rua qhov nwg cov plaubhau npug nwg lub taubhau ib yaam le nwg ntoo phuam.

¹⁶Tabsis yog leejtwg xaav caam txug zaaj nuav, kuv tsuas has tas peb hab cov ntseeg Vaajtswv kws nyob txhua qhov yeej muaj tuab txuj cai nuav xwb.

¹⁷Tej kws kuv yuav qha mej nuav, tsi yog kuv qhuas mej, rua qhov thaus mej tuaj saablaaj ua ke, tsi yog mej tuaj ua zoo, tabsis yog mej tuaj ua phem xwb.

¹⁸Thawj qhov kws muaj tuabneeg tuaj qha rua kuv yog has tas, thaus mej cov kws ntseeg tuaj sis sau ua ke, mej tawg ua paab ua pawg; zaaj nuav kuv xaav has tas yeej muaj tseeb le ntawd tag.

¹⁹(Ua le caag los mej yuavtsum tawg ua ob peb paab, kuas suavdlawg txhaj paub has tas paab twg yog paab kws ua zoo.)

²⁰Thaus mej tuaj saablaaj ua ke, tsi yog mej tuaj noj tug Tswv Rooj Mov.

²¹Rua qhov thaus txug sijhawm noj, mej nyag taug nyag fuas moog noj nyag le tsi tog lwm tug, yog le ntawd muaj qee leej tsi tau noj, tabsis muaj qee leej tub noj tsau haus qaug lawm.

²²Mej tsi muaj tsev nyob hab tsi muaj noj tsi muaj haus los? Lossis mej txhobtxwm ua saib tsi taug cov ntseeg Vaajtswv hab ua kuas cov tuabneeg pluag txaajmuag los? Mej xaav has tas kuv yuav has le caag rua mej? Kuv yuav qhuas mej nua los? Kuv yeej tsi qhuas mej hlo le.

²³Tej lug kws kuv tub qha rua mej lawm, yeej yog tug Tswv tej lug: mo kws luas ntxeev sab rua tug Tswv Yexus, nwg muab ib lub ncuav lug,

²⁴nwg ua Vaajtswv tsaug, nwg muab lub ncuav ntawd ndlais hab nwg has tas, “Lub ncuav nuav yog kuv lub cev kws kuv muab rua mej. Mej ua le nuav mej txhaj yuav ncu ntsoov kuv.”

²⁵Thaus noj mo taag nwg muab ib lub khob lug ua ib yaam nkaus le ntawd, hab nwg has tas, “Lub khob nuav yog Vaajtswv tej lug cog tseg tshab kws muaj kuv cov ntshaav ua lub cim nas rua. Thaus mej haus lub khob nuav, mej txhaj yuav ncu ntsoov kuv.”

²⁶Rua qhov txhua zag kws mej noj lub ncuav nuav hab haus lub khob nuav, yog mej qha tug Tswv txujkev tuag moog txug nub kws tug Tswv rov qaab lug.

²⁷Yog le ntawd, tug kws tsi fwm tug Tswv, nwg ca le noj tug Tswv lub ncuav lossis haus tug Tswv lub khob, tug ntawd muaj txim, vim nwg ua txhum tug Tswv lub cev hab tug Tswv cov ntshaav.

²⁸Yog le ntawd txhua tug yuavtsum ua tuab zoo xaav tsaiv, maam le noj lub ncuav hab haus lub khob.

²⁹Rua qhov tug kws noj lub ncuav nuav hab haus lub khob nuav, yog nwg tsi ua tuab zoo xaav txug tug Tswv lub cev, ces yog nwg rov ua rua nwg raug txim, vim qhov kws nwg noj hab haus ntawd.

³⁰Tub yog vim le ntawd mej cov txhaj muaj ntau leej muaj mob, hab muaj qee leej tuag lawm.

³¹Yog peb xub ua tuab zoo xaav thoob thoob ua ntej, Vaajtswv txhaj yuav tsi rau txim rua peb.

³²Tabsis thaus tug Tswv rau txim rua peb, tub yog nwg qhuab ntuag peb, kuas peb txhaj tsi nrug tuabneeg nplajteb raug txim.

³³Yog le ntawd cov kwvtij, thaus mej tuaj ua ke noj tug Tswv Rooj Mov, mej ib leeg yuavtsum tog ib leeg, suavdlawg maam le tuab txhij noj.

³⁴Yog leejtwg tshaib, nwg ca le noj mov tom tsev tsaiv maam le tuaj, yog mej ua le ntawd thaus mej tuaj saablaaj ua ke, Vaajtswv txhaj yuav tsi rau txim rua mej. Tshuav ob peb yaam kws kuv tsi tau teb mej, ca kuv tuaj tsaiv kuv maam le qha mej.