Read Hmong Njua 1 Kauleethaus 12 Bible Online

1 Kauleethaus 12 - Hmong Njua bible

1 Kauleethaus 12

¹Cov kwvtij, qhov kws mej sau ntawv tuaj rua kuv has tas Vaaj Ntsujplig tug dlawbhuv pub koob moov rua peb nyag muaj nyag tswvyim. Nwgnuav kuv xaav kuas mej paub tseeb txug tej koob moov ntawd.

²Mej tub paub lawm has tas thaus mej tseem tsi tau ntseeg, mej raug luas ntxag moog pe tej mlom kws tsi muaj sa.

³Kuv xaav kuas mej paub has tas, tug kws muaj Vaajtswv tug Ntsujplig nyob huv nwg lub sab, tug ntawd tsi foom Yexus ib zag le. Tsi muaj leejtwg yuav kaam leeg has tas, Yexus yog peb tug Tswv, tsuas yog tug kws muaj Vaajtswv tug Ntsujplig nyob huv nwg lub sab txhaj le kaam leeg xwb.

⁴Vaaj Ntsujplig pub koob moov rua peb nyag muaj nyag tswvyim, tabsis tej tswvyim ntawd puavleej yog tuab tug Vaaj Ntsujplig pub xwb.

⁵Peb nyag ua nyag ib teg num, tabsis peb suavdlawg ua rua tuab tug Tswv xwb.

⁶Vaajtswv pub txhua tug nyag muaj nyag tswvyim ua num, tabsis tej tswvyim ntawd puavleej yog Vaajtswv tuab leeg pub.

⁷Vaaj Ntsujplig pub nyag muaj nyag tswvyim kuas suavdlawg txhaj sis paab tau.

⁸Vaaj Ntsujplig pub rua ib tug muaj tswvyim txawj qhuab qha, hab nwg pub rua ib tug muaj tswvyim kawm txawj kawm ntse, tabsis puavleej yog tuab tug Vaaj Ntsujplig pub xwb.

⁹Tuab tug Vaaj Ntsujplig ntawd pub ib tug muaj kev ntseeg, hab pub ib tug muaj fwjchim khu tau mob zoo.

¹⁰Ib tug muaj fwjchim ua tau tej txujci tseemceeb, ib tug txawj qha Vaajtswv txujlug, ib tug txawj saib tej tswvyim kws yog Vaajtswv tug Ntsujplig le hab tej kws tsi yog. Ib tug txawj has tej lug txawv txawv, ib tug txawj txhais tej lug txawv txawv ntawd.

¹¹Tabsis txhua yaam nuav puavleej yog tuab tug Vaaj Ntsujplig pub xwb; nwg pub rua txhua tug nyag muaj nyag tswvyim lawv le nwg pum zoo pub.

¹²Yexus Khetos zoo le lub cev kws muaj teg muaj taw, muaj taubhau hab muaj sab muaj ntsws; txawm yog muaj ntau yaam los puavleej koom ua ib lub cev.

¹³Ib yaam nkaus le ntawd, tsi has cov Yudais lossis lwm Tsaav Tuabneeg, cov ua qhev lossis cov kws tsi ua qhev, peb suavdlawg puavleej koom tuab lub cev, peb ua kevcai raus dlej lug ntawm tuab tug Vaaj Ntsujplig, hab yog tuab tug Vaaj Ntsujplig ntawd nyob huv peb.

¹⁴Rua qhov lub cev tsi yog muaj ib yaam xwb, tabsis muaj teg muaj taw, muaj taubhau hab muaj sab muaj ntsws huv tuabsi.

¹⁵Yog kutaw has tas, “Kuv tsi yog teg, mas kuv tsi koom lub cev,” txawm yog kutaw yuav has le ntawd los nwg tseem koom rawv lub cev.

¹⁶Yog nploojntseg has tas, “Kuv tsi yog qhovmuag, mas kuv tsi koom lub cev,” txawm yog nploojntseg yuav has le ntawd los nwg yeej koom rawv lub cev hab.

¹⁷Yog lub cev muaj qhovmuag xwb, yuav ua le caag nov tau lug? hab yog lub cev tsuas muaj nploojntseg xwb, yuav ua le caag nov ntxhab?

¹⁸Tub yog vim le ntawd, Vaajtswv txhaj tsim kuas muaj teg muaj taw, muaj taubhau hab muaj sab muaj ntsws lug koom ua ib lub cev lawv le Vaajtswv pum zoo.

¹⁹Yog muaj tuab yaam xwb, yeej hu tsi tau has tas yog lub cev.

²⁰Tub yog vim le ntawd, lub cev txhaj muaj teg muaj taw, muaj taubhau hab muaj sab muaj ntsws.

²¹Yog le ntawd lub qhovmuag yuav has rua txhais teg has tas, “Kuv tsi yuav koj!” los yeej has tsi tau. Lossis lub taubhau yuav has rua txhais kutaw has tas, “Kuv tsi yuav koj!” los yeej has tsi tau ib yaam nkaus.

²²Peb lub cev muaj qee yaam tsi tshua tseemceeb, tabsis yog tsi muaj tej ntawd peb yeej tsi tsheej tuabneeg;

²³hab tej kws peb xaav has tas tsi tshua tseemceeb pistsawg, peb hajyam tu tej ntawd zoo dlua; peb lub cev tej yaam kws tsi zoo nkauj, peb hajyam tu kuas zoo nkauj,

²⁴yaam kws zoo lawm tsi taag yuav tu. Vaajtswv yog tug kws muab teg muab taw, muab taubhau hab muab sab muab ntsws lug puab ua ib lub cev kuas tej kws tsi tshua tseemceeb, txhaj tseemceeb.

²⁵Yog le ntawd, lub cev sis faib tsi tau, rua qhov txhua yaam ntawd ib yaam yeej paab ib yaam.

²⁶Yog lub cev muaj ib qho mob lawm, yeej yuav mob thoob plawg lub cev. Yog luas qhuas lub cev ib qho, taagnrho lub cev puavleej yuav tau ntsejmuag.

²⁷Mej suavdlawg puavleej yog Yexus Khetos lub cev, hab mej ib leeg yog ib yaam ntawm lub cev.

²⁸Vaajtswv tsaa peb nyag muaj nyag ib teg num nyob huv pawg ntseeg: thawj paab yog cov timthawj, paab ob yog cov cev Vaajtswv lug, hab paab peb yog cov xwbfwb kws cob qha; dlua le ntawd muaj ibtxha ua tau tej txujci tseemceeb, ibtxha tau lub fwjchim khu mob zoo, muaj ibtxha paab tau lwm tug, muaj ibtxha txawj qhuab ntuag lwm tug hab muaj ibtxha has tau lug txawv txawv.

²⁹Tsi yog txhua tug ua timthawj lossis ua tug cev Vaajtswv lug lossis ua xwbfwb cob qha. Tsi yog txhua tug tau lub fwjchim kws ua tau tej txujci tseemceeb,

³⁰lossis khu tau mob zoo lossis has tau lug txawv txawv lossis txawj txhais tau tej lug txawv txawv ntawd.

³¹Mej yuavtsum muab sab rau nrhav tej koob moov kws tseemceeb tshaaj plawg. Tabsis nwgnuav kuv yuav qha ib zaaj kws zoo tshaaj tej ntawd huv tuabsi rua mej.