Read Hmong Njua 1 Kauleethaus 13 Bible Online

1 Kauleethaus 13 - Hmong Njua bible

1 Kauleethaus 13

¹Txawm yog kuv has tau txhua tsaav tuabneeg tej lug hab has tau cov timtswv ceebtsheej tej lug los yog kuv tsi muaj kev hlub, ces tej lug kws kuv has tau ntawd zoo le tej suab tswb tooj tswb hlau kws nrov nrov xwb.

²Txawm yog kuv yuav muaj lub tswvyim txawj qhuab qha; muaj txhua yaam kev txawj ntse, hab totaub txhua yaam kws tsi muaj tuabneeg paub; hab txawm yog kuv muaj kev ntseeg has tau kuas tej roob txaav tau moog rua lwm qhov, tabsis yog kuv tsi muaj kev hlub, ces kuv yeej tsi muaj nqes dlaabtsi hlo le.

³Txawm yog kuv yuav muab txhua yaam kws kuv muaj pub rua lwm tug, hab muab kuv lub cev rua luas hlawv los yog kuv tsi muaj kev hlub, ces yeej tsi muaj nqes dlaabtsi hlo le.

⁴Tug kws muaj kev hlub, nwg ua tau sab ntev, nwg muaj lub sab dlawb sab zoo; nwg tsi khib, tsi khaavtheeb hab tsi muab hlub;

⁵tug kws muaj kev hlub, nwg tsi ua nruj ua tsiv, tsi cuamkhum, tsi chim sai; tsi cim ntsoov luas tej kev txhum rua nruab sab;

⁶tug kws muaj kev hlub, nwg tsi nyam kev phem kev qas, tabsis nwg nyam kev ncaaj kev nceeg.

⁷Tug kws muaj kev hlub, nwg nyaj taug txhua tsaav yaam, muab sab rau ntseeg, ca sab hab ua sab ntev moog le.

⁸Txujkev hlub yuav nyob moog ibtxhis, tabsis cov kws txawj qha Vaajtswv txujlug, puab tsuas qha ib ntus xwb, cov kws txawj has lug txawv txawv, puab yuav tsi has lawm, hab tej kev txawj ntse yuav pluj moog.

⁹Txawm yog peb kawm kev txawj ntse los peb tseem paub tsi txhij, hab txawm yog peb txawj qha Vaajtswv txujlug los peb tseem qha tsi tau zoo;

¹⁰tabsis thaus peb paub txhij txhua lawm, ces tej kws peb paub tsi txhij ntawd yeej yuav pluj moog.

¹¹Thaus kuv tseem yog mivnyuas yau, kuv has hab kuv xaav le mivnyuas yau; nwgnuav kuv hlub tav txiv lawm, kuv tsi ua le mivnyuas yau ua lawm.

¹²Rua qhov tej kws nwgnuav peb pum, zoo le tug dluab plooj plooj kws nyob huv dlaim tsom av xwb; tabsis muaj ib nub peb yuav pum tim ntsej tim muag. Nwgnuav kuv tseem paub tsi tau txhij; tabsis muaj ib nub kuv yuav paub txhij ib yaam le Vaajtswv paub kuv.

¹³Nwgnuav tseem muaj peb yaam kws yuav nyob moog ibtxhis: kev ntseeg, kev ca sab, hab kev hlub; tabsis kev hlub yog yaam kws tseemceeb dlua ndlais huv tuabsi.