Read Hmong Njua 1 Kauleethaus 15 Bible Online

1 Kauleethaus 15 - Hmong Njua bible

1 Kauleethaus 15

¹Cov kwvtij, kuv xaav kuas mej ncu ntsoov Txujmoo Zoo kws kuv tub qha rua mej hab mej tub ntseeg lawm, hab naj nub nua` los mej tseem ntseeg le qub.

²Yog mej cim ntsoov Txujmoo Zoo kws kuv qha rua mej lawm, mej yeej yuav dlim mej lub txim, ntshai yog mej tsua tsi ntseeg tag xwb.

³Tej lug kws Vaajtswv muab rua kuv qha mej ntawd, yog tej lug kws tseemceeb kawg le. Tej lug ntawd has le nuav tas: Yexus Khetos tau tuag theej peb suavdlawg lub txhoj, lawv le muaj lug sau ca rua huv Vaajtswv txujlug has tas,

⁴luas coj nwg moog log hab tom qaab ntawd peb nub Vaajtswv tsaa nwg sawv huv qhov tuag rov qaab lug, lawv le Vaajtswv txujlug sau tseg lawm;

⁵tub yog le ntawd nwg txhaj lug tshwm rua Petus pum hab tom qaab ntawd nwg lug tshwm rua kaum ob tug timthawj pum.

⁶Hab tom qaab ntawd nwg lug tshwm rua tsib puas tawm leej pum, puab cov ntawd coob leej tseem muaj sa nyob, tsuas yog qee leej txhaj tuag lawm xwb.

⁷Ces nwg tsua lug tshwm rua Yakaunpaus pum, hab tom qaab ntawd nwg lug rua cov timthawj suavdlawg pum.

⁸Thaus kawg nwg lug tshwm rua kuv pum, kuv zoo le tug mivnyuas kws yug thaus tseem tsi tau txug caij yug.

⁹Kuv yog tug kws muaj lub fwjchim nqeg dlua cov timthawj huv tuabsi, kuv tsi tsimnyog tau lub npe hu ua timthawj, rua qhov kuv tau tsimtxom cov ntseeg Vaajtswv lawm.

¹⁰Tabsis vim Vaajtswv txuj koob moov, kuv txhaj tau ua ib tug timthawj, hab txuj koob moov kws Vaajtswv pub rua kuv ntawd tsi yog txuj kws tsi muaj nqes, yeej muaj nqes heev. Kuv ua num khwv dlua cov timthawj huv tuabsi, tsi yog kuv siv kuv tug zug ua xwb, tabsis yog Vaajtswv pub koob moov rua kuv, kuv txhaj ua tau.

¹¹Txawm yog tej kws kuv qha lossis tej kws puab qha los peb puavleej qha ib yaam nkaus, hab tej ntawd yog tej kws mej tub ntseeg lawm.

¹²Peb tub qha rua mej lawm has tas, Vaajtswv tub tsaa Yexus Khetos sawv huv qhov tuag rov qaab lug lawm, ua le caag mej cov tseem muaj qee leej has tas cov tuabneeg kws tuag lawm yuav sawv tsi tau huv qhov tuag lug?

¹³Yog muaj le puab has ntawd tag, ces Vaajtswv kuj tsi tau tsaa Yexus Khetos sawv huv qhov tuag rov qaab lug;

¹⁴hab yog has tas Yexus Khetos tsi sawv huv qhov tuag rov qaab lug, ces tej kws peb qha yeej tsi muaj nqes dlaabtsi, hab tej kws mej ntseeg los yeej tsi muaj nqes ib yaam nkaus.

¹⁵Tsi taag le ntawd xwb, suavdlawg yuav pum has tas peb qha Vaajtswv txujlug tsi tseeb, rua qhov peb qha has tas Vaajtswv tub tsaa Yexus Khetos sawv huv qhov tuag rov qaab lug lawm, yog has tas cov tuabneeg kws tuag lawm tsi sawv huv qhov tuag rov qaab lug le puab has ntawd tag, ces Vaajtswv kuj tsi tau tsaa Yexus sawv huv qhov tuag lug.

¹⁶Rua qhov yog has tas cov tuabneeg kws tuag lawm tsi sawv huv qhov tuag rov qaab lug, ces Vaajtswv yeej tsi tau tsaa Yexus Khetos sawv huv qhov tuag rov qaab lug hab.

¹⁷Yog has tas Vaajtswv tsi tau tsaa Yexus Khetos sawv huv qhov tuag rov qaab lug, ces qhov kws mej ntseeg yeej tsi muaj nqes dlaabtsi le, mej tseem muaj txim le qub.

¹⁸Hab cov ntseeg Yexus Khetos kws tub tuag lawm, puab yuav ca le puamtsuaj moog le.

¹⁹Yog has tas, qhov kws peb ca sab rua Yexus Khetos, tsuas paab tau peb thaus peb tseem ua neej nyob nuav xwb, ces peb kuj yog cov kws txomnyem dlua tej tuabneeg kws nyob huv nplajteb nuav huv tuabsi.

²⁰Tabsis qhov tseemceeb yog le nuav: Vaajtswv tub tsaa Yexus Khetos sawv huv qhov tuag rov qaab lug lawm, Vaajtswv ua le ntawd kuas suavdlawg paub tseeb has tas, Vaajtswv yuav tsaa cov tuabneeg kws tuag lawm sawv rov qaab lug hab.

²¹Tub yog vim muaj ib tug ua txhum, suavdlawg txhaj raug kev pluj kev tuag, hab tub yog vim muaj ib tug sawv huv qhov tuag rov qaab lug, suavdlawg txhaj yuav sawv tau ib yaam le tug ntawd.

²²Txhua tug puavleej raug kev pluj kev tuag, rua qhov suavdlawg yog Adaas roj ntshaa, ib yaam nkaus le ntawd, txhua tug yuav sawv huv qhov tuag rov qaab lug, rua qhov suavdlawg nrug Yexus Khetos koom ib txujsa.

²³Tabsis txhua tug yuav sawv lawv le Vaajtswv teem tseg: Yexus Khetos yog tug kws xub sawv ua ntej; ces thaus txug lub sijhawm kws Yexus Khetos rov qaab lug, txhua tug kws ntseeg nwg maam le sawv.

²⁴Tom qaab kws yog lub sijhawm kawg; Yexus Khetos yuav muab txhua tug numtswv txu fwjchim tsi pub kaav teb kaav chaw, hab nwg yuav muab ib puas tsaav yaam kws muaj fwjchim cob rua Vaajtswv kws yog nwg Leej Txiv huv tuabsi.

²⁵Rua qhov Yexus Khetos yuav kaav moog txug thaus Vaajtswv muab txhua tug yeebncuab rua Yexus Khetos tsuj.

²⁶Txujkev tuag yog tug yeebncuab kws thaus kawg Vaajtswv yuav muab rhuav kuas puamtsuaj moog.

²⁷Vaajtswv txujlug has tas, “Vaajtswv muab ib puas tsaav yaam rua Yexus Khetos tsuj.” Lu lug kws has tas, “Ib puas tsaav yaam” ntawd tsi tau has txug Vaajtswv tug kws muab ib puas tsaav yaam rua Yexus Khetos tsuj.

²⁸Tabsis thaus kws Vaajtswv muab ib puas tsaav yaam rua Yexus Khetos kaav lawm, ces Yexus Khetos kws yog Leej Tub yuav ca Vaajtswv ua tug kaav nwg. Vaajtswv yuav muab ib puas tsaav yaam rua Yexus kaav; hab Vaajtswv yuav kaav taagnrho ib puas tsaav yaam ntawd huv tuabsi.

²⁹Yog tsi muaj le ntawd, cov tuabneeg kws ua kevcai raus dlej paab cov tuabneeg kws tuag lawm, puab xaav le caag puab txhaj ua le ntawd? Yog has tas cov tuabneeg kws tuag lawm sawv tsi tau rov qaab lug, ua le caag puab tseem ua kevcai raus dlej rua cov tuabneeg kws tuag lawm ua dlaabtsi hab?

³⁰Ua le caag peb tseem naj nub tiv quas qeeg kev txomnyem ua dlaabtsi?

³¹Cov kwvtij, kuv naj nub ntsib kev pluj kev tuag! Kuv zoo sab rua mej heev, tub yog peb suavdlawg nrug Yexus Khetos kws yog peb tug Tswv koom ib txujsa, qhov ntawd txhaj ua rua kuv qha tej nuav rua mej.

³²Yog kuv tawmtsaam tej “tsaj nyaum” huv lub nroog Efexus lawv le tuabneeg lub sab nyam, kuv yuav tau dlaabtsi? Yog has tas cov tuabneeg kws tuag lawm tsi sawv rov qaab lug, “Peb ca le noj hab haus, rua qhov pigkig peb yuav tuag.”

³³Tsi xob pub leejtwg ntxag tau mej. “Tug kws moog nrug tug kws ua phem nyob ua ke, nwg yeej yuav ua phem le tug ntawd.”

³⁴Mej ca le tso plhuav mej tej kev txhum tseg hab tig rov qaab lug ua tuabneeg zoo. Mej cov muaj qee leej tseem tsi tau paub Vaajtswv, kuv has le nuav kuas mej paub txaajmuag.

³⁵Tej zag yuav muaj tuabneeg nug has tas, “Cov tuabneeg kws tuag lawm yuav ua le caag sawv tau rov qaab lug? Thaus puab sawv rov qaab lug, puab yuav muaj lub cev zoo le caag?”

³⁶Ua le caag mej yuav ruag ua luaj le! Thaus mej muab lub noob qoob cog rua huv aav, yog lub noob ntawd tsi lwj yeej tuaj tsi taug kaug ib zag le.

³⁷Lub noob kws mej cog ntawd, txawm yog noob nplej lossis lwm yaam noob los xij, tsi yog mej muab hlo ib tsob moog cog, tabsis mej tsuas muab lub noob moog cog xwb,

³⁸Vaajtswv pub lub noob ntawd muaj nplooj muaj kaav lawv le nwg pum zoo; hab Vaajtswv pub txhua yaam noob nyag muaj nyag nplooj nyag kaav lawv le nyag yaam noob.

³⁹Txhua yaam nyag yeej muaj nyag ib yaam nqaj zoo tsi sis thooj; tuabneeg muaj dlua ib yaam nqaj, tej tsaj nyag muaj dlua nyag ib yaam nqaj, tsi has tej noog hab tej ntseg los nyag yeej muaj dlua nyag ib yaam nqaj.

⁴⁰Cov tuabneeg sau ntuj lub cev zoo tsi thooj cov tuabneeg huv nplajteb nuav lub cev; cov tuabneeg sau ntuj hab cov tuabneeg huv nplajteb lub cev nyag zoo nyag lawm ib yaam.

⁴¹Lub nub, lub hli, hab tej nubqub nyag ci txawv nyag lawm ib yaam; hab txawm yog tej nubqub los ib lub yeej ci tsi thooj ib lub hab.

⁴²Ib yaam nkaus le ntawd, lub cev kws luas muab log, yog lub cev kws txawj tuag; lub cev kws sawv huv qhov tuag rov qaab lug, yog lub cev kws tsi txawj tuag.

⁴³Lub cev kws luas muab log yeej tsi zoo nkauj hab tsi muaj zug, tabsis lub cev kws Vaajtswv tsaa sawv huv qhov tuag rov qaab lug, lub cev ntawd zoo nkauj hab muaj zug.

⁴⁴Lub cev kws luas muab log, yog lub kws muaj roj muaj ntshaav, tabsis thaus Vaajtswv tsaa sawv huv qhov tuag rov qaab lug lawm, tug ntawd muaj lub cev tshab. Yog tub muaj lub cev qub lawm yeej yuav muaj lub cev tshab.

⁴⁵Vaajtswv txujlug has tas, “Adaas yog thawj tug kws Vaajtswv tsim hab Vaajtswv rau sav rau paa kuas caj sa,” tabsis tug Adaas kws lug thaus kawg, yog tug kws pub tau txujsa rua tuabneeg.

⁴⁶Vaajtswv xub pub tuabneeg muaj lub cev kws muaj roj muaj ntshaav, tom qaab ntawd nwg maam le pub tuabneeg muaj lub cev tshab.

⁴⁷Thawj tug Adaas yog Vaajtswv muab aav puab; tabsis tug Adaas ob, yog lug sau ntuj ceebtsheej lug.

⁴⁸Tuabneeg nplajteb zoo ib yaam le tug kws Vaajtswv muab aav lug puab, tabsis tuabneeg qaum ntuj zoo ib yaam le tug kws lug sau ntuj lug.

⁴⁹Peb tub muaj tug yaam ntxwv zoo le tug kws Vaajtswv muab aav lug puab; yog le ntawd peb yeej yuav muaj tug yaam ntxwv zoo le tug kws lug sau ntuj lug hab.

⁵⁰Cov kwvtij, qhov kws kuv has ntawd yog le nuav: lub cev kws muaj roj muaj ntshaav yeej moog nyob tsi tau Vaajtswv lub tebchaws, hab tej kws txawj pluj txawj tuag yeej koom tsi tau tej kws tsi txawj pluj tsi txawj tuag le.

⁵¹Mej ca le ua tuab zoo noog, kuv yuav qha zaaj kws mej tsi tau nov dlua rua mej noog; peb txhua tug yuav tsi tuag huv tuabsi, tabsis thaus tshuab raaj tshuab xyu zag kawg, tuab ntsais muag xwb peb yuav hloov dlua lub cev tshab. Rua qhov thaus tshuab raaj tshuab xyu, cov kws tuag lawm yuav sawv huv qhov tuag rov qaab lug, hab peb suavdlawg yuav hloov dlua lub cev tshab kws tsi txawj tuag le lawm.

⁵²

⁵³Rua qhov lub cev kws txawj tuag yuav hloov ua lub kws tsi txawj tuag; lub cev kws txawj lwj yuav hloov ua lub kws tsi txawj lwj.

⁵⁴Yog le ntawd thaus lub cev kws txawj pluj txawj tuag hloov ua lub cev kws tsi txawj pluj tsi txawj tuag lawm, ces thaus ntawd yuav muaj tav lawv le Vaajtswv txujlug kws has tas, “Peb kovyeej txujkev tuag lawm!”

⁵⁵“Txujkev tuag, koj swb lawm lauj! Txujkev tuag, koj tej taug tsuag taag lawm lauj!”

⁵⁶Txujkev tuag muaj taug yuam tau tuabneeg rua qhov tuabneeg muaj txim; yog tsi muaj Vaajtswv txuj kevcai, txujkev txhum yeej yuav tsi muaj fwjchim yuam tuabneeg.

⁵⁷Tabsis peb ca le ua Vaajtswv tsaug, rua qhov Vaajtswv tub kuas Yexus Khetos kws yog peb tug Tswv paab peb kovyeej lawm.

⁵⁸Yog le ntawd cov kwvtij kws kuv hlub, mej yuavtsum muab sab rau ntseeg, tsi xob ua ywjfaab ywjfwj. Mej yuavtsum rau sab ntso ua tug Tswv teg num, rua qhov mej tub paub lawm has tas, tej num kws mej ua rua tug Tswv ntawd, puavleej muaj nqes, tsi muaj ib yaam kws tsi muaj nqes le.