Read Hmong Njua 1 Kauleethaus 3 Bible Online

1 Kauleethaus 3 - Hmong Njua bible

1 Kauleethaus 3

¹Cov kwvtij, kuv tsi qha mej le kws kuv qha cov kws tub muaj Vaaj Ntsujplig kaav puab lub sab lawm; kuv qha mej ib yaam le mej tseem yog tuabneeg nplajteb, hab ib yaam le mej yog mivnyuas mog, rua qhov mej tsi tau paub Yexus Khetos tseeb.

²Kuv muab mig rua mej noj xwb, kuv tsi muab mov hab zaub rua mej noj, rua qhov mej tseem noj tsi tau taug zaub mov. Txawm yog nwgnuav los mej tseem noj tsi tau taug hab,

³Rua qhov mej tseem ua mej lub neej zoo le tuabneeg nplajteb ua. Yog mej tseem muaj kev sis khib hab ib leeg nrug ib leeg sis caav sis tshe, yog mej ua le ntawd yeej yog mej ua mej lub neej zoo le tuabneeg nplajteb ua, hab mej tseem yog tuabneeg nplajteb.

⁴Thaus mej cov muaj ib tug has tas, “Kuv yog Paulus paab”, hab muaj dlua lwm tug has tas, “Kuv yog Apaulaus paab”, tub yog mej ua lawv le tuabneeg nplajteb ua ntaag los sav!

⁵Apaulaus yog leejtwg? Paulus yog leejtwg? Wb tsuas yog Vaajtswv ob tug tubkhai kws coj mej lug ntseeg xwb, tug Tswv faib rua wb nyag muaj nyag ib teg num ua.

⁶Kuv yog tug cog, Apaulaus yog tug ywg dlej, tabsis tug ua kuas luj hlub yog Vaajtswv.

⁷Tug kws cog hab tug kws ywg dlej yeej tsi tseemceeb dlaabtsi, tabsis Vaajtswv yog tug kws tseemceeb, rua qhov nwg yog tug ua kuas luj hlub.

⁸Tug kws cog hab tug kws ywg dlej, obtug teg num zoo ib yaam nkaus; Vaajtswv yuav muab nqe zug rua obtug lawv le teg num kws obtug ua.

⁹Rua qhov wb yog Vaajtswv ob tug tubkhai, hab ua num ua ke; mej yog Vaajtswv thaaj teb. Hab mej yog Vaajtswv lub tsev.

¹⁰Vim txuj koob moov kws Vaajtswv pub rua kuv, kuv txhaj zoo le tug kws kws ua tsev, kuv txhus ncej hab nrum qhaab rua, lwm tug tuaj vuv hab tuaj xov rua. Tabsis txhua tug nyag yuavtsum ua tuab zoo ua nyag teg num.

¹¹Rua qhov yeej tsi muaj leejtwg yuav muaj cuabkaav tsaa tau dlua lwm lub tsev hloov lub kws Vaajtswv tub tsaa tau lawm, lub ntawd yog Yexus Khetos ntaag.

¹²Muaj qee leej yuav muab kub, muab nyaj, muab tej pobzeb muaj nqes, muab ntoo, muab nqeeb, hab muab quav nyab tuaj vuv hab tuaj xov lub tsev ntawd.

¹³Nub kws Yexus rov qaab lug, nwg yuav muab txhua tug teg num nthuav qha rua suavdlawg pum, Nub ntawd yuav tsi muab npog ca lawm, rua qhov Nub ntawd yuav muab suavtawg sim txhua tug teg num saib puas ruaj puas khov.

¹⁴Yog tej kws suavdlawg coj tuaj vuv lossis xov lub tsev ntawd, leejtwg le tsi kub nyab, tug ntawd txhaj tau nqe zug.

¹⁵Tabsis yog leejtwg teg num kub nyab lawm, nwg yuav tsi tau dlaabtsi; nwg yuav dlim, tabsis nwg tsuas dlim ib yaam le tug kws tsiv dlim huv suavtawg lug xwb.

¹⁶Mej yeej paub has tas mej lub cev yog Vaajtswv lub tuamtsev, hab Vaajtswv tug Ntsujplig nyob huv mej lub sab?

¹⁷Yog leejtwg rhuav Vaajtswv lub tuamtsev, Vaajtswv yuav rhuav tug ntawd kuas puamtsuaj hab. Rua qhov Vaajtswv lub tuamtsev yog lub kws dlawbhuv, hab mej yog Vaajtswv lub tuamtsev ntaag.

¹⁸Yug tsi xob rov dlaag yug. Yog mej leejtwg xaav has tas nwg yog tug txawj ntse, nwg yuavtsum ua le tug ruag, nwg txhaj yog tug ntse.

¹⁹Tej kws tuabneeg nplajteb suav has tas yog kev txawj ntse, tej ntawd Vaajtswv suav has tas yog kev ruag. Lawv le Vaajtswv txujlug has tas, “Vaajtswv muab cov tuabneeg txawj ntse lub tswvyim rov lug ua ntaa npuj cuab puab kev”;

²⁰hab Vaajtswv txujlug muaj dlua ib lus has tas, “Tug Tswv paub tej kws cov tuabneeg txawj ntse xaav, tej ntawd tsi tseemceeb dlaabtsi le.”

²¹Yog le ntawd, mej tsi xob khaav tej kws tuabneeg ua tau. Rua qhov txhua yaam puavleej yog mej tug,

²²tsi has Paulaus, Apaulaus, Petus, lub nplajteb, txujsa, kev tuag, tam nuav lossis tam tom ntej, tej nuav puavleej yog mej tug,

²³mej yog Yexus Khetos tug, hab Yexus Khetos yog Vaajtswv tug.