Read Hmong Njua 1 Kauleethaus 6 Bible Online

1 Kauleethaus 6 - Hmong Njua bible

1 Kauleethaus 6

¹Thaus mej cov ntseeg ib leeg ua plaub rua ib leeg, mej tseem coj moog rua cov tsi ntseeg nrug mej has hab los? Tub tsimnyog mej ca rua cov ntseeg nrug mej has xwb los sav!

²Mej puas paub has tas cov ntseeg yuav ua cov txav txim rua tuabneeg nplajteb? Yog mej tub yuav txav txim rua tuabneeg nplajteb, mej txawm yuav tsi muaj cuabkaav has tej nyuas plaub miv miv nuav hab los?

³Mej tsi paub has tas, peb tub yog cov kws yuav txav txim rua cov timtswv nua los? Yog le ntawd, tsimnyog peb has tau tej nyuas plaub ntug kws naj nub muaj nuav hab!

⁴Thaus mej muaj plaub ntug, mej yuav coj moog rua cov tsi ntseeg has los?

⁵Kuv has le nuav kuas mej paub txaajmuag. Mej cov yeej muaj tug txawj ntse kws yuav has tau tej plaub ntug kws cov ntseeg ib leeg ua rua ib leeg,

⁶tabsis cov ntseeg ib leeg tseem kom ib leeg moog rua huv tsev tu plaub hab ca cov tsi ntseeg has.

⁷Qhov kws mej ib leeg kom ib leeg ntawd qha rua suavdlawg paub has tas, mej yeej tsi muab sab npuab Vaajtswv. Ua le caag mej tsi ua tug swb? Ua le caag mej tsi ca luas ntxo mej zoo dlua?

⁸Tabsis mej tsua tsi ua le ntawd, txawm yog mej yog tuab cov ntseeg xwb los mej ib leeg tseem ua phem rua ib leeg, hab ib leeg ntxo ib leeg.

⁹Mej tsi paub has tas, cov tuabneeg kws ua phem ua qas yuav tsi muaj feem moog nyob Vaajtswv lub Tebchaws nua los? Mej tsi xob rov dlaag mej; cov tuabneeg kws nyam ua kev nkauj kev nraug, pe mlom, ntxag luas quaspuj luas quasyawg, txivneej ntxag txivneej, quaspuj ntxag quaspuj,

¹⁰ua tubsaab, ntshaw luas tug, quav cawv, thuam lwm tug hab txhaav luas tug. Cov tuabneeg ntawd yuav tsi muaj feem moog nyob Vaajtswv lub Tebchaws le.

¹¹Yaav taag lug mej cov muaj qee leej ua ib yaam nkaus le ntawd, tabsis nwgnuav Yexus Khetos tub ntxuav mej lub txim hab muab mej pub rua Vaajtswv lawm. Peb tug Tswv Yexus Khetos hab Vaajtswv tug Ntsujplig tub coj mej lug nrug Vaajtswv sis raug zoo lawm.

¹²Muaj qee leej yuav has tas, “Kuv muaj cuabkaav ua tau txhua yaam tsi muaj leejtwg txwv kuv.” Tabsis tsi yog txhua yaam ntawd yuav muaj nqes rua koj huv tuabsi. Kuv los muaj cuabkaav has tas, “Kuv ua tau txhua yaam tsi muaj leejtwg txwv tau kuv, tabsis kuv yuav tsi ca tej kws kuv ua ntawd yuam tau kuv ua tej ntawd qhev.”

¹³Lwm tug tsua yuav has tas, “Zaub mov yog npaaj lug rua lub plaab, hab lub plaab yog npaaj lug ntim zaub mov.” Yeej yog le ntawd tag, tabsis Vaajtswv yuav ua kuas ob yaam ntawd puamtsuaj taag huv tuabsi. Tug Tswv tsi tsim lub cev ca ua kev nkauj kev nraug, tabsis yog tsim lug ca pehawm tug Tswv.

¹⁴Vaajtswv tub tsaa tug Tswv sawv huv qhov tuag rov qaab lug lawm, Vaajtswv lub fwjchim yuav tsaa peb txhua tug sawv huv qhov tuag rov qaab lug ib yaam nkaus hab.

¹⁵Mej yeej paub lawm has tas, mej lub cev yog Yexus Khetos tej teg taw. Kuv yuav muab Yexus Khetos tej teg taw moog ua namndlav tej teg taw tsi tau le.

¹⁶Mej tsi paub has tas tug tuabneeg kws moog ntxag namndlav, tug ntawd yeej nrug namndlav koom ua ib lub cev lawm nua los? Vaajtswv txujlug has tas, “Obtug yuav koom ua ib lub cev.”

¹⁷Tabsis tug kws nrug tug Tswv sis raug zoo, tug ntawd yeej nrug tug Tswv koom ib txujsa.

¹⁸Mej tsi xob ua kev nkauj kev nraug. Tej kev txhum kws tuabneeg naj nub ua, yeej tsi ua rua tuabneeg lub cev qas, tabsis tug kws ua kev nkauj kev nraug, tug ntawd ua rua nwg lub cev qas.

¹⁹Mej tsi paub has tas mej lub cev yog Vaaj Ntsujplig tug dlawbhuv kws Vaajtswv muab pub rua mej lub tuamtsev nua los? Nwg nyob huv mej lub sab, mej tsi yog tug tswv kws kaav mej lub cev, tabsis Vaajtswv yog tug tswv kws kaav mej lub cev;

²⁰Vaajtswv tub txhwv mej kim kawg le lug lawm. Yog le ntawd, mej yuavtsum ca mej lub cev ua rua Vaajtswv tau ntsejmuag.