Read Hmong Njua 1 Kauleethaus 16 Bible Online

1 Kauleethaus 16 - Hmong Njua bible

1 Kauleethaus 16

¹Nwgnuav kuv yuav has txug tej nyaj kws mej sau xaa moog paab cov Yudas kws ntseeg Vaajtswv nraag lub nroog Yeluxalees. Mej yuavtsum ua ib yaam le tej kws kuv qha kuas cov ntseeg kws nyob huv lub xeev Kalatias ua.

²Txhua Nubkaaj mej yuavtsum muab tej nyaj kws mej khwv tau lug mivntsiv khaws ca. Tug kws tau ntau muab ntau, tug kws tau tsawg muab tsawg, yog mej ua le ntawd thaus kuv tuaj txug tsi taag yuav sau ntxiv lawm.

³Thaus kuv tuaj txug, kuv yuav khaiv cov tuabneeg kws mej tub xaiv tau lawm, xaa ntawv hab xaa cov nyaj ntawd moog rua nraag lub nroog Yeluxalees.

⁴Yog kuv xaav has tas tsimnyog kuv moog hab kuv yuav coj puab moog.

⁵Kuv yuav xub moog peg Makedaunias tsaiv, tom qaab ntawd kuv maam le tuaj saib mej, rua qhov kuv yuav tuaj peg Makedaunias tuaj.

⁶Tej zag kuv yuav tuaj nrug mej nyob ib ntus lossis yuav nyob kuas dlhau caij ntuj no los tsi paub, tom qaab ntawd yog kuv xaav moog qhov twg nyaj mej yuav paab xaa kuv moog.

⁷Kuv tsi xaav tuaj pum mej ib plag xwb; yog tug Tswv pum zoo, kuv yeej yuav tau nrug mej nyob ib ntus.

⁸Tabsis kuv yuav nyob huv lub nroog Efexus nuav moog txug nub kws suavdlawg ua Kevcai Peetekos taag tsaiv,

⁹Rua qhov nwgnuav Vaajtswv taabtom qheb qhovrooj rua kuv ua teg num tseemceeb hab muaj nqes heev, txawm le ntawd los tseem muaj ntau leej tawmtsaam kuv.

¹⁰Yog Timautes tuaj saib mej, mej ca le txaus sab tog txais nwg, rua qhov nwg ua tug Tswv teg num ib yaam le kuv ua hab.

¹¹Yog le ntawd, mej yuavtsum saib taug nwg, hab paab xaa nwg moog kaaj sab lug, mej ua le ntawd nwg txhaj yuav rov lug txug kuv; rua qhov kuv yeej tog ntsoov nwg hab cov kwvtij kws nrug nwg tuaj.

¹²Nwgnuav kuv has txug peb tug kwv Apaulaus. Kuv tub has kuas nwg nrug cov kwvtij tim nuav tuaj saib mej, tabsis nwg tseem tsi tau npaaj sab tuaj lub sijhawm nuav. Txawm yog le caag los thaus nwg khoom, nwg yeej yuav tuaj saib mej xwb.

¹³Mej yuavtsum ceevfaaj, muab sab rau ntseeg, ua sab tawv qhawv, hab cuab zug khov kho.

¹⁴Txhua yaam kws mej ua, mej yuavtsum sis hlub sis paab.

¹⁵Mej yeej paub Xatefanas hab nwg tsev tuabneeg zoo lawm; puab yog tsev tuabneeg kws xub lug ntseeg huv lub xeev Akhayas, hab puab zoo sab paab cov ntseeg Vaajtswv. Cov kwvtij, kuv thov ntuag mej,

¹⁶kuas mej noog cov tuabneeg ntawd hab lwm tug kws nrug puab ua num ua ke ntawd lug.

¹⁷Txawm yog kuv tsi pum mej los kuv yeej zoo sab, rua qhov Xatefanas, Fautunatus hab Akhayikus tub tuaj saib kuv lawm,

¹⁸hab puab ua rua kuv zoo sab ib yaam le puab ua rua mej zoo sab ntaag. Tsimnyog peb fwm cov tuabneeg kws zoo le ntawd.

¹⁹Cov ntseeg kws nyob huv lub xeev Axias, xaa lug noj qaab nyob zoo tuaj rua mej. Akilas obtug ob nam txiv hab cov ntseeg kws tuaj noog lug qhuab qha huv obtug tsev los has noj qaab nyob zoo rua mej hab.

²⁰Cov ntseeg kws nyob tim nuav los puab puavleej has noj qaab nyob zoo rua mej hab. Mej ib leeg has noj qaab nyob rua ib leeg hab ib leeg hlub ib leeg.

²¹Kuv yog Paulus, kuv yog tug sau tej lug noj qaab nyob zoo nuav tuaj rua mej ntaag.

²²Yog leejtwg tsi hlub tug Tswv, tug ntawd yuav raug foom tsi zoo. Malanathas, Peb tug Tswv, koj ca le lug!

²³Thov tug Tswv Yexus foom koob moov rua mej txhua tug.

²⁴Kuv hlub mej txhua tug, rua qhov peb puavleej ntseeg Yexus Khetos.