Read Hmong Njua 1 Kauleethaus 7 Bible Online

1 Kauleethaus 7 - Hmong Njua bible

1 Kauleethaus 7

¹Tej lug kws mej sau ntawv tuaj nug kuv ntawd, nwgnuav kuv teb rua mej has tas: “Tug txivneej twg tsi yuav quaspuj los yeej zoo.”

²Tabsis vim muaj tuabneeg ua kev nkauj kev nraug ntau heev, yog le ntawd tsimnyog txhua tug txivneej nyag muaj nyag ib tug quaspuj, hab txhua tug quaspuj nyag muaj nyag ib tug quasyawg.

³Tug quasyawg yuavtsum tsi xob cais nwg tug quaspuj, hab tug quaspuj los tsi xob cais nwg tug quasyawg, obtug ib leeg yuavtsum txaus sab rua ib leeg.

⁴Tug quaspuj tsi muaj cai kaav nwg lub cev, tabsis tug quasyawg muaj cai kaav tug quaspuj; tug quasyawg los ib yaam nkaus le ntawd, nwg tsi muaj cai kaav nwg lub cev, tabsis tug quaspuj muaj cai kaav tug quasyawg.

⁵Meb ob nam txiv tsi xob sis cais chaw pw, yog meb yuav cais, meb yuavtsum sis has kuas hum tsaiv maam le cais mo puav txhaj muaj sijhawm thov Vaajtswv; tabsis tom qaab ntawd, meb yuavtsum rov lug pw ua ke. Yog meb tsi ua le ntawd, nyob tsaam meb tswj tsi tau meb lub sab, ces dlaab Ntxwgnyoog yuav ntxag tau meb ua txhum.

⁶Kuv has le nuav tsi yog kuv tsi pub mej sis yuav, kuv yeej pub mej sis yuav.

⁷Qhov tseemceeb, kuv xaav kuas mej ua lub neej ib yaam le kuv; tabsis Vaajtswv pub nyag muaj nyag sab, ib leeg nyam lawm ib yaam.

⁸Nwgnuav, kuv has rua mej cov kws tseem tsi tau sis yuav hab cov puj ntsuag has tas, yog mej nyob ib yaam le kuv tsi xob sis yuav ntshai yuav zoo dlua.

⁹Tabsis yog mej tswj tsi tau mej lub sab, mej ca le sis yuav, yog mej sis yuav kuj yuav zoo dlua qhov kws mej lub sab pheej ntshaw.

¹⁰Kuv has ib lus rua mej cov kws tub sis yuav lawm, tug quaspuj yuavtsum tsi xob tso nwg tug quasyawg tseg, tej lug nuav tsi yog kuv has, tabsis yog tug Tswv has;

¹¹yog nwg muab nwg tug quasyawg tso tseg, nwg tsi xob moog yuav dlua quasyawg tshab, tabsis yog nwg xaav yuav quasyawg, nwg ca le rov qaab lug yuav tug quasyawg qub xwb; hab tug quasyawg tsi xob muab nwg tug quaspuj nrauj.

¹²Kuv has dlua ib lus ntxiv rua lwm tug (lu lug nuav yog kuv has, tsi yog tug Tswv has): yog ib tug ntseeg twg nwg tug quaspuj tsi ntseeg, tabsis tug quaspuj ntawd zoo sab nrug tug quasyawg nyob, tug quasyawg tsi xob muab tug quaspuj ntawd nrauj.

¹³Hab ib tug quaspuj twg kws yog tug ntseeg yuav tug quasyawg kws tsi ntseeg, tabsis tug quasyawg kws tsi ntseeg zoo sab nrug tug quaspuj nyob, tug quaspuj tsi xob muab tug quasyawg ntawd nrauj.

¹⁴Yog tug quaspuj ntseeg Vaajtswv lawm, tug quasyawg yeej yog Vaajtswv tug hab. Yog tug quasyawg ntseeg Vaajtswv lawm, tug quaspuj yeej yog Vaajtswv tug ib yaam nkaus. Yog tsi yog le ntawd, obtug cov mivnyuas yeej yuav zoo ib yaam le cov tsi ntseeg tej mivnyuas, tabsis tsi yog le ntawd, obtug cov mivnyuas yeej yog Vaajtswv cov mivnyuas.

¹⁵Tabsis yog has tas tug kws tsi ntseeg xaav tso tug ntseeg tseg los tso tau. has txug qhov nuav, cov ntseeg, tsi has tug quasyawg lossis tug quaspuj muaj cai tso tseg tau rua qhov Vaajtswv yeej hu mej kuas lug nyob sis humxeeb.

¹⁶Tug quaspuj kws ntseeg, koj puas paub has tas, koj yuav coj tau koj tug quasyawg lug ntseeg. Lossis tug quasyawg kws ntseeg, sov koj puas paub has tas, koj yuav coj tau koj tug quaspuj lug ntseeg.

¹⁷Txhua tug nyag yuavtsum ua nyag lub neej lawv le tug Tswv tub pub rua nwg lawm, hab ua lawv le thaus Vaajtswv hu nwg lug. Kuv yeej qha txuj kevcai nuav rua txhua pawg ntseeg.

¹⁸Yog leejtwg ua kevcai txav ua ntej kws Vaajtswv hu nwg, nwg tsi xob rhuav qhov kws nwg ua kevcai txav ntawd; yog Vaajtswv hu tug kws tsi tau ua kevcai txav lug ntseeg, tsi taag nwg yuav ua kevcai txav lawm.

¹⁹Qhov kws tuabneeg ua kevcai txav hab tsi ua, yeej tsi tseemceeb; qhov tseemceeb yog qhov kws noog Vaajtswv lug.

²⁰Txhua tug nyag yuavtsum ua nyag lub neej lawv le thaus Vaajtswv hu nwg lug ntseeg.

²¹Thaus Vaajtswv hu koj lug ntseeg, koj tseem ua qhev los? Koj tsi xob nyuaj sab. Yog koj muaj kev tawm tau lug nyob ywjpheej, koj ca le tawm.

²²Tug kws tug Tswv hu thaus nwg tseem ua qhev, tug ntawd tug Tswv tub tso nwg dlim lawm; ib yaam nkaus le ntawd, tug kws tsi ua qhev thaus Yexus Khetos hu nwg lug, nwg yog Yexus Khetos tug qhev.

²³Vaajtswv tub txhwv mej kim kawg le lug lawm; yog le ntawd mej tsi xob ca tuabneeg ntxag tau mej moog ua qhev.

²⁴Cov kwvtij, mej yuavtsum nrug Vaajtswv sis raug zoo ib yaam le thaus kws Vaajtswv nyavnyuas hu mej lug ntseeg.

²⁵Nwgnuav, kuv yuav has txug cov tuabneeg kws tseem tsi tau sis yuav; tej lug kws kuv has nuav tug Tswv tsi tau kuas kuv has, tabsis kuv has lawv le kuv pum zoo. Kuv tej lug suavdlawg yeej ca sab tau, rua qhov suavdlawg yeej paub has tas tug Tswv foom koob moov rua kuv.

²⁶Rua qhov kuv pum has tas naj nub nua suavdlawg muaj kev ntxhuv sab heev, yog le ntawd kuv txhaj xaav has tas kuas txhua tug txivneej nyag nyob nyag le ntawd ntshai yuav zoo dlua.

²⁷Koj puas tau muaj quaspuj? Yog koj yuav lawm, tsi xob muab tso tseg. Yog koj tsi tau yuav quaspuj, koj tsi xob yuav.

²⁸Tabsis yog koj yuav quaspuj lawm los yeej tsi txhum; hab yog tug hluas nkauj kws tsi tau yuav quasyawg, nwg yuav quasyawg los yeej tsi txhum. Tabsis kuv tsi xaav kuas mej muaj kev nyuaj sab le cov kws tub sis yuav lawm naj nub nyuaj sab.

²⁹Cov kwvtij, qhov kws kuv has yog le nuav: vim peb lub sijhawm tub dlhau zuj zug lawm, txij nuav moog cov kws tub yuav quaspuj lawm, ca le ua ib yaam le cov kws tsi tau yuav;

³⁰cov kws quaj ntsuag, ca le ua le kws tsi muaj kev quaj ntsuag; cov kws muaj kev zoo sab, ca le ua le kws tsi muaj kev zoo sab; cov kws yuav tau qhov txhua chaw, ca le ua le kws tsi tau dlaabtsi;

³¹tug kws siv tej qhov txhua chaw kws nyob huv lub nplajteb nuav, nwg tsi xob suav has tas tej ntawd yog tej kws tseemceeb. rua qhov lub nplajteb nuav, taabtom pluj moog lawm.

³²Kuv tsi xaav ca mej muaj kev nyuaj sab. Tug kws tsi yuav quaspuj, nwg muab sab rau ua tug Tswv teg num, rua qhov nwg xaav ua lawv le tug Tswv lub sab nyam.

³³Tabsis tug kws muaj quaspuj lawm, nwg rau sab ntso khwv noj khwv haus huv lub nplajteb nuav, nwg ua le ntawd kuas nwg tug quaspuj zoo sab rua nwg;

³⁴yog le ntawd tug quasyawg txhaj muaj ob teg num. Tug quaspuj kws tsi tau yuav quasyawg lossis tug nkaujxwb, nwg muab sab rau ua tug Tswv teg num, vim nwg xaav muab nwg lub cev hab lub sab fij rua tug Tswv; tabsis tug quaspuj kws yuav quasyawg lawm, nwg rau sab ntso khwv noj khwv haus huv lub nplajteb nuav, rua qhov nwg xaav kuas nwg tug quasyawg zoo sab rua nwg.

³⁵Kuv has le nuav, tsi yog kuv txwv mej, tabsis yog kuv xaav paab mej. Kuv xaav kuas mej ua tej yaam kws tsimnyog ua, hab muab sab rau ua tug Tswv teg num tsi xob ua tuabneeg ywjfaab ywjfwj.

³⁶Yog tug tub hab tug ntxhais twg kws tub sis qhab lawm, tabsis tug tub tswj tsi tau nwg lub sab, hab xaav has tas obtug yuavtsum sis yuav xwb, ces obtug ca le sis yuav los tau. Qhov ntawd yeej tsi txhum le.

³⁷Tabsis yog nwg ua tau ib sab has tas, nwg yuav tsi yuav quaspuj ib simneej le, yog nwg tswj tau nwg lub sab hab ua tau lawv le nwg xaav, yog le ntawd nwg tsi yuav tug hluas nkauj los hajyam zoo.

³⁸Tug kws yuav tug ntxhais kws nwg qhab lawm, nwg ua tau zoo, tabsis tug kws tsi yuav quaspuj tseem hajyam ua tau zoo dlua hab.

³⁹Tug quaspuj kws muaj quasyawg, yog tug quasyawg tseem ua neej nyob nwg yuavtsum nrug tug quasyawg nyob moog le; tabsis yog nwg tug quasyawg tuag lawm, nwg yuav dlua quasyawg tshab los tau, tabsis yuav tug kws ntseeg Vaajtswv xwb.

⁴⁰Kuv xaav has tas yog nwg nyob taug le ntawd moog, yuav muaj kev kaaj sab dlua. Tej lug kws kuv has nuav, yog Vaajtswv tug Ntsujplig qha kuv has.