Read Hmong Njua 1 Kauleethaus 5 Bible Online

1 Kauleethaus 5 - Hmong Njua bible

1 Kauleethaus 5

¹Kuv nov xuv has tas mej cov muaj qee leej ua txhum kev nkauj kev nraug luj heev, txawm yog cov tsi ntseeg los puab tub tsi ua txhum luj npaum le ntawd; muaj tuabneeg tuaj qha rua kuv has tas muaj ib tug tub ca le yuav nwg nam tshab lug ua quaspuj.

²Mej tseem muaj plhus khaav hab los? Tub tsimnyog mej nyuaj sab, hab muab tug kws ua txhum ntawd rhu tawm huv mej cov moog.

³Txawm yog kuv nyob dleb mej los kuv lub sab nrug nraim mej nyob; yog kuv nrug mej nyob,

⁴ntshai kuv tub tuav peb tug Tswv Yexus lub npe rau txim rua tug kws ua txhum ntawd lawm. Thaus mej tuaj saablaaj ua ke, kuv lub sab yeej nrug mej hab peb tug Tswv Yexus lub fwjchim yeej nrug nraim peb,

⁵mej ca le muab tug ntawd cob rua dlaab Ntxwgnyoog ua kuas nwg lub cev puamtsuaj moog, yog mej ua le ntawd, thaus txug Nub kws tug Tswv lug, tug ntawd tug ntsujplig txhaj yuav dlim.

⁶Tsi tsimnyog mej yuav khaavtheeb hlo le! Mej tub paub lu lug kws has tas, “Ib qhov keeb miv miv xwb, ua rua lub ncuav su tuaj.”

⁷Mej yuavtsum muab tej keeb qub kws yog txujkev txhum tso povtseg, mej txhaj yuav ua tau tuabneeg dlawbhuv. Yog mej ua le ntawd, txhaj yuav zoo le lub ncuav tshab kws tsi xyaw keeb, kuv paub has tas tsi muaj keeb nyob huv mej lawm. Rua qhov Yexus Khetos kws yog tug mivnyuas yaaj kws luas muab tua ua kevcai Hlaa Dlhau, nwg tub tuag theej peb lub txhoj lawm.

⁸Yog le ntawd, peb ca le ua kevcai Hlaa Dlhau, peb tsi xob muab cov qub keeb kws yog kev txhum hab kev phem kev qas lug ua, tabsis muab cov ncuav tsi xyaw keeb kws yog txujkev ncaaj nceeg hab kev tseeb lug ua xwb.

⁹Kuv tub sau ntawv tuaj qha rua mej lawm has tas, mej tsi xob moog koom nrug cov tuabneeg kws nyam ua kev nkauj kev nraug hlo le.

¹⁰Qhov kws kuv has le ntawd, tsi yog kuv has txug tej tuabneeg nplajteb kws nyam ua kev nkauj kev nraug lossis cov tuabneeg kws ntshaw luas tug lossis cov tuabneeg kws ua tubsaab lossis cov tuabneeg kws pe mlom. Yog mej tsi nrug cov tuabneeg ntawd nyob, ces mej yuavtsum tawm huv lub nplajteb nuav moog.

¹¹Tabsis qhov kws kuv sau tsaab ntawv nuav tuaj rua mej, yog qha kuas mej tsi xob moog koom nrug tug tuabneeg kws nwg ua txuj has tas nwg yog tug ntseeg, tabsis nwg tseem nyam ua kev nkauj kev nraug, ntshaw luas tug, pe mlom, thuam lwm tug, quav cawv hab ua tubsaab. Txawm yog noj mov los mej tsi xob nrug tug tuabneeg kws zoo le ntawd koom tsum.

¹²Dlua le ntawd, kuv tsi yog tug kws yuav txav txim rua cov tuabneeg kws tsi ntseeg. Tabsis mej yog cov kws yuav txav txim rua cov ntseeg.

¹³Vaajtswv yog tug kws yuav txav txim rua cov kws tsi ntseeg. Rua qhov Vaajtswv txujlug has tas, “Ca le muab tug kws ua phem ntawd ntab tawm huv mej cov moog.”