Read Hmong Njua 1 Kauleethaus 4 Bible Online

1 Kauleethaus 4 - Hmong Njua bible

1 Kauleethaus 4

¹Tsimnyog mej fwm has tas peb yog Yexus Khetos cov tubkhai, peb tuav Vaajtswv txujlug tseemceeb kws yaav taag lug tsi muaj leejtwg paub.

²Ib qho ntxiv, tug kws luas tsaa lug ua tubkhai, tug ntawd yuavtsum ncaaj nceeg rua nwg tug tswv.

³Tabsis tej kws mej lossis lwm tug txav txim rua kuv, kuv pum has tas tej ntawd tsi ua le caag rua kuv. Txawm yog kuv los kuv tsi txav txim rua kuv.

⁴Kuv lub sab qha rua kuv has tas kuv yeej tsi tau ua txhum, kuv has le ntawd tsi yog kuv has tas kuv tsi muaj txim. Tug Tswv yog tug kws yuav txav txim rua kuv.

⁵Yog le ntawd, thaus tseem tsi tau txug lub sijhawm kws Vaajtswv teem ca, mej tsi xob txav txim rua leejtwg. Tog txug Nub kws tug Tswv lug txav txim thaus kawg; nwg yuav muab tej kws tuabneeg ua nyob huv qhov tsaus ntuj lug nthuav rua ntawm qhov pum kev hab muab tej kws tuabneeg lub sab xaav nraim nkoog qha rua suavdlawg paub. Hab Vaajtswv yuav qhuas txhua tug kws tsimnyog Vaajtswv qhuas.

⁶Cov kwvtij, qhov kws kuv muab Apaulaus hab kuv zaaj coj lug pav rua mej, tub yog kuv xaav kuas mej xyum ua le wb tug yaam ntxwv, mej txhaj paub qhov kws has tas, “Tsi xob ua dlhau Vaajtswv txujlug.” Tsi tsimnyog mej qhuas tug nuav hab thuam tug tod.

⁷Leejtwg tsaa mej lub neej zoo dlua lwm tug lub? Txhua yaam kws mej muaj puavleej yog Vaajtswv pub rua mej los sav! Ua le caag mej tseem khaav has tas yog mej khwv tau?

⁸Mej tub muaj txhua yaam kws mej xaav tau lawm los? Mej tub npluanuj lawm los? Mej tub tau ua vaajntxwv lawm los, ua le caag peb tsua tsi tau ua vaajntxwv? Kuv xaav kuas mej tau ua vaajntxwv, peb txhaj tau nrug mej ua vaajntxwv hab.

⁹Kuv xaav has tas Vaajtswv muab peb cov kws yog timthawj tso tuaj tom tw, ib yaam le cov tuabneeg raug txim kws luas coj moog tua, rua qhov peb zoo le tug kws ua yeebyaam rua lub nplajteb nuav, rua cov timtswv, hab rua tuabneeg nplajteb saib.

¹⁰Tub yog vim peb ua Yexus Khetos teg num, suavdlawg txhaj has tas peb yog tuabneeg ruag, tabsis mej yog tuabneeg ntse, mej txhaj ntseeg Yexus Khetos. Peb qaug zug, tabsis mej muaj zug kawg le. Luas fwm mej, tabsis luas thuam peb kawg le.

¹¹Txawm yog naj nub nua los peb tseem tshaib nqhes kawg le; peb tsi muaj rig tsho zoo nrug luas naav; peb raug luas ntaus; peb tsi muaj tsev nrug luas nyob;

¹²peb ua num khwv heev, peb txhaj tau noj tau haus. Thaus luas foom tsi zoo rua peb, peb thov Vaajtswv foom koob moov rua luas; thaus luas tsimtxom peb, peb ua sab ntev nyaj;

¹³thaus luas thuam peb, peb ua tuab zoo has luas. Peb zoo le tej khoom lamsim kws tuabneeg nplajteb muab povtseg, peb zoo le tej yaam qas qas rua tuabneeg nplajteb lug txug naj nub nua.

¹⁴Kuv sau tsaab ntawv nuav tuaj rua mej tsi yog kuv xaav kuas mej txaajmuag, tabsis kuv sau tuaj ntuag mej ib yaam le kuv ntuag cov mivnyuas kws kuv hlub.

¹⁵Txawm yog mej yuav muaj kaum txheeb leej qha Yexus Khetos zaaj rua mej los mej tsuas muaj tuab leeg txiv xwb. Kuv yog mej txiv, rua qhov kuv coj Txujmoo Zoo tuaj qha rua mej hab coj mej lug ntseeg Yexus Khetos.

¹⁶Yog le ntawd, kuv thov mej ua mej lub neej lawv le kuv tug yaam ntxwv.

¹⁷Tub yog vim le nuav kuv txhaj khaiv Timautes tug kws kuv hlub, hab yog ib tug tub kws ua lub neej ncaaj nceeg rua tug Tswv tuaj qha mej, kuas mej ncu txug qhov kws kuv nrug Yexus Khetos koom ib txujsa hab tej kws kuv qha rua cov ntseeg kws nyob txhua qhov chaw.

¹⁸Mej cov muaj qee leej khaavtheeb, rua qhov mej xaav has tas kuv yuav tsi tuaj saib mej lawm.

¹⁹Yog tug Tswv pum zoo, tsi ntev nuav kuv yuav tuaj saib mej. Kuv xaav tuaj saib mej saib cov tuabneeg kws khaav khaav ntawd, puab tsua ua tau puab tej num zoo npaum le caag dlag.

²⁰Rua qhov Vaajtswv lub tebchaws tsi yog tuabneeg lub ncauj has xwb, tabsis yog teg num kws puab ua.

²¹Mej nyam le caag? Ca kuv nqaa nplawm tuaj lossis ca kuv tuaj hlub hab ua tuab zoo qha mej?